رواية وجهان العمله واحدة البارت التاسع

Prt " 9"

عـلـى الـسـريـر الأبيض دخلوهـ المستشفـى ووراهـ أبوهـ وأخوهـ ,, طلـعـه نواف من البرجه وهو فاقد الوعـي.. حاول يسوي لـه تنفس أصطناعي لكن بدون فايدهـ جاف نبضه كان شبه خفيف
شالوهـ على طول للمستشفـى وسط صياح نوره اللي كانت خاايييفــه وتررجف بصوره ملحوظــه ,,,, كله على بالهـا أنـها راح تفقد أخوهـا بسبب تهورهـا !!
.
.
ببيت بو نواف

بحظن أمها كانت تصيح وهي ترجف : والله ماقصدت يمه,,,,, بس هو أستفزني
أم نواف اللي خايفه على ولدهـا أكثر من خوف نوره عليـه حظنتهـا بحنان وهي تقول : ماعليه شر أن شالله .. ماعليه شر
نوره تبتعد عن حظن أمها وتقول بصوت مرتجف باكي : ماكان يرد على نوااااف ,, أبوووي حركه مااكان يتحرررك ..... يمه خااااايييييففففه عليييه .. لو يصير فيه شي بموووت
أم نواف ترجع تحظنهـا بقوه هالمره بخوف أكبر على هالطاري : لا أن شالله ,, لا تقوليـن جذي يمه ... شوي وبيرجع البيت لا تحاتيــن .. أبوج بيطمنا
نوره تصيح بطريقه أقوى : واللله العظيييم ماكان قصدي ,, نسيييت أنه مايعرف يسبح ....
أم نواف ماجاوبتهـا لأنها لو ردت عليها راح تزيد نوره بالصياح أكتفيت بأنهـا تطبطب عليها وتحاول تهديهـا بدون فايدهـ ...
.
.
.
.
شـافـت ساعـة يدهـا كانت تشير لـ 6 المغرب !!
من الصبح وهذي طلعتهـا .... ولصراحه ماتبي ترجع البيت .. بس مضطرهـ .... لأنـه ماعندهـا مكان تروحه أساساً
لفـت مجمعات الدوحه كلهـا وتوهـا طالعه من فيلاجيو ,,, ومن كل مجمع شررت أغراض شكثرر ......وأول ماأستقرت بالسياره متوجهه للبيت حست بالملل أجتاح المكان حولهـا من يديد
طلبت من محمود يمر هارديز ,, بتشتري وجبـة أطفال لخواتها .....
من زمان ماقعدت معاهم وأساساً ماتحب تقعد معاهم كلهم صغار واايييييييييد عليـهـا ,,
وسوالفهم بايخه بالنسبـه لـهـا ... وصلوا هارديز وخلـت محمود ينزل يشتري وجبات لخواتهـا بينما هي تمت بالسياره تسمع الأغنيـه اللي بالمسـجــل
لفـت راسـهـا لصوب الدريشـه جافت وااحد داش هـارديز وشايل بيـدهـ بنوته صغيره وبيدهـ اليميـن ماسك بـنـتـه الثانيــه اللي بايـنـه بملامحهـا الفرحه ,,,
آبتسمت لمنظرهم ... وتـنـهـدت على طفولتهـا ...!!!!
شـافـت واحد بالسـيـاره اللي أحذاهـا يطالعهـا ببتسامه ,, صدت عنه وهي تقول : ولييييييييه ,, نسيت أنـه المخفي خفيف وايد .... شهلـ بلشـه !
نزلت نظرهـا لجوالـهـا حطت لهـا على لـعبـه وقعدت تلـعـب بأنتظــار محمود يرجع ..... وهي تدندن مع المسـجل ,,
ماطول داخل شوي وطلع وبيدهـ أكيـاس ركب السياره وحطهم بالكرسي اللي أحذاهـ فوق الزحمـه اللي صايره " أغراض وضحى " ولما تأكد من أنهم ماراح يطيحون
حرك متـجـه للبـيــت ....
بينما وضحى ولا رفعت راسـهـا ماغير تلعب بأندماج ....
ماحسـت بروحهـا ألا والـسـيـاره تتوقف ببيتهم ... سكرت اللعبـه ونـزلت من الـسيـاره متجهه لداخل .. فتحت الـبـاب وهي تنادي على مايـا علشـان تشيل أغراضهـا اللي بالسياره وتوديهم جناحها
على صوت صراخهـا طلعت أمها ...
وضحى جافتهـا وقالت بقلبها " اللهم طولج ياروح .. ويهـا مايبشر بخير "
أم وضحى وهي رافعه واحد من حواجبها بأستنكار : شرفتي ؟
وضـحـى لمـايا اللي طلعت لها : روحي جيبي الأغراض اللي بالسياره ووديهم ماي روم
مايا هزت راسها بأيجاب وتحركت تنفذ الأوامر
وضحى طالعت أمها ببرود : هلا يمه ,,
جات بطوفهـا لكن صوت آمهـا وقفها : وأن شالله ويـن هـايتـه من صباح الله خيــر للحين ,, راشد كذا مرهـ جا سأل عنج ومالقاج .. ويقول أنه يتصل لج ولا ترديـن عليه !! ليش ؟
وضحى : أدري أنه راشد يتصل لي وحاارق تلفوني بس أنـا مب بمزااج لـه !!!!.. آما ويـن هايته من الصبح قلت لج طلعت أشم هـوى ؟؟.." بعد سكوت مادام " الا أنتي اللي شعندج قاعدهـ بالبيت اليوم وماطلعتي ؟؟؟ ولــه اليوم يوم أستثنائي .. علشان عيوني
أم وضحى طالعتهـا بغضب وتركت لهـا المكان وأبتعـدت عنهـا لحد ماأختفت عن عيـنـها
بينما وضحى تحركت خطاها وراحت فوق لجناحهـا فتحت الـبـاب لقـت فلافي بأستقبالهـا عند الباب شكله زهق بروحه وهي بنفسهـا ماتطلعه من الغرفـه كلش
فصخت شيلتهـا وحركت شعرهـا بخفـه ,, وراحت لباب غرفتهـا دشـت وسكرت الـبـاب وراهـا
فتحت أزرت عبايتهـا وأول مافصختهـا ألا جوالـهـا يرن للمرهـ المليون بنفس النغمة المميزهـ
وضحى زفررررررت بزهق
وراحت لجوالهـا وردت : خير راشد ؟؟ شتبي !!
راشد بغضب : أنتي وينج فيـه ؟؟؟
وضحى : موجودهـ !!
راشد : موجودهـ وماترديـن على أتصالاتي ومرتيـن جايج البيت وماألقاااج !!!! ويــن رحتي ؟
وضحى تحط يد على خصرها : أظن هذا مب شغلك ,,, وأتصالاتك أنـا صار لي تقريباً كم شهر ماأرد عليـهـا ..
راشد : شوفي وضحى ,, آنـا حاولت أجيبج بالطييب ماجيتي لا تخليني أستخدم معاج أسلوب ثاني
وضحى : أنت اللي شوف ,, هالرقم لا تتصل عليـه مرهـ ثـانيــه .... ولا تحدني أأروح لأهلي وأقول لهم عن البلوهـ اللي كنت ناوي تسويهـا ,,,,,, ترى لو دروا ... حتى شوفتي من بعيد ماراح يخلونك تشوفهـا !!
ماسمعت ردهـ شكله كان يحاول يسيطر على أعصابه ,, بعد ثانيـه سمعته يقول بصوت يجاهد علشان يبيـن هادي : شصـار على موضوع خطبتج ,,؟
وضحى : مايقدرون يجبروني على واحد ماأبيـه ,,,
راشد تنهد بأرتياح وكان بايـن هالشي لوضحى اللي قالت : بس لوو تقدم لي وااحد عـدل والأهم مو من طرف أمي .. راح أرضـى فيييـه ..
قدرت تحس من تسارع أنفاسه أنه يغلي من الغضب : وضـحى رجاءاً لا تستفزيني
وضحى ببرود أعصاب : ماأستفزيتك ..!!!... المهم تامرني بشي
راشد : ماخلصت كلامي ,,
وضحى : أشوفك سكت
راشد : لأنج ماتخليـن الواااحد يتكلم أساساً ..
وضحى بنفس البرود: ماقاطعتك !!
راشد بصرخه : لا تستخدميـن معاي هالأسلوب ,,,
وضحى عقدت ملامحها : لا تصاررخ أنت علي ,,,!! أنا مب هيـا بسكت لك .....؟! شوف اللي بيني وبينك أنت هدمته ولا تحاول تصلحه لأنه مايتصلللللح .. وبليز لا عاد تتصل
راشد بحده : والله لو تسكريـن الخط لا أقلب ليلج نهـار .....
وضحى غمضت عينهـا بقوه وقالت : نعم ؟ قول شعندك
راشد :اللي صار ذاك اليوم لو صج بغيت أنفذهـ جان نفذته حتى لو رفعتي بويهي ساطوورررر ...!!؟ مب سجينه بتمنعنـي ..!.. بس أنـا ماتماديــت ولا فكرت أتـمـادى ,, مسكت عمري وطللللعتت
وضحى : ماأبي أسمع مبررااات تافـها ....
راشد : آآنـا تافــه ....!!
وضحى : فسر كلامي على هوااااك ... اللي عندي سمعته .... وأذا ماعندك غير هالموضوع فرجاءاً أبي أسكرر
راشد سكت ورجع تكلم : وضحى آآنـا متضاايييق .. تعبان تعرفيـن يعني شنو تـعـبــان ... حتى عيالي ماقمت أقعد معاهم واايد ولا أسولف معاهم أو أشوفهم الا حزت الوجبات الرئيسيـه ..! مو بس أنتي متغيرهـ علي ,, حتى هـيـا ,,,,, ترى ماأقدر أستحمل كل هذا !!! تكفيين لا تصيريـن جذي ..." بصوت صـار هادي " 4 شهور وااييييييييييييد .. ورب الكعبـه قلبج حجرررر ماتحسييييين ..... أبي أعرف شلون قدرتي تصبريـن كل هالمدهـ عني وأأنتي قبل أسبوع ماتقدريــن !!!! آنـا حمار وحيوان وماأستحقق أكون أنـسـان لآني للحظه فكرت أعتدي عليج .... بس والله نـدمــت ,,!!! وهالفتره اللي قسيتي علي فيـهـا حسستيني بغلطتي ...... ! خلاص وضحى .. يرحم أمج سامحيني ... والله حياتي كلهـا منقلبه فوق تحت والسبــه آنتي .. تــراج ذليتيييني !
ماسمـع ردهـا ... لأنهـا من الصوب الثاني كانت عايشـه بصراااع
زفر بصوت مسموع وقال : مستحيل تكونيـن وضحى اللي عرفتهـا .. بغلطه وحدهـ بس تغيرتي 180 درجه علي .....
هـم ماسمع ردهـا ,,
راشد : ألو ! وضحى أنتي معاي !!!!
وضحى بصوت واطي جداً : آيـه ...
راشد : شقلتي !
سمـع صوتهـا المليان بكاء خفيف : آنـت ليش سويت جذي ,,,, عبالك أنـا قادرهـ أعيييش بدووونك !!!! طول هالفتره حااسه روحي وحييده محد معبرني ...... أذا أنت بدوني حياتك منقلبه آآنـا بدوونك عاايشـه بفرراااااااغ يذبح
والله حاولت أنسى وأسااامــحــك بس .. مااقدررررر .. تعرف شنو ماأقدر ... ماعدت أقدر أثق فيك من يديد ,, اللي سويته هززززني وهز ثقتي فيك .. ماعدت أقدر أطلع معاك بروحي ولا حتى أقعد معاك ,,, خايفه بأي لحظة تقوم تهجمممم علي ..." بصوت مليان ألم وحزن ودموع " صرت أخاااف مننننك ... أخااف منك وأحتاجك ... شلون ؟ آنـا نفسي ماأدري شلون !!!,,,, ولا تفكر تسألني لآنك ماراح تحصل جواااب عندي ...... راشد تكـفـى أطلع من حياااتـي يمكن أقدر أرتااح
راشد كان يسمع كلامها ويحس قلبه يعتصر : عبالج سهله أطلع من حياتج !!.. " يتنهد بصوت مسموع " زيـن لا تنسيــن ... تناسي وخلينا نفتح صفحه يديده وصدقيني ماراح تندميـن ,,
وضحى : أحنا مو مكتوب لنا نكون لبعض ولا نكون قراب من بعض بأي طريقـه ... كل شي حولنا يفرقنا !!!... أنت أخترت طريجك .. وآنـا طريجي راح أختـارهـ ,,,, تمسكنا ببعض ماراح يفـيد ... لآني لا أنـا أقـدر أرجع أثق فيك ولا حتى آآنت تقدر تسوي أي شي يرجع هالثقـه من يديد ,,,
راشد يتسند : طريجي ماأخترته برضاااي ... وآنتي تدريـن أنـه زواجي من هيـا كان علشان خاطر أهلي وبس !..
وضحى حست أنها لو تطول بالكلام راح تضعف وتسامحه قالت : راشد ,, توني راجعه من السوق ... وآبي أنـام لي شوي
راشد : يعني طرده ,,, زيــن أبي أشوفج .... صار لي فتره مالمحتج حتى
" دشت هـيـا الـغـرفـه "
وضحى : آآســفـه راشد ....
راشد : وقت مايحن قلبج تعرفيـن رقمي !
سـكــرت بدون ماتسمع باقي كلامه ,,
مسحت دموعها وهي تقول بحره : ليش ردت عليه !...
.
.

بالـمسـتـشـفـى

طـولوا وهم ينطرون الـرد نواف رايح وراح ومتوتر .. وبونـواف مايقل عن حال ولدهـ ,,,
رن جوال نـواف شاف المتـصـل ورد : ألـوو هلا .. بخير بخير .... هلأ ؟.. لا بس أنا بالمستشفـى ,,,, آيـه بالمستشفـى ,, جايب أخوي غـرق بالبرجه ...... لااااا والله مايحتاي أن شالله مـابيصير ألا كل خير .. لا تتعب عمرك ..... " بعد تردد " آوكي على راحتك .... آوكي فمان الله
سكر وحط جوالـه بمخبـاه ,,
بو نواف طالعه : من هذا ؟
نواف : زايييد ....
بو نواف أنغزه قلبـه من هالطـاري وأكيد مابين هالشي لولدهـ
مرت دقايق حسوهـا طوال لحد ماطلع لهم الدكتور وقال لهم ببتسامه : الحمدالله تـعـدى مرحلة الـخـطـر ,, مثل ماانتوا عارفيـن أستنشق وشرب ماااااي واييييد وفقد القدرهـ على التنفسس !!! وهالشي أدى ألى أغمـائـه .... حطيناه حالياً تحت الملاحظة علشان نتطمن على صحته أكثر ..... بس مافي شي يدعو للخوف أن شالله بالكثير باجر يرجع البيــت ,,
بو نواف ببتسامه عريضه : ربي يطمن قلبك مثل ماطمنت قلبي ....
الدكتور بنفس الأبتسامه : المفروض ماتسمحون لـه ينزل البرجه دامه مايعرف يسبح .. هالمرهـ الله ســتــر ... المرهـ اليايـه ماتدري شممكن يصير ,,
بو نواف : أن شالله يادكتور ,, نقدر نشوفـه صح ...
الدكتور : آيـه أكييد ... بس مااظنه راح يرد عليكم .. الولد نـايم
بو نواف : المهم أشوفـه ...
الدكتور : تقدر تدش ...
ترك لهم المكان وراح
بينما بو نواف دش على ولدهـ علشان يتطمن أكثر
أما نواف أتصل على البيت يطمنهم مايمديه يكمل الرنه الأولى ألا صوت أمه : ألوووو ,,
نواف : هلا يمه ,,,, الحمدالله ماعليـه شررر الدكتور يقول بالكثير باجر بيرخصونه
أم نواف زفرت بأرتيااح : الحمدددددددداللللله ....
وصل له صوت نوره اللي شكلهـا سحبت التلفون من آمها : نوااف شلونننه ؟؟ بخييير !!
نواف بنذاله : ولج وي تسأليـن شلوونه ,,, لو صار فيه شي محد بينلام غييرررج
نوره بحره وهي ترجع تصييح : آآدررري لا تذكريني ,,, طمنيي شلووونه ؟
نواف أبتسم على صياحها : الدكتور يقول هو بخير بس خلوا نوره بعيييد عنــه
نوره زادت بالصياح : يالخايس أنا قلبي محترررق وأنت تستخف دمك ,,,,, كلمكم غنووم ؟
نواف : مـادري ابوي دش عليـه توهـ ,, آآنـا أتصلت أطمنكم
نوره بسرعه قالت : بـنـجيــكم ,,,
نواف : ويـن تجـوون ,, ؟!! خلكم اللحيـن احنا راجعيــن ..
نوره : وتخلون غنووم بروحه ,,,؟
نواف : ترااه بغل شكبرهـ مب يـاهـل ,,,
سمع صوت آمه تقول : بنجيكم وبقعد عند غـآنم ,,,
نواف توهق فيهم : لا لا .. لا تجوون .. خلكم بالبيت .... الولد بخير لا تخربونه بهلـ دلال
أم نواف : وه فديت ولدي ,, ماراح أتطمن ألا لما أشوفه جدامي بخيررر .." بغصه " شكله وانت شايله مب راضي يفارق بـالـي
نواف تنهد : لا تذكريني بـ يوم شلته .... كـتوفي للحيـن تعورني مـن ثقله ..
أم نواف : أذكر الله ,,, قول لا الله الا الله .... أخوووك مب متيييـن علشااان تعورك كتوفك ... فديته معصقللللل وناااااشف .. بس أنت تحب تدلع
نواف : مب شررط يكون متين علشان يكون ثقيييييل ,, ولدج عليـه عظااامـه توزن ديـناصور
أم نواف عقدت ملامحها وقالت بحزم : لا اله الا الله ,, أذكر ربــــك ,,
نواف : مشالله ,, يلا بــآآي بدش أشوووووف دلوعج
أم نواف : أذا قام وكلمكم أتصل لي خلني أكلمه ... ترى لو تأخرتوا زوود بخلي الدريول يشغل السياره وجاينكم ....
نواف : آن شالله ,,, يلا فمان الله

سكر من عند أمه وراح عند أخوهـ .. دش الغرفـه شـاف أبوهـ قاعد أحذاهـ ويتأمل ملامحه بدقه
نواف بصوت واطي : شلونه ؟
بو نواف : بخير ,,,
نواف جا وقف من الصوب الثـانـي ,,, رجع شـعـر غانم اللي على ويهـا لورى وطبع بوسه على يبهته : حمدالله على سلامتك ياخوي !
بو نواف لـنـواف : طمنت أمك ؟
نواف : آيـه طمنتـهـا .. ونوره شايله البيت على راسهـا بصياحهـا ....
بو نواف يطالع غانم ويقول : مـادري شكانت تفكر فيـه حزتـهـا ,, !
نواف : الواحد لا عصب ماينتبه للي يسويـه ,, وعـاد غنووم ماخذ الدكتوراهـ بـحرق الأعـصــاب ,, وآنت أبخص بـ بنتك جبريييت ,,
بو نواف يطالع غانم : خرعني عليــه .... انـا قلت خلاص الولد راح من يدي ..
نواف ببتسامه وهو يطالع أخوه : ماعليك ,, ولدك ســبــع طالع علي ...
بو نواف مارد أكتفـى بأنه يطالع غانم بتأمل
شكله كان أينن وهو نـايم تحسون كل هـدوء الدنيا مرتسم بملامحه ,, رغم أنه طبعه غيييرر واللي مبين عليه اللحيـن غييير ...
.
.
.
كان بسيارته متجه للمستشفـى بعد ماعطى آمه خبر كالعاده
وهـو حاس روحه مستانس ... ليش أنـه خطتـه أبتـدت تاخذ مفعولـها وتمثيليـة أأمس راح تساعدهـ اليوم
وأذا راح لنواف الحيـن هالشي راح يخليـه يعتقد بأنه زايد ونعم الصديق وأنــه وقـت ماكان ضااايق وقف معاهـ وساندهـ .. مانـسـاهـ وتخـلـى عنه وعن معرفتـه وقت ماأحتاجه مثل غيييره !!
أو مثل ربـعـه القبليــن ,,,
زايد بأسلوب غامض : نقطتيـن لصالحي ضدك يافـايز ,,, والـجــااي أعـظم أن شالله ....
وصل المستشفـى وبعد ماطلعت روحه وهو يدور باركنج ....لـقـالـه واحد ..وكان اللي صاف سيارته بــه ناوي يطـلـع منـه ...

لمح لكزس واللي فيـهـا الظـاهـر ناوي ياخذ هالباركنج ,, لكن هيهات ياخذهـ دام زايد نيشـن عليــه
أول ماطلع صاحب السياره سيارته ,,, ألا بزايد جااي شاااخط من بعيييد وصفط سيارته ,,,,,, وآبتسم آبتسامه عريضــه بنصر !!
متأكد ألف بالميـه أنه راعي الـ لكزس قاعد يسببه بذمه وضميييررر اللحيـن... وودهـ يطشرررر دمـه برصاصــه ....
بند سيارته برواق ونزل منهـا وقفلهـا وراهـ
شاف راعي اللكزس يطالعهـ بنظرااات تحسونه ودهـ ينزل يكفر فييييــه ,,, نزل الدريشـه وهو يقول : يعني قلوا المواااقف !!
زايد يستغـبـى ويطالعه ببلاهه : تكلمني الشيخ ؟
راعي اللكزس وهو يحررك وشكلـه معصب ومتنرفز الله أعلم من شنو ,, : الله ياااااااااخذك ياشيخ ...
شخط بسيارته وهو مغبر بالدنيـا وراهـ ,,, و زايد أبرد من برود أعصابه مافيــه ....
مـشـى متـجـه لداخل المـسـتـشـفـى طلع جواله وأتصل على نواف رن شوي وجاله صوته : هلا نواف ,, أقولل ,,, وينكم فيـه !!... آنـا تحت ! أأييــه .... قلنالك مافيها كلافه ولا شي ... المهم ! شلونه أخووك ؟؟ ..... آوكيه اللحيـن جايك ...
حط جواله بمخبـاه وهو يقول : والله لو مب اللي ببالي ماأفتكرت فيك لا أنت ولا اخووك !!...
توجه بخطواته لعند الغرفه اللي يرقد بأحضانهـا غانم ,,,, ولمح من بعيييد فـايز قاعد على الكرسي ومتكتف ... ونوااف قاعد أحذاهـ
زايد أقترب منهم : السلام عليكم
بونواف ونواف : وعليكم السلام
سلم عليهم وبعدهـا قال : هاا ,, عساه بخير بس ؟
نواف : لا الحمدالله ... بخيرر,,
زايد بستفسار : كلمكم ؟؟
نواف : لا الولد بسابع نوومـه ,,,
زايد بتفهم : آها !.. زين متى بيرخصونه ...
نواف : أظـن باجر ... ماراح يطول هني ..
زايد ببتسامه : يصير أجوفه صح ؟
نواف فرح لطلب زايد قام وقف وقال : آكييد ,, آمش " يكلم أبوه " عن أذنك يبـه ..
بو نواف وهو يطالعهم بتفحص : أذنك معاك
دشوا الغرفـه وبو نواف يراقب زايد ورجع تذكر كل اللي سمـعـه منه آمس !!
.
.
.
شـافـتـه قام وأتجـه صوبهـا ,, وبسرعه رفـعـت اللحاف وأنسدحت ,, عطـتـه ظهرهـا وغمضـة عيـنـها على أنـهـا بتنام ... وهي بداخلهـا ميته قهررر
" كان يكلمهـا !!.. وماسوى لي أعتبار ولا أحسااااب !!؟.... أنـ....."
قطع حبل أفكارهـا القصير وايد .. يد راشد اللي أنحطت على كتفهـا : بتناميـن ؟
هيا بجديـه : شتشوف ,,
راشد : مب من عادتج تناميـن هالحزه ,,؟
هيا : تعـبـانه ,,!!!!
راشد هز راسه بتفهم ... ترك لهـا الغرفـه وطلــع وهو مسكر الباب بهدوء وراهـ .. حتى ماكلف عمرهـ يسألهـا شفيـهـا ..
وخلاهـا تـغـلي بالسرير وودهـا تصيح لكنها ماسكه عمرهـا ...
بينما برى عند راشد
راح يقعد مع عياله شوي ع الأقل يتناسـى وضحى وزعل هيا ...
شـافهم منسدحيـن أحذى بعضهم ع الأرض بالصاله ... جدامهم دفتر تلويـن وحوليهم ألوان متنثرهـ وقاعديـن يلونون
جوري بصفحــه ,, وعلي بالصفحه اللي أحذاهـا ...
راشد ببتسامه : الحلويـن شيسون ,,
جوري ترفع راسها ببرائه : نـلون ..
راشد جا وقعد متربع جدامهم : شتلونون ....
علي يرفع راسه ويشوف أبوه : ثوف " شوف" بابا ,, هذي ثيارتي " سيارتي "
راشد أتسعت أبتسامته للون السياره اللي كانت باللون الأحمر: تبيـهـا حمره ؟؟
علي بعد تفكير : كنت أبيـهـا ثـفـره " صفره " بس مافي لون أثفر " أصفر "
راشد : صفرررهـ عااااد ...! " يطالع بالألوان ويسحب لون أصفر " زيـن وهذا شنو ؟؟
علي طالع اللون بأستنكار وقال : لوء !! ثنو " شنو " ذي ؟؟؟؟؟ ماأبي وردي
راشد فتح عينه على كبرهـا : اللحيـن هذا وردي ؟؟.. عيل أي وااحد الأصفر ,,
علي يأشر على علبة ألوان أخته : هذاااك أأخر لووون ..
راشد شاافه وكان أسود ,, قال بعد ماضحك : أهاا عيل هذا الاصفرر اللي تبيــه ,,,!!
علي ببتسامه عريضه : أأيووهـ ,,,
راشد يحط يدهـ على راس ولدهـ ويبعثر تنظيم شعره بخفه : ياحليلك ... " يطالع جوري " والجورري شتلون ؟؟
جوري رفعت راسها بدلع وقالت : ألون عروسـه ...
راشد يطالع الرسمه اللي جدام بنتـه ويقول : هذي آنتي صح ؟؟
جوري ببتسامه : آيــوهـ ,, هوذي أونـا .... لما أكبر وأطول شوي ..
راشد طالعها بحب طبع بوسـه على خدهـا وخد أخوهـا وقام وقف : تجـون نتشمـى بالسـيـاره ,,,
فزوا أثنينهم
جوري بفرحه : صج بابا ,,,
راشد : آي صج ... " يمد يدهـ لهم " يلا أمشوا ..
علي طالع أخته بعدين قال : زيـن لحظـه ثوي " شوي "
راح يركض لصوب الدري ولحقته أخته ,,, وراشد لحقهم بنظرهـ بتسأل !!
ويــن راحوا ذولا ,,,

بينما ع الدري كانوا يتسابقون لحد ماوصلوا غرفـة أمهـم وأبوهـم فتحوا الباب وسيدهـ لسرير عند أمهم أهجموا عليها ...جوري تناقز أحذاهـا وعلي يسحب اللحاف اللي على ويهـا ,,,,
هـيـا تنسدح على ظهـرهـا بعد ماكانت منسدحه على جنبهـا اليميـن بسبب هالأعصار اللي أقتحم هدوء الغرفـه ,,: يوهـ ياماما ,,!!! آبي أنـآآم شوي ,, لما أقوم بلعب معاكم
جوري تناقز بخفه : قومي ماما تـعولي " تعالي " معانا .. بنـروح نتمشى
علي بحماس : آآيه ماما ..
هيا بستغراب : ومن بيمشيكم ..؟
علي : بابا
هيا أمتعضت من طاريـه قالت بحب وهي تخفي اللي بقلبها : لا ماما ,, روحوا أنتوا تمشوا .... آنـا بتم هني " تحاول تحمسهم " علشان أسوي لكم الكيكه اللي شفناهـا بالتلفزيـون
جوري : مووونبي ... لما نجي نشتري كيكه من محل الكاافي الكبير ذاك
هيا تلعب بشعر بنتها : لا حبيبتي ماأبي ,,, تعبانه ...
علي برجى : يلا عاااد ماما ,,, ترى بحاربج
هيا تطالعه وتقول بدلع : تحارب ماما ,,, !
علي يسحب اللحاف : عيل قومي ...
هيا تقوم تقعد بملل : لا يابابا مأأبي أطللع ,, روحوا مع ابووكم ....
وصلهـا صوت رجولي من عند باب الغرفه : زيـن علشان خاطرهم !! مب عشاني ,,
هيا طالعـت صوب باب الغرفه شافت راشد قالت بجديه لعيالها : يلا طلعوا ...
علي توه بيتكلم لكن هيا قاطعته بحزم : علي !! شقلنا احنا ... خلاص روحوا أنتوا وآنــا بقعد هني
راشد تقدم كم خطوه وقال : عيالج يبونج تطلعيـن معانا ,, مالـه داعي اللي بيـنـا يجي براسهم ... تدريـن أنهم ماراح يستانسون بدونج ..
هيا : راشد رجاءاً ,, آنا أعرف شلون أتعامل معاهم
راشد : أنتي اللي رجاءاً قومي بدلي ونزلي ننطرررج ,,, لا تكسريـن بخاطرهم ..." يكلم عياله " يلا تعالوا خلوا ماما تبدل ....
راحوا علي وجوري صوب أبوهم مسك يدهم وطلع من الغرفـه بدون ماينطر يسمع جواب هـيــا المنقهره منه ,,,
كانت بتعاند وترجع تنام وتطقع له ,, لكن صوت عيالهـا وهم يترجعونهـا للحيـن يرن بأذنهـا ,,
أزاحت للحاف قامت بدلت ولبست عباتهـا وطلـعـت لهم .... وآكيد قعدت جداام .. جوري بحظنـهـا وعـلي بحـظـن أبوهـ ,,
.
.

حاولت تلـهـي عمرهـا بالأغراض اللي شرتهم ... قعدت تقايس الثـيــاب وكل بدله تلبس معاهـا أكسسواراتهـا والـنـعـال " الله يعزكم " اللي تناسبـهـا
لحد ماملـت .. بـدلـت ولبس لهـا بجامـه ... جمعت كل أغراضهـا وحطتهم بالكـبت على أنهـا بتقايس الباقيـن لما تتفرغ ,,,
دورت بعيونهـا على فلافي لقــتـه عند الدريشـه يلـعـب بطرف الستاره من تحت ,,, شالته وهي تداعبـه بحب .. ونــزلـت تـحــت ....
كالـعـاده أذا ماوصل صوت الأازعاج لطابق الثاني فأكيد البيت خالي من آمهـا وربع أمهـا ..
فتحت باب الصاله وطلعـت ,, حطت فلافي ع الأرض علشان يغير جو شوي ,, بالبدايـه تم واقف بمكانه بس بعدهـا تحررك ... راحت صوب الـنـافـورهـ اللي دووم كانت تعجبهـا وتحبها ,,
وقفـت قريبـه منهـا ,, كـانت كبييييرهـ ... قـعـدت تلعب بالـمــاي وكل شوي ترفـع عيـنـهـا تشوف فلافي ويـنـه .. خوفهـا يطلع من البيت ولا عاد تشوفـه
ساعتهـا من بيسليـهـا !
حسـت أنـهـا شافت صوره راشد بالـمــاي .. غمضت عينهـا ورجعت فتحتهـا .. مالقت شي ....
تـنـهـدت وهي تتسند على النـافوره وتتكتف فـاتحـه المجـال لنسمات الهوى تداعبها وتداعب ويـهـا
" ماأظن أني راح أقـدر أصبر أكثر من جذي ... , مشتاقـه لــه موت .. وهو بعد .... لو أبوي يوافق عليـه ويخليــه ياخذني جان أحنا بخير ,, ( بتفكير بسيط ) وهـيا ؟؟ هي شذنبهـا أذا راشد خذاني عليـهـا ,,, آنـا متأكده أنـهـا تحبـه ,, وتموت فيـه بعد .. بس هو يحبني آنـا وآآنا بعد أحبـه ..وهالشي مو بيدي ولا هو بيـد راشد ...( ترخي راسهـا لورى شوي )... لو مب الحركه اللي سواهـ ذاك اليوم .. جان ماعشت هالأربع شهور وكأنهـا أربع قرون .. ولا حسـت بملل وفراااغ اللي حاسـه فيـهم اللحيــن .. المشكله محد حاول يمليــه ونوره مب على طول حولي ... وماعندي آآم مثل العالم تقعد معاي وأشاركهـا همومي .... كل اللي هامهـا الناس وكلام النـاس .. ,,, ( تنهدت ) آآه ياراشد ! ...... حاسه روحي قربت أضـعــف وأسامحك .. ماتدري شكثر عايشششـه بصراع بيني وبيـن نفسي .. أسامحك ولــه أسمع كلام نوره وآكمل اللي أبتـديـت فييـه .......! بس نوره مب حااسـه فيني وماتدري شكثر أنـا متضايقه من وضعـي ... قالت لي آنسـاهـ بس ماعلمتني شلووون ,,,, حياتي بدونه ماتسـوى .. واللحيـن بس تأكدت من هالشي ..( بعد تفكير شبـه طويل ) بعطيـه فرصه !!!! هو ياما سامحني وراح أسامحه ... خلاص ماأقدر أأكممممل تظاهـر بالقوهـ .."
حسـت بفلافي لازق بريولهـا شكله ماأعتاد على هالمكان الغررريب لأنه عالمه منحصر بجناح وضحى وبس
شالتـه وأتجـهـت لداخل البيـت .. وصـلـت جناحهـا وأتجهت لغرفتهـا بعد ماتركت فلافي بصالتهـا ...
خذت جوالهـا ناوي تتصل على راشد ... لكـن شي منـعـهـا .. قعدت على طرف سريرهـا وقررت تطرش مســج
بس شتكتب فيـه ؟؟
بيـت شـعـر !!
ولـه تقول لـه أنـهـا سامحـتــه ,,!!!!
آو ,,,؟
ردت جوالهـا مكانه وهي تقول : باجر يصير خير ...
.
.

بالـمسـتشـفـى

تـفـرقوا عند السـيـاير بعد ماأصر زايد أنه يجيهم باجر الـصبح بما أنه غانم راح يرخصونـه بالليل ,,
ركب سيارته وحرك .. وهو حاس روحه منتصر بمعركه يديدهـ بـ الحرب الهاديـه اللي بيـنـه وبيـن فايز !!
نـظـرات فايز للحيـن راسخه بباله ... كان يحاول يتصيد أي شي يــثبت أنه زايد متقرب منه علشــآن هــدف معيـن ... لـكـنه ماعطـاهـ فرصــه
وصل الـبيــت و صف سيارته برواق ,, ونزل منـهـا .. دش البيـت وشـم ريـحـة الـبـخــور حاشره المـكــان ...
زايد أستغرب !؟
رفع واحد من حواجبـه وهو ينادي على آمـه ...
اللي طلـعـت من المطـبـخ وأول ماشافته يـببـت بصوت عالي مسموع وبفرحه عاليــه
زايد أبتسم لا شعورياً على هالأستقبال
أم زايد قربت صوبـه وباسـتـه على خدهـ اليميـن واليسـار وطبعـت بوسـه على يبـهـته بعد وهي تقول : ألف ألف مبرووووك ياولـدي ... والله الفرحه مب سايعتني
زايد اللي مازال مب فاهم السالفـه وسبب هالفرحه الكبيره هذي والأستقبال الحاامي : دوووم هالفرحه بس على شنو ؟
أم زايد : آمـنـه واافقــت ...
زايد تلاشت أبتسامته على هالطاري !!
وافقـت ؟؟؟؟؟؟؟؟؟؟؟؟؟؟؟؟؟؟؟
أم زايد أستغربت من أبتسامته اللي أختفت تدريجياً : هو ؟؟؟ شفيك مب مستانس ؟؟؟
زايد رجع أبتسم من يديد وقال يجاريها : بلا مستاااننسس ... ومستانس واايييد بعد آفا عليج !
أم زايد بنفس الفرحه : مبروك يايبـه ..صدقني مابتلاقي أحسـن من آمنه زوجه لك ..... عقبال مااشوف عيالكم وأصيير يــده .." أمتلت عيونهـا بالدموع " ويملون علي البيـت وأشوف ولدك يراكض هني وبـنـتك هنـاك وآنـا ماغير مبتلشـه فيهم .....
زايد ماينكر أنـه تضايق لما درى أنه آمنه وافقـت لكن الدموع اللي تجمعـت بعيون آمه خلـتـه يرضـى بهلـ زواج ... من زمان ماشافهـا مستانسـه جذي ...
مسك يدها وباسها بحب وهو يقول : آميين ... الله يسمع منج ..
أم زايد بحماس : مسويـه حلو ,, بتاكل أصابعك وراهـ ...
زايد وهو يتبع آمه للمطبخ : أنتي أكلج بكبرهـ يخليني أكل يدي بكبرهـا مب أصابعي بس
أم زايد : وفديتك والله ...." بنغزه " اللحيـن أكلي يعجبك باجر لا صارت آمنه مرتك ,, بتنسى أكلي
زايد بجديه : يمه ! لا تقوليـن جذي .. ترى هاا أهوون وألغي سالفـة الزواج من بالي ,,
أم زايد تضحك : مب بكيفك ..." تفتح الثلاجه وتأشر لزايد علشان يجوف الكيكه " توني حاطهـا ... خلهـا تبــرد وبـعـدهـا ناكلهـا آنـا وياك ... وبطرش لأم وليد وأم محمد بعد ..... أبي الكل يشاركوني فرحتي فيك
زايد هز راسـه وهو بالغصب يحاول يحتفظ بأبتسامته
تـوهـ بس أستوعب أنــه راح يتزووج !!... ولا وبيتزوج أمنــه
" كمللللللللللللللللت ! "
.
.
.
رغم الجو المتوتر بينهم ألا أنـه الطلعه مع عيالهم مسويـه لهم جو عجيييب ..
تمشى معاهم بالسـيـاره بس بدون ماينـزلون ألا آنـه الفرحه كانت غامره عياله اللي راحوا ورى وكـل واحد فيهم لزق بدريشـه
علي ع اليميـن وجوري ع اليسـار ويطالعون السياير برى ,,, وحاسيـن بمتعـه عجييبـه
وراشد مطول ع المسجل ومخليهم ينطربون ورى ويلهون شوي عـنـه وعن هـيـا
راشد لـهـيـا : بطوليـن بالزعل ,,؟
هـيـا كانت مبتسمه ومستانسـه لفرح عيالهـا اللي شايليـن الدنيا وراهـا لكن من كلمهـا أختفت أبتسامتهـا بالتدريج : ومن متى يهمك زعلي ؟؟
راشد يطالع الطريج جدامه ويقول بعد صمت قصير : آسـف ,,,
هيا : ياليت هالكلمـه تقدر تداوي جروحي اللي جاتني منك ,,
راشد طالعها ورجع طالع الطريج جدامه وقال وهو يحاول يتفاهم : آحـنـا مشكلتنا كلـهـا بوضحى .. ومليون مرهـ قايل لج لا تعتقديـن أني بقدر أأنـسـاهـا... وأنتي تدريـن ليش ..!! كل أهتمامج منصب بعيالج وآنـا هاملتني ... من جبتيهم وآنـا حاس روحي مركون على جنب ...حتى ماحسيتج تحاوليـن مجرد محاولـه أنج تخليني أتـنـاسـاهـا !!.. وأنتي عارفه أنـه وضحى بويهي كل شوي ,, ياأما ع التلفون أو ويه بـ ويـه .... وأذا كان ع الكلام الجارح اللي أقولـه لج كنت أبي أشوف تقدم منج بس لا حياه لمن تنادي !!!!,, مو من حقج تلوميني لو زاد تعلقي فيها آكثر من ماأنـا متعلق فيـهـا اللحيييـن .... لآنـه اللوم بالأول والأخير عليييج .. آنتي أهملتيني ووضحى أهتمت فيني !!
هـيـا طالعته بحده وقالت : اللحيـن طلعت أنا الغلطانه ؟؟؟... لو كان ودك أني أهتم فيك على قولتك .. كنت تقدر تساعدني بتربيـة عيالك والأهتمام فيهم علشان ألاقي وقت أفضى بـه لك .... راشد ! أنـا عندي توم !!! مب ياهل واحد ! علشان آول ماينام أتفرغ لك ... لما تنام جوري .. علي يقعد .. وأذا نام علي ... قامت جوورري وآآنـا ماأقدر أجابلك وأهمل عيالي !!!!.. لو أنك مارسـت دورك كأب عدل .... جان ماوصلنا لهلـ لحظة ... أنـت حاذف مسؤولياتك ورى ظهـرك ورايح تركض ورى بنت خالتك وتلبي رغباتهـا وطلباتهـا ..... صحيح تصرف علينا وتعطينا الفلوس اللي نحتاجهـا بس هذا مب كافي ,,, آحـنـا نبيك أنت .. مانبي شويـت ورق !!! مانبي وااحد معتبر البيت فنـدق ,,,,, يجي ينام ويطلع على اليهال وهو طالع ,,,,, " صـدت عـنـه بجفاف وهي تقول " أذا ودك تلوم آحد .. لوم نفسك قبل لا تلومني ....
مارد عليـهـا ... سـكـت وهي سكتت ...
لـحـد مارجعـوا البيـت .. نـزلت هـيـا وفتـحـت الـبــاب اللي ورى على عيالهـا اللي نــاموا ,,,
كان علي اللي وراهـا فشالتــه وهي تسكر الـبـاب ودشـت دااخل ,, ولحقهـا راشد بجوري اللي متكوره بيـن أحضانه ومتعلقه بمخبـى ثوبـه ...
حطوا كل واحد بسريرهـ ,,, وطلـعـت هـيـا متجهه لغرفتـها ..فصخت شيلتهـا وراحت تعلقهـا حست براشد دش الغرفـه لكنهـا ماعبرته ,, فصخـت عبايتهـا وعلقـتهـا ... ألتفتت الا براشد قريب منهـا ,,,
مسك يدهـا وباسـهـا براحة يدهـا وهو يقول وعيـنـه بعينهـا : خلينا نبدأ صفحه يديده ,,
تصادمت المشاعر بقلبهـا لما حس بقربـه منهـا ,, طول هالفتره كانت تبيـن أنهـا قويـه وماراح تضعف لأنه مايفكر يقترب منهـا أما اللحيـن وبهلـ لحظة ,,, حاسـه روحها بتضعـف خلاص
أستجمعت اللي بـقـى لهـا من قوه وصدت عنه بعد ماسحبت يدها برفق وقالت : صفحه يديده علشان تمليـهـا بأغلاطك
راشد يسند يدهـ على الطوفـه وأنحصرت هـيـا بهلـ مـكـان الضيق : أعتبريني سفييـه ,, جاااهل ,, ماأفتهم .... وأذا غلطت نوريني ..
هيا تحط عينها بعينه : ودي أسامحك بس ,,
راشد : بس شنو ؟؟
هيا : خوفي ترجع نفس قبل أول ماتتعدل علاقتك بوضـحـى ,,
راشد نزل نظره لتحت وطالعها بلمحة حزن بعينه : أذا السالفه على جذي ,, أبشرج ... وضحى طردتني من حياتهـا كلهـا !! وما أظن بترحب فيني من يديد
هيا ببتسامه ساخره : يعني لو ماطردتك من حياتهـا ,, ماكنت راح تعبرني ؟
راشد : هالشي صار لصالحج والمفروض تستغليـنـه عدل ...
هيا نزلت راسها لتحت تفكر بكلامه
راشد رفع ويهـا بسبابته : شقلتي ؟
هـيـا تطالع ويـهـا بتفحص وبـعـدها سكوت مب طويل ... قالت : بـنـشوف ياراشد ... ولو أنـي مب قادرهـ أصدق كلامك
راشد أبتسم لها : مع الأيام بتصدقيني ...
.
.
الـيـوم الـتـالي

نـور قوي أخترق عليـه رقادهـ ... وصوت آمــه أقتحم عالم أحلامه
فتح عينه ببطئ على ويهـا البشوش : صبـاح الورد يمه ,, يلا قوووم ,, وراك دوااام
زايد قام قعد بكسل وهو يتثاوب : كم الساعه اللحيـن ؟؟..
أم زايد : 6 ... قوم يلا لا تتأخرر ...
زايد قام قعد وهو يحك عينه بخمول : آن شالله
أم زايد ببتسامه عذبه : ولما ترجع ترتاح لك شوي .. وبعدهـا نروح وياخالك للمحكمه علشان تملج على أمنه
زايد أنصدم وفتح عينه على كبرهـا : نــعــم !! بهلـ سرعه ؟؟؟؟
أم زايد ببساطه : آي .. أملج عليهـا وبعد شهـر الـعـرس شرايك
زايد بغـى يوقف قلبه : يمه شدعوهـ ؟ تبيـن الفكه مني !!!
أم زايد ضحكت وهي تقول : علشاني أبي أشوفك معرس صرت أبي الفكه !
زايد : شدراني عنج ,,, اليوم أملج وبعد شهر العرس !! " بستخفاف " لا شهر واايييد شرايج بعد يوميـن العرس أحســن .. عشان تشوفيني معرس بأسرع وقت
أم زايد تدفعه بالخفيف من كتفه : ويا ويهـك ... " تقوم توقف " المهم .. دش أسبح وأكشخ وأنزل تريق ...
زايد : آنزين
طلعت أم زايد من الغرفـه وتركت زايد أفكار توديـه وأفكار تجيبــه
" ولييييه ! صج صج بلشـت عمرررري .... من قال لي أواافق من الأساس ع الخطبــه ... كنت أقدر أقول لـهـا آمنه مثل أختي وماأتخيلهـا زووجـه لي وأفك عمرررري !!!
المشكله لو قلت لـهـا اللحيـن بهدم فرحتـهـا .. من أمس وهي الدنيا مب سايعتهـا !!؟ ومابقـى حد ماقالت لــه زيـن ماتنشر بالـCNN !!,, شهلـ مصيـبه اللي دخلت عمري فيـهـا
أنـا ويهي وي زواج وخرابييييط .. بنفسه بالي مشغولي بشغلات ماودهـا تخلص ,,, ماأقول الا الله يسامحج ياآمنــه جانج خيبتي ظني .. كان عندي آمل أنج ترفضييييـن بحكم الأخووهـ !
بس الظاهـر كلام الوالدهـ صج ,, ماصدقت خطبتهـا وافقت على طوووول ..."
أزاح للحاف بقهر خفيف جدا وشال روحه ودش الحمام علشان يسبح ... وأول ماخلص طلــع من الحمام وهو شبـه رايق
خلـص لبـس وطـلـع من غرفته نازل الدري وهو مقرر يكلم أمه بطريقـة جديـه ... مستحيل عرسـه يكون بعد شـهـر .. بهلـ طريقـه بتحس آمنه أنه ميـت عليـهـا
بيخليـه عقب ثلاث شهور أو أربـع ولو صارت سنه ماراح يقول لا ,,! المهم مايتزوجهـا بهلـ سرعه
جاف أمه تصب الجاي بـ كوب ,,
باس راسهـأ وقعد أحذاهـا ع طاولـة الطعام وتكلم بدون مقدمات : يمه من صجج أتفقتي مع خالي آنه العرس الشهـر الياي ؟؟
آم زايد وهي تحط الدله وتمد لـه كوبه : لا .. بس ناويـه أقولـه..
زايد بجديه : يمه شدعوه ؟ مختررررررع ! .. شـهـر شوويــه ,, وبعديـن أأكييد في شغلات تخصكم يالحريم ماراح تقدر تخلصهـا بشـهـر ,,,
آم زايد تطالعه : زيـن شـهـريـن ,,؟
زايد ماأخذ ثانيه بالتفكير قال : ماأظن هالمده تكفي علشان أتعرف عليهـا عدل ...
أم زايد : وشله تعرف عليهـا ؟ يعني أنت ماتعرفـهـا !!
زايد : لا ماأعرفهـا ... ومن كبرت ولا عمري تكلمت معاهـا اللهم بس السلام عليكم وعليكم السلام ..!!! ماعرف عنهـا ولا شي .." بتوتر أخفاهـ ببراعه " وبعديـن يمكن مايكون في نصيب فنفترق وآحنا ع البر
حس ملامح أمه تغيرت شكلهـا تضايقت من أخر كلامه
زايد تدارك الوضع : مب أكيييد طبعاً ,, آنـا قلت يمكن ... وبعديـن أنتي تعرفيـنـهـا عدل وآآكيد مابتختاريـن لي ألا الزيـــن .." يغير الموضوع " ألا شنو الريوق
أم زايد أبتسمت على تصرفاته .. عبالهـا أنه مرتبك من الزواج ... ماتدري أنه مايبي يتزوج من الأسـاس .. ولو مب خاطرهـا جان مافكر يوافق ...

.
.

قايـمـة ع الـسـاعه 10 الـصـبح وهي حاسـه بـنـشـاط ماتدري من ويـن جا ,, قامت دشت الحمام " الله يعزكم " غسلت ويـهـا وأسنـانهـا وطلعت خذت لـهـا ثـيـاب تكشخ فيـهـم مثل كل يوم
دشـت سبـحـت وهي مسترخيـه لأخر درجه ,, وبعدهـا طلـعـت لبسـت هدومهـا ... شافت فلافي فاتح عيونه ويطالعهـا وهو بسـلـة نومه ...
وضحى وهي تطرش له بوسـه بالهوى : صباحو ..
راحت قـعـدت على طرف السرير جافت جوالهـا وهي تتمـنـى تلاقي أتصال من راشد علشان يكون عندهـا سبب تتصل لـه .. لكنهـا ماحصلت لا أتصال ولا شي ,,,
قررت تطرش مسج ... وهو آكيد لما يشوفـه يابيتصل أو بيطرش مسج من الونــاســه ...
كانت مستانسـه أنـهـا بتسمح لـه يرجع لحياتهـا من يديد
وخايفـه بنفس الوقت ..من أنـه اللي صـار قبل يتكرر ,,, لـكـن شي بداخلهـا يخليهـا تتنـاسى خوفهـا وتتجاهلهـ
هو أستسمح منهـا وأعتذر وصار لـه شهور وهو ذال عمرهـ ,,,
هذا عقاب كااافي يخليـه يفكر ألف مرهـ قبل لا يخطي هالخطوهـ من يديد...

" أقول انساگ وما أقدر
أظل بالحيل منكسرهـ
وكل مرهـ أقول أنساگ
أرد أهواگ من ثاني "

قـرت الـمسـج أكثر من مرهـ وترددت بأنهـا تطرشـه .... زادت عليـه بأخر المسـج كلمة " صباح الخير "
وبــعــد تردد وصراع ,,, ضغطت أرسـال ... وآبتسمت ..
جات ببالهـا نوره ,, لو تدري أنـهـا خالفـت كلامهـا ورجعت لراشد من يديد أحتمال تذبحهـا من الحرهـ ,,
بس شتسوي ,,, حاسـه روحها لو تتم جذي زيادهـ بتستخف ....
خذت الجوال معاهـا وطلعت من الغرفـه علشان تروح تتريق ... وعلشان لا طرش مسج ولـه أتصل ترد عليــه ,,
,
,
بيـنـمـا من الـصـوب الـثـاني كانت ترتب الغرفـه وهي حاسـه أنه الدنيا توهـا ضحكـت لـهـا ,, خاصـه مع تغير راشد معاهـا آمس ,,,
تحسـه رجع راشد اللي حبـتــه وأنغرمـت فيييـه ... دعت من كل قلبـهـا أنه ربي مايغير عليهم ويسـد عيـونـه عن وضـحــى
سـمـعت صوت جوالـه يعلن أستقبال مســج ... وكان هو بالحمام يسبــح ....
أتـجـهـت صـوب جوالـه بفضـول تبي تشوف المسج من مـنـه ... فـتـحـتـه وكان من " وضـحـى "
قرت المسج ومع كل كلمـة تحس روحهـا بتولـع !!!!!
" صج جليلة حيا وماتستحي على ويـهـااااا هذي... "
راحت صوب مســح ومسـحـت المـسـج ورجعـت الجوال لمكانـه وهي حاسـه روحهـا منقـهـرهـ منـهـا .....
عليـهـا قوات عيــن ماجافت مثلهـا ..... مب توهـا طلعـت راشد من حياتهـا ..
شعندهـا راجعه تطرش لـه مسجااات ,,,
ولـه وقت ماتمل منه تبعدهـ ووقت ماتبيـه تستردهـ ....
هيا بقلبـهـا : آنـا أعرف شلون أتعامل معاااها ,, ماراح أسمح لها تاخذ راشد مني من يديد ... خل تروح تدور لهـا ع وااحد ثاني
خلصـت ترتيب الغرفـه وطلعـت منهـا نازلـه للمطبخ تحت تجهز الفطور ....
وكلمات المسج للحيـن تتردد ببالهـا ,,,
أتجـهـت لطاولـة الطعام وحطت الأكــل من بعد ماجابته من المطبخ... شافت راشد ينزل من الدري ببتسامه مشرقه
والأكيد أنه مادرى بالمسج ,,, لآنـه لو طالع مبجر شوي من الحمام جان قرى المسج وطيراان رااح للي ماتتسـمــى قليلة الأصل ,,
راشد : صــبــآآح الـخــيــر
هـيـا تطالعه بأبتسامه : صباح الـنـور ,,
راشد يطالع الأكل : تسلم يدج ...
هـيـا زادت أبتسامتهـا رغم أنه الكلمه عاديـه ألا أنـهـا فرحتهـا : فيه العافيـه أن شالله .. بروح أنـادي عيالك ..
راشد وهو يـقـعـد : آوكي ...
راحت نادت عيالهـا للفطور ونزلوا مسرعييـن من فوق يتسابقون كالعاده ,,, وقعدوا ياكلون وشاركتهم هيا الأكل ...
هيا بتسائل : مب رايح الشغل ؟
راشد يشوف ساعة يده ويقول : لا ماأظـن ,, وبعديـن أنـه هالفتره ماقمت أروح الدوام واايد .... لولا الواسطه جان أنـا اللحيــن مطرود من زمـان ..
هيا : بس بعد حبيبي لآزم تهتم بدوامك .. مب كل مرهـ بيتغاضون عن تغيبك .....
راشد وهو ياكل : يصير خيـر ..
هيا بتسأل : تبي أصب لك شاي ؟
راشد : ياليت ..
هـيـا مسكت الدله وصبت لراشد ببتسامه حلوهـ ...

.
.
بيت بو نواف

بغرفـتـهـا كانت تطلع ثـيـاب وتدخل ثـيـاب ,, ومب عاجبهـا العجب ولا الصيام برجب .. لحد ماأستقرت على بنطلون جيـنز وبلوزهـ ناعمه ...وهي تقول : يييييــآآه !! يعني أنـا ويـن رايحه ألا المستشفــى ... مب لآزم أعور راسي جذي ..
لـبـسـت وتعـطــرت فتحـت شعرهـا الطويل وعجفتـه وربـطـتـه نـهـايتـه بربطـه تناسب لبسـهـا .. وجابـت عجفتهـا على كتفهـا اليســآر.. كان شكلهـا كيووت مع قذلتهـا الطويلـه ..
طلعـت من غرفتهـا ركض لغرفـة أمهأ طقـت الـبــاب وبعدهـا دشـت مالقـت حد ,, ماغير تسمع صوت الماي منبعث من الحمام ,,
راحت لباب الحمام " الله يعزكم " وطقت الباب وهي تصارخ : يمـــــــــه آآآتصللل لأبوي أقول لـه خلصـنا ....؟؟
ماجالهـا رد ..
رجعت صرخت من يديد بصوت أعلى : يمـــــــــــــــــــــــآآآآآآآآآآآآآآآآه
جالهـا صوت آمهـا الغاضب : ومصمــآآآآهـ ...!!!!؟؟ فاررررجي ,,! ماتشوفيني أسبح !!
نوره : أأكلللم أبوي ,,,؟؟
ماردت عليهـا
رجعت طقت الـباب : يمــههههههه ! آآكلمه ولـه لا ؟؟؟..." نطرت الأجابـه بلا فايده " بــكلمــه عييييل !
هم ماجالهـا رد ....
طلعت من غرفه آمهـأ وراحت لجوالـهـا ,, خذتـه وأتصلت على أبوهـا اللي واعدهم يجيهم ع الـوحدهـ علشان يوديهم لغـآنم بالمستشفـى رغم أنهم بيرخصونه فالليل بس أصرار نورهـ خلاهم غصب يودونـهـا لـه
البنت تبي تطمن على اخوهـا ,,, قلبهـا ذابحهـا من آمس ,,,
رن شوي وجالهـا صوت آبوهـا اللي باين أنه مشغول : هلا نورهـ ,,
نوره : يبـه خلصنـا تعــال يلا ,,,
بو نواف : كم الساعه ؟
نوره تتلفت حولهـا تدور ساعة وقالت بعد ماشافت الساعه المعلقه بغرفتهـا : 11 ألا ربــع ,,,
بو نواف : آنـا قايل لكم الـظـهـر ع الوحدهـ ,, وحدهـ ونص !! .. مب اللحيــن ..
نوره بدلع : يبـه أبي أأرووح لغنووووم .. نوافوه الخايس طلع من الصبح قبل لا أقوم وراح لـه ... حتى ماجا يقومني علشان أروح معاهـ ,,
بو نواف بجديه : يانواري أنـا مشغول اللحيـن ,,, عندي أشياء كثر شعر راسي لأزم أخلصهم ... ع الوحدهـ أن شالله بودج ,,, لا تخافيـن بتشوفيـنـه وتطمنيـن عليـه .. هو جذي جذاك جايج بالليل
نقزت نوره : لا لا ,, شينطرني ليـن فليل ,,, أبي أأشوفـه يبــه والله حرام عليكم .. ضميري معذبني مابرتاح ألا لما أشوفـه وأتفل بويهـا ياجزى الخرعه اللي سببهـا لي آآمس ,,, مع أنه هو الغلطان ليش يشقق دفتري ويخرب قمييصي والله ماعنـدي غيرهم لو تـدري وضـ.....
قاطعهـا بو نواف : نورهـ آنـا مشغوووول ! يلا بـآي لا رجعت يصير خير كملي لي قصـة حياتج
نوره تمد بوزهـا بزعل : زيـن باي ,,
سكرت وطالعت الساعه اللي مازالت ثابته ع الـ11 الا ربـع ,,, زفرت بقهر وهي تقول : آآففففف باقي واايييد ...
خذت تلفونهـا وأتصلت على وضحى تشكي لهـا الحال ,,
مايمديـه يكمل الرنه الا صوت وضحى : هـــــلآ وغــــلآ بالـنــووور كلـه ,,
نوره شقت الحلج : آآدري آدري يالظلمـه ..
وضحى ضحكت : هههههه محد ظلمـه غيرج ,,,
نوره تمد البوز : وضووح زعلانــه ومتضايقه وحاسـه روحي بنفجر ؟؟؟
وضحى : وي وي وي ؟؟ ليش كل هذا ؟؟؟ لهدرجة بعدي عذاب
نوره بضحكه خفيفه : ياشيـن الثقه بس !!... بس خطيبج أمـس طب بالبرجه وغرق عليـنـا ... ووديـنـاهـ المستشفـى
وضحى بجديه وخوف : غنيم ؟؟... شمنزلـه البرجه !! مااخبرهـ يحب يسبح ؟؟؟؟
نوره بخجل من نفسهـا : دزيتهـ ,,
وضحى نقزت : وي ياعللللللللللللللللللللللللج !! هبللللله أنتي ... تبي تذبحيـن الصبي
نوره : يعني شتبيني أسوي قهررررررني ,,, تعرفين الدفتر اللي كل ربعي بالثانويـه من اول ليـن ثالث كاتبيـن لي فيـه ومع المسـات " جمع مس " اللي أحبهم وأعزهم .... وكاتبـه به كل المواقف اللي صارت لي بالثانويـه من دشيتهـا ليـن طلعت منهـا ؟؟؟؟ وحاطه به صور تخرجـنـا وجذي ..... الهييييس خذاهـ ونتفـه تنتففف وحذفـه بالبررررجــــه وقسماً بالله لما شفته بغيت أنصرررررع ...
وضحى تسمعهـا بذهول : وليش كل هذا ؟؟ شمسويـه له ماكله حلالـه !!!
نوره : ركبت بطبطته وقعدت أأتمشى فيـهـا بالحوش جان يدش علي واحد من ربع نواف ومن الربكـه والأحراج ماوعيت بنفسي ألا طايرهـ فيـهـا وصااكه بالطووفــه ... أقولج خبطت خبطــه خضت مخيي
وضحى ماتت ضحك على أسلوب نوره وهي تقول لهـا السالفه : ههههههههههههـ شدعوهـ ماعمرج شفتي ريال غريب ؟
نوره : ويافيسج ,, تطنزي يعلج بموقف أخس مني زيـن .....
وضحى وهي تهدى تدريجياً : زيـن شصار عقب ؟
نوره : ولا شي ,, قام أخوي الغالي وجاااف بطبطته منخفسه من جداااام وتوعد فيني وحشررررني ...ومادري شلون وصل لدفتر وقميصي اللي عليـه صورنا
وضحى نقزت : شسوى بالقميص ,,؟؟؟؟؟
نوره : ألا قولي شـ ماسوى !! .... راح القميييص ياوضحى .. راحت ذكرياتي كلها ..... من الحرهـ دزيييته بالبرجه ولما شفته طببب تذكرت أنه مايعرف يسبح ... شنووووو مت خرررعه
وضحى : مع أأنـــه حرااام اللي سويتيـه بـــه ,, بس أحسـن يستاهـل ... لو أنا منج أسوي بـه أردى من جذي ..... وأروح أدور شي يعزهـ وأأخرربـه
نوره بسرعه : لا لا يبـه ... مافيني على أنتقاماته الخايسـه .... باجر أقووووم ألاقي قطااوهـ بغرفتي ,,, عادي ترى يسويـهـا
وضحى ضحكت : ههههههههههـ ماعندج سالفـه والله
.
.
بالمستشفـى

قاعد ع الكرسي وعيـنـه بجوالـه يلـعـب
وغـانم قاعد متملل .. يطالع أخوهـ ويلتفت ع الأجهزهـ اللي حولـه يقعد يقزهـا قز ويحفظ كل حرف مكتوب عليـهـا ويرجع يلتفت على نواف
لحد ماطفش وقال : نويف ..
نواف : هااااا !
غانم : هـوى ينفخك قول نعم ,, أنا أخوك الصغير
نواف وعينه مازالت بالجوال : أخلص شتبي ؟؟ أذا ماي ... أصبر ليـن تجي أمك وتروح تجيب لك ... عيزت وأنا رايح رااد
غانم : لو أبي مااي .. بتقوم وريلك على راسك بعد ,,
نواف رفع راسـه وطالعه بحدهـ
غانم شق الحلج بأرتباك وقال : أتغشمر شبلاك ,,, لا تحمقق !
نواف رفع واحد من حواجبه وقال : شوف لو ماتاكل تبـن وتنطم لا ألبسك الجهاز اللي وراك
غانم يسوي روحه زعل : اللحيـن لو أني ميـت آآمس بالبرجه جان اللحيـن أنت حاضر عزااي وشـغـال صيــاح .. " ينزل نظره بحظنه " وتروح تفتح غرفتي وتجابل ثيابي وتشم ريحتي الـعطرهـ
نواف قاطعه : قصدك الخايسـه !
غانم كمل ولا عليه من كلام أخوه : وتقعد تصيح وتحك ويــهـــك بزوليتي تتمـنـى تشم ريـحـة خطواتي المبجلـه .... وأذا حضرت العزى.....وجوا لك عالم تعزيك فيني .. تقوم تنسدح بنص الميلللسسسس وتنفجرر صيــآآح وتقول " قام يتكلم بلهجه مصريـه " خلااااااااااااااااص بـئـااا !! كفايييـه ...كفااايـه مش آـادر أستحمل ,, كده كفااايــه ,,,, فيييينك ياغانم ,, دي الدوونـيـا فـبـوعدك مش عوزهـا ,,,, ياخرااااااااااااشيي ياخويآآآ ,, فيييين أيامك القمييلـه ... دآ آنـا بدونك سلطه يأأحلى سلطه أكلتهـا بحياتي ... " رجع يتكلم قطري " عاد ساعتهـا تكسر خاطر أبوي ويسحبك على أقرب مستشفـى ميانيــن .." يتنهد بتمثيليـه " يافديتك يأخوي ,,, من بعدي راح تستخف
نواف طالعه بلوعة جبد وقال : يرحم أمك بس ...
غانم ألتفت عليه بحماس وقال : صج صج نواف ,, لو أني ميــت آمس شراح تسوي ؟؟ بتصييييح علي صح !!
نواف : ألا برقص رقص ماخطر ببالك حتى ,,, وبسوي حفلـه عووودهـ أحتفال بأنــك فارجتنـا ...
غانم : آفا !! .. آدري مو من قلبك ..... أنـا لو أسوي روحي ميت اللحيـن ...بتقوم تقحصصص ليـن توصل لدكاترهـ علشان يجوونــي ويشوفون شبلانـي .." ينسدح على ظهرهـ ويقول بثقه " مشكلتي أنحب !
نواف : ياواثق ,,,
غانم : وليش ماأوثق ,, وسامه وأخلاق ورجولــه وجنتل مان على أصول ..... لآزم أنحب وبقوهـ بعد ,," يطالع نواف بنفس الأبتسامه العريضـه " ... أنت تدري أأنـي معلللق السستر اللي تجي تجييك علي كل شوي .... مادري شلون بتستحمل بعدي ... " يرجع يتنهد بتمثيليـه من يديد " يلا ...!! هذي الدنيـا ...! كل يوم نقابل ناس ونحبهم ونضطر نفارقهم ... عاد أذا شفتهـا سوت عرررس بمناحتهـا لما أجي أطلع ... بقط عليهـا رقمي السبيشللل كصدقـه ..!!
نواف كان يطالعه بنظرات تحسونه ودهـ يقوم يسكت هالأدمي بأي طريقــه ,,, رجع طالع جواله وهو يستغفر ...
عم الـهـدوء ع المكان من يديد
نطق غانم وهو يقول بعد ماتملل من هالصمت : ياااأأخي ليش ماتقووم تطسسس وتخلي أمي وأبوي يجووون ع الأقل بيسولفون معاي ,,,, مب يتصدقون علي بالكلمه ..
نواف : لو بطس ,, بطس بكييفي ... " من قلبـه قال " ودي لو مرهـ وحدهـ بس .... تسكت خمس دقايق على بعضهـا ... لسانك هذا مايتعب من كثر الحجي .. ؟؟
غانم : وشحارق دمك ...؟؟ لساني وأأنـا حرررر ...!! بعديـن هذا يسمونـه تمررريـن للسااان علشان يقوآ .. " يأشر لـه بيده " شوف لسانك أنت شلوون طااب على صدرررك لأنك مااااتمرنه
نواف يدور شي حولـه علشان يحذفه عليـه ولقط قلاص ماي بلاستك فاضي وفرره على غااااانم : كللللللللل تبـن زييـن ,, شقالولك جلللب !
غانم بأسلوب يستفز ويقهر بعد ماتفادى القلاص : لا لا حراااام تمدح نفسك جذي !
.
.
طلـعـت من الحمام الله يعزكم بعد ماسندرتهـا بنتهـا من شوي
نشفـت شعرهـا بالفوطهـ ولما جف خذت لهـأ ربطـه ولفت شعرهـا بأهمال وطلعت تشوف شغلهـا مع نوره
دورتهـا فوق لحد ماوصلت لغرفتها فتحتهـا ودشت جافتهـا تتكلم بالتلفون وميته ضحك .. أشرت لها أنهـا تبيـها
نوره : ههههـ زيـن زيـن ,, جوفي بسكر اللحيـن أمي تبيـني .... وبتصلج بعديـن .. بس مو تنسيــن باجر راح تجينـا ... ولـه خطيبج بيزعل ههه
وضحى : آن شالللله ,, كم غنووم عندنا ...
نوره ببتسامه : يلا باي
وضحى : باي

آم نواف وهي تتخصر : كم مرهـ قايله لج ماتجين تحنيـن على راسي لما أكون بالحمام ؟؟؟
نوره : شسوي ,, أبي أروح لأخوي حبيبي بعد جبدي ومحد معبرني ... لو أنج دااقـه على زوجج العزيز جان هد اللي بيدهـ وجا ,, بس ليش أني أنا اللي داقه عليـه قال لي ع الوحدهـ بيجكم
أم نواف : المهم كلام الـنـص كم هذا خليـه لج .. بدلتي لأختج ؟
نوره تنفخ من قلبها : لا ,,,
أم نواف : شتنطريـن ؟؟؟؟
نوره قامت وقفت وهي طايفه أمها : زييـن خلاص لا تعصبيييـن .. بروح أبدل لهـا اللحيــن ... آآآف متى يجي فارس الأحلام وياخذني من هالعيشه القرف اللي كلهـا شغل بشغل ...... مااادري ليش ماتجيبيــن خداامه وترحميني
آم نواف : بيتي مايدشونه خدم ,,, زيـن مني راضيه بالدريول ... هذا اللي ناقص ..! أقعد أنا وبنتي نربي شحوم ولحووم والخدامه قايمه بشغل البيت .. ليـن تحلـى بعيـن أبوج وياخذهـا علي
نوره اللي وصلت لباب الغرفه : هذا اللي مخرعج أنتي ,,, ترى حلاته تكون معاج شريجه تسليييـج لا كان زوجج المصون محـــد ,,
أم نواف : عطيني مقفاااج بالزيــن ,,!! لا تزوجتي وخذآآ ريلج عليج وحدهـ .. عرفي ساعتهـا التسليـه على أصولهـا
نوره تطالع أمها وتحرك لها حواجبها : مايقدررر ,,, بخليه خاااتم بصبعي أقول لـه يمين يروح يميـن أقول له يسار يروح يسار ,,, ولو أقولـه طب من فوق جسررر يطب وهو مغمض بعد ...
أم نواف : عيل الله يخلف على العيال اللي هالمخدي أبوهم ,,, روحي بس روحي الله يكملج بعقلج
راحت نوره تاركه وراهـا صوت ضحكتهـا ,,,
وسيده لغرفـة أختهـا اللي كانت قاعدهـ فوق سريرهـا وتلعب بلعبتهـا اللي جابهـا لهـا أبوهـا
فتحت كبتهـا وهي تقول : شنلبسج ...؟؟؟؟ ممممممم " قعدت تنقل نظرهـا بيـن الثياب وبعد تفكير سحبت فستان يوصل لتحت الركبه بشوي لونـه فوشي وألتفتت على أختهـا وهي تقول " يلا أأمشي خل أبدلج
ريم قامت وراحت صوب أختهـا علشان تبــدل لــهـا ,,, وبــعــد عذاااب وهي تحاول تخلي ريم ترفع ريلهـا اللي مثبتتهـا بالأرض قــدرت تبدل لـهـا ,,,

مـــر الـوقــت وكلـهـم أجـهـزوا وقـعـدوا ينـطرون بو نواف اللي عطاهم خبر أنه قررريب وآول ماوصل طلعوا لــه متجهيــن للمستشفـى
نوره بحماس : يبـه شفته ؟؟
بو نواف : لا ماشفته ... أخووج شاافــه ..
نوره : يعني هو بخير !!!
بو نواف : لو مب بخير جان ماقالوا بيرخصونه بالليل
نوره ببتسامه نابعه من قلبها : والله البيت بدونه مالـه طعم ...
أم نواف : آي والله صاجـه ... على كثر شطانته على كثر ماهو مسوي جوو فضييع بالبيـت .. " توجه الكلام لنوره " لو صار به شي جان ذبحتج
نوره : مـاتقدريـن باباتي ماراح يخليج ,,,
بو نواف : آآي ,, هذي الغاللييييـه ماأرضـى عليـهـا ترى ,,
أم نواف : ووووي ... لا يطيح نصك بس
نوره ماتت ضحك : هههههههههه وي يبـه آمي تغااااار
بو نواف يشاركهـا الضحك : أأجووووف ويـهـا أنقلب لونـه
طبعا أم نواف ماأنقلب لونهـا ولا شي بس فايز وبنته يبون ينرفزونهـا صدت عنهم وهي تقول : ماأخذ على عقلكم آنـا ,,
نوره : آفاا يبـه تغلط عليك وأنت ساكت ...
بو نواف : خل تغلط ... حلال عليـهـا
نوره : أشوفك قلبت علي ... زيـن هيـن حسابك لما نرجع البيت
هالمرهـ ضحكت آم نواف على كلام بنتهـا ,, وبو نواف أكتفى بالأبتسامه العريضـه ,,

وصلوا المستشفى وبالموت لقوا موقف ,,
نــزلوا ودشوا المستشفـى ونوره سابقتهم ...
عاد أم نواف مرت على محل الورد والكوافي ألا تشتري سلة كافي لغانم
جـنـها جايـه زيارهـ لواحد غررريب ,,, مب جنه هالسله مردهـا بتجي البيت اليوم بالليل وبيقضون عليهـا كلهم ,,
ولا والبـلا أبوهـا شارك أمهـا الفكره ووقفوا جدام المحل يشوفون شنو آحسـن شي عندهم ,,
نوره بطفششش : يلا عاااااد ترى والله مالهـ دااعي ,,,
أم نواف : لـه داعي ونص ,,دام أخوج مرقد عندهم ,,, خل ندلـعـه ..
نوره تستنجد بأبوهـا : يبببببـه !!
بو نواف : اللي قالته أمج هو اللي بيتنفذ ..
نوره بزهق : تدرون شلون خلكم أنتوا هني وآنـا بروح لغنوووم لا خلصتوا تعالوا .. تعرفون رقم الغرفـه ,,
تـركتـهم وهـي متجهه لداخل المستشفــى ,, دشت الأصنصيير وضغطت على رقم الطابق اللي موجود فيـه غانم
وهي قاعدهـ تخطط ببالهـا شلون بدش عليــه ,,,,
لحد ماوصلت ... طلعت وهي تقرى أرقاام الغرف غرفه غرفه ,, لــحــد ماوصلت لغرفـة غـانم
زاادت خطواتهـا وفتحت البــاب شوي شوي ,, ولـقـت نواف واقف جداام الـستـارهـ اللي وراهـا غانم ... بس معطيهـا ظهرهـ ولا وكااشخ بغتره وعقــال بعد ,,, مادري حق من ..!! كل هـاي حب بغـنـوووم ,,
أبتسمت ورااحت وراهـ وطوقـة ذراعه وهي تقول : أنــآآآ جييييييت
ألتفت عليـها وأنصعقت أنه مب نواف ... تركته بسرعه وأبتـعـدت
أنربط لسانهـا وماقدرت تنطق بولا حرررررف ,,,
الـشـاب بستغراب : خيرر ؟
نوره الكلام مب راضي يطلع وعينها متعلقه بعينه : آآ..!!....آآآآآ !!!
الشاب طالعها من فوق لتحت بنظرات تشبـه الأحتقار وفتح الستاره وهو يقول : نواف أنـا رايح ,,
شوي ألا نواف طالع : لحظة خل أوصـ......" شاف نوره وقال بغرابه شديده " شتسويـن هني ,,
نوره طالعته بدون ماترد أصلا ماتقدر ترد ,,, ولمح بعينهـا دموووع
نواف مسكهـا من معصمهـا ودخلهـا عند غانم ... حســت أنه راح يفصل معصمهـا من قوة ضغطـه عليـه ,, عطاهـا نظره توعد ,, وطلع لـرفيجـه ,,
بينما هي واقفه بمكانها ماتحركت شبــر
غانم بستغراب من شكلها : شبلااج ؟؟.. لا تصيحيـن آنـا بخير ..آآنـا بخيييرر !!
نوره تغطي حلجهـا بيدهـا وعيونهـا غرقانه دموع لو ترمش رمشه وحدهـ بس بتصيح : ياويلي !
غانم بتسائل : شفيييج !! شكلي يخررع لهدرجه ؟
نوره بصوت جاي من بئر : بيذبحني نواااف ,,
غانم : ليش شمهببه ...
نوره نزلت دموعهـا على خدهـا وقعدت على الكرسي الموجود وراهـا ,,,,,,

بينما عند نواف
كـان منحررج من منظر أخته اللي واقفه تطالع زايد ولا نزلت نظرهـا ,,, ومايدري شبلاهـ زايد تعكر مزااجــه ؟!! .. رغم أنه لما جالـه أتصال وطلع يرد عليـه كان أحلى منه مافيـه ,,
وصلـه لعند الأصنصير وهو يقول : مع السلامه ,,,
زايد مارد عليـه أكتفـى بأنه يطالعه بنظره ماقدر يستشف منهـا المـعنـى وضغط ع الزر وثواني ألا هو فاتح دش وسكر الأصنصير بوي نواف
" هذي نفسهـا اللي جفتهـا ذاك اليوم بحوشهم ؟؟.. شكلهـا منتهييييـه وماتعرف الأأأأدب .. آآكييد بتطلع بهلـ الأخلاق الزفته دااام فيوز أبوهــا .... ( يلمس ذراعه مكان ماطوقته ) الله يقرفج ياشيخ
مادري هي متعمدهـ ولــه بدون قصصصد !!!.. رغم أنه نظراتهـا تقول آنـهـا مب قاصدهـ ؟؟... "
أنفتح الأصنصير جا بيطلع ألا بفـايز ومرته بويهـا ومعاهم بنوته صغيره ,,, وهو صج صج مزااجه متعكر والسبه الموقف السخيف اللي صادهـ من شوي,,, اللحيـن شلون بيقدر يبتسم بـ ويه فايز ؟ ...
طالعه وقال بدون لا يبتسم : هلا ....." بالغصب قال " عمي !
بو نواف اللي أنصدم لما شافه قال : هلا زايد ,,
زايد طالعه وطالع مرته وطلــع بدون لا يقول حتى مع السلامه
.
.
.
رجع نواف لغرفـة أخوهـ وهو معصب دش الغرفـه وأزاح الستارهـ وشاف نورهـ قاعدهـ تصيح قال بغضب : شعندج واقفه معاه ؟؟
نوره طالعته وقالت بصوت مخنوق : والله عبالي أنتـآآ
نواف : ياسبحان الله لهدرجـه شيفنا تتشابـه ؟؟
نوره وهي مازالت تصيح : ماجفت ويهـا ,, كان معطيني ظهرهـ لما جييت و....." سكتت ..!! لو درى أشسوت بينحرهـا "
نواف رفع واحد من حواجبه بغضب ممتزج بتسائل : و شنو ؟
نوره تغطي ويهـا وتكمل صياح : والله عبالي آنتا ,,
غانم دش بالسالفه : نواف خلاص ,, تراك مكبر الموضوع على شي تافه .. شفيهـا لو جاافـهـا يعني ؟
نواف طالعه بقـهـر ورد النظره لنوره ,, وسحب لـه كرسي وقـعـد وهو عيـنـه بتاكل آخته اللي أبتـدت تهدى تدريجياً

.
.

عـنـد وضـحـى
كانت منسدحه على سريرهـا بغرفتهـا والجوال بيدهـا ,, طرشت المسج من الصبح وللحيـن ماوصلهـا الرد
" معقولـة ماجافـه ؟؟.. ولـه يمكن جافـه بس حقرني !!! عاد صج صج أنا اللي بتفشل ,, هو الغلطان وأنا اللي قاعدهـ ألاحقـه ؟؟؟ لا لا يمكن راقد للحيــن ( بسرعه طردت هالفكره من بالها ) شدخل راقد ... عمرهـ ماطول بالرقاد هالكثر ,,, آآكييد قرى المسج !! بس ليش مارد ولا أتصــل ,,,؟...( بعد تفكير قصيير قعدت على حيلهـا وقالت ) خــل أتصل آن شالله يرد !! "
أتصلت عليــه رن شوي بـعـدهـا تسكر بويـهـا ..
أنصـــدمـــت!!!
عمرهـ راشد ماسواهـا ؟؟؟؟؟
عمرهـ ماسكر التلفون بويهـا حتى لو كان معصب عليهـا وودهـ يذبحهـا !
معقولـه قاعد ينفذ الكلام اللي قالته لـه آآآآمس ؟
شدعوهـ مااصدق تقول لـه هالكلام علشان يبتـعــد ,,!!!
جــآآت بتتصل من يديد لــكــن وصلهـا مســـج
فتحـته وكان من راشد

" لا تتصليــن مرهـ ثاانيه لو سمحتي ! "

أرتخت ملامحهـا من قوة الصدمه !
مــعــقـــووولـة راااشد يقول هالكلام ؟؟؟؟؟؟
مـعــقــووولـــة ,,؟؟؟




نـهـايـة الـبـآرت التـاسع

شروق آلشـريف معجب بهذا

الجمَال يَكمُن فِي رقيّ اطروحتك
دُمتَ بِسلَامْ

بيض الله وجهك على اختيارك
للطرح الراقي
لاحرمك الله رضاه

‏لك كل
تقديري واحترامي


مجنون قصآيد

‏

الله يعطيك العافيه على الطرح
اللي كله ابداااااااع

حضوري شكر وتقدير لك
ولاهتمامك في مواضيعك

اخوك
نجم الجدي

‏جمال الاختيار
خلفه ذآئقة جميله جدا

تعرف ماذا تقدم

‏محتوى الطرح اكثر من راقي

من الاعماق
اقدم لك شكري واحترامي



‏ليل المواجع
محمد الحريري

كـــ العادة إبـداع رائـع
وطرح يـسـتـحـق المتـابـعـة
بـــــ انتظار الجديد القادم


:
مع التحية والتقدير ..

موضوع في غاية الروعه والجمال
سلمت اناملك على الذوق الأكثر من رائع
دام التميز والتالق

سلمت يمناك
طرح جميل جدا

المشاركة الأصلية كتبت بواسطة شروق آلشـريف

الجمَال يَكمُن فِي رقيّ اطروحتك
دُمتَ بِسلَامْ

شكراً من القلب على جمال حضورك
اسعدني تواجدك الرائع بمتصفحي
لا حرمني الله روعة وصالك
كل الود وباقة ورد’

المشاركة الأصلية كتبت بواسطة مجنون قصايد

بيض الله وجهك على اختيارك
للطرح الراقي
لاحرمك الله رضاه

‏لك كل
تقديري واحترامي


مجنون قصآيد

‏

شكراً من القلب على جمال حضورك
اسعدني تواجدك الرائع بمتصفحي
لا حرمني الله روعة وصالك
كل الود وباقة ورد’