ديوان الشاعره مطلع الشمــس

الشمس


الشمس غير الكواكب والنجوم ... من وصلها يحترق ذاق الهلاك

من تمناها على نفسه ظلوم ... من حتوف الموت ما يلقى فكاك

أنشدك تصحى من اضغاث الحلوم ... وانتبه للي تقوله وش بلاك

شفتني في الحلم أو جاتك علوم ... ويش دخلني بسويداك وغلاك

ومثل ما قد قلت مع ربعي محشوم ... ذا صحيح ومنزلي بأعلى سماك

ولي شغاميم على الشده تروم ... هجنهم وخيولهم ترهب عداك

عزنا موروث من مجد ورسوم ... ما طلبنا العز من هذا وذاك

شفتنا وتشوفنا عند اللزوم ... ما نهاب الموت أو نخشى العراك

والكرم فينا وعادات وسلوم ... والزبين نقول له كل شي فداك

وفر وصوفك على نفسك ولوم ... وان حلمت احلم على مستواك

والشمس غير الكواكب والنجوم ... ومن يحاول وصلها ذاق الهلاك