 |
 |
 |
 |
|
 |
||||||||
 |
 |
| …»●[الرويات والقصص المنقوله]●«… { .. حكاية تخطها أناملنا وتشويق مستمر .. } |
 |
|
|
أدوات الموضوع | انواع عرض الموضوع |
|
|
|
|
|
|
|
|
|
||||||||
|
|
|
| …»●[الرويات والقصص المنقوله]●«… { .. حكاية تخطها أناملنا وتشويق مستمر .. } |
|
|
|
|
أدوات الموضوع | انواع عرض الموضوع |
|
#1
04-17-2019
|
||||||||||||||||||||||||||||||||
|
||||||||||||||||||||||||||||||||
رواية / غالبا مايكون الحب قدر لاخيارا/ البارت 29
-29-
راحت مشاعل و خذت جوالها من السيارة وابعدت شوي عن البنات و اتصلت على عبدالعزيز بعد ثواني رد عليها : هلا قلبي مشاعل بهدوء غريب : هلا عزيز عبدالعزيز عقد حواجبه مستغرب : وش عندك ؟ رجعتوا ؟ مشاعل : عزيز بقولك شي بس لا تعصب عبدالعزيز بخوف و بحدة : وشو ؟ صاير شي ! مشاعل خافت شوي : انا قلت لك لا تعصب عبدالعزيز بقلة صبر : ماعصبت مشاعل اخلصي وش صاير !!!! مشاعل بتردد بس مازالت محافظه على هدوئها : امممم انفجر كفر السيارة عبدالعزيز : وشوو ؟؟؟ مشاعل : وطينا شي صلب وانفجرت عبدالعزيز وهو يحاول يكتم عصبيته : وينكم !! مشاعل : مادري مادري بس جنب الخط السريع عبدالعزيز بعصبيه وصوت عالي مره : بعد !!! ليه واصلين ذيك المنطقه ! ماتخافون انتم ! مجانين ؟ سكر منها قبل مايسمع ردها مشاعل لفت على البنات بخوف : عبدالعزيز معصب مرره مره رهف سبّت نفسها للمرة المليون وكانت خايفه مره لان لو تركي او امها او ابوها يدرون عن اللي صار ماراح يسكتون وبيكبر الموضوع والخوف الاكبر و الاعظم كان من عبدالعزيز ومادراك ماعبدالعزيز .. كل ماحاولت انها تقلل مشاكل معه تنزل لها مشكلة من حيث لا تعلم فتحت شنطتها و طلعت نظارتها الشمسيه ولبستها مع ان الجو ماكان يحتاج بس تخاف تخونها دموعها وتنزل جلسو شوي وكلهم ساكتين والجو هدووء بس يسمعون صوت السيارات اللي تروح وتجي على الخط السريع الهنوف قطعت الصمت وهي تحاول تخفف عليهم : بنات خلاص لا تخافون ماصار شي دام كلنا بخير الحمدلله ريوف : اي ماصار شي ! تقولك معصب وهو ماشاف الكفر كيف اذا شافه قسم بالله بنروح فيها الهنوف فتحت عيونها بقوه : ريوف بلا استهبال يعني وش بيسوي ترى مو بزران حنا ريوف : مادري والله بس خايفه ماتسوى علينا كل ماجينا ناخذ سيارة خربت طلعتنا مشاعل عقدت حواجبها باستغراب : ليه متى اخذنا سيارة قبل هالمرة قطع كلامهم لما وصلو خالد وعبدالعزيز نزل عبدالعزيز من السيارة وهو يستغفر و يحاول انه مايتكلم عشان ماينفجر فيهم خالد قرب لهم : انتم بخير بنات ؟؟ الهنوف تقاوم دموعها : ايه عمي بخيير الحمدلله عبدالعزيز لما شاف الكفر كان متهشم كله وعصب اكثر : مجانين انتم ماتشوفون الطريق ؟؟ خالد يحاول يهديه : يارجال الكفر بداله مليون كفر اهم شي انهم بخير عبدالعزيز اللي كان جديآ معصب و بصوته العالي اللي زاد رعب البنات : بلعنه الكفر وبلعنه السيارة كلها انا اتكلم عن الارواح اللي فيها افرضو انقلبت فيكم على الخط السريع وكله سيارات وشاحنات مسرعه ! والله مايبقى فيكم حتى اصبع واحد !!! ( ولف على رهف بعصبية ورفع صوته اكثر ) وانتي بما انك تعرفين تسوقين اكيد تعرفين خطر انك تطلعين لشارع عام بهالطريقة ومن مكان كذا بالذات رهف ماكان عندها اي كلمة تقولها لذلك اكتفت بالسكوت وهي منزله راسها بدون ماتلف عليه عبدالعزيز يكمل : وانتم ولا وحدة تفكر بعقلها !!! وش بتفيد وناستكم اذا صار لكم شي البنات برضو ساكتين ومحد قدر ينطق بحرف لان الغلط راكبهم خالد يحاول يمسك اعصابه وبحدة : عبدالعزيز خلاص اذكر الله مايسوى كل هذا عبدالعزيز لف عليه بعصبية : الا يسوى ونص ياخي افرض جاهم شي !! واللي قاهررني اكثر انهم مسرعين لان مستحيل ينفجر الكفر وهم يمشون بشويش وشلووون مسرعين جنب طريق كذا مجانين انتم ؟؟ ( ولف على رهف ) اذا انتي بايعه نفسك ترى معك ارواح ! رهف تعض شفايفها بقهر ماتحملت وتكلمت بصوت عالي : انا بايعه نفسي اصلا يوم ركبت سيارتك ( ورمت المفتاح من يدها بعصبية ولفت على البنات ) وانتم الله ياخذ اللي يمشي ورى رايكم مشاعل اخيرا تكلمت : عزيز انا اللي قلت لها اسرعي ترى ( وبكذب ) وانا اللي قلت ابعدي اذا بتهاوش احد هاوشني انا عبدالعزيز حس انه زودها وسكت و بعد صمت طويل تنهد بقوه وقال : تعالو اركبو السيارة برجعكم يالله كل البنات مشو بطواعيه باستثناء رهف اللي ظلت واقفة بمكانها بشموخ عبدالعزيز ناظر رهف ثم لف على مشاعل اللي كانت جنبه وبصوت واطي : قولي لها تركب لا اكوفنها مابي دلع بنات رهف سمعت كلامه وانفقع قلبها وبصوت عالي : ماراح اركب معك التهزيئ اللي جاء كفاية طلع باقي امراضك النفسية باختك وبنات عمك عبدالعزيز غمض عيونه وشد على يده يحاول يمسك اعصابه عشان ماينفلت عليها : وانا قلت كلكم بتركبون يعني بتركبون مافيه احد بيجلس خالد حس بالاجواء المتوترة واساسا المفروض مايخلي عبدالعزيز ينفرد فيهم كفايه الخوف اللي جاهم و قال بهدوء : خلاص عبدالعزيز انا برجعهم انت اجلس عند السيارة وشوي و اجيك عبدالعزيز توه بيتكلم بس خالد ماعطاه فرصة يرد وتوجه للسيارة رهف مشت وتقصدت انها تمر جنب عبدالعزيز ولفت عليه وهي تشيل نظارتها مع نظرة انتصار وراحت وعيون عبدالعزيز تترقبها باستغراب و بنفسه : ياقو باسها هالبنت ! رهف ركبت و كانت من داخلها ترتجف خوووف ورعب بعكس القوه اللي كانت باينه عليها ظاهريا تحس عبدالعزيز ماراح يمشي هالموضوع لها ! كان الوقت قريب من الليل باقي نور بسيط من الغروب .. ... .. ... في الخيمة اللي مجتمعين فيها الحريم هيفاء جالسة تتقهوى وجنبها نورة وريناد الجدة : وش اخبار عيونك اليوم هيفاء ؟ هيفاء : تمام الحمدلله يمه ام سلمان : صح ذكرتيني .. جاب لك عزيز القطره ؟ هيفاء : اييه اليوم الصبح اعطاني اياها ام ماجد باستغراب : ليه هيفاء شفيها عيونك ؟ هيفاء : حساسية اتوقع من الغبار ام ماجد : سلامتك ياقلبي هيفاء : الله يسلمك ياعمتي ريناد لفت عليهم : وش رايكم نطلع نتمشى ؟ هيفاء ناظرت نورة : يالله نورة نطلع ؟ عاد مالك عذر الشمس غابت اللحين نورة تضحك : اوكي بس دقيقة اخلص فنجالي اقل من خمس دقايق وطلعو كلهم نورة رفعت راسها للسماء : يا الله ماطلعت اليوم ابد ريناد : ههههههههههههههه يوه كل ذا خوف عشان بشرتك ؟ نورة : اييه اجل ولا بعد ماودي اني طالعه الحين هيفاء : يا ليت مشاعل تعطيك شوي نورة : عاد اختك ماعندها احساس معليش ريناد : على طاري مشاعل حددو زواجها بالضبط ؟ هيفاء : اتوقع ماراح يطول بعد زواج نورة على طول نورة : يارب يمديني احضر قبل مانسافر ريناد : بتنقلون نهائي ولا فترة محدده ؟ نورة : والله مادري عن علي بس يقول لي احتمال 6 شهور وممكن اكثر بس اقل من كذا لا هيفاء بحزن : يوه نورة ماتخيل بيت عمي بدونك نورة خنقتها العبره : تكفين لاتذكريني كل ماتذكرت اني بتغرب عن اهلي وجمعتنا كل خميس عند جدتي وكذا يضيق صدري ماتعودت ابد هيفاء : لا ماعليك ان شاءالله تمر بسرعة نورة : ان شاءالله ( وبضحك ) خلاص سكرو الموضوع كل يوم احلم فيه ابي شي يوسع الصدر ريناد : ودي بدباب تتوقعون فيه ؟ هيفاء : وش جوك يا عزيزتي !! ههههههههههههههه ريناد : ههههههههههه شسوي يختي من الظهر مقابلين الحريم ابي تغيير شوي هيفاء : ليش مارحتي مع البنات ؟ ريناد عقدت حواجبها : ليه البنات وين رايحيين ؟ هيفاء : اييه صح انتي كنتي نايمه .. ماخذين سيارة عزيز ورايحين يتمشون ريناد : صدق ! وش هالخيانه ماقالو لي ! شوي ولمحت ماجد اللي كان متجه لخيمة الرجال وبصوت عالي : مجوود ماجد قرب عندهم : لبيه ريناد : مافيه احد يأجر دبابات او شي خااطري بدباب مرره ماجد : لا والله مشيعل وعبدالرحمن دورو ومالقو انتبه ان معها ثنتين و لف عليهم : هلا نورة وهيفاء شخباركم نورة : الحمدلله بخير انت اخبارك هيفاء : تمام الحمدلله ماجد انتبه لعيون هيفاء : سلامتك يابنت الخال شفيك ؟ هيفاء تمسك عيونها بتوتر : لا بس حساسية ماجد : اخذتي قطرة ؟ هيفاء : ايه ماجد ابتسم : اوكي حلو ماتشوفين شر هيفاء : مايجيك يارب هيفاء متفشله لأن اخر مرة شافها لما كانت ترقص وودها تهاوش ريناد لأنها نادته ماجد : تبون شي ثاني ؟ برجع للخيمة انا ريناد : لا الله يعافيك .. بس تكفى حاولو تدورون لنا دبابات ملينا وحنا مقابلين الحريم ونتقهوى ماجد وهو يضحك : طيب من عيوني تركهم ماجد وراح بهاللحظة شافو البنات وهم ينزلون من سيارة خالد استغربو وريناد لفت على هيفاء : مو تقولين هم بسيارة عبدالعزيز هيفاء رفعت كتفها مستغربه البنات دخلو خيمة الحريم اما ريناد وهيفاء ونورة للحين برا .. ... ... عند عبدالعزيز جاه خالد بعد ماوصل البنات وجلسو يغيرون الكفر وبنص شغلهم رن جوال خالد و رد : هلا والله ,, ابشرو بس وش تبون بالضبط ؟ ,, من عيوني بس ارسلو الاغراض وانا بجيبها بس اصبرو شوي يبي لي نص ساعه ,, لا لا قاعد ازين مع عزيز الكفر ,, خلاص طيب ابشري ,, يالله عبدالعزيز لف عليه : وش يبون ؟ خالد : يبون اجيب لهم اغراض الشوي اللي ناقصة عبدالعزيز : خلاص رح انا بكمل خالد : متأكد ؟ عبدالعزيز : ايه رح بس مابقى الا شوي اصلا خالد : طيب تبي شي من هناك ؟ عبدالعزيز : باكيت واحد بس خالد يبتسم له : ابشر .. بس ترى الدنيا مانهدمت من السالفه للحين وانت نفسك بخشمك خلاص كل شي تعدل والسيارة ماصار لها شي عبدالعزيز لف عليه وبحدة : يعني ياخالد انت مقتنع اني معصب عشان السيارة ؟ خالد : عشان السيارة ولا غيرها خلاص مودك هذا عدله قبل مانرجع للمخيم عبدالعزيز سفهه ورجع يكمل وهو بنفس عقدة الحواجب خالد هز راسه وراح لسيارته وعبدالعزيز ركب الكفر لما خلص قفل اللمبة اللي كانت فوق السيارة وقام ينفض الغبار عن ملابسه وفتح باب السيارة وركب اول ماجلس انتشرت ريحة العطر اللي كانت على مقعده ! عبدالعزيز تذكر وين شم هالريحة وابتسم : هالبنت بتذبحني ناقص عمر والله بتذبحني شغل السيارة ورجع المخيم و مر باقي اليوم طبيعي وعادي بدون اي اصطدامات .. - يوم السبت الصبح ابو سلمان وعياله توهم ماشين للشرقية والباقي قررو يجلسون لين الليل لان المخيم قريب من الرياض كانت ام تركي وبناتها يجهزون اغراضهم بيمشون الحين الجدة : ليه يا ام تركي ليتكم جالسين للغداء ام تركي : والله ودنا بس مرتبطين اليوم بعزيمه الليل ام فيصل : الله يستر عليكم والله بنفقدكم سلمو على الجميع وطلعو كان تركي يسلم على العيال ووقف جنب سيارته مع عزيز يسلم عليه ويسولفون طلعو ام تركي ووعد ورهف رهف يوم شافت عبدالعزيز وقفت مكانها وامها ووعد راحو يركبون وعد كانت فاتحه الشباك وتنادي رهف بصوت خفيف ورهف ماسمعتها و بصوت عالي : ررررهف تعالي رهف كانت تشوف عبدالعزيز يوم نادتها وعد كلهم لفو عليها عبدالعزيز : يالله اجل مانطول عليك ونشوفك بالرياض تركي : على خير ان شاءالله وسلمو على بعض وركب تركي ورهف جت وركبت رهف وهي تسكر الباب بعصبيه : ماشاءالله كل العالم درو اني ماركبت السيارة وعد : تستاهلين اكلمك بصوت واطي ماتسمعين قلت لازم افضحها تركي : طيب شوي شوي على الباب ترى قلبي مايطاوعني اهاوشك بس المرة الجايه بكسر يدك وعد : ههههههههههههههههه وش هالمشاعر المعوقه ياخوي تركي : مدري عنكم تحسسوني ان بينكم وبين باب السيارة ثار قديم وعد : عاد احسن اكسر يدها تستاهل رهف عطتها نظرة وطلعت سماعتها وحطتها بااذنها وسكتت وعد تناظرها وتضحك : اووف المود ضارب اليوم تركي : ههههههههههههههه دايم وهو ضارب مودها مو شي جديد وعد : المشكله قبل شوي مافيها الا العافيه جلسو يسولفون شوي بعدين ام تركي لفت على وعد : ترى بتروحون معي للعزيمه اليوم وعد بتأفف : لا يمه والله مالي خلق حرام عليك ام تركي : المشكله محد رايح الا انتي لأني عارفه ابليس اللي جنبك لو اموت ماراحت معي وعد انفجرت : ههههههههههههههههههههههههههه والله يمه لعيون هالكلمة بروح معك حتى لو لبيت خالتي نوف تركي يلف على رهف اللي مغمضه عيونها ورى و ضحك : حرام عليكم والله انها تهبل وين ابليس معه وعد لفت عليها وقبصت خدها بخفيف وهي تضحك : ايييه والله احبها الكلبه بس لازم المحارش تعرف انت رهف كانت بسابع نومه مادرت لا عنهم و لا عن كلامهم المغرب جالسين يتقهوون الحريم والبنات في الخيمة الجدة اللي كانت جنبها ريوف مدت جوالها لها : دقي لي على خالك خالد ريوف مسكت جوالها : وش اسمه عندك ؟ الجدة : مدري والله بس اضغطي رقم 2 ويدق عليه على طول ريوف : طيب اتصلت ريوف عليه وعطت جدتها الجوال ريوف لفت على وجدان وبصوت واطي : ماشاءالله جدتي شحنها فل من قبل مانجي المخيم وجدان : هههههههههههههههههههههههه وانتي مدققه مره على الشحن ريوف : والله من يوم كنا بالرياض قالت لي اتصل على وحدة وكان فل واللحين فل وجدان : ترى عندها شاحن متنقل ياحبيبتي ريوف : هههههههههههههههههه اماا عاد ماتمزح امي لطيفه الهنوف كانت تسمعهم : وين الشاحن المتنقل تكفين ؟ حقي خالص وجدان : بشنطتها الهنوف بيأس : اووه عز الله ماشحنت ابد ريما : تبوني اسرقه لكم ؟ ريوف : وانتي جاهزه للشر بس ؟ ريما : كنت بنفعكم بس والله ماتستاهلون رد خالد بهاللحظة على امه وقالت له يجي هو والعيال الباقين يتقهوون معها وجدان بصوت واطي : تلاحظون اننا مانملى عينها ؟ الهنوف : من جد ! كل ماجتمعنا لازم تتصل عليهم ريوف : عاد ترى معروف ولد الولد اغلى من الولد الهنوف : المقصود بهالجمله ياحبيبتي الاحفاد ككل بنات وعيال بس عند جدتي الظاهر العيال بس ريما : اييه حتى هي تقوله لي ذاك اليوم ماجد وسيف وسعود اغلى منكم ريوف : ههههههههههههههههههههههه انتي واضح انك محومه كبدها ريما : اييه تخيلو جلست فوق راسها من الساعة 4 الفجر لين 9 وانا اقول من تحبين لين زبدت لي جمانة : ههههههههههههههههههههههههه والله ماتنلام ريما : والله كنت كل يوم اسوي لها الفطور اللي احلى من فطور الفلبينيات على قولتها بس عقب مازبدت لي صرت انام عشان تعرف قيمتي غدي : حرام عليك يانذله هههههههههههههههههه وجدان : اقول بس قومو نروح للخيمة الثانية مالي خلق اتحجب بهاللحظة سمعو صوت العيال كلهم بسرعة تحجبو الجدة : حياكم الله ادخلو دخل خالد وعبدالعزيز وسيف وماجد وعبدالله وفيصل وعبدالرحمن سلمو على جدتهم وجلسو يتقهوون الجدة : وانتم ماتجوني وتسلمون علي الا اذا ناديتكم ؟ فيصل : والله يايمه ودي اني اجيك كل يوم بس تعرفين تجهيزات البيت ودوامي مشغلتني مره الجدة وهي تاخذ من صحن التمر وتمدها لعبدالعزيز : انت معذور يابوي الشرهه على هالسلقه عبدالعزيز معي بنفس البيت ولا كنه موجود خالد كتم ضحكته عبدالعزيز يااخذ التمر من يدها و بصدمه : افا ! الجدة : ايه وانا صادقة ماشوفك الا بالاسبوع مرتين واحيان خالد هو اللي يسحبك عبدالعزيز : والله ان الدوام مشغلني ولا انا اقدر اسحب على حبيبتي لطوف ؟؟؟ الجدة : العب علي بهالكلمتين ( ولفت على عبدالرحمن ) وانت وراي ماشوفك ابد ؟ ولا المتوسط مشغلتك بعد ؟ اللكل : ههههههههههههههههههههههههههههههه عبدالرحمن وهو يضحك : والله لو عندي سيارة جيتك كل يوم بس انتي اقنعي الوالده الجدة : والله انك كذاب اعرفك انا عبدالرحمن : وراك قالبه علينا يالغاليه ؟ عبدالله : والله انت تستاهل حتى حنا مانشوفك كيف هي الجدة : كلكم ماشوفكم الا كل اسبوع مره الا ماجد وسيف الله يخليهم لي دوامهم طويل وبالمستشفى بس كل يومين اشوف واحد منهم سيف يلف على عبدالعزيز وهو مبتسم و يرفع حواجبه عبدالعزيز يناظره باستحقار : الغلا بالقلب يايمه مو بكثرة الشوف الجدة : انت بالذات اسكت لأني منقهره منك عبدالعزيز : انا المفروض اني ماجيت من الاساس من يوم دخلت وانتي تسبين فيني الجدة : من حبي لك سبيتك ولا لو مالك غلا كان مافرقت معي رحت ولا جيت ماجد : الله الله يا ام محمد وش هالدرر عبدالعزيز يتنهد وبحزن كاذب : اييه لي الله عشان اهلي مو عندي تهاوشيني والباقي ساكته لهم الجدة ضاق صدرها : افا وانا امك عاد انت وليدي و من جيت على الدنيا وانت عارف ان غلاك غير عن باقي العيال عبدالعزيز ضحك وناظر العيال : يسس الحمدلله ورجعتها بصفي مره ثانيه سيف : ياحيوان ما امدانا ننبسط شوي قلبتها علينا هههههههههههههههههه عند البنات الهنوف لفت لوجدان وبصوت واطي : خلاص كلتي الولد بعيونك وجدان : وشو اي ولد ؟ الهنوف قربت لأذنها وبهمس مع ضحكه : سيووفي وجدان مسكت جوالها بسرعه وسفهتها والهنوف جلست تضحك بصوت خفيف كلمو جلستهم وسوالفهم الحلوة لين شالو اغراضهم ورجعوا بيوتهم - يوم الاحد عبدالعزيز واقف عند مغسلة السيارات و جالس يشيل الاغراض المهمة اللي يبيها فجأه لمح تحت مرتبته عند الدواسات شي يلمع قرب له طلعت سوارة طايحه عبدالعزيز عقد حواجبه و اخذها باستغراب ومسكها بيده وشاف عليها اسم رهف ابتسم بقوه و بنفسه : يعني هذي مستحيل تعطيني فرصة انساها !! كل ماقلت خلاص راحت يطلع لي شي منها الهندي اللي واقف ينتظره : بابا ليش يضحك ؟ عبدالعزيز لف عليه وهو رافع حاجبه : ماضحكت متى ضحكت ؟ الهندي تركه وراح وهو يتحمد عبدالعزيز استغرب بس ماعطى الموضوع اهميه ورجع يشوف الاسوارة تذكر صورتها اللي عنده كان حاطها بسحاب المحفظه وفتحها بسرعة وشافها طلعها ومسكها بيده وفوقها الاسوارة .. كان مستغرب ليه هو مهتم لهالدرجة ليه مارمى الصورة ! قطع تفكيره صوت الهندي وهو يسأله انه يبدا يغسل السيارة ولا عبدالعزيز بسرعة : لا لا اصبر بطلع باقي الاغراض رجع دخل الصورة بالمحفظه بس هالمرة معها الاسوارة واخذ باقي الاغراض بعد اسبوع مر سريع وروتيني على الجميع يوم الخميس الصبح يوم زواج نورة وعلي الساعة 6 نورة تتقلب في سريرها ماقدرت تنام وزيادة على خوفها وتوترها كانت شايله هم علي لأنه ماكلمها من 3 ايام وماتقدر هي تدخل وتسأل تحس عيب لازم هو يبدا ! حست الباب ينفتح بشويش وشافت فيصل : هلا فيصل ادخل فيصل فتح الباب : والله حسبتك نايمة نورة بابتسامة توتر : لا ماجاني نوم فيصل فتح اللمبة وجا يجلس على السرير : افاا وش فيها عروستنا مانامت نورة : يعني نمت شوي وصحيت فيصل : اكيد تكلمين علاوي طول الليل ههههههههههههه .. ما تدرين متى وصل الرياض ؟ لأني اذكره يسولف بقروب العيال ويقول رحلتي 10 ونمت بعدها نورة حز بخاطرها انها ماكانت تدري عن هالموضوع ابد ولاتدري وين رايح وقالت بكذب : انا كنت نايمه بعد مادري عنه ويوم صحيت لقيت جوالي مقفول وللان ماشحنته فيصل : الله يتمم لك على خير والله اني مبسوط انك بتاخذين علي بالذات لأنه رجال والنعم فيه يستاهل كل خير نورة : امين ياخوي ويااك بس انا ضايق صدري من اللحين اني ماراح اقدر احضر زواجك فيصل : لو ان رحلتكم مو مهمه والله ماسمح انك تروحين بس عاد الشكوى لله روحي وانبسطي واعتبري انك معنا ولا تخافين وجدان بتسوي لك بث مباشر على كل شي هههههههههههههه نورة ضمت فيصل بقوه وهو استغرب شوي بس سكت وبادلها الحضن كانو حاجزين سويت كبيير بالفندق اللي فيه الزواج والساعه 9 الصبح كلهم راحو هنا بااغراضهم على المغرب البنات كانو عند نورة بالسويت وباقي الحريم بقاعة الزواج وجالسين ينتظرون المعازيم في السويت اللي كانت ريحته تفوح قهوة و هيل و زعفران مختلطة مع ريحة العطور والعود اجواء رايقه وحلوه وهاديه على الجميع الا على نورة اللي متوتره شوي خصوصا انها اول بنت تتزوج بالعايلة كانو تقريبا كلهم مخلصين وباقي العروسة اللي للحين الميك اب ارتست تحط لها اللمسات الأخيرة مشاعل : ياعمري ياعمري ياعمري يالزيين اشوا اننا ماحطينا زواجنا سوا والله بتغطين علي نورة ضحكت : الا والله ليته عشان ماتصير الأنظار كلها علي مشاعل تبتسم لها : صدقيني بيسحبون علي ويشوفونك حتى لو كنت معك ريوف توها داخله ومعها حلا : هنوفه اختك تصيح لها ساعة تدورك الهنوف اللي كانت لابسه وخالصة من كل شي قامت لأختها وطلعوا للقاعه وريوف جت عند البنات وهي تلف يمين ويسار : بنات شرايكم وش احلى هذا الفستان ولا ذاك ؟ "" كانت لابسه فستان طويل اوف شولدر بلون كحلي وماسكة شعرها مسكه بسيطه مع بف بسيط من قدام والباقي ويفي مفكوك وميك اب بسيط وناعم "" هيفاء : لا لا والله هذا احلى مرره بعدين حركة شعرك ماتصلح مع الفستان الثاني ريوف جلست وهي تقول : اجل وجدان قلبي صبي لي قهوه تكفين دايخه ( و لفت على نورة وقعدت تصفر ) وااااو ماشاءالله تبارك الله اخخ بس يا ليتني علي نورة : هههههههههههههههههههه رحت عليك خلااص ريوف : والله محظووظ ابن اللذين هيفاء : نورة امانة كيف الشعور ؟ تحسين ودك تبكين صح ؟ نورة خنقتها العبره بقوه وعيونها صارت حمراء وجدان لفت على هيفاء بعصبيه مخلوطة بضحكه : هيفااء ياتبن ههههههههههههههه يالله يالله سكتناها و احنا جايين هنا وانتي بكل سهوله تخربينها هيفاء انصدمت تحسبها جالسة تغير جو مادرت انها زادت الهم : امزح امزح والله اسفه طلعت رهف من الغرفه اللي داخل وهي تتهاوش مع فستانها وبصوت عالي : الهنوف تعاالي س.. ( رفعت راسها وشافت الهنوف مو موجوده ) اووف بنات تكفون وحده تساعدني وتقفل السحاب الكلب هذا قامت لها ريما : ههههههههههههههه اول مره اشوف وحده نحيفه عندها مشاكل مع السحاب وعد تضحك : لا ابشرك تتمشكل مع السحابات اكثر من المربربات بعد ريما سكرت سحابها بكل سهوله : واضح انك ماتعرفين تتعاملين معه حرام عليك بكل سهوله تسكر رهف : افف شكرآ ياقلبي والله لي ساعه داخل جالسه اتهاوش انا وياه ولفت على الجدار اللي كله مرايات طويله تشوف شكلها النهائي "" كانت لابسه فستان سترابلس شيفون اسود من قدام واصل نص الساق ومن ورى طوييل مره وفتحة الصدر كبيره شوي ومسويه ويفي بشعرها الاومبري اللي على اشقر ومكياج وجهها ناعم وخفيف مع روج عنابي اعطى اطلالتها فخامه اكثر "" رهف تتفل على نفسها وبغرور : الله يعينك يانورة شكلي بخطف الاضواء منك اليوم نورة وهي تناظرها من المرايه بحب : يازينك انا اشهد والله رهف بسرعه : يا حبيبتي والله اخسي انا .. انتي احلى مني بمليون مرة نورة : يوه كنت بشبكك عشان تمشين معي بالزفة بس شكل مافيكم فايده رهف : هههههههههههههههههه وانا انصدمت احسبها مدحة لوجه الله طق الباب بهاللحظه ودخلوا الجازي والعنود وجدان هي الوحيدة اللي ماشافتهم لانها مع نورة طول الوقت ماطلعت للقاعه ابدآ قامت سلمت عليهم الجازي توجه كلامها لنورة : شكلي بصورك لعلي عشان يجي يخطفك قبل الزفة نورة ضحكت بحياء واكتفت بالصمت العنود وهي تسلم على نورة : مبروك ياعمري نورة : الله يبارك فيك حبيبتي عقبالك يارب جلسو الجازي والعنود شوي و طلعوا عشان تكمل البنت تجهيزها اما باقي البنات كملو سوالف وضحك عشان يخففون على نورة توترها اللي كان مره باين عليها خصوصا بعد مادخلو خوات علي بعد صلاة العشاء تقريبا جهزت نورة تماما من ميك اب وشعر والبنات ساعدوها بلبس الفستان وكان اخر شي تركيب الشرعة اللي كملت اطلالتها وخلت الجميع تخنقهم العبرة مشاعل وهي تحاول تمسك نفسها : والله ماكذبت يوم قلت بتغطين علي وجدان كانت تحاول ماتشوف نورة كثير عشان ماتصيح : يالله بنات انا بروح البس عشان نطلع للمعازيم دخلت وجدان الغرفة عشان تلبس فستانها و رن جوالها وهي داخل كانت وحده من صديقاتها وخذتها السوالف طولت وهي داخل وراحت رهف عندها وانتظرت لين قفلت من صديقتها رهف جلست تصفق : اووه اوووه وش هالقمر اللي طالع لنا بليلة 8 ؟ فعلآ صايرة اخت العروسه بحق وحقيقي .. استعدي من بكره للاتصالات اللي بتجيكم وجدان : ههههههههههههههه امانه صدق شكلي حلو ترى مو مره مقتنعه بفستاني رهف : يا كذابه تبيني امدحك اكثر صح ؟ وجدان فتحت عيونها بقوه وهي تضحك : ياربي انتي ماتكملين جميلك ؟ امانه والله اني صادقه من يوم شريته وانا اقولكم اني مو مقتنعه فيه رهف : هههههههههههههههههههه ادري والله .. بس يجنن يجننن وبعدين ليش انتي دايم كذا غبيه ؟ الاشياء اللي فوق مستوى الخيال ماتقتنعين فيها والاشياء البايخه تعجبك وجدان تشوف نفسها بالمرايه بعدم اقتناع بسيط "" كان فستانها طويل كم واحد كت بلون ليلكي وفيه فتحه لما فوق الركبه بشوي وشعرها البني الفاتح مرفوع من على جنب رفعه بسيطه مع خصل نازله بشكل عشوائي وميك اب بسيط مع روج احمر "" طبعا من قبل العصر و كل شي يصير بالسويت هذا كان يتوثق بتصوير فيديو وبعض الصور الفوتوغرافيه .. طلعو البنات للقاعة ومر كل شي طبيعي وجميل والفرحه عامة بالاجواء جاء علي في السويت عند نورة وتصورو مع بعض كان بارد بلا حياة او روح .. نورة مستغربه وضعه بس توقعت ان شخصيته كذا وكملت عادي الساعة 12 بدت الزفه نزلت نورة على موسيقى هادية تمشي بين المعازيم واللكل منبهر من طلتها الناعمة بفخامه بعضهم يناظرها بحب والبعض الاخر بحقد ! وصلت الكوشه وكانت امها وخواتها كلهم جنبها وجدان خانقتها العبره بس ماسكه نفسها نورة شافتها : لو سمحتي لا تشوفك عيني مابي اصيح وجدان : ترى تكه وابكي والله ,, وين علي خل يجي ياخذك وارتاح شوي نورة : انتي تبين تصيحين من فراقي ولا تبين تصيحين لانه طول ماجا ياخذني ؟ حددي وجدان : ههههههههههههههههههههه مدري مشاعري ملخبطه بس كلها فيني الصيحه عليها بتروحين وتخليني و ماراح اشوفك فترة طويلة نورة خنقتها العبرة جد وعيونها صارت حمرا وهي تحاول تمسك دموعها وجدان مسكت يدها : لاخلاص اسفه اسفه تكفين لاتخربين شغل 3 ساعات بثانية خلي علي يشوفك ويخق مانبيه يرتاع نورة دفت يدها وهي تقاوم دموعها بأبتسامة : طيب خلاص وخري عن وجهي بعد دقايق جو خالاتها وبناتهم وتصورو معها على الكوشة وبعدها جو بنات عمها وبنات عمتها وصديقاتها واللكل كان مبسوط لها .... تابع البارت -29- عند العيال فيصل : ياخي ادخل يالله علي بنفس اسلوب فيصل : ياخي استحي والله فيه مليون حرمة داخل فيصل وهو يضحك : ماقلت لك سلم عليهم بس خذ زوجتك واطلع علي : لا خلاص اذا دخلو يتعشون دخلت فيصل عرف ان مافيه فايدة وسكت الساعه 1 دخلو الحريم لصالة العشاء ودخل علي وجلس جنب نورة وتصورو شوي بالكوشه وكانت ام نايف وام فيصل والجازي والعنود وبتول موجودين وصورو معاهم سلمو على علي ونورة نورة بهمس لامها : ماما انا بروح للغرفة اخذ باقي اغراضي وخلي وجدان والبنات يجوني ودي اسلم عليهم قبل ماروح ام فيصل : اغراضك كلها جاهزه بالغرفه بس خلاص روحي هناك وانا بقولهم يجونك علي اللي كان يسمع كلامها : خلاص روحي للبنات وخذي راحتك وانا بروح عند العيال لين تطلعين نورة : اوكي راحت الغرفه وجلست ودخلو عليها البنات بعد دقيقتين نورة وقفت : اسفة ماخليتكم تتعشون زين بس وربي مو هاين علي اطلع وانا ماسلمت عليكم جوو البنات وسلمو عليها وكل وحده تضمها من جهه نورة تدور بعيونها : بناات وييين رهف ؟ رهف دخلت بسرعه وهي تاكل ورق عنب : كني سمعت اسمي الهنوف : هههههههههههههههه الطيب عند ذكره نورة وهي خانقتها العبره : اشوا جيتي ماكنت ابي اروح بدون ماشوفك رهف : وانتي غبيه يعني تتوقعين اني بخليك تروحين وانا ماسلمت عليك ؟؟ جت رهف وضمتها بقوه نورة كانت فعلا تحس رهف اختها مرره وتعتبرها نفس وجدان رجعو مره ثانيه البنات يضممونها و كلهم يحاولون مايصيحون الا وجدان اللي ضمتها قبل ماتطلع وقعدت تبكي نورة بصوت باكي : خلاص وجداان تكفين وجدان : وشلون ماشووفك 6 شهور وشلون ؟ نورة بكذب : ترى يمكن نجي قبل وجدان : لاتكذبين علي فيصل يقول 6 شهور واحتمال تكون اكثر بعد نورة ضمتها اكثر وبكت معها .. البنات كانو متأثرين مره يعرفون قد وشو وجدان متعلقه بنورة كلهم نزلت دموعهم باستثناء رهف اللي ماسكة نفسها عشان ماتصيح قدام احد رهف بصوت عالي عشان تخفف اجواء الحزن : اووه بنات ترى ماراح تهاجرر والله نورة وهي تمسح دموعها : من جددد رهف علميهم ! مشاعل : شوفو الميك اب خرب حسبي الله عليكم بنات هيفاء : جميلة والله بميك اب ولا بدون ريوف : اقول بس وش رايكم ناخذ صورة جماعية قبل ماتطلع البنات كلهم اعجبتهم الفكرة وقعدو يتضبطون ويعدلون شعورهم والميك اب وجدان وهي تضحك ضحكة مخلوطة بدموع : والله مايرقعكم شي لا تحاولون تعالو بس صورو بسرعة وسلمو للمرة المليون على نورة الهنوف : اتوقع علي بيذبحنا الليلة وجدان : هههههههههههه من جد الله يستررر نورة : لا لا انا قلت له بسلم عليهم واجلس شوي ريوف : لا والله خلاص صدق روحي له لا يدعي علينا طلعت نورة من عندهم ومعها وجدان شايلة اغراضها لما جت عند الباب اللي علي واقف قدامه بالسيارة ضمت وجدان بحرارة وودعتها وجدان : يالله نشوفك على خير ان شاءالله وتراني احبك مره انتبهي على نفسك نورة : انا بعد احبك ادعي لي واول ما اوصل والقى وقت وكذا بتصل عليك ردي على اي رقم لو سمحتي وجدان ابتسمت وهي خانقتها العبره : ابشري طلعت نورة وعيون وجدان تترقبها لين اختفت من قدامها وجدان خنقتها العبرة مرة ثانية وسكرت الباب بس قبل مايتسكر حست بيد تدفه وجدان : بسم الله مين ؟ فيصل دخل وجدان يوم شافته فيصل ضمته بقوه وانهارت فيصل : خير وجدان بلا هبال تراها ماماتت وجدان وهي تصيح وتطقه : بسم الله عليها وجع فيصل ضحك وهو يمسك كتوفها ويوخرها عشان يشوف وجهها و مسح دموعها : خربتي كل المكياج حرام عليك الحين بتطيحين بكبد امي وابوي محد خاطبك وجدان وهي تضحك : حلوة بكل حالاتي يا حبيبي امه داعيه له اللي بيتزوجني فيصل : هههههههههههههههههه لا والله لو شاف هالوجه بيندم على اللحظة اللي اختارك فيها وجدان : وخر عن وجهي بس لاتقهرني فيصل كان جنب الباب لف يسار وشاف سيف فيصل : يوه سيوف للان تنتظرني ههههههههههههههه اسف نسيتك قسم بالله وجدان ارتاعت سيف طول الوققت موجود واكيد سمع كلامهم كله وصاحت مرة ثانية سيف كان كاتم الضحكة : لاعادي وش دعوى خذ راحتك فيصل : معليش اختي دراما شوي تحمل لين نكمل هالفقرة وجدان تركت فيصل ودخلت تركض فيصل بصوت عالي : لحظظة وجدان اصبررري ماردت عليه سيف : حرام عليك احرجتها فيصل : وش قلت هههههههههههههههههههههه سيف : الله يقلعك اللحين وشلون ريوف بتجيني ؟ فيصل : والله اسف بس اصبر بتصل على وجدان تناديها سيف : و واثق انها بترد عليك ؟ وبالفعل فيصل اتصل عليها وسكرت بوجهه فيصل : هههههههههههههههههههه والله انك صادق سيف : وانصحك تنام بمكان ثاني اليوم لانها بتشوتك لو شافتك فيصل : حبيبي اللي فاهم نفسية البنات سيف : 3 خوات مطلعين الشيب براسي اكيد اني بفهم فيصل : ياخي على انهم غثيثين الا ان مالنا غناة والله سيف : والله البنات ملح الحياة فيصل : والله ملح الحياة مشاعلي بس يارب تخليها لي سيف : خل عنك مشاعل وتعال نرجع للعيال بس فيصل وهو يمشي : ههههههههههههههههه يالله خلص الزواج على اتم وجه .. البنات قررو يرجعون كلهم لبيت الجده ويسهرون هناك لان اساسا بكرة اللكل بيجتمع عندها الساعة 5 ونص الفجر كانو توهم واصلين و تعبانين مرره مشاعل ماسكة جوالها وتضحك ريوف لفت عليها : مشاعل وش هالطاقة ماشااءالله وشلون تحركين وجهك هيفاء : تلقين فصيل اللي يكلمها ولا والله ماتمسك جوالها اختي واعرفها مشاعل وجهها صار احمر الهنوف وهي تضحك بتعب : من جدك تستحين للحين اذا جا طاريه ؟ وجدان كانت جنب مشاعل ودخلت وجهها بجوال مشاعل : تكفين بشوف كيف اخوي يتغزل سحبت مشاعل جوالها وهي تضحك : اففف ياشينكم خلوني اتهنى بدون تعليقات سخيفه وجدان بلقافة : بالله تكفيين وش يقول مشاعل : ناشب لي من امس يقول بشوفك ورافضة انا وجدان : حرام عليك لاتعذبين اخوي ان مارسلتي له صورتك برسله انا صورتك وانتي تبكين مشاعل فتحت عيونها بقوه وبسرعه : لااا لا لا برسل له خلاص وجع الهنوف : ههههههههههههههه ليه ؟ خايفه يغير رايه ؟ وجدان وهي تضحك : والله مايغير رايه لو تصير اشين وحده بالعالم مشاعل ضحكت بحياء و فتحت الصورة ولفت على وجدان : تعالي بس اختاري معي وش احلى صوره وجدان تناظرها نظرة شك وهي تمشي على الصور : يعني بتقنعيني انك مصوره كل هالصور عشان نفسك بس ؟ مشاعل : ايه اجل عشان ايش ؟ وجدان : ياحقيره من الاساس ناويه ترسلينها له بس جالسة تلعبين بااعصاب اخوي مشاعل : هههههههههههههههه اي حبيبتي لازم التغلي شوي وجدان رجعت بسرعه الصورة اللي قبل : هذي تجنن ارسليها ارسلت مشاعل لفيصل صورتها "" كانت لابسه فستان كريب ناعم فوشي طويل بدون اكمام بس فيه خيوط مربوطة من عند الرقبة وطبقات .. ومسويه ويفي بشعرها الاسود مع برمتين من الجوانب وميك اب خفيف وبسيط "" وجدان بضحكة : ترى اللحين بيطير عقله و يشب علينا وبيخلي الزواج بعد بكرة اعرف اخوي مشاعل شهقت : لااا تكفين توني ماستعديت نفسيآ الهنوف ترفع راسها من جوالها : اقول بنات ترى رهف تقول تعالو افطرو عندي ريوف : غررريبة مانامت ؟ كانت بتنام بالقاعه من الساعه 2 الهنوف : تقول يوم وصلت جاني ارق و ماقدرت انام هيفاء بصوت كله تعب ونوم : انا مستحيل اروح خلاص عيوني جالسه تقفل من نفسها مشاعل قامت بسرعه : يالله قومو ياشينكم بس الهنوف قامت وبعدها البنات ريوف ووجدان ولبسو عباياتهم وراحو لرهف .. ... .. الساعة 7 الصبح في بيت ابو تركي جالسين بالحديقة توهم مفطرين وقعدو يسولفون رهف : ياشين الباقي ليه ماجو ريوف : والله قلنا لهم بس داييخين مره الهنوف : والله حتى حنا دايخين بس لعيونك تعنينا رهف : ههاي ياحبيبتي والله ماخليكم انتم بتجلسون عندي لين ادوخ وجدان : ان ماجبتي لنا قهوة اللحين نمت هنا وقد اعذر من انذر رهف : قلت لساندي تسويها والله بس وحدة منكم تقوم معي نجيبها لو سمحتو اخاف اجي والقاكم منحاشين مشاعل : ههههههههههههههههه شغالات احنا ؟؟ قومي بس بلا سخافه رهف : والله ماقوم لحالي بسرعه وحده منكم تجي البنات كلهم سكتو دايخين الا الهنوف اللي قامت بخفه رهف : وتلومووني بحب هالبنت ؟؟؟ وجدان وهي مالها خلق : محد يلومك بس روحي جيبي القهوة دخلو رهف والهنوف المطبخ رهف وهي تحط القهوة بالترمس : اكثر شي نكد علي بالزواج امس خالاتي الهنوف : ايه اشوف خالتك نوف تذب كلام و قدامنا بعد رهف : انتي تدرين حتى قدام امي ماتخلينا بحالنا ابد الهنوف : طيب ليه كذا ؟ رهف : تغار مره واتوقع نصف كرهها بسبب مشكلة قديمة حصلت لنا مع بنتها لولوة بس خلاص مر سنين كثير وكلنا نسينا مع العلم ان بنتها هي السبب في كل شي الهنوف كانت تسمع باهتمام رهف استرسلت : الحين فيه تتش بين كل خالاتي بسبب هالموضوع امي هي الوحيدة اللي مازالت علاقتها بالجميع حلوة وتحاول تعزمهم وتشوفهم كثير مع ان جمعاتهم اغلبها دق بالحكي وبالذات اذا كانو فيه نوف وتهاني الهنوف : ياساتر لهالدرجة ! رهف : واكثرر من كذا خليها على ربك بس الهنوف : بس ماعليهم حسوفه والله حتى بناتها وكذا ماتحسينهم على قلب واحد رهف : لا ابد كل شغلهم مجاملات بالذات بنات خالتي تهاني ونوف بما انهم اقرب ثنتين لبعض يحاولون يخلون بناتهم دايم مع بعض مع ذلك لولوة وحنين يكرهون بعض مره الهنوف : مساكين ياربيه وش هالحياة قطع صوتهم دخول تركي للمطبخ الهنوف بحركة سريعة نطت من الطاوله و تخبت ورا الثلاجة تركي كان توه صاحي من النوم مانتبه لها ووجه كلامه لرهف : يالله ريحة الزعفران واصله غرفتي رهف كانت ميته ضحك على نطه الهنوف ماردت عليه تركي باستغراب : وش فيك الحمدلله والشكر رهف وهي تضحك للحين : اطلع اطلع وبجيب لك القهوه عندي بنات تركي يلف عينه على المطبخ وهو عاقد حواجبه : وين البنات ماشوفهم رهف : هههههههههههههههههههههههههههههه يالله تركي اترك الفهاوه عنك تكفى تركي مازال نصه نوم تركها وطلع من المطبخ وعلى طول الهنوف طلعت رهف : هههههههههههههههههههههههههه بسم الله كييف دخلتي ورا الثلاجة ؟ الهنوف تتنهد براحه : شكرآ والله انكم مقدمينها شوي ولا كان صحت قدام اخوك مافيه اي مكان اقدر اتخبى فيه رهف : حتى لو انك جالسه اتوقع مايدقق عيونه مقفله من النوم الهنوف : خذي له قهوة تكفين عشان مايجي مرة ثانية رهف فتحت الدولاب عشان تطلع كوب وهي مازالت تضحك الهنوف : ترى مايضحك ابد رهف خذت الكوب يوم جت تصب فيه وهي للحين ميته ضحك ماقدرت تمسك الترمس وبصوت متقطع : الهنوف تكفين صبي انتي الهنوف تاخذ الترمس وتصب : خبله والله العظيم ههههههههههههههههههههههههههههه راحت رهف تعطي تركي القهوه والهنوف راحت للبنات وجتهم رهف بعد 5 دقايق وصحصحو شوي بعد القهوه وكملو سواليف وكلها كانت عن الزواج .. .. ... الساعة 8 في الفندق نورة مانامت من التوتر وعلي من اول مادخلو الجناح بارك لها وفصخ ثوبه ونام على الاريكه اللي برا ! كانت مستغربة منه من اول ماتملكو وهي تحس حركاته غريبة كأنه مو طايقها وامس تأكد لها هالشي ودها تكلمه بهالموضوع بس مو قادره تقول كلمتين فوق بعض نورة بنفسها : يمكن ماتعود يعني طول عمره يشوف خواته و بس ! ان شاءالله يكون كذا ولا انه يكون مغصوب علي او شي طردت هالفكرة من مخها وقامت تطلع لها لبس عشان تتحمم وسمعت صوت بالصاله وشوي ودخل عندها علي : رحلتنا بعد ساعتين جهزي الاغراض عشان نطلع للمطار على طول نورة اخيرآ نطقت : ماراح نمر اهلي ؟ علي بجفا : لا حتى اهلي قلت لهم بنمشي على طول نورة : اوكي .. علي دخل الحمام ياخذ دش ونورة جهزت لبسها وانتظرته يطلع عشان تتحمم هي بعد ... ... .. المغرب كان اللكل مجتمع في بيت الجدة عند العيال بالملحق عبدالعزيز منسدح : اسبوع كامل لاتقولون لي سلم على احد خلاص كفاية اللي امس وقبله خالد : بيجون العيال اللحين وبتقوم زي الكلب تسلم عليهم عبدالعزيز يلف عليه : وش فيكم انتم علي كل من شافني قعد يهاوشني فيصل : بعذرهم فيك والله ترى ذي حوبتي انا ومشاعل عبدالعزيز يرمي عليه الريموت اللي جنبه : هاه وش قلنا ؟ لا تجيب طاري اختي لين الزواج عبدالله يضحك عليهم ولف على خالد : من بيجي ؟ خالد : ناصر واحمد وعبدالملك عبدالعزيز : صدق ؟ رجع ناصر من السفر ؟ خالد : ايييه توه راجع امس عبدالعزيز : ايه زيين بعد ربع ساعه دخلو اخوياهم وقامو العيال يسلمون عبدالعزيز وهو يسلم على ناصر : يالله حيه الحمدلله على السلامة ناصر : الله يسلمك خالد : الحمدلله على السلامة ابو نواف هاه شخبار لندن ناصر : زي الزفت تذكرني بالجامعة وايام الجامعة بس مايمنع اني انبسطت شوي عاد خالد : ههههههههههههههههه بالعكس والله كانت ايام حلوة ناصر : المشكله كل الاماكن اللي هناك قد ذاكرت فيها عشان كذا اتوقع جاني اكتئاب عبدالعزيز وهو يضحك : اللحين انت تارك كل بقاع العالم ورايح للمكان اللي كنت تدرس فيه ناصر : ياخي شاورت العيال وكلهم صملو عليها واستحيت والله اني اقولهم يغيرونها سيف يبتسم له : اهم شي انبسطتو ناصر : اي والله الحمدلله .. وشفت اخوك سعود جاي هناك والله ياهو ناحف حرام عليكم ماجد وهو يضحك : اييه مسكين مكلمه امس يقول مافيه وقت حتى احك راسي فيه بس عندهم اجازة اسبوع ناصر : ايه اشوفه يقول ضاغط نفسي عشان اخلص هالسنة وارجع السعودية سيف : الله يووفقه يارب ويرجع لنا معه الشهادة اللكل : اميين يارب - يوم السبت في بيت ابوتركي رهف ووعد جالسين بالصالة مع امهم و رن الجرس ام تركي : هذي اكيد نوف رهف عقدت حواجبها : وش تبي نوف ؟ ام تركي تنرفزت شوي من اسلوب بنتها : مرة ثانيه تقولين خالتي نوف .. انا عازمتهم للعشاء وعد : يووه يمه من جدك مالبست ام تركي : لحول عادي خالاتكم بعدين ملابسكم مافيها شي رهف فتحت عيونها بقوه : بععد ! بيجون خالاتي الباقين ؟ ام تركي : انا قلت لهم كلهم بس صارو مشغولين الا نوف وتهاني رهف ارسلت لوعد بالواتس اب : شفتي كيف والله نوف ذي ماتفوت الجيه لبيتنا وعد تشوف جوالها وتضحك ام تركي : وش فيكم كلكم ماسكين جوالاتكم وحده منكم تقوم تفتح الباب رهف : ساندي راحت تفتحه وعد ردت عليها : لا ولاحظي اللي معها تهاني ماردى من هذي الا هذي الله يعينا بس دخلو خالاتهم ومعهم لولوة بنت نوف وحنين بنت تهاني سلمو عليهم وجلسو يسولفون اللي يشوفهم من بعيد يتوقع انهم اكثر عائله مترابطه لكن داخل القلوب شي غيير ... نوف بعد ماخلصت سواليف مع ام تركي لفت على رهف : شخبارك يارهف وين وصلتي اي مستوى بالجامعة ؟ رهف : السادس ام لولوة "نوف" : اوه نفس لولوة بنتي ,, بس انها تقول انها ماتشوفك بالجامعة رهف : ايه اكيد انا تخصص ولولوة تخصص ام لولوة : ولو يعني ماتشوفون بعض ابد ؟ ( وبضحكة ) ولا شكلك تقولين لأهلك انك تداومين وانتي مو مداومه رهف تنرفزت بس مسكت اعصابها وسفهتها لانها لو ردت بتغلط عليها لولوة : انا جيت للمبنى حقكم الاسبوع اللي فات عندي شغل هناك بس ماشفتك رهف بعصبية : يعني اوقف لك عند باب المبنى عشان تشوفيني طال عمرك ؟ اكيد عندي محاضرة وقتها لولوة ببرود : طيب ليه عصبتي ؟ عادي حنا جالسين نسولف ام تركي : معليش لولوة بنيتي شوي تعبانة مانامت زين رهف سكتت عشان خاطر امها ام لولوة لفت على وعد : وانتي وعد شخبارك مع الدوام وعد ابتسمت : مستقيله انا من فترة ام حنين "تهاني" : وليه ؟ وعد : بس والله مارتحت ام لولوة : انا قايلة لك يا ام تركي الدوام المختلط يسبب مشاكل وبلاوي انتم بغنى عنها بس ماسمعتي كلامي ام تركي : بنتي ماجاها شي بسم الله عليها لا مشكلة ولا شي بس مارتاحت وطلعت ام حنين بخبث : الا كانت وظيفتها حلوة وراتبها حلو وش اللي مو مريحها يعني ؟ مافيه الا ان واحد من الشباب يتحرش فيها وعد فتحت عيونها : خير ان شاءالله ؟ اوكي خالتي بس ما اسمح لك تتكلمين عني كذا ! ام لولوة : كلام خالتك تهاني صح الحقيقة ماتزعل ولا شرايك ياختي يام تركي ام تركي تنرفزت شوي : لا والله يزعل انكم تتكلمون بشرف بنتي قدامي ام حنين : ماقلت شي انا ام تركي : الا قلتي بس قفلي على الموضوع عشان مايكبر ونزعل من بعض ام حنين ميلت فمها بعدم رضاء وسكتت كملو جلستهم اللي مرت كنها سنه على وعد ورهف وتعشوا وطلعو منهم بعد كم يوم .. يوم الثلاثاء الساعة 3 العصر خالد بالسيارة جاي للبيت توه يخلص دوامه اتصل عليه ابوه خالد : هلا والله ابو محمد : هلا ابوي خالد وش اخبارك ؟ خالد : الحمدلله بخير يبه انت شخبارك ؟ ابو محمد : الحمدلله بخير ونعمه .. كلمت العامل ؟ خالد : ايه كلمته وقال لي بيجيكم بعد ساعة ابو محمد : طيب زيين خالد : انا قريب الحين من البيت جايك ,, بالمجلس انت ؟ ابو محمد : ايه حياك الله وانا ابوك بعد ربع ساعه في مجلس ابو محمد دخل خالد وسلم على ابوه وجلس عنده خالد : الا وين عزيز غريبة ماله حس ابومحمد : رايح هو وسيف يتعشون عند واحد مدري وش يقال له خالد : اييه صح ذكرت فهد ال ... صح ؟ ابو محمد : ايه ايه هو قطع كلامهم دخول شخص غريب لفو عليه وكلهم ماعرفوه مجلس ابو محمد دايم مفتوح وكثير يجونه بس استغربو هذا الوجه الجديد .... : السلام عليكم وقفو ابو محمد وخالد وسلمو عليه ابو محمد يدقق بوجهه : معليش ياوليدي ماعرفتك .... : ايه انا اول مره اجيك معك مازن ابو محمد : والنعم والله مازن : ماعليك زود ,, اخبارك يابو محمد ابو محمد : الحمدلله انت شخبارك مازن : الحمدلله والله بخير ( ولف على خالد ) انت خالد ؟ خالد باستغراب : ايه مازن : ياحليلك ياخالد وش اخبارك ؟ خالد : الحمدلله بخير انت بشرنا عنك مازن : والله الحمدلله عم الصمت على ارجاء المجلس ابو محمد بعد صمت : من انت ولده وانا ابوك ؟ مازن : انا مازن متعب ال.... استغرب ابو محمد لانه ماقد سمع بأسم العايلة بس رحب فيه وجلسه و قام خالد يصب لهم القهوة مازن بعد تردد طويل : يابو محمد انا جايك ابي اكلمك بموضوع ابو محمد لف عليه باهتمام : امرني مازن : مايامر عليك عدو ,, تعرف وحدة يقال لها سارة بنت عبدالله ال .... ؟ ابو محمد فز للاسم : اييه ! وش فيها سارة ؟ خالد عقد حواجبه مستغرب اول مره يسمع عايلة هالرجال واول مره يسمع عايلة سارة ذي ! بس توقع انهم من معارف ابوه او يمكن جيرانهم القديمين مازن : اممم موضوعي سارة بنت خالتي ابو محمد : بنت خالتك ؟ مازن : ايه ابو محمد بشك : بس ام سارة ماكان لها خوات مازن : الا لها و كان فيه مشاكل كثيرة من جهة جدي و ماكان يبيها تعرف عنهم ,, بس امي هي اللي تعبت لين وصلت لها ابو محمد يناظره باهتمام وينتظره يكمل مازن نزل راسه بحزن : سارة عطتك عمرها من شهرين ابو محمد بحزن : لا حول ولا قوة الا بالله العلي العظيم الله يرحمها ويغفر لها مازن بتردد : وانا جايك عشان اعلمك عن بنتك.. ابو محمد بصدمة : بنتي !!! مازن : ايه بنتك لطيفة انتهى البارت 
 
|
|
04-17-2019
|
#2 | |||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
|
سلمت الانااامل
لجمااال ماشاهدناااه نشكرك ويعطيك العاااافيه
|
|
| |||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
العرض العادي
