ديوان الشاعر المبدع / ثامر بن شبيب

منت اختياري


تعال ارسم على وجه الزمن بسمه
عبت من دنيتن فيها الحزن ضيفي

القلب ضاق بجفاك ومل من جسمه
صبرت مير الصبر كسر مجاديفي

مرت سنه !!! والجدار معلق الرسمه
اخر هداياك وكانت بأخر الصيفي

ايام كان الخيال يداعب النسمه
صنفت جزل القصايد قبل تصنيفي

عشيتها من جزال افكاري الدسمه
غلفتها في يدي وختمت تغليفي

وان عودت للغلا والله منحسمه
هالمسأله شرفت من غير تكليفي

غلاك عانه وسم في داخلي وسمه
مكتوب فوق الوسم ( اغلا مواليفي )

منت اختياري ولكن صرت لي قسمه
الله كتب لي احبك ماهو بكيفي

عاد انت يالله تعال ورجع البسمه
مليت من دنيتن فيها الحزن ضيفي

أخيَـر انسان


يتلني قلبي على هرجتك تل
واجي اسولف لك ولو ماسئلتي

كنتي اصغيره .. بس اغلا من الكل
كنت اتامل خير لامن كملتي

لكن خساره مانفع : ياعسى وعل
صرتي مثل ورده .. كبرتي وذبلتي

انتى وصلتي مرحله مالها حل
اتفه سبب لا من حصل لك زعلتي

انكان قلبك من تعب عالمي مل
محد جبرك انتى بكيفك دخلتي

ابعتبر نفسي مثل غادي دل
وانتى معايه .. مانجحتي فشلتي

مرضى عليك ولا على نفسي الذل
اعادلك بالروح مهما عملتي

انا اخير انسان .. في حقك يزل
اموت ‍‍‍.. وانتى بشيمتي مانخذلتي

انا عطيتك ما تعذرت بالقل
وانتى بقول الحق فيني بخلتي

انا رسمتك غيمة للبشر ظل
اعلا مكانه في حياتي وصلتي

كنتى بمكانن مرتفع تحتك الكل
لكن خساره من مكانك .. نزلتي

غلطة حياتي


لا تنصدم ماعدت شي بحياتي
كلك على بعضك كرهتك وعفتك

مابيك لو انه وجودك غناتي
حذفت انا اسمك من سجلي وحذفتك

صارت حياتي معك تشبه مماتي
مافيك حاجه طيبه لا وصفتك

عمر الخطا ماكان نوع بصفاتي
حتى مشيت العام دربك وشفتك

انا غلطت بحق نفسي وذاتي
غلطه بدت من يوم جبتك وضفتك

داخل خفوق حط حبك مناتي
كبرك في عيني وجيت وعرفتك

وصرت القريب اللي .. شتاته شتاتي
جرفتني كلي .. وكلك جرفتك

لكن خساره منت كفو لسواتي
اللي حصل بين رداك وكشفتك

تدري بصراحه ايش غلطة حياتي
اني نزلت لمستواك وعرفتك

ارفعك بيدي لسما





لاجيت افكر بالوجيه المفاليح
وفرقت بين الناس عالي و واطي

فكرت بك ضمن الوجيه المشافيح
متقلطن ببساط ماهو بساطي

علاقتي وياك تحتاج توضيح
من شفت في بعض الامور اختلاطي

مثلك خطا يحتاج وقفه وتصحيح
بين مثل تفريق ماخذ وعاطي

ربيت من صغري على هبة الريح
ولبست لي ثوبن كمومه اخياطي

يوم انت تلعب في يدين المراجيح
انا انطح الضيفان وافرش سماطي

ماعابني لاصرت ظمن المجاريح
اغلا جروحي بين الاظلاع ساطي

العيب لاسقت القدم دون تصريح
وخليتها بدرب الرديين تاطي

والمشكله انك تحرث النار وتصيح
اركد قبل لافك عنك رباطي

خابرك ماتبعد قريب المراويح
زايد عن العالم بكثر الهياطي

اكبر طموحك لاتعطرت بالريح
تطلع تمشى بين شاطي وشاطي

عندي سؤال وخابرن فيه تجريح
لكن ضروري تسمعه بأنبساطي

ارفعك بيدي لسما ترجع اتطيح
قلي شسوي فيك لا صرت واطي .؟

ليلة افراق




الليله هذي واضحه ليلة افراق
حاولت اعديها وعيت تعدي

اظروف ماتنطاق ولا راح تنطاق
صد القدر ماهو بصدك وصدي

تعال اخذني بين اياديك مشتاق
قبل انتفارق حط يدك بيدي

بجلس معك ساعه حبايب وعشاق
من بعدها كيفك ولو صرت ضدي

فيني خليط اشواق باشواق باشواق
واصل معك من كثرت الشوق حدي

ودي ألمك واحضنك حضنت عناق
ياشيب عيني كل ماقلت ودي

في خاطري ‍.. وش خاطري ؟ خاطري ضاق
الكون كله ضاق ماهو بقدي

حتى الدموع اللي استحت كبر واخلاق
تساقطت من فوق خدك وخدي

لوحة شعر تبكي على بيض الاوراق
بيحت فيها من ردى الحظ سدي

ليلة جفا وافراق مامثله افراق
حاولت اعديها وعيت تعدي

اضحك حبيبي


راسك علامك رافعه يوم احاكيك
الضاهر اني فوق حجمك عطيتك

لحظه .. نبي نرجع دقيقه لماضيك
بذكرك في أي حاله لقيتك

كان الضياع ودمعتينك تخاويك
منهار وفي عز انهيارك خذيتك

وارخصت عمري لجل احبك واداريك
هدمت قصر الذل فيك وبنيتك

كان الغلا شمعه تنور لياليك
لو اظلمت دنياك جيت وضويتك

يالاسف كنت امدحك وافتخر فيك
رفعت من شانك وعليت صيتك

كنت انت .. عندي غير مقدر اخليك
اموت واحيا ان قلت سم وفديتك

واليوم اشوفك خنت حتى مباديك
صغرت في عيني وانا اللي هويتك

الضيف لو انه عدو معاديك
غصب عليك تقدره وسط بيتك

ياصاحبي بتموت ماني براجيك
واشره علي انكان حتى طريتك

لاصار ذل النفس في قلب يغليك
يلعنك ياقلب عشقك وشريتك

اضحك حبيبي دام وقتك مسليك
بكره تموت من القهر لا نسيتك

فيني بدوي


لاتسئليني عن سبب ضيقة البال
مبطي وانا ماذقت طعم السعاده

ظروف خلت حالتي ماهي بحال
كافحت ليما مابقت بي إراده

بنيت لي في عالم الصبر تمثال
وباد الزمن تمثال صبري إباده

حاولت اوسع خاطري بلعب الاطفال
وكل ماسليت شوي ضاقت زياده

لو المشاكل حلها الدمع لا سال
استغفر الله .. صار دمعي عباده

لبكي بكا .. ضيقه ولوعه وغربال
مابكي بكا .. خوف وذل وشراده

يابنت .. وديار البدو عشب ورمال
ومسرى بليا شور كله جهاده

وانا سريت بوادي فوقه جبال
الحر ماشاف الشبك يوم صاده

فيني بدوي طبعه ورى الخير رحال
اكثر مقيمه فوق مركب شداده

يشد وينزل كل فتره بمنزال
قربه صعب جدا وسهل ابتعاده

ان قال فرقا .. ماتراجع اليا قال
ماتقدر الدنيا تكسر عناده

فينا الولد .. يسوا ثمانين رجال
فينا الكرم .. خلقه وسنه وعاده

وبالعشق اخذت اللي مواصيفها ثقال
في زينها ماهي بحاجة شهاده

حبيبتي .. مازينوها بسلسال
من زود ماتبرق تضيع القلاده

اسود شعرها .. للبست فوقه الشال
الشال الاسود .. ينصدم من سواده

ارجولها خلخال .. من دون خلخال
خلقتها لفت انظار .. ماهي عماده

لو نفترض مرت على شارع الجال
فاض البحر يشكي عليها وداده

الارض تهتز حدرها هز زلزال
زلزالهاتعشق حدوثه بلاده

فيها الحلا .. عايل على كلها عال
ان سولفت بالليل انسى رقاده

بس المصيبه حظك الشين لا مال
اليارقد يابعد والله قعاده

وانا مع حظي .. بعض ناس عذال
زادوا علي .. من النكاده نكاده

صحيح انا عايش .. ولو الحزن طال
الحمد لله والشكر والشهاده

الفضل لله .. عزني بكل الاحوال
ماذلني بحاجه تشمت إعباده

مير البلا ضيقات الوان واشكال
لاجني خلني طريح الوساده

هذ انا . ياناشدتني عن الحال
من كثر ضيقاتي نسيت السعاده

ملح القصايد


ملح القصايد حدني لشي مابيه
ووردت له حمل الركايب لحالي

له هقوة(ن) فيني ولي هقوة(ن) فيه
والغالي مايشره على غير غالي

اموت والله قبل اخيب هقاويه
لو احتمل شي(ن) يفوق احتمالي

انا من اللي ذراع الايام تلويه
جماعة(ن) مافرقتها الليالي

عمي وخالي للشرف راس ووجيه
من طيب مجنايه عمامي خوالي

ناس اتذكرها .. وهي ماهي هنيه
وناس اتناساها .. ولو هي قبالي

اشد طعنات الزمان وبلاويه
طعنت ضهر بيد الرفيق الموالي

بيت(ن) لفاه الضيف عيا يعشيه
يعل ماتلفي عليه الرجالي

الشعر تشتاق لخيالي معانيه
شوق القصايد للبيوت الجزالي

حقه علي .. مثل الخوي يوم اخاويه
ارفعه فوق النايفات الطوالي

لعيون من راسه على القلب راكيه
اللي فدا قربه حلالي ومالي

اني لسوي شي محد(ن) مسويه
ان شافه العاقل يصيبه هبالي

وان عودت يم الغلا شلون مغليه
لا صار له كل الغلا اول وتالي

يخطي على قلبي ولا قلت له ليه
وكل ماجرحني قلت له لا تبالي

فداه لو تل المعاليق بيديه
ثم حط له بين الحنايا مجالي

لجل يتخطا عروق قلبي برجليه
ويعضد يدينه بالضلوع متعالي

دامي احبه حيل .. واعشق طواريه
خله يتل القلب كل ما طرالي

ملح القصايد حدني لشي مابيه
و وردت له حمل الركايب لحالي

يا ناشدن ساحات الاعلام عني


يا ناشدن ساحات الاعلام عني
ارتاح من كتب الرسايل بالاقلام

مبعد عن الساحه وغثاها لأني
شاعر حقيقي ماني بحاجة اعلام

الشعر احسه قطعت انسان مني
كبرته بعيني على مر الاعوام

كتبت كل اللي احسه وكني
اترجم احساس المخاليق بالهام

ومن شفت جنيه لشاعر وجني
عرفت ان المسأله صارت أوهام

تركت شعار المجنن تغني
على لحن: ياشاعر الناس نيام

ولجروح قلبي قلت: في صمت وني
ماودي تسمعها الاماني والاحلام

ظنيت في شعري ولاخاب ظني
حشمته سواة الرجاجيل الاحشام

للمقفيه ماقلت تكفين حني
ادوس ماضيها مثل دوس الاقدام

و للشيخ ماقلت الركايب تعني
ازين اسلوب المدايح لحكام

وعن الملحن والطبل والمغني
حرمتها بحكم الشريعة بالاسلام

واليوم رد العلم للناس عني
وارتاح من كتب الرسايل والاقلام

مبعد عن الساحه وغثاها لأني
شاعر حقيقي ماني بحاجة اعلام

تَــمَّ بحـمد الله و تَـوفيقـه
أتمنَّـى أن ينَـــال اعجاب الجَـميع ..