10-16-2021
|
#21
|
حبايب قلبي والله اسعدتوني والله بتواصلكم وتفاعلكم اللي عجبني انتظروني شويات وتنزلكم احلى البارتات بامر الله
|
|
|
10-16-2021
|
#22
|
ماشاء الله عليك
بارت جميل جدا
وعوده حميده
اشقنا لك مره دجى
كتابتنا مميزه
ابداعتي ماشاء الله عليك
|
|
|
10-16-2021
|
#23
|
![](https://dso7.raed.net:451/files/12.gif)
![](https://mrkzgulfup.com/uploads/166414222812281.gif)
البارت السادس
:
عند راشد واليازيه :
اليازيه بعصبيه: انته تستهبل صح كيف ما قلت لها انك معرس شو يعني بتصدمها
راشد بضيقه: تكفين الله يخليج يا اليازية والله مب مستعد اقولها الحين بقولها عقب العرس
اليازيه بقهر: وانته قلت لثريا انك بتعرس
راشد يتنهد: لا بقولها الحين بتصل بها عسب ما تيلس تتصل بي كل شوي ...
اليازيه بضيقه: انا ماعرف انته كيف بتطلع نفسك من هالمصيبه فالع راسك بحصاتين
راشد بعصبيه: انا اساساً ماحب ثريا قلبي لمهره وانتي تشوفين حياتي وياها كيف قتلج زواجي من ثريا غلطه
اليازيه بقهر: وحمالها بعد بالغلط انته جنيت على نفسك يا راشد مب قادر تلقى حل لمشكلتك وغرقان بحبك لمهره لكن عقب بطيح على راسك وعقب لا تلوم مهره لوم نفسك وراحت عنه صوب غرفتها ...
تنهد راشد بقهر واتصل بثريا ردت عليه بتعب: هلا حبيبي
راشد بعصبيه وقهر : لاهلا ولا مسهلى ثريوه انتي شو سويتي فالموضوع
ثريا تتنهد: ماسويت شي ربيعتي قالت بتشوف عياده خاصه عشان بسوون اجهاض بس قالت لها دكتوره ٥٠٠٠ درهم على الفحوصات وفتح الملف والإجراءات اللي قبل عمليه الإجهاض و٥٠٠٠ بعد العمليه ..
راشد براحه: الحمدلله زين سويتي مب مشكله لووتبا ٤٠٠٠٠الف بعطيها المهم تنزله اللي في بطنج
ثريا بهم: الله كريم ان شاء الله
راشد : بكلمج بموضوع
ثريا بحب: امر فديتك
راشد: انا باجر عرسي
ثريا بصدمة :شوووو حلف قول والله
راشد يتنهد: والله العظيم باجر عرسي وانتي تدرين ان ابويه يباني لبنت عمي
ثريا تبكي: واناااا شو بيصير فيني
راشد بضيقه: انتي بلوى واابتليت فيها بعد شو اسوي وغلطه انا ادفع ثمنها وثمنها غالي وايد يا ثريا وانا ماريد اخسر ابويه واهليه عشان غلطه
ثريا: يعنننني شو ؟؟ بطلقني ؟؟
راشد يتنهد: كيف اطلقج وانتي حامل خليني اطمن اول انه نزل وعقب بشوف حل واذا ما طلقتج بتكونين بالسر ثريا انا مابا اتصالاتج تكثر انا الحين مب مثل قبل بروحي
ثريا بغيرة وقهر : وشو يعنى تخاف على مشاعرها واحاسيسها وانا طز فيني انته مب شايف نفسك ما تحس انك زودتها ويايه انا حرمتك بعد ولي حقوقي ومثل مالها انا لي بعد
راشد بقهر : ها من الحين بدت الغيره صح
ثريا بخنقه: بمووووت بعد من الغيره منو لي غيرك في هالدنيا يا راشد انا فتحت عيوني عليك تملكت قلبي واحساسي وتحملت جفاك وعصبيتك وبعدك شوف نفسك من متى متجاهلنى ومب معبرني وساكته عنك وغير الكلام اللي تعقه عليه لو بنت عمك تسوي كل هذا فيها ما بتتحمل ولا وفوق هذا كله بعد بتعرس عليه يعنى لو بنت عمك مكانى ما بتتحمل اللي انا اتحمله منگ
راشد رحمها وبهدوء قال: خلاص ماعليه اعتبري اللي بدر مني قبل ماضي وانتهى وببدا وياج صفحةً يديده اتعامل معاج بهدوء وبخصص لج وقت وبيي عندج بس كل هذا عقب العرس سمعتي ولالا
ثريا وهي تشاهق من صايح: ان شاء الله
راشد: يلا خلاص الحين اهدي وغسلي ويهج وتراج بتمين زوجة لي طول العمر اذا احترمتي خصوصياتي وابتعدتي عن الشر والغيرة الزايده ...
ثريا تمسح دموعها: زوجه على ورق بس ولا شو الفايده من تواجدي وانته بعيد عني
راشد بهدوء: ماعليه يا حرمة كل شي بيتحسن للاحسن ان شاء الله ان ما خيبتي ظني وتميتي على اسلوبج هذا بس ان سويتي لي مشاكل بيصير كلام ثاني
ثريا: لازم تقول لبنت عمك ان عندك زوجة عشان يوم تي عندي في ليلتي ما تتصل بك ولا تزعجنا
راشد بحده: اشوف تبين تسوين مشاكل من أولها ثريا الحين فكيني من الكلام خليني اتزوج واشوف زوجتي وعقب بقولها انى متزوج ...
ثريا بغيره وحسد وقهر : هههههه ماتدري المسكينه ان اول ضنا بيكون لك مني
راشد يتنهد بضجر: لا حول ولا قوة الا بالله العلي العظيم ترا قلنا بتسوين اجهاض
ثريا بقهر: اممم صح افكر بس عقب ماشوف العياده ..
راشد بضجر وضيقه: عارف انه ما فيج فايده وانج ما بتسوين اللي اباه بس عقب العرس انا اللي بيج وبوديج يلا الحين برايج..
ثريا بقهر مكتوم من الخاطر: مع سلامه وسكر راشد الخط بسرعه قبل لا يسمع منها أي شي ثاني وتنهد بتعب…
مبارك كان مصدوم سكر باب غرفته بهدوء وانسدح ع الشبرية وهو يفكر بمهره وحياتها مع راشد وفي نفس الوقت مصدوم ان راشد متزوج بالسر وخرت دمعه من عينه على خده يعرف ان مهره ما تستاهل اللي قاعد يصير فيها لكن تنهد بتعب وهو يحاول انه ينام...
في بيت بو سعيد
اما عند مهره فكانت تسولف وويا لطوف وشما خواتها
شما: تحسين بالحب اتجاهه..
مهره: صراحه ، لا صح انى أتكلم وياه وايي عندي واقعد معاه وكل شي بس الحب صراحه لا ما حبه كيف احبه وانا ما عشت وياه في بيت واحد لايغركن المظاهر وحبه لي انا ماقدر اسلم قلبي لاي واحد وعقب ينكسر لازم ادرسه زين عشان اعرف انه يستاهل قلبي فعلا ويستاهل حبي اما عن طريق الكلام مافي فايده لانه الكلام وايد بس احترام احترمه استحي منه ومن تودده وقربه لي استحي من جرأته وحركاته لي استحي من همسه ولمسه وقربه مني ..
حتى لو تلاحظن انى يوم اكلمه واسولف وياه كلامى عادي وياه مب غزل ودلع لاني ماقدر ادلعه وانا قلبي فاضي لازم امليه ...
شما بحب: فديت قلبج يا المهر الله يسعدج غناتى
مهره تبتسم: ويسعدكن كلكن يا خواتي والفال لكن ان شاء الله ...
شما: فديت روحج غناتي
لطوف تتنهد بتعب وصمت عقب كلام مهره عن الحب وحست بأن كلام مهره صحاها من غفلتها اللي هي فيه.
مهره تبتسم لهن وهي تشوف اغراضها وترتبها وهن يساعدنها...
اما في بيت بو حمد ...
اليازيه تكلم ودوم بنتها: انزين متى بتون باجر عرس خالج؟
ودوم وهى تضحك ع حمدان: ههههه أي وتكلم أمها والله ماماه ما عرف صراحه يمكن أي باجر الصبح أي حمدان خلاصص توبه ماماه شوفي حمدان الدب مايباني ابات عندكم باجر عقب العرس
اليازيه تضحك على ريل بنتها: عطيني إياه
ودوم تعطي حمدان التلفون: ماماه تباك
حمدان يضحك عليها : مرحبا الساع بعمتيه شحالج الغاليه
اليازية تبتسم: بخير ونعمه الغالي فديتك انته شحالك
حمدان: بنعمه ولله الحمد
اليازيه: صدق ما بتون باجر عرس راشد اخويه
حمدان: بني فديتج بس عالمغرب ان شاء الله
اليازيه: ليش ماتون من وقت احسن لكم عشان تريحون من الدرب
حمدان بحب: ماودي افارق بطتيه
اليازيه تضحك: انزين بات عندنا
حمدان وهو يحضن ودوم: لا عموه فديتج لا تحرجيني اذا هي خاطرها تبات عندكم برايها تبات بس انا بحجز لي في فندق واكون قريب منها ...
اليازيه تنهد براحه: ع راحتكم الغالي كيفكم المهم انكم تكونون مرتاحيبن ..
حمدان يبتسم بحب وهو يبوس ودوم ع خدها وقال: ان شاء الله الغاليه فديتج ما يهمج
اليازيه : يلا عيل الغاالي في حفظ الله
حمدان : ودعتج الله.... وسكروا الخط ...
تفاجأت اليازيه بدخول راشد عليها قعد ع الشبريه وقال: ظنج يا اليازيه انى مجرم
اليازيه تتنهد: حبيبي راشد ازهاق روح حرام والله اللي عطاك هالياهل وبعدين انته يبته من الحلال مب الحرام عشان تعقه انا بس خايفه من فعلتك انك لو اجهضته يعاقبك االله
راشد بضجر: يعني انتى من صدقج بخلي حد من عيالي بعيد عن عيني يربى ولا يعرفني ولا اعرفه ويتم مجهول
اليازيه: حبيبي راشد عارفه قدر مهره عندك وانك تحبها وماداني حد يخرب بينك وبينها بس انا أخاف من ربي يعاقبك اذا سويت فعلتك هاي فرض باجر يعاقبك بان مهره مافيها عيال او انه يادبك انته بفعلك هاي ويخليك انته عقيم تكون خسرت نفسك وخسرت حرمتك وضناك من ثريا
راشد تنهد بضيقه : والله يا اليازيه ان مهره تسوى عيوني واحبها واموووت عليها وماقدر اصدمها فيني ما اتحمل اشوف نظرة الانكسار في عيونها ترا والله ما بسامح نفسي وانتي تعرفيني زين
اليازيه تتنهد بضيقه: سكت بالله عليك انا بروحي ما بسامح نفسي لانى من دريت كان المفروض أتكلم واوجهك بس مادري شياني سكت قلت هو ريال وبرايه يتصرف حر في حياته بس للأسف يا راشد انا اشوفك تخسر حبك وتخسر نفسك وانته توك مابديت حياتك يكفي انك فرحان فيها لكن والله صعبه يا راشد جان صارحت مهرة بشي اللي سويته لا تعالج الغلط بغلط اكبر منه
راشد بحيرة: يعني انتي تشوفين ان زواجي من مهره غلط
اليازيه تتنهد: الواضح جي يا خوي
راشد يتنهد بضيقه: زواجي من ثريا غلط اما من مهره فزواجي منها عين الصواب مهره محد يحبها كثري ومحد بيسعدها كثري تكفين اليازي لا تخربين فرحتي
اليازيه تحضنه: فديتت عمرك يا الغالي والله اني احبك وأتمنى لك الحياه السعيده ويارب يسخر مهره لك في كل امورك وتكون لك عون في كل امورك يا الغالي
راشد يبتسم: يارب العالمين يا الغاليه أتمنى من الله انه يسر خاطري وخاطرها ويألف بين قلوبنا ويقربنا من بعض اكثر ولا يفرقنا عن بعض
اليازيه تبتسم: امين يارب العالمين والله من قلبي أتمنى لك حياة هاديه وسعيده
راشد يشوف الساعه اربع وربع الفير سار قسمه بيرقد شوي بس ماهنا له بال يرقد اتصل بمهره وردت عليه من ثاني رنه: هلا والله
راشد يبتسم بحب: صباحج حب يا اغلى من في الوجود
مهره تبتسم: صباح النور ورضى من الله
راشد يتنهد وقال: كيف النفسية
مهره تتجاهل سواله وقالت: من شو هالضيقه اللي فيك يا راشد
راشد انصدم من سوالها واحساسها وقال بهمس:ضيقه؟؟؟
مهره تبتسم: هي عبالك فاقده الإحساس تراني اعرفك من نبرة صوتك واحس انك شال هموم الدنيا على راسك فيك شي
راشد متضايق ومتكدر لهدرجة هي تحس فيه رد عليها وقال: مهره ما تحسين ان من ملجنا ما اسمع منج كلام حلو كله رسميه ويايه
مهره تبتسم: وهذا اللي مزعلنك شي طبيعي يا ولد العم الحب مايي الا بعد الزواج والعشره
راشد يتنهد بضيقة قال: بس انا احبج واموووت فيج ومن زمان بعد ما ترييت العرس ايي عشان يجمعني فيج واحبج يا قلبي
مهره تبتسم: لانه انته اللي بديت وقلبك تحرك صوبي لو مب قلبك وحبك لي ما كان انته اليوم لي صح ولالا
راشد يتنهد بضيقه: صح كلامج بس كنت أتمنى اشوف الحب في عيونج
مهره تتنهد ووببتسامه قالت : بي الحب انته ليش مستعيل صعب ااسلم قلبي بسهوله يا راشد
راشد بضيقه: يعني لو شفتي مني شي يكدر بالج ما بتحبيني
مهره: راشد بقول لك كلام وفهمه زين وريح بالك انا عندي إحساس ان في شي شاغل بالك ومضايقنك بس سمع كلامي الحب مب كل شي في الحياه الزوجيه التفاهم والاحترام والثقه اهم الأشياء بين الزوجين وبعدين الحب بي بروحه يا راشد لا تعذب قلبگ مردي تراني لگ وانته الوحيد اللي في حياتي وباجر لو استوى بينا شي لا قدر الله يكون بيني وبينك مب لازم الكل يعرف ولو شوه ما تسوي يا راشد تعال عندي وقول وتاكد اني ما باخذلك في شي مهما كان صغير او كبير ترى لا يروح تفكيرك بعيد يا بو سنيدة ما يستاهل شي ضايق فيه عمرك
راشد يبتسم: والله يا مهره انج تشلين الاعواق
|
|
|
10-16-2021
|
#24
|
حبيبتي ضاميه والله انا بعد اشتقت للكتابه
|
|
|
10-16-2021
|
#25
|
![](https://dso7.raed.net:451/files/12.gif)
![](https://mrkzgulfup.com/uploads/166414222812281.gif)
البارت السابع
:
مهره: شو اللي مضايق بك وما خلاك ترقد لين الحين يا ولد عمي
راشد بهم: ماشي بس شوي تعبان
مهره: سلامتك من التعب جان عشان الحب صدقني الحب بي بروحه والله من دون شعور
راشد يحاول يهون على نفسه : مهره والله انس روحي بتطلع احس اني مخنوق
مهره: يعل الضيقه فيني ولا فيك ليتها ما تعرف دربگ ...
راشد: فددداج انا يا روح روحي
مهره: انته استانس اليوم كلها ساعات واكون قربك باذن الله لا تكدر بالك عاد اليوم لازم تكون اسعد شخص في الدنيا ...
راشد بصدق: والله اني اليوم اسعد مخلوق فالدنيا ما دامني قربج بس حسيت اني متضايق
مهره تبتسم: مب لازم الضيقه تيك اليوم تجاهلها وخذها مني عهد ووعد يا راشد والله لو يدور بيني وبينك أي شي صدقني يا بوسنيدة مب مهره اللى تخذلك راشد لو تجرم ما بخليك فهمت ريح بالك وماضيك بالنسبة لي ما يشكل أي أهمية اللي يهمني الحاضر يا راشد خلاص ارتاح لازم ترتاح نفسيا خذها مني وعد قطعي ع عمري انى ماخليك عشان ماضيك وصدقني راشد بكون لك مثل ما تبا انا عارفه ان كل ريال وراه ماضي وبلاوي زرقا بس ارتاح من هالناحية مب مهره اللي تخذلك ان ما كنت لك عون وايد تشل عنك الثقل ما راح أكون اليد اللي تخذلك صدقني وانا قد كلامي
راشد طار عقله بكلامها وارتاح وبصدق قال: عساني ما انحرم منجج فديت قلبج والله اني ارتحت الحين
مهره بصدق: عسى دوم يارب
راشد بحب : وياج يا قلبي
مهره تبتسم: هممم ما تبا تنام
راشد: عقب ماسمعت هالصوت وكلامج اللي يداوي القلب برقد وبرتاح بعد
مهره تضحك: عله رقاد العافيه يارب
راشد: يعافيج يا روحي فداعة الله
مهره: في حفظه ... وسكروا الخط
ومر الوقت سريعاً ودخل وقت المغرب وكانت مهره جاهزه باجمل منظر واحلى طله الفستان سكري ومخصر على جسمها والمسكه طايحة على ايديها وحناها وميكبها وتسريحتها باختصار كانت لا توصف دخل راشد وتصور وياها وهو الفرحه مب سايعتنه وحضنها بحب وهو يقول: وأخيرا الليلة انتي لي
ابتسمت بحيا على كلامه ورفعت راسها له انبهر بجمالها ولفها بين ايديه وهمس بعشق : اه يا مهره سلبتي عقلي وقلبي فديت حضنج وفديت قربج كم احبج يا بنت عمى احبج حب فاق الحدود واعشقج عشق القلب للجنون يا جنوني انتي
ابتسمت وهي بين حضنه وقالت: الله يبارك في أيامنا ويجعله زواج مبروك
راشد وهو بعده حاضننها: امين يا عمري ومبروك عليه انتي ومبروك عليج انا يا قلبي
مهره تبتسم: الله يبارك لك ويبارك فيك يارب ...
في القاعه ...
اليازيه وشما واقفات عند استقبال الحريم ... سلامه ولطيفة وودوم عند الطاولة اللي عدال الكوشه
لطوف تكلم ودوم: ياربي فديت البطه انا ولهنا عليج يا دبه
ودوم تضحك: ههه لا تقولين بطه والله تحسسوني متينه
لطوف : لا بسم الله عليج انتي ضعيفه عيل
ودوم تضربها على جتفها: يا دبه هالمتن متن حمل بعدين من اربي كل هذا بيروح وبتشوفوني غزال
سلامه تضحك: امبونج غزال بنت شهاب ما تخربين
ودوم: افداج خالوه يسلم منطوقج
سلامه: فدى الحلوه انا بنت اختى
ودوم تضحك:ما عليج زود خالوه
شوي وحضرن الريم والعنود وعهود بنات خالة لطوف اخوات مايد سلمن على البنات ويلسن ع طاوله
لطوف تكلم عهود: وين هالغيبه عنبوه من زمان عنكن
عهود : بعد شو نسوي فديتج الدنيا مشاغل الله يشغلنا بطاعته ولا يشغلنا بغيره
لطوف تحضنها: بعد عمري انتى حبييبة اخوى
عهود تضربها على كتفها بخفيف: يا دبببه محد بيكشف اوراقي الا انتى
لطوف تيلس عدالها: في ذمتج حبيبته ولالا
عهود تتنهد: والله مادري به بس هو بالنسبة لي حبيبي
لطوف تغمز لها: وانتي بالنسبه له حبيبته
عهود قلبها دق واستحت وقالت للطوف: مايندرابه اخوج الا تعالي صدق انتي علوم الحب وياج
لطوف تبتسم: ههههه انتي تدرين اني من زمان اكلم مايد عشان يشل الهكر من تلفوني ويرد ايميلاتي من خطبني استويت مودبه
عهود تضحك: هي قالي مايد قال من خطبتها ما سمعت صوتها
لطوف باحراج: ههههههههه ياختي فشله قبل الخاطر مافيه شي الحين كل شي انكشف لازم اصطلب
عهود: تدرين انه بيملج بج قريب
لطوف بصدمه: قولي والله
عهود: والله قالي اليوم ونحن يايين فالدرب وامي مستانسه قال بيكلم خالوه باجر هي تعالي انا ما قلت لج بنبات عندكم
لطوف بفرحه: مرحبا الساع والله تنورون البيت
العنود من وراها: منور باهله يا حلوه شو عندكم مجابلين بعض وناسين العرس
لطوف تضحك: ولا شي بس يالسين نرمس عن مايد وعلومه
العنود تضحك: هي العوق عند مايد
لطوف ابتسمت بحيا والعنود قالت: بيموت ويشوفج
ضحكت لطوف عليها والعنود قعدت عدالها تصورن السناب وطرشته لمايد ولطوف هزبتها وهى تضحك عليها ...دخل وقت العشا وصلوا العرب وقرب الساعه ١٠ ونص بندت ليتات القاعه وبدت تشتغل الموسيقى ويهيئون الزفة ..
ورى الكوشة نايف ماسگ مهره ويبتسم لها من سمع زفة رفعت مهره عيونها له وبانت ملامح الخوف والربكة نايف قال: هدي مهره فديتج ليله وبتعدي لا تتوترين
هدت ملامحها وقالت: لا تفجني
نايف يمسكها بيرقيها الدري ويرفع فستانها رفعت ريلها وهي تركب الدري ونايف عدالها ماسكنها لف عليها وقال: ابتسمي فديتج خلي الخوف عنج مايسد انج تشوفيني عدالج
ابتسمت مهره بحب ع كلامه طالعته وعقب بدت طالع الحضور وتتلفت وتمشي وتزيد ابتسامتها يوم طيح عينها على ربيعاتها وخواتها وبنات خالتها ..
نايف بحب: نزلي المسكة شوي ورفعي راسج بشموخ وانتي طالعين خليج واثقه من نفسج تراها سويعات وتعدي
ابتسمت ع كلامه وضحكت غصبن عنها ابتسم على ضحكتها وباسها بين عيونها وقال: الله يحفظج الغالية
مهره تبتسم : ويحفظك الغالي عقبالك يارب
نايف: الله يسمع منج يارب
مهره طالع صوب أمها وخالتها وخواتها وبنات خالتها وبنات عمها وتبتسم سمعت نايف يوم يقول: خذي شهيق طويل وبعده زفير عشان توتر يخف
مهره تسوي نفس ما قال وحست براحه تغمر صدرها وردت دورعلى الكوشة متجهة صوب الكرسسي ..
نايف : بفجج مشي شوي شوي وانا عدالج اوك
مهره تبتسم : اوك
بعد عنها شوي وعدل غترته ولف ع طرف الكوشه وشاف لطوف تاشر له قرب منها ووخى عليها وهو يقول: لبيه
لطوف تبا تعرف في خاطره شي صوب عهود ولالا قالت باحراج: لبية في منى فديتك خلاص عنى فداك بس كنت بقول نبا نرقص قبل لا يدخل راشد
نايف يضحك: يلا غايته دامني موجود تعالي رقصي
لطوف: حتى بنات خالوه لطيفه يبن يرقصن مب بروحي
نايف يضحك: انزين عادي خليهن يرقصن عشان اتنقى لي عروس ما يصير ياختيه لين اليوم اخوج بلا حبيبه
ضحكت لطوف وهي تقول: ياويلي ان درن بك بيجحوتني
ضحك نايف ومسك لطوف من ايدها وهو يقول: تعالي رقصي ورفجه تين تعالي ركبي
لطوف تضحك ع نايف اللي ركبها الكوشة وساروا عند مهره اللي واقفه عالكرسي وحطت الباقه على طرف الكرسي وتضحك عليهم ونايف راح عند دي جي وقالهم يشغلون حربية انا المغرم انا الهاوي ...
وبدا يوول نايف ولطوف ترقص وياه والعنود تصور فيديو وطرش لمايد اللي حاشرنها حشره ونايف يضحك ويا لطوف لف صوب طاوله يدور شما طاحت عينه في عين عهود اللي استحت ووخت بحيا اما نايف قال للطوف بهمس: منو اللي يالسه عدال سلامه بنت عمي
لفت لطوف وشافت عهود قالت بوناسه: هاي عهود بنت خالوه لطيفه
نايف ابتسم: وانا أقول جمال خطيبج من وين العايله كلها جميله شكلها انتاج خالتي وايد حلو
ضحكت لطوف عليه بالقوو وقال: زقري شما وشوي انه سعيد داق لنايف رد عليه: هلا
سعيد: دخيلك حشرنا راشد يبا يدخل خلصتوا ولالا
نايف يضحك : والله مبسطين الغالي يواله ورقص خواتي والحين بيرقصن بنات الخاله بطلع انا وعقب بنددخل رباعه
سعيد يضحك: تمام دور على عروس لا تنسى وانا لاحقنك
ضحك نايف وهو يلف على طاولة يبا يلمحها بس ما شافها تفاجا فيها راكبه على الكوشة هي وشما والعنود والريم ولطوف وياهن قربن من مهره وسلمن عليها وتصورن وياها نايف سمع سعيد يقول: الو ضاعت علومك شكلها يا ولد امي وابوي وسكر ماسمع رد من نايف ..
نايف كانت عينه على عهود ولاحظ توترها ومن شافها مختبصه عرف ان الحلوه ميته فيه اطمن على نفسه وابتسم بينه وبين نفسه يوم شافهن نزلن دق لسعيد وقاله تعال انته والمعرس ونزلن خواته وشوي ودخل سعيد وراشد اللي الأرض مب شالتنه من الفرحه باس مهره على راسها : مبرووووك ي قلب راشد
مهره بحيا: الله يبارك فيك
سعيد قرب من مهره وسلم عليها: مبروك فديتج
مهره: الله يبارك فيك الغالي وعقبالك
سعيد: ان شاء الله
نايف دخل ابوه وعمه وهو يضحك عليهم وخلاهم يسلمون على المعاريس وعقب مسك ابوه ويلس يرزف وياه على الكوشه وسعيد مسك عمه ورزف وياه ويلسوا يرزفون والفرحه ماليه عيونهم وقلبهم ومهره وراشد مستانسين عليهم والحريم مبسطين على نايف وامه كل شوي تقرى عليه في خاطرها وتستودعه الله من رمسات الحريم شافها نايف عند طاولة خواته وبنات خالته نزل من ع طرف الكوشه صوبها ويبس قدام امه والبنات ميتات عليه وعهود ترفع عيونها شوي وترد تنزلهن بتموت عليه تغااار شافته يمسك أمها وامه ويوديهن فوق الكوشه ويمسكهن بيديهن ويرزفن وياه وشاف عمته ام راشد ونزل ويابها وخلاها ترزف وياهم واستوى الجو كله فوق الكوشه ونايف ما شاء الله عليه كان ماكل الجو والكل يطريه ويطري جماله وجرأته وربشته هو الوحيد اللي اربشهم مسكته امه وتمت تقرى عليه باسها على راسها وساروا صوب مهره وتصوروا وتصور وياهم وعقب نزلوا سعيد ونايف عشان بنات عمهم وركبن اليازيه وبنتها وديمه وسلامه وسارن صوب مهره وراشد ...
اليازي تسلم على اخوها وتحضنه: مبروك يا عمرى زواج الهنا يارب
راشد يبتسم: يبارك في عمرج فديتج امين يارب
ودوم تحضن خالها: مبروك خالي فديتك منك المال ومنها العيال الغالي
راشد يبادلها الحضن: الله يبارك فيج كروشه امين الله يسمع منج يا الغاليه من زمان عنج فديتج
ودوم تضحك: شو نسوي فديتك مالنا باليد حيله العرس وما يسوي عني فداك
راشد يضحك: الله يوفقج ويسهل عليج يارب الولاده
ودوم: امين يارب العالمين فديت دعوتك وراحت تسلم ع مهره وتحضنها: مبروك يا بنت العم عني فداج
مهره تحضنها وتبتسم: الله يبارك فيج يا قلبي
ودوم تبتسم: الله يسعدكم يارب
مهره تبتسم: امين غناتي ومن يقول
سلامه تحضن اخوها: فدا قلبه انا الغالي عله زواج العمر والهنا يا قلب اختك
راشد يحضنها بحب اخوي : يا قلببي قلباه يا الحساسه الله يسمع منج يارب
سلامه خانفتنها العبره: فديت عمرك يا راشد عسى السعاده تخاويك في حياتك يا قلب اختك والله يبارك لك في هالزواج يارب العالمين
راشد بدفء حضنه: آمين يارب العالمين لا تصيحين فديتج عقبال ما افرح فيج وازفج بيديه الهنتين ...
سلامه: افداك يا خوي عسى الهم والضيق ما يعرف لك درب
راشد غمض عيونه بدعوتها ومسح على راسها وهو يبتسم وقال: امين يارب العالمين
بعدت عنه وحضنت مهره وهي تبارك لها وتصوروا عندهم شوي وانتبه عالساعه ١:٠٠ وطلعوا من القاعة المعاريس اول يوم في الفندق ... لطوف وبنات خالتها ساروا البيت .. ودوم وريلها حجزوا فالعين وباتوا... اليازيه وخواتها سارن البيت يريحن.. مبارك من خلص عرس رياييل يا البيت وهو يفكر كيف شاف الفرحه في عيون عمه وعياله وابوه وامه وعمته وراشد هذا بروحه حكاية مصدوم من اللي سمعه وعرفه يطالع راشد ويشوفه عادي ولاكأن فيه شي ويشوف الفرحة في عيونه ومبارك شال هم الدنيا على راسه كيف تنزل روسهم في تراب وكيف عقب بتجابلهم يوم بتيب ضناك وكيف بتسلب فرحتهم وفرحة مهره تنهد بضيق مب عارف شو يسوي ... حمد حاول انه يتجاهل شعور الذنب اللي يحس فيه كل ما يشوف لطوف في بيتهم .. مايد واخوانه راقدين في الميالس ..عهود وعنود راقدين في حجرة مهره ... الريم راقده في حجرة لطوف ...وشما راقده في حجرتها... نايف في حجرته .. سعيد في حجرته..
بعد مرور أسبوع عالعرس راشد ومهرة من خمس أيام مسافرين النمسا والييوم طلعوا على المانيا بيقعدون كم يوم وبيرجعون ...
في المانيا وعند الملاهي بالتحديد راشد يلعب ويا مهره ويخوفها في لعبه وهي متقبضه فيه وتحاول انها ما تصارخ ولا تشوف شي وهو يضحك عليها حضنها بيده وقربها منه باسها على خدها وقفت اللعبه ونزلوا مهره باحراج: اصطلب مب قدام الناس
يضحك راشد بعناد ويرد يبوسها على خدها طلعوا يتمشون وهو ماسگ ايد مهره: احبببج
مهره تبتسم وشدت على مسكة ايده وحطت راسها على جتفه وقالت: للسعاده عنوان وانته بدايتها لف عليها بحب وسحب ايدها وباسها بالقو وهو يقول في خاطره يارب ما يخيب ظنج فيني يا مهره بموت لو صار فيج شي بسببي وتنهد
مهره تلفه صوبه: شو سالفة هالتنهيدة يا راشد في شي شاغل بالك
راشد يطالع عيونها وبصدق:هي والله انتي يا قلبي اللي شاغله بالي وافكر بج وانتي قربي
مهره بحيا: وانا وين اروح من طيب كرمك يا الغالي ومن معدنك هالطيب مافي منك اثتين في الدنيا انا متاكده
راشد اللي اعجب بكلامها شلها ودار فيها ووعقب نزلها وقال بحب: احب كلامج يريحني وايد يثلج صدري والله عني هبلاج
مهره : تصدق راشد اشوف الحب في عيونك وافعالك الله يقدرني واكون لك مثل ما تبا
راشد ماسك ايدها: يارب تحبيني بس هاي اول امنيه
مهره تضحك وباسته على خده وهي منحرجه وبهمس: ليش تحاتي الحب وايد اهم شي اني مرتاحه وياك فديتك
راشد اقشعر جسمه من همسها وغمض عيونه قربها منه زود وقال: وغلاتج انج مذوبتني ورايح فيها..
انحرجت مهره وهي تشوف شكله كيف استوى وصلوا الفندق وساروا شقتهم اول ما وصلوا باب شقتهم فتح الباب راشد دخلت مهره ودخل وراها ولفها صوبه وحضنها ابتسمت مهره وهي في حضنه: انته مافيك صبر ما تتحمل مني كلمه ولا همسه على طول تذوب وتروح فيها
راشد منغمس في حضنها ومغمض عيونه: يالله لا تتخبرين يا قلبي انتي لو حبيتيني مادري شو بيصير فيني اذا همسج ولمسج يوديني في ستين داهيه ....
مهره باحراج تبعد عنه وبهمس جنن راشد:،انته أصلا خليت فيني عقل ولا انته تخلي الواحد يفكر ماخليت لي مجال للتفكير يا ولد العم بسرعه تدخل القلب أسبوع بس شفت الحب في كل شي في كلامك في فعلك في نظرتك في لمستك ماخليت لي مجال افكر بسرعة ادش القلب يا راشد اسلوبك ويايه خلاني اغير رايي في الرياييل يعني الريال يقدر بخلي الحرمة تحبه في ساعه وحين بس انته توددك لي من يوم الملجة لين اليوم وانا ماشوف حبك تغير لي بالعكس اشوفه يزيد رغم اللي اعرفة انهم يقولون الريال في الملجة غير وبعد العرس شخص ثاني ويهه ثاني يطلع عقب العرس
راشد بحب: مب كلهم واحد انا احبج من زمان وانتي تدرين شو صار فيني يوم رفضتيني وشفتي فرحتي يوم وافقتي عليه بالنسبة لي كان يوم عيد
مهره تبوسه ع خده: فديتگ الغالي عسى ايامگ كلها أعياد يا اغلاهم
راشد اللي ذايب بكلام مهره ومستحاها قربها منه وباس شفايفها لاحظ ان مهره خذت عليه وايد وعايبنه الوضع بعدت عنه مهره باحراج وهي تقول بمستحى: انته مافيك صبر لين نوصل الحجره ضحك راشد وقال: خلي فيني عقل اول انتي بعدين قولي مافيك صبر
ابتسمت باحراج وهي تبعد شيله عنها وتفج اللبس شافت راشد يدخل الحمام وشال ملابسه شلت اغراضها وراحت الغرفه ثانيه اتسبحت وتعطرت ولبست قميص نوم طويل احمر مع دانتيل من على الصدر وشفاف من تحت وفوقه روب ولبست سليبر وطلعت وهي شاله ثيابها اللي بطلتهن ودخلت الغرفه حطتهن في كيس وربطتهن وحطتهن في الشنطه طلعت كريمات وعطور ورشت عمرها وحطت من الكريم على ايديها وويها وفتحت البوكس الصغير وطلعت دهن العود وحطت ورى اذنها شوي ومسكت عطر الشعر ورشت على شعرها ردته في البوكس وحطته في الشنطه ولفت بتروح صوب التسريحه وشافته قدامها فاتح ايديه حقها استحت مهره وتقدمت له ببطء ويهها محمر من جرائته وهو يضحگ عليها حضنها بحب وقال: شو سويتي فيني يا مهره والله مب قادر ارد نفسي عنج والله يا غناتي
مهره بين ايديه بس تبتسم حست بعيونه اللي تحرقها حراق وتتفحصها دفنت ويهها بحيا ع صدره وهي تقول: رحمني دخيلك من نظراتگ
شلها بين ايديه وسدحها عالشبريه وهو يقول: حلالي وكيفي ولا عندج مانع يا عمري
مهره بحيا من نظراته حطت ايديها على عيونه وقالت : عيونگ نظراتها تأسر الواحد وانا مابا أكون اسيرت عيونگ
راشد بحب وصدق: ليش ؟؟
مهره تلف ويهها صوب ثاني: بس جي
راشد يبوس رقبتها ويسسمع تأوهاتها : فيه سبب ولا مستحيل تقولين لي هالرمسه وانتي خاطرج مافيه شي
مهره تضحك: بعدين بقول لك الحين استمتع بجوگ وعقب بقولك
راشد بذوبان: أصلا انا احاسيسي كلها لج وقلببي لج ريحي بالج محد بياخذ مكانج
مهره ارتاحت من كلامه وحست بشفايفه ع شفايفها وتمت تبوسه بحب وتخلل شعره بصبوعها وتتأوه بحب من حرارة أنفاسه ودفء حضنه وداعبه بطريقتها جننت راشد قلبت كيانه وراشد يتاوه بحب وهو يقول : احبج واموووت عليج انتي بالنسبة لي كل شي ولا حياة لي بدونج
مهره مستمتعه بكلامه وراشد هيمان فيها وذايب وناسي الدنيا بوجودها لدرجة ان تلفونه لين اليوم ما فتحه ولا افتكر فيه عشان ماتزعجه ثريا ويبا يستانس بحبه الوحيد ... بعد مرور أيام راشد ومهره بيردون الامارات وفي المطار يتريون النداء على رحلتهم ...
راشد بحب يقعد عدالها ع الكرسي : حبي ليش هذاك اليوم قلتي لي مابا أكون أسيرة عيونك
مهره بمستحى وبتردد وخوف قالت: امممم شو تبا تعرف
راشد يمسك ايدها ويشد عليها قال: أبا اعرف اللي في قلبج
مهره بخوف منه قالت: عشان ما تشوف غيري ويحلالك الجو في عيونك
راشد ايتسم وقال بصدق: والله العظيم انه قلبي لج وعيوني ما تشوف غيرج واحبج حب ما يعلم فيه غير الله ...
مهره بجرأة: انزين قولي عن اللي في قلبك الشي اللي مضيق بك ومسبب لك هموم الدنيا على راسگ وكل شوي تتنهد ..
راشد بضيق: صدقيني يا مهره وجودج عندي في الدنيا هاي كلها مغنيني عن كل شي ودامج بقربي انا اسعد انسان
مهره تحط ايدها على ايده: تأكد يا الغالي ان صوتگ يوم كلمتني الصبح يوم عرسنا لين الحين يتردد على مسامعيه أحاول اميز نبرة صوتك وسبب الضيقه مالقيت سبب يخليك ما ترقد في هذاك اليوم الا اذا كان سبب قوي ومنعته عني لاسباب خاصه فيك بس على كلن راشد انا مستحيل اتخلى عنك واذا فيك شي أتمنى تقولي واوعدك انه يكون بيني وبينك ومحد يدري عنه نهائيا..
راشد يتنهد وشد على ايدها: مافيه موضوع ولا فيه شي انا اتنهد لسبب واحد بس اني مابا انحرم منج واني مابا اكون سبب ضيقتج في يوم من الأيام فهمتي
مهره بصدق: فديت روحك يا الغالي عنبو يا راشد لا تفكر جي لو مهما صار بينا مشاكل او سوء فهم لا تفكر انى ببعد عنگ وبخليك واذا تفكر ان أي مشكله بتواجهنا بقول لك طلقنى فانته غلطان انا مب شرات باقي الحريم راشد اباك تعرف شي واحد دام ارتبط فيك ما راح يهمني أي مشكله تواجهني فهمت شوي ريح قلبك والله انى عارفه ان قلبك مشغول ويهويس بس انته خايف من شو
راشد بضيق: أخاف اخسرج واخاف اطيح من عينج واخاف حياتي من بعدج يسودها ظلام وسواد فهمتي من شو خايف الحين ...
مهره بحب ترص على ايده وبهمس قالت: انته مسوي جريمه عشان تخاف انك تخسرني ؟! انته مطالب قانونياً ؟ انته كاتب على نفسك شيكات بدون رصيد ومتبهدل؟
راشد يطالعها وبصدق يقول في خاطره ياليته صدق انى مطالب وعندي ديون ولا انى اصدمج عقب بزواجي اه الموضوع اكبر من جي تنهد وسمع صوت النداء على رحلتهم قام وقامت مهره وياه وقال ببتسامه: ماعليج الامور طيبه بس شوي ضغوطات في الحياة والدوام
مهره تبتسم له وترص على ايده: يعلني ما ذوق حزنك
راشد بصدق: ولا حزنج يا غناتى ... وتوجهوا لطياره ...
|
|
|
10-16-2021
|
#26
|
![](https://dso7.raed.net:451/files/12.gif)
![](https://mrkzgulfup.com/uploads/166414222812281.gif)
البارت الثامن
:
في الامارات عند بيت اليازيه تكلم مبارك اخوها: وانته شدراگ
مبارك بقهر: سمعتكم هذاك اليوم تتكلمون قدام غرفتيه انتي واخوج وكنت بطلع بس من فتحت الباب وسمعت سوالفكم رديت على غرفتيه سيده
اليازيه تتنهد: بس مبارك فديتك لا تخبر حد الحين انا وانته اللي ندري بالموضوع بس تكفى ياخوي طلبتك لا تقول لحد
مبارك بعصبيه: لين متى لين تربي الحرمة وتييب ياهل لراشد وعقب تصدمون امايه وابويه وتصدمون مهره انتي تعرفين شو بيصير فيها لو عرفت اليازية الله يخليج فكري بعقلانيه سكوتكم عن الموضوع غلط واكبر غلط تسونه ما تبون تصارحون مهره وهليه بالموضوع ليش
اليازيه بتوتر: لانها رغبة راشد مايبا يخسر مهره
مبارك يقعد على الكرسي بعصبية وبقهر قال: هو أساساً قاعد يخسرها من دون شعور ولا إحساس
اليازيه بضيقه: والله قلت له يا الغالي والله قلت له بس هو بنفسه مب عارف كيف يطلع من هالمشكله
مبارك بعصبية: طبعا ما بيعرف يطلع منها لأن أيد وحده ما تصفق لو هو يأ وشاورنا جان عرفنا نحل الموضوع ونتصرف ...
تنهدت اليازيه بضيقه وسكتت عقب قال مبارك: انا بسير البيت الحين ويوم بي راشد لي كلام وياه
اليازيه : دخيلك يا مبارك لا تتصرف بتهور وتدخل بينهم حرام تفرق بينهم
مبارك بحده قال وهو يلف عليها ويجابلها ويه بويهه: يا سلاااااام ومب حرام انكم غاشين البنت وسااكتين صح كلها كم شهر واوراق راشد بتنكشف وبعدين مهره شو بيصير فيها كلام الناس بيرحمها نظرتكم لها شو بتكون شفقه احساسها بخيانة راشد وتزعزع الثقه اللي بينهم تفتكرين انها بترد عقب تسلم قلبها لراشد وبكل ثقه ليش ما تفكرون في عواقب الأمور وتتحسبين هالبنت بتخلي مهره في حالها عقب ماتيب ياهل لراشد شوفي شو بتسوي فيها وبتذكرين كلامي عقب وبتقولين صدقه مبارك ..
تنهدت بتعب وهي تقول: يعني في نظرك شو الحل
مبارك تنهد وزفر بقوه وقال: يبالها تفكير طويل خليني اروح البيت الحين وعقب يصير خير
اليازيه: اوك فديتك الله يحفظك وعن سرعه غناتي
مبارك يتجهه للباب : ان شاء الله ... وطلع عنها اماا هي تنهدت ودعت الله يسهل الأمور ..
في بيت بو سعيد ..
ام سعيد تكلم لطيفه: انزين واستلم نتايج الفحص
لطيفه: هي فديتج خلاص استلمهن امس
ام سعيد: الله يوفقكم يارب فديتكم
لطيفة بهدوء: امين يارب
دخلوا سعيد ونايف : سلام عليكم
ام سعيد ولطوف: وعليكم السلام
سعيد يبتسم: مبروك لطوف
لطيفه منزله عيونها بمستحى منه : الله يبارك فيك الغالي
نايف يحضنها: مبروك فديتج
لطيفه: يبارك فيك حبيبي ومبروك لك انته بعد الغالي
نايف : الله يبارك فيج فديتج
ام سعيد بفرحه: الحمدلله اللي الله هداكم وقلتوا بنعرس
سعيد يضحك: هي عشان بنات اختج فرحانه ولا عشان عيالج
ام سعيد تضحك: كلكم عندي غاليين
سعيد: انا بعد امس طلعت فحوصاتي والحمدلله زين
امه: الحمدلله والعنود
سعيد: هي الحمدلله العنود اليوم بتطلع نتايجها ان شاء الله
امه: يالله بالخبر الطيب ان شاء الله
سعيد : امين يارب
وشوي اتصل عبدالله وبلغ سعيد ان النتايج سليمه وكلهم بيملجون في وقت واحد مايد وسعيد ونايف واقترحوا انهم يملجون فالمحكمة مره وحده من دون حفله وغيرة وكان الراي عاجب الكل والكل مقتنع ...
بعد مرور ساعات وصلوا المعاريس الى ارض الوطن وركبوا السياره متجهين للعين وصلوا بيت بو حمد ونزلوا ساروا داخل شافوا الكل متجممع سلامه مبارك حمد ام حمد وابوه سلموا عليهم وقعدوا عندهم..
ام حمد: ربكم ما تعبتوا
راشد بفرحه: لا والله ما تعبنا ولله الحمد يا امايه بالعكس كنا مستانسين والله
حمد: هي لدرجة انك غالق تلفونك من سرت لين وصلت
راشد يضحك: هههههههه هي بعد شو مستانس وحط ايده ع جتف مهره اللي ابتسمت
ام حمد: الا صدق ما خبرتكم سعيد ونايف خطبوا بنات عبيد ( ريل خال مهره)
مهره بفرحه: صدق
ام حمد: هي فديتج عقب عرسكم سعيد خطب العنود ونايف خطب عهود ومايد ولطيفه خلاص فحصوا وسعيد ونايف بعد وطلعت نتايجهم والحمدلله كلهم سليمين وبيملجون مره وحده
مهره بفرحه: يستاهلون فديتهم عله بالبركة مابغوا يتحركون اخواني ..
ام حمد: هي والله الحمدلله عقبال بو شهاب وبو العريج
مهره: ان شاء الله يارب
راشد ينش : يلا عيل يا جماعة انا استئذنكم تعبان بروح اريح
نشت مهره وياه وراحوا فوق تسبحوا وناموا... بعد يومين مبارك كان على النار الا يتكلم الموضوع صعب ينسكت عنه دش الصاله وشاف مهره وراشد يالسين انتبه ان مهره طالع راشد اللي يالس يكتب مسجات في تلفونه ويراقب حركات مهره كيف تراقب حركات راشد وتعابير ويهه وتشوفه كيف يسكر الخط في ويهه المتصل حس ان مهره شاكه فيه بس ساكته تنهدت بتعب وحيره وجبلت طالع تلفزيون ومخها مب عندها تفكر بالف فكره وفكره وكل شوي تتنهد...
مبارك يكلم راشد: راشد اباك في موضوع
راشد اللي حس بالفرج ياه: اوك يلا
مبارك طلع برى يتريا راشد ثواني وشاف راشد عنده يلس راشد ع طاوله وقال: هلا مبارك امر
مبارك بضيقه: راشد بكلمك في موضوع ورجاءً لا تنفعل ممكن تسمع لين الأخير
راشد: قول الغالي امر اسمعك
مبارك يتنهد: راشد انته لين متى بتم خاش موضوع زواجك وحمل حرمتك
راشد انصدم وحس ان لسانه نشل وتم يطالع مبارك ومارمش ولا رمشه كمل مبارك وقال: سرگ في بير الغالي لا تخاف محد يدري بالموضوع
راشد تنهد بضيقه ولف صوب الثاني يتاكد ان محد يسمعهم ولف ع مبارك وقال: وانته كيف عرفت
مبارك تتهد بضيقه: سمعتك هذاك اليوم تتكلم مع اليازية جدام غرفتيه وانا كنت بظهر من سمعت كلامكم رديت الغرفه الحين مب هذا المهم ، المهم انك تعالج الموضوع قبل لا يكبر وتدري مهره وتخسرها
راشد بضيقه: اففف مب عارف اتصرف
مبارك: كيف بتتصرف يوم انته مب قايل لحد واساساً ليش تاخذها وتحملها
راشد: خذتها عشان اسلي نفسي لين ما تخلص مهره من فروسيتها ودراستها اما حمالها فاستوى بالغلط
مبارك: وانته قاعد فالبيت ومستريح ولاهي ويا مهره صح اقولك خلص الموضوع بسرعه ترا باجر يكبر اللي في بطنها ويصير التخلي عنه صعب وكل ماله يزيد خطوره عليهم هم الاثنين خلص نفسك من هالبلشه اللي بلشت نفسك فيها قبل لا تخسر حب حياتك ترا صعب الحرمة تتحمل الكذب والخيانه من الريال والله عقب ما تعطيك الثقه ولا بتسلمك قلبها تصرف يا راشد لا تيلس واثق وايد فيها انها بتنزله ترا الحرمة بتركبها الغيره وبيركبها الحسد والكرهه والحقد ولا بتسوي شي من اللي انته قلته لها حتى قبل عرسك بيوم انته تكلمها انا انصدمت من اسلوبك وياها اونه بكون وياج محترم ببس لا تسوين مشاكل لي عطها ع راسها انته وقف لها وخلها تهابك مب ع أساس انها نزلة لك دمعتين كسرت خاطرك ترا هاي اللي نزلت لك اليوم دمعتين باجر تنزلك دموع مهره وتكسر قلبها وتتغير مهره من صوبك والفضل طبعا يعود لست الحسن والدلال وانته كيفك راشد ان ما تحركت فالموضوع تراني بسير لعمي وبقوله
راشد بصدمه : لا دخيلك يا مبارك لا تسويها بحاول اني اكلمها واشوف شو صار عالموضوع
مبارك بقهر: انا مادري وين مخك وين قلبك وين عيونك حد اييب لعمره بلاء حد اييب لنفسه شقى حد عنده مهره ويفكر في غيرها
راشد بقهرروضيقه: قتلك غلطة يا مبارك وبعدين انا ماخذنها من سنتين مب من قريب
مبارك بضيقه: المهم اتصرف فالموضوع قبل كل شي وقولي يدييدك نش واقف وشل سويج السيارة ونظارته وقال : يلا سلااام بو سنيدة
وراح وخلاه بضيقته وقهره وبدى الموضوع ينكشف يا راشد المره الأولى اليازية والحين مبارك وعقب مهره وعقب الله يعين ...
نش واقف وسار السياره اتصل بثريا وردت عليه بسرعه وبلهفه: هلاااااا وغلااااااا بالشيخ
راشد يتنهد بضيقه: اهلين شحالج
ثريا تبتسم: زينه من سمعت هالصوت
راشد بضيقه مكتومه: شو سويتي بالموضوع
ثريا بخبث : ولا شي لين الحين ما تحركت
راشد تنهد بضيقه وبقهر قال: زين احسن بعد انتي في أي شهر الحين
ثريا مستغربه أسلوبه وبفرحه قالت: يعني متقبل خبر حملي
راشد بضيقه: نوعا ما يعني مب بالتمام سمعي باجر بييج
ثريا بصدق وفرحه: صددددق
راشد : ان شاء الله
ثريا: واووووووو وناسسسسه واخيررررا بتشرفني حضرة جنابك خبر المسعده اللي عندك
راشد ضاق صدره وقال: زين زين انتي فجي عني الحين وطلعي من مخي وتراج وايد ازعجتيني اليوم مسجات واتصالات بس عاد انتي ناويه تخربينها ويايه ولا شو
ثريا بضحك: متعمده فديتك تراك ساير أسبوعين وشي وغالق تلفوناتك مايضرك لو حرقت تلفونك اليوم عشان تعرف المسعده ان عندك شي من وراها
راشد بقهر: والله بزوالج وبطلاقج
ثريا: ما يهمني مادام اني بحرق قلبها مايهمني المهم عنديً انته وبس
راشد: شكلها ربيعتج غيرتج وطولة لسانج ...
ثريا تلعب بشعرها: اكيد بعد شو انته تعال وبتشوفني وحده ثانيه بتعذر بتعافها حرمتك
راشد يضحك: يخربيت غيرتج يعني اهون عليج تسودين حياتي
ثريا : انته اللي بديت ولا انا طول عمري مسالمه
راشد يتنهد: زين زين يلا برايج ...
ثريا: فداعة الله وسكروا الخط ويلس في سيارة شوي يفكر ويعيد ترتيب أفكاره ... سمع اذان العشا وتنهد وسار يصلي ...
اما مهرة فكانت مترترة منظر راشد مش عايبنها من صبح وهو متوتر وتعابير ويهه ماطمن وتلفوناته انا شاكة عنده شي وشي كبير بعد خاشنه عني ومبارك وملامح الجمود والجدية اللي في ويهه ماطمنت يوم زقره وقاله أبا اكلمك فضولي خلاني اروح القسم فوق واطالعهم من بلكونتيه كنت حريصة كل الحرص انهم ما ينتبهون لي ولا يفطنون لي كنت أتمنى اسمع شي يريح بالي يجتل الفضول اللي فيني مب مطمنه لراشد نهائيا حاسه فيه شي بس للأسف ماقدرت اسمع شي بس شفت ملامح الصدمه في راشد مارام ينطق بكلمه شفته يوم يتلفت جنه يخاف حد يسمع كلامهم يالس مب مرتاح نهائيا وقلبي يدق بسررعه مادري ليش قلبي مقبوض منه ومن حركاته عقب ماشفت الحوار كله بس ماقدرت اسمع شي بس ردة فعله صادمتني شو بلاه هالريال متمشكل في دوامه ولا مضارب ويا حد ولا حد مشتكي عليه افففف متى بتفصح عن اللي في بالك يا راشد يارب لطفك ورحمتك وتي العواقب سليمه…
دخلت الحمام ووتسبحت وتلبست وفرشت سيادتها وصلت العشا ويلست تدعي لراشد بان يرتاح اللي في باله ويسر اموره ويقضي الله حاجته ارتاحت توها ناشه من صلاه انتبهت لفتحت الباب ودخول راشد لها ببتسامه عكس اللي في قلبه بادلته الابتسامه ولفت سيادتها بترفعها فوق التسريحة تفاجات يحضنها من ورى حساسها ما خاب فيه شي لفت عليه وحضنته: حبيبي شفيك والله مب مرتاحه
راشد تفاجاً من كلمة حبيبي اللي حركت مشاعره وقال ببحه: اااه محلى الكلمه اللي نطقتي بها مهره تبتسم وهي في حضنه وقالت بهمس: شفيك حبيبي والله احاتيك تكلم قول لا تخليني مشغولة البال
راشد بحب تنهد تنهيدة طويله وقال بصدق: عسى الله يطيب الفال يا قلبي ويسر الأمور
مهره قلبها يدق: من قبل انا قايله ان فيك شي بس انته الله يهديك ما تتكلم غموضك هذا وين بيوديك ماعرف
راشد تنهد وهو يسير صوب الكبت ويطلع ملابسه ويحطهن في شنطه: الظاهر يا حبيبتي بيوديني ورى الشمس
مهره بتردد وخوف : وين بتروح ؟؟
راشد وده يبكي في حضنها ويطلب منها سماح لف عليها شاف الخوف في عيونها هذا اللي كنت خايف منه يا مهره اشوف ضعفج جدامي ولا اقدر اسوي شي
مهرة تتقرب منه: حبيبي وين ساير في هاليل فيك شي صار شي راشد تكفى لا تخوفني ترا اعصابي فالته ما تمت فيني أعصاب
راشد يسكر شنطه ويتجنب ييشوف عيونها: حبيبي عندي شغل ضروري اخلصه هاليومين
مهره بخوف وربكة بانت في صوتها: شغل اخر الليل راشد حبيبي جان عندك مشكلة قولي ترا انا وكل ما املك فدوى لك ..
راشد حضنها وهو يحس انه قاعد يخسرها وخايف من هالشعور اللي يراوده والخبر بسرعه انتشر ع الله ماتدرين يا مهره من غيري لين ماشوف حل لهذي المصيبه قبل لا يطيح الفاس بالراس باسها بعمق وهو يحس انه مخنوق
مهره لفت عليه وباسته ع خده وبهمس قالت: يحفظك الله غناتي ... قلبي وياگ طمني عليك ..
راشد يبتسم وهو خلاص العبره واصله حدها ويحس ان دموعه تهدد بنزول قال بصدق: فديت قلبج مدامه ويايه انا بالف خير وخير بس مهرة وعديني ان طال زمن ولا قصر وعرفتى شي اباج تعرفين شي واحد انه قلبي لج وبسسس وعن غيرج تسكر وخذيها مني انا ولا تاخذينها من غيري لان الغير مايبا لنا غير العثره والدثره ولا انا بدونج ترا مالي حياة ولا اعتبر نفسي من اعداد الحيين فهمتي كلامي
مهره بخوف وفي عيونها لمعة من الدموع تهدد بنزول: يالله عسى ما تنكتب لي حياه بدونك اذا بفكر اخليك
شهق راشد وحط ايده على شفايفها وقال: اوشششششش لا اسمعج تدعين على عمرج حبي تكفييين ترا حياتج هي حياتي لا تدعين على عمرج عشان ما اشقى انا دعيلي بالخير ...
مهره ودموعها طيح: قتلك يا راشد مالي حياة من بعدگ وخذها مني لا حياة لي بدون حبگ فهمت ...
راشد يمسح دموعها وطاحت دمعته غصبن عنه وقال: فديت مدامع عينج انا لا تنزلينهن على كل شي دموعج الماس وداماس بعد وغاليات وااااااايد عليه فوق ماتتصورييين بس انا شوي تعبان ومضغوط وعندي مشاكل فالدوام ومن عرفوا انى رديت من السفر وهم ما وقفوا اتصالاتهم ومسجاتهم عشان اباشر دوامي ولازم اروح لهم حبيبي عشان اشوف الشغل كيف ماشي
مهره تمسح دموعها: بس اكيد انته بخير مافيك شي محد يهددك محد يطلب منك شي
راشد تنهد ومصها على رقبتها بحب وقال: بشتاق لج وبشتاق للحب وياج ماعليج ان شاء الله انا بخير انتى ردي عليه يوم اتصل بج ترانى بولهه عليج وايد ....
مهره بحب: اكيد حبيبي انته من تطلع كلمني لين توصل بوظبي عشان ااطمن عليك يا قلبي
راشد يبوس خدها وعضها بخفيف وقال: ان شاء الله ما طلبتي ...
مهره تحاول تريح عمرها: استودعتك الله غناتي
راشد ماوده يفارقها يحس بعدها عنه عذاب وده ينهي هالمهزله جنه يالس في لعبه قال بصدق وحب: ومن قال يارب طلع ولف مره ثانيه على مهره وقال: مهره
مهره اللي طالعه بعيونها ودها يقول شي سمعته يقول: قلبي بين ايديج امانه لا تفرطين فيه
هزت راسها بالإيجاب وهي تبكي بصمت مب عارفه شو فيه خايفه عليه وايد من غدر الزمان وغدر الليالي خايف عليه من كل شي ...
مهره تقوي من نفسها وهي تقول يارب تيسرها علينا وتلطف بحالنا تونا رادين البارحة من السفر ما وحى لنا نستانس مع بعض الله يسر لك كل امر عسير يارب نظر عيني انتبهت لتلفونها يرن وربعت تشله شافت رقمه وردت: هلا بنظر عيني
راشد بحب وصدق وخوف: اهلين بلي سالبه قلبي وروحي وعقلي من مكانهم
مهره تحنحن: الله لا يمتحني فيك ولا يختبر غلاتك في قلبي يا بعدهم ...
راشد حس بخنقه ونفسه ضاق فتح الدريشه وقال: فديتتت روحج يارب والله يخليج لي طول العمر يا حبي ولا يحرمني منج ولا يحرمني من عقلج ورزانته وهدوء افكارج ...
مهره تبتسم: ولا يحرمني من حنيتگ وحنانگ ودفء صدرگ ...
راشد بحب وهو يتنهد: مهره خاطري اقولج شي اباج تعرفينه مني مب من غيري بس صدقيني يوم بي وقته..
مهره تحاول تخفف عنه وهي بروحها خايفه: قول حبيبي قبل قلت لك ما بتخلى عنك
راشد بحب: أتمنى يا مهره والله أتمنى انج ما تبعدين عني
مهره تتنهد: تراني قلت لكً قولي وبفهمك بس انته الله يهديك ما تبا تقول
راشد بصدق: مب مستعد اخسرج بس بقولج شي وحطيها في بالج كل انسان في حياته معرض لمواقف واغلاط تجبره على أشياء هو ما يباها ولا فكر حتى فيها حتى الندم بعد ارتكاب هالاخطاء والافعال يصبح صعب ويتم الانسان محتار ما يعرف شو يسوي بس كل اللي يعرفه انه ما يبا يخسر حب حياته
مهره فهمت عليه وقالت: تلمح لشوه يا قلبي تراني فهمت من كلامك بعض الأشياء وقلت لك ما دامك شاريني انا شارتنك ومدامك تباني انا اباك اغلاطك الماضيه ماتهمني كل انسان يغلط حبيبي نحن بشر مب ملايكه منزلين من السماء ولا معصومين من اغلاطنا وافعالنا وين المشكله يوم الواحد يعرف انه غلط ويعترف بغلطه
راشدً يتنهد: بس غلطيه ما ينغفر يا قلبي بسبب هالغلطة عادي اخسرج الى الابد
مهره تريح قلبه: مش انته اللي تحكم اذا كان غلطك بيخليك تخسرني ولالا انا اللي احكم لاني انا اشوف الحب واشوف مكانتي في عيونك وشو يعني جرمك اللي سويته يستاهل اني اتخلى عنك ترا الله يغفر ذنب عباده مهما بلغ من ذنوب ومهما عصى وسوا وفجر وبالاخير رد لربه وتاب يتوب الله عليه ليش انته تحكم عليه اني انا بخليك عشان غلطة فالماضي صحيح اني ماعرف شو عندك ولا شو وراك بس اللي متاكدة منه اشوف الحب في عيونك وهذا يكفيني
راشد اللي بدى يرتاح شوي من كلامها: مهما كانت غلطتيه ومهما كان عذري يا غناتي متاكده انج مابتخليني
مهره بتاكيد: متاكده اني ما بخليك انا مهره والمهره ما تهاب غدر الليالي وسود الأيام مهما كان
راشد: وغدر الحبيب ينغفر ؟
مهره: على حسب الغدر عاد اذا كان ينغفر ولالا ، ليش ذنبك الوحيد ما ينغفر يعني راشد حبيبي انا مسامحتنك ع كل شي سويته وانا ماعرفه بس تكفى اطلع من هالجو اللي انته فيه خلاص انا بديت اتعب وأفكار تروح وتيبني خايفه عليك ودي اعرف شو فيك وانته ما تبا تنطق
راشد بحب: احبج واموت عليج وانتي كل شي حلو لي في هالدنيا. وانتي أساس حياتي
مهره بحب: لو انه قلبي مقبوض من كلامك واحسك تلمح لشي اعترف لي راشد من كلمك مبارك وانا حاسه كيانك مجلوب
راشد يتنهد: كيف ما ينجلب كياني وانا بعيد عنج كيف ما ينجلب كياني وانا ماعرف شو بيصير فيني لو تخليني وشو بيصير فيج لو دريتي
مهره تتنهد: راشد انا وعدتك ما بيصير غير اللي الله كاتبنه وخلاص لا تعذب عمرك اكثر من جي تطمن ريح قلبك وعيونك مالي في حب غيرك امل ولا لي بعدك حبيب فهمت
راشد يبتسم: احبببببج وامووووووووت علييييج غناتي
مهره تبتسم: ربي يحفظك بحفظه الغالي ويتاقي عليك
راشد بحب: زين غناتى انا وصلت بيت اليازيه بنزل الحين عشان الصبح اروح الدوام
مهره تتنهد: الله يحفظك غناتى
راشد : تصبحين ع خير غناتي
مهره: وانته من اهل الخير فديتك رقاد العافيه
راشد ينزل من سياره: يعافيج يا قلبي
مهره: في حفظ الله مع سلامه
راشد ينزل الشنطه ويشوف الشقه والعماره وتنهد تنهيدة طويله وقال: كيف برقد ليله وانا بعيد عن حضنج
مهره تبتسم بصدق : ان شاء الله شده وتعدي وتفتك من مشكلتك وارجع لحضني
ضحك بحب وهو يدخل العماره ويقفل السياره بالريموت وقال وهو يرقى الدري: اه ماودي اسكرررر يا روحي
مهره تضحك: حاول حبيبي بعد مجبور تراك عالسيرة عشان الدوام
راشد يوصل عند باب الشقه وقال بحب: الله يصبرني بس ويقدرني الليله ع بعدج
مهره تضحك: ههههه فديت عينك ربي يحفظك
راشد يدقً الجرس: الله يحفظج ي روحي ... وسكروا الخط
تتهد راشد وهو يشوف الباب يتبطل وانصدمت بوجوده وحضنته بحب: فدييييتك ما صبرت عنى صح
راشد يبعد عنها ويدخل : مب قدام الناس يا الهبله وبعدين انتى شو مسويه بنفسج بسم الله الرحمن الرحيم
ثريا بصدمه: ليششش مب حلو
راشد بضحك: ههههه طبعا. مب حلو قاصه شعرج وصابغتنه اشقر وليش مسمره عمرج اكيد مسويه تان صح
ثريا تضحك: هي بس خفيف بس طالعه حلوه صح حبيبي
راشد يسحبها عند المرايه: في ذمتج هذي صورة حرمة تاملي نفسج شويه وين الحلاه فالموضوع لو انتي حنطيه او قمحيه بقول اوك اللون بيناسبج بس انتى مسمره نفسج بزياده بالتان فطالع شكلج مب حلو
راشد يضحك: ههههه ياربي منكن يا الحريم الغيرة وين وصلتكن كل وحده تبا تستوي جميله ترا اللي محلنه ربه ومجملنه ما يباله هالخرابيط اقولج لا تتبعين شور ربيعتج والله خربتج احس انى قاعد ويا واحد من شباب
ثريا بصدمه واحراج هي تعرف راشد ما يجامل انحرجت منه وايد وقالت: اسفه
راشد وده ينفجر ضحك بس مسك نفسه لان عورت قلبه قال بجدبه: والله سوري ع تشبيه بس جنج افلبيني متحول
انصدمت من رده فعله وكلامه وقال بجديه : وايد غيرتي ملامح ويهج احس ملامحج استوت رجوليه شعر ويهج مخلتنه ماشليتيه بس مشقرتنه انتي تعرفين اني ماحب البنت اللي تكون هبله وتسوي اللي يشورون عليها ربيعاتها خليتي عمرج غبيه تربعين ورى ربيعتج انا ماحب الشعر تعرفيني قايل لج احب البنت ناعمه وطرت في باله مهره ومرت صورتها في باله غمض عيونه بحب وهو يتفداها في خاطره ويقول شو ياب اللي ياب والله ماتي عند مهره شي
رد على صوتها وهي تقول: اسفه والله توقعت بيعيبك النيولوك
راشد بضيقه: وععععععع يعنى في ذمتج مشقره شنبج ومخليه شعر ويهج ومغلظه حوايبج المهم عقلي انتي وبطلي حركات ربيعتج الهبله خلتج ولد ماعلينا سمعي الكلام انتي باجر تروحين صالون تغيرين نفسج سمعتي
ثريا: ان شاء الله
راشد تنهد وقال: انتي في أي شهر
ثريا تقعد ع الكرسي وبتوتر قالت: شهرين ونص
راشد عقد حوايبه وقال: كيييف شهرين ونص
ثريا بتوتر: شو بعد كيف ربك المعطي
راشد بعصبيه: كيف شهرين ونص وانا من ١٠ شهور ما قربتج ولا ييت عندج ولا بيني وبينج قرب كيف حملتي في هالفتره هاه.
ثريا بتوتر : مادري ماعرف شدراني سال الدكتوره
راشد بقهر: انزين ماعليه بشوف كيف شهربن ونص الا اذا ابوه مب انا يمكن
ثريا توترت من تفكيرة ودب الخوف في قلبها وهي تسب ربيعتها ام الأفكار السوده وقالت بدلع وهي تقرب منه :خلاص حبيبي لا تعصب ارجوك اهدا وباجر بتفهم من الدكتورة كل شي
راشد بعصبيه: غبي انا غبي ولا ياهل جدامج شو تشرح لي انا ماييتج من ١٠ شهور وما قربتج كيف حملتي في هالشهرين ونص فهميني
ثريا بخوف: وانا شدراني باجر نروح انا وانته ونشوف شو تقول الدكتوره
تنهد بضيقه وقهر وهو يطالعها بطرف عينه : مصيري بعرف وين بتوديج ربيعتج
ثريا مسكت ايديها بتوتر وتمت تفكر بكلامه: حبيبي يعنى بطلقنى
راشد يلعب بتلفونه: الظاهر جي
ثريا بندم: لا والله توببه ماعيدها والله توبه
راشد بقهر: اصبري لين باجر لا تحنين عليه قومي نامي مابا اشوفج
راحت وهي ضايقه ودخلت الغرفه اما راشد فاتصل على مهره وانسدح على الكرسي: هلا بالحب
مهره: اهلين فديتك مانمت
راشد: لا ما اصبر عنج ما اقدر انام بعيد عنج
مهره تبتسم: صليت الصبح
راشد يتثاوب: لا والله الحين بصلي
مهره ببتسامه: الله يفرحك حبيببي ويسر امورك الحين صوتك احسن عن مساعه
راشد بهمس: لانى تاكدت انى في بعدج ماقدر أعيش وانى ما اقوى على بعدج
مهره بحب: فدييييت قلبك حبيبي عسانى ماذوق حزنك ياحظي يوم تحبني هالكثر
راشد ببتسامه : واكثرررر والله يا قلبي فوق ما تصورين غناتي
مهره: علني فداك انا من قدي يوم بوسنيدة يحبني هالحب كله
راشد بصدق وحب : محد احتل هالقلب غيرج
مهره: بس ودي اعرف اللي بقلبك واللي مخبنه عني
راشد حس بحركه وراه وشاف ثريا يايه وبهمس قال: بكلمج بعدين باي حبي وسكر الخط
ثريا تقرب منه وبغيره: تكلمها صح
راشد طالعها بطرف عينه وقال: وانتي شو يخصصصج
ثريا بقهر: شو اللي شو يخصني اليوم لي ماشبعت منها يعني انته
راشد يرفع حوايبه : لا ما شبعت منها وانتي تعرفين اني الليله ياي عشان افصل الموضوع بنفسي واشوف شو اقدر اسوي
ثريا بقهر وضيقه تهز ريولها بتوتر وتلعن ربيعتها اللي قصت عليها بنيولوك هذا وبتموت غيره من حب راشد لبنت عمه شافته قام ساير صوب الحجرة دخلت وراه شافته ساير الحمام دخل توضى وطلع وفرش سيادته وصلى ولف عليها وقال: وعيني قبل موعدج بساعه او نص ساعه عشان نتجهز ونروح الموعد
هزت راسها بحب وقعدت عداله على الشبريه سمعت صوته: قومي سيري الغرفه الثانيه اليوم ماباج لين ماعرف كل شي من دكتوره
تنهدت بضيق وبقهر قالت: انتتت شفيككك اليوم متضايق وزعلان
راشد يطالعها بطرف عينه: يعني ما تبين تقومين
قامت عنه وهي متضايقه وعارفه انها لو تمت ويا ربيعتها بتخسر راشد قررت انها تغير من نفسها حباً وكرامة وتبعد عن ربيعتها .طلعت عنه وسكرت الباب وراحت الحجرة الثانية عنه ترقد هناك ...
|
|
|
10-16-2021
|
#27
|
البارت السادس والسابع والثامن
ما شاء الله عليك ابداع يا حبنا لك ولكتابتك جميله يا جميله
رجع لنا ابداع من جديد
البارت السادس والسابع والثامن
كل بارت يقول شو زين وفن في كتابتنا مميزه
دجي
انتي ابداع وتميز
|
|
|
| | | | | | |