ديوان الشاعر المبدع / ثامر بن شبيب

قصيدة شيخة العوب


كل البشر في صوب وهالبنت في صوب
الكامل الله كامله ماتعابي

ترفه وهي تمشي مسافات ودروب
في عز رحلات الشقى والعذابي

لامن مشت في يدها ترفع الثوب
كل يناديها وهي تقول مابي

من الدلع سميتها شيخة العوب
حتى دلعها منحني له عجابي

مركوبها ماهوب أيات مركوب
من مر قدامي تلنه ركابي

لحقتها والهرج زاهب ومكتوب
لأي موقف كنت عامل حسابي

قلت السلام وردت بأيش مطلوب
قلت الخفوق بخفت الدم ذابي

قالت وش اللي حدك لناري تذوب
قلت المشاعر ماعليها عتابي

قالت تمثل دور عاشق ومحبوب
قلت الحقيقه افتديك بشبابي

قالت اخير الحب ناهب ومنهوب
قلت انهبيني قبل لانقل صوابي

قالت متى تكبر عن الحب وتوب
قلت الخبل من شاف زينك وتابي

قالت صراحه ماتوقعتك سلوب
قلت افهم انك معجبه في جوابي

فجأه عرض لي واحد عرضت خروب
سلم علي وخاطر البنت طابي

جاني مطفي ضارب فياض وشطوب
ومن قو عينه قال يامرحبابي

واخذ يسولف لي وانا فيه مغصوب
يسئل عن احوالي وسبة غيابي

مايدري انه بعرضته كسر قلوب
لا واعذابي منه لا واعذابي

رقد على كبدي وانا بوقت محسوب
البنت راحت والرجى منه خابي

وقفت عاجز كني انسان مغلوب
من قرد حظي كل هذا جرابي

اتلا عهدها تلتفت لفت رعبوب
مالله كتبها قسمة في كتابي

اقفت تمشى في مسافات ودروب
قلبي يناديها وهي تقول مابي

قصيدة مرت وعدت



امنت ان الحي بيقابل الحي
من صدفة للدرب هذا جرفتني

امشي بفالي صدفة ما ابي شي
فجأه عرضت لي شفتها وطوفتني

مرت وعدت كنها ماهي بهي
ماكنها ياخوك يوم عرفتني

عطيتها حب وغلا وقصرت بي
اوفيتها بس للاسف ما وفتني

كانت اليا ضاقت تجي كلها لي
نست عطاي وطيبتي لالفتني

ماكن لي فيها غلا لو هو شوي
ولكنها بسود الليالي جفتني

وقفت اطالع منجرح منكوي كي
ساعه بمكاني منصدم وقفتني !!!

بغيت اجيها وصدها كتف ايدي
تبي الصراحه ياولد خوفتني !!!!!

خايف اجيها تقول لي وشتبي في
.؟؟ولا تسوي نفسها ماعرفتني !!!!!!

قصيدة احساس طفله


يا بنت وجه الخير بين ومعروف
لو ماتكلم شافت الناس خيره

والوجه الاقشر ماهو بحاجة اوصوف
يبان حتى للعيون الضريره

من عاش يتبع خطوة المال ملهوف
رزق كتبه الله .. مافيه غيره

الخوف لو ينفع .. نفع صاحب الخوف
اللي على حقه يدينه قصيره

الضعف ماغير قدر ناس ضعوف
عاشت صغيره ويوم ماتت صغيره

كلمة احبك بس من اربع حروف
وتحكي احاسيس ومشاعر كثيره

الحب اكبر من سهر ليل وطيوف
ماتفهمه حتى القلوب الكسيره

تدرين اصدق حب يطلع من الجوف
حب الفقير اللي عشق له فقيره

احلامهم تكبر من ملامس كفوف
وتكبر من اشواق العشير لعشيره

كنه معاها لو على ضلع مكشوف
داخل قصر يجمع امير واميره

احساسهم صادق بلا كذب وزيوف
كلن يقول اللي يريح ضميره

احساس طفله عندها العيد نفنوف
تظن من تلبسه صارت كبيره

وانا لحالي مجابه صفوف وصفوف
واليا خسرت اقول فدوه وخيره

اطيح ووقف وابعد الشوف واطوف
اخذ قليل الزاد وارحل لديره

اترك كثير الزاد واكسب ماعروف
ترك الكثير يجملك في مصيره

يمكن يجيه انسان هالك من صدوف
يلقا من اللي تاركه مايجيره

شايف من الدنيا وعايف بشر عوف
اجناب والا من رجال العشيره

مرت علي اظروف واظروف واظروف
ماريحت حتى العيون السهيره

وللحين راسي راس وكتوفي كتوف
ماغيرت مني ليالن عسيره

مدام فيني حيل وعيوني تشوف
والله معيشني بحاله ستيره

والله لستقبل على بابي ضيوف
لو ما املك الا دلتين وحصيره

طيحة العود


تعبت اقول لضيقتي سهود ومهود
اليا متى هالعذر بيكون عذري

البارحة يوم اكثر العالم رقود
عادت علي اللي تجي منين مدري

الضيقة اللي كل ماراحت تعود
مكانها مابين قلبي وصدري

ناس تنام مدهنة في دهن عود
وناس تنام مدهنة بزيت مقري

لاواهني اللي حلالة من الذود
تسعين وضحى كل ماضاق يسري

يسج معها كل ماهبت النود
يتبع مسيل السيل في القاع يجري

ماهوب مثلي من اقرب الناس مجحود
الله يسامح من طعني بظهري

من راح ماكنه على القاع موجود
مايدري انه اول اسباب كسري

كل ماطرالي قلت من قلت الفود
ياليت منهو راح ماعاد يطري

لو تستحي من فعلها ايامي السود
كان استحت مبطي ولا طال صبري

قدمت بالموجود لخاطر الجود
لين التفت ولابقى شي حدري

عطيت من عمري ولا شفت مردود
ياللأسف للناس ضيعت عمري

واذا افرحوا واجد على طيحة العود
هذا دليل انه فعل شي يغري

بوقف لحالي واتبع الطيب والزود
اشره علي ان صغر الوقت كبري

ماني على بعض المخاليق محدود
اموت مانزلت للناس قدري

حاولت اغير فيك من كثر مغليك


البارحه مابين وشلون يمديك
في يوم واحد ياحبيبي تغيرت

الليل خلاني وخلا طواريك
تلعب بقلبي كل ماداخلي ثرت

سويت شين حدني غصب ماجيك
والا قبل لاسير الليل سيرت

هدمت كل اللي بنيت بتجافيك
هدمت لا والله بالعون دمرت

خليتني ماقلت لي شلون اخليك
ليتك بحالي قبل مارحت ناظرت

الله كريم يصبر اشواق مغليك
لاقام ينثرني غلاك وتناثرت

والله يسامح قلبي اللي مواليك
اخذت كل اللي تبي منه وانكرت

منهار جيت العام تسبق خطاويك
واليوم ماكنك قبل جيت وانهرت

في ذمتك لامن تذكرت ماضيك
من يطري في بالك اليامن تذكرت ؟

من كثر مافكرت وشلون اراضيك
وياك في نفسي ولا يوم فكرت

على كثر ماكنت متمسكن فيك
وعلى كثر ماحتجتني ما تعذرت

جيتك وعندي حاجتن بين اياديك
والمشكله تقدر عليها وقصرت

رح بشر اللي ملتفت لك يناديك
قله تركته لخاطرك ما تأخرت

صدقني انها غلطتي يوم اداريك
ولا انت لولا غلطتي كان ما صرت

كبرتك بعين البعيد وحواليك
ابيك تكبر والمصيبه تكبرت

حاولت اغير فيك من كثر مغليك
قدرت لكنك عليه تغيرت

ضيقة الطير


يارشيد رح قله ترى ثامر بخير
عقبك وابحسن حال هالحين حاله

طابت جروحه ومابقا داخله غير
شي يتل القلب كل ماطراله

وكانه طلب منك عن الشي تفسير
جاوب سؤاله لاتحاقر سؤاله

قله سمعت بيوم عن ضيقة الطير
وعن عشه اللي كان مرقد عياله

الطير لامن ضاق من عشه يطير
خان الغصن والعش دور بداله

وكانه فهم بتشوف فيه التعابير
لاغيرت وجهه سرح عنك باله

خله وروح لوضعه الحين تقدير
ماودي يبكي وانت واقف قباله

يارشيد لو انه بدا منه تقصير
يبقاله بقلبي مكان لحاله

صحيح انا عقبه وانا اخوك في خير
لكن اليامن ضاق جعلي فداله

دمعه عزيزه


ياراكب اللي تو فارق حفيزه
من ديرته مطلوب للي تمناه

لارحت بيت اللي حبيبي لزيزه
اليا دخلت ابيتهم لاتعداه

حتى تشوف اللي سهومه ركيزه
داخل خفوقي يوم قفى وخلاه

قله يقول اللي جروحه عجيزه
وشلون من عاشرت ترحل وتنساه .؟

محتاج له ياجعل ربي يعيزه
لواحد يحتاج قربه ويجفاه

ابكي من فراقه .. ونفسي عزيزه
كل مالتفت .. وشفت ماني بوياه

حبه دخل قلبي بفتره وجيزه
سيطر على قلبي وحطه بمخباه

من اول .. مليون ميزه وميزه
عندي بوقت راح .. وراحت مزاياه

واليوم عندي بس ( دمعه عزيزه )
كل مالتفت وشفت ماني بوياه

لساك فاكر


كان الوعد باكر وانا جيت باكر
شايل معي موعد وماضي وتذكار

قلت الحقيقه لموعدك دوم ذاكر
القلب كنه يتنظر لك على نار

قالت بلهجه غير ( لساك فاكر )
تضحك .. وانا واقف وانا شبه منهار

بغيت اقول .. وقالت : بصوت ناكر
( اصلا انا مذكر معك موعد صار )

قلت اسمعي مني وانا اكون شاكر
انا اللذي حطيت لك باب واجدار

واليوم يوم اصبح وراك العساكر
رفعتي راسك فوق بهتان وانكار !!!

قالت وهي تضحك على اسلوب ماكر
( صدقت انا اضحك معك ياشمعة الدار )

قلت الحقيقه واضحه إبلا تذاكر
ماكل منهو زل يلقا له اعذار

وانتي نسيتيني وانا كنت فاكر
اني بجي ويكون طعم اللقا حار

لكن وعد مني اذا عشت باكر
ماعاد لك موعد وماضي وتذكار

يا راس


يا راس لاترجي رفيق يعزك
ان كان ماعزيت نفسك بتنهان

قام الردي يجسر عليك ويدزك
دارت عليك اليوم دورات الازمان

الناس ماتعطف عليك وترزك
ارفع مقامك وارتفع ياكحيلان

والموقف اللي هز قلبك وهزك
لاتلتفت للي غدى ماضي كان

يحز بالخاطر وانا ادري يحزك
انك تشوف الذل من اقرب انسان

اصبر على هموم كثيره تلزك
وقف على حيلك ولو كنت تعبان

عاند زمانك في طموح يكزك
لو قالوا : ان معاند الوقت خسران

قلوب خلق الله بعضها تعزك
واكثر من اللي تعزك قلوب عدوان

يعني اليامن طحت محد يرزك
انكان مارزيت نفسك بتنهان

لولا وجودك انت عزي لحالي


لولا ظلام الليل مابين الصبح
ولولا المواقف ماتبان الرجالي

ولولا الغرق محد تعلم على السبح
ولولا الفرج خاويت سود الليالي

ولولا الخساره تنعدم قيمة الربح
ولولا وجودك انت عزي لحالي

غلاك ذابحني وانا قابل الذبح
لو منت غالي كان مارخصت غالي

لاتلتفت للهرج يامبعد الشبح
هرج القفا طبع الردي لاتبالي

الكلب حول البيت يكثر من النبح
والذيب يعوي بالرجوم الطوالي

وانا معك من غيبة الشمس للصبح
والصبح روح وخل طيفك قبالي