{<<<<<{ عمرها عشرين }>>>>>}

طاح قلبي في هواها وأنا توي صغـــــــير = عمرها عشرين وأنا أصغر بأربع سنـــــــه
وأمتلكني حبها غصب وأصبحت الأسـير = والذي مثل سنى الحب يكشف معدنــــه
كنت أعرف إن الهوى كايد ماهو يســير = وأعرف إن الحب ماهوب حاجه هينــــه
لكن إني قلت يمكن ألاقي لي مصـــــير = وأرجع أحاول وأدور من الهرج أحسـنـــه
وهي تجاملني وأنا أقول هذا ما يصــــير = لازم إن اللي في القلب تنّطقه ألســنــــــه
قالت الموضوع كلّه على بعضه عســــــير = لا تحسب إن الهوى في حياتي هيجنـــه
الهوى في عالم الحب كم عذب كبـــــير = وكم تمتع به من الناس عبر الأزمنــــــــه
وأنت عادك بأول العمر وأمثالك كثــــير = ينتشيهم داعي الحب فأحذر تأمنـــــــــه
قلت يا زين الوصايف أنا مثلك خبــــير = وأدري إن الحب ما كل شخصٍ يعلنـــــه
وأدري إن الحب عند البدو في قاع بـــير = وأدري إن الحب في القلب يبقى موطنـــه
والهوى وإن صار من ناحية شخص فقير= ينتهي عمره ولا فاد من الحب أسمنـــــه
والغني لو كان مطلبه في بنت الوزيـــــر = جابها والناس حوله يسار وميمنــــــــــه
وإن حصل له منصبٍ عاليٍ ناسب أمـير = لكن اللي مثل حالي يزيد الونــــونــــــه
فأقبلي حبي ورؤفي بحالي يا أ........ = وأرحمي من كان صدق النوايا ديدنـــــــه
قالت أستأذنك بأمشي وباكر وعد خـير = وإن حصل ما جيت علمي معك تكفى صنه
لا تشمت بي العذاري ومعدوم الضمــير= وأعتبرني كنت حلمٍ ولا تصحى منـــــــــه
قلت حاضر يا حياتي ولا في العلم ضير = وأنا مؤمن بالمقادير وأنتي مؤمنــــــــــــــه
والحقيقه كان حلمٍ ولكن حلم غــــــير = وأكثر الأحلام في بعض وقتي ممكنــــــــــه

بقلم محبكم
رفيق الأحزان