ديوان الشاعر/ مساعد الرشيدي

........( يـاقصيـــدي )..........


في زمان(ن) كنه البرد شبيت القصيد ..
قلت أبدفى و الليالي تموت ببردها
في طريق(ن) كنه الموت و لحالي وحيد ..
قلت أبا أحيا و المنايا تبوح بسدها
أتقارب هقوة العمر لو كانت بعيد ..
و أتغنى بالمقابيل و أخطب ودها
لا قديم الجرح يقوى و لا الجرح الجديد ..
يخلف النفس العزيزة عن اللي ودها
و الله إني ما أتنازل ولي راس(ن) عنيد ..
لين أداعب غرة الشمس و ألثم خدها
و أنزفي يا وردة الشعر من دم الوريد ..
لا تجفي في عروق(ن) تراجف يدها

" يا قصيدي كان الأشعار سادات و عبيد ..
و الله إنك من بحور(ن) عريب(ن) جدها "

ما تقاود مهرة الحرف للقلب البليد ..
يا قصيدي خذ رسنها و خلك قدها
في طريق كنه الخوف سليت القصيد ..
قلت أبا أحيا و الليالي تموت ببردها


........( عطـر الأشجـــان )..........


هبت شمال و ساقت الوبل هتان ..
قالوا روى قلب العطش قلت لله
توه يبل الريق من ريق الأمزان ..
قلب(ن) تفيا غيمة(ن) مستهله
ودي تفيض بفاتر الصوت غدران ..
نقع المطر يرفا عن الكبد غله
حي الغلا بشفاك يا عطر الأشجان ..
قل للغدير اللي نهى القلب قل له
طاح الربيع و وردت جرد الأغصان ..
عشب القلوب مصافح الخل خله
نش السراب و حادي الغيم نشوان ..
هيض غناه معانق الورد طله
من فرحتك شابت نواطير الأحزان ..
و بجيتك خان أسود الهم ظله
هج الظلام و سال في حجر الأعيان ..
ضي تزفه غرة(ن) مسفهله
لك من هنا لآخر تفاصيل الأزمان ..
عشق(ن) تمده راحة(ن) ما تمله
و إليا لفحك القيظ بأطراف الأجفان ..
خذ نصف قلبي, لا خذ القلب كله


أتمنـى أن أكـون وفقـت فـي إختيـار القصائــد ،،

مسجـــات الصبـــاح