ديوان الشاعرة/منتهى القريش

بيديني بحفر لي قبر

ما اعاتبك
أعاتب الوقت الذي جمعني بك
ولا أغصبك
تبقى معي
وتعطيني قلبك مو إلي
أو تبتعد وتحن لي

ولو قلت لي
لا ترحلي
ببقى معك
وبايديني بجمع أدمعك

بزرع بدل دمعك فرح
وبابدل الظلمه صبح

وبرسم مساحات السما
غيم ومطر
ومها تصد.. يبقى الوعد
عمري إلك.. ما بدلك
وتبقى سنيني تنتظر

بس قول الي
إنك إلي
وحدي تكون..
بليا غدر
وبتحملك واكون الك
وبا مرمر أيام الصبر

وان كان حبي يجعلك
تمشي على الرمضا قهر
ببعد أنا عن دنيتك
وعن شوقي لك
راح اعتذر

ياللي على جرحي قويت
شايف أنا حبي اشكثر؟
صدقني مثلي ما تشوف
واذا لقيت عطني خبر
بيديني بحفر لي قبر.