تجميعي : ديوان بقصائد متنوعة لـ صانع الكلمة " أحمد الصانع "

من بعيد [ 16 ]


■

بالفراق القلب [ شمعه ] تحترق
.................... وبوصاله , يمرّني .. كل يوم " عيد "

أجمل اللحظات .. مني ؟ تنسرق
.................... وإن لقيته ، أطمع بـ " موعد " جديد

فجأه [ قلبه ] صار قاسي مايرق
.................... إفترقنا , وهذا هو بيت .. القصيد

كان ودّي ، للأبد - ما نفترق
.................... صار ودّي .. نلتقي لو من ( بعيد ) !

■




حي ما مات [ 17 ]

■

مهما طعنت القلب .. من قلب ؟ مسموح
.................... ما فيه غيرك ، إحتمَل " منّي " طعنات

صحيح أهدينا [ بعض ] واجد جروح
.................... وثنينا , فينا عيوبٍ .... وغلطات

لكن نحب وعندنا [ إحساس ] وطموح
.................... مانفترق , مهما حصل غير لحظات

للحين باقي ، في جسَد حبّنا " روح "
.................... نموت ويبقى حُبّنا .. حي ما ( مات ) !

■

إيه راضي [ 18 ]

■

إيه راضي [ فيك ] لو زدت العنا
.................... صرت لي , هالناس كلْها وآنا .. صرت :

كل ما أنساك .. ينساني ؟ الهنا
.................... وكل ما ، تنساني " عنّي " ماصبرت

إحنا أصلاً [ إنخلقنا ] لـ بعضنا
.................... منبهر فيني , وأنا فيك | إنبهرت |

إنت ، ماتقدر تحب غيري و " أنا "
.................... لو نويت .. أحب غيرك ما ( قدرت ) !

■



صورتك [ 19 ]

■

إمش [ قدامي ] ولا تمشي وراي
.................... وكون يمّي , لا تباعد .. خطوتك

ماني مصدّق .. لقيتك ؟ يا غلاي
.................... عيني { مرتاحه } حبيبي : بشوفتك

من تروح شوي ، حاصَرني عناي
.................... أكتب أبياتي , وأطالع | صورتك |

صار عندي ، كل شي وإنتَ " معاي "
.................... يعني .. أفقد كل شي ( بروحتك ) !

■



عساك سالم [ 20 ]

■

مليت أسأل [ عليك ] الغير
.................... طمنّي , عنّك .. وش علومك

في غيبتك .. موحش ؟ التفكير
.................... عكس ، الشعور إللي : بقدومك

يا الغالي ، مسموح هالتقصير
.................... لكن , على غيابك | ألومك |

أتمنى ، إنك تكون " بـ خير "
.................... ياجعل .. يومي قبل ( يومك ) !

■



حظي الردي [ 21 ]

■

ننتهي أحسن [ لنا ] من هـ الخلاف
.................. روح , عن عيني .. وفرحي يبتدي

روح ولك منّي .. تحيّه ؟ وإعتراف
..................عمري ، ماحسّيت إن إنت : سْندي

قلبي من غيرك ، كثير جروح شاف
.................... مو عليك , الدنيا توقف يا | بْعدي |

ما أقول ، العيب منّك " لااا تخاف "
................. راح أقول العيب .. من حظّي ( الردي ) !

■



صغير السن [ 22 ]

■

كثير أيّام راحت وإنت [ ساهي ]
.................... بهذا الوضع , مايرتاح .. قلبك

سواهي ، تحْتَهَا " تِطلع " دواهي
.................... صغير السن .. ياهو كبير ( ذنبك ) !

حياتك .. لا تعدّي . . . مثل ماهي
.................... نصيحة قلب ، لك من قلب | حبك |

حرام ، يروح عمرك ؟ وإنت لاهي
.................... وش إللي شاغلك ، عن ذكر : ربك ؟

■



شيل من راسك [ 23 ]

■

تنتظر من [ شاعرك ] كلمة عتب ؟
.................... يا تجي من طيب , وإلا .. ما طلبت

روح ، سولف " عنّي " وقول السبب :
.................... إنّي خاين .. وبـ أحاسيسك ( لعبت ) !

قول حامض .. كان ماطلت ( العنب )
.................... سو نفسك ، فايز وإنت | إنغلبت |

ما أجيلك ، حتى لو قلبي ؟ تعب
.................... شيل من راسك ، أجي لامن : تعبت

■



يا حنيّن [ 24 ]

■

يا صاحبي .. بعض [ المواقف ] تبيّن
.................... منهو يخون , ومنهو لك كان صاين

في عز ماكنت لـ " طعوني " تزيّن
.................... أكرِم أنا .. من أجل عينك ( مداين ) !

علي خايف ! أشكرك .. يا ( حنيّن )
.................... الحقد واضح ، في عيونك و | باين |

لو خان ، محبوبك ؟ ترى الوضع هيّن
.................... كل البلا ، لا صار صاحِبْك : خاين

■



مثل السراب [ 25 ]

■

وقت ضيقك صرت لـ عيونك كتاب
..................ووقت ضيقي { شي عادي } تعدّني !

إنت وينك ؟ " أطردك " مثل السراب
.................... وكل ما أحلم .. معاك ( تهدّني ) !

رحت عنّك وإنفتح .. مليون ( باب )
.................... وقلبي لك ، رغم الجروح | يشدّني |

كل ماسلّمت ، نفسي ؟ للـ غياب
.................... شي لك بالذات ، غصب : يردّني

■



تركي الحربي [ 26 ]

■

لا تنشغل لو قلت لك إنّي [ ضايق ]
.................... يمكن يكون الضيق , سبّة .. ضلوعي

مرات .. أحس الحزن لي ؟ حيل لايق
.................... ومرات ، أدندن له : ولي في ربوعي !

كل ما ألدّ ( عْيوني ) أكشف حقايق
.................... ضويت أصحابي .. وطفّوا [ شموعي ] !

ماطقْت .. حِمْل الجرح ، وآقول ؟ طايق
.................... هزّيت جذع " العين " طاحت دموعي

هذا رماد القلب .. عقب ؟ الحرايق
.................... مرتاح ، مستانس وهدّيت " روعي "

يا ( تركي الحربي ) ترى البال رايق !
.................... وأبشّرك .. شبعان من بعد جوعي

مثلك .. ليامنه فقدني , { دقايق }
.................... أجيه .. لو ماكنت ناوي رجوعي

لا تنشغل لو قلت لك ، حيل ضايق
.................... الضيق " ضيفٍ " والمراجل ضلوعي !

■



أعايد [ 27 ]

■

مشتاق لك ، والشوق ؟ فالقلب زايد
.................... وش مستفيده ، من غيابك و بعدين ؟

مو قادر إني .. في فراقك ( أعايد )
.................... وينك " عشان " يصير هالعيد عيدين !

■



فاقد العيد [ 28 ]

■

آنا ؟ على حطّت إيدينك < وضايق >
.................... كل عام وإنت بعيد وأكثر من بعيد

العيد فرحه .. في عيون ( الخلايق )
.................... لكن أنا ، في غيبتك فاقد " العيد " !

■



■

كما ختمتها معكم السنين الماضيه
سـ أقول أيضاً :

[ الجمر ] .. مهما طال وقته يرمِّد
وإذا طفت ناري أمانه .. إعذروني

كتبت ,, وغيري من وجودي تجمَّد
وكلَّه عشان ( عيونكم ) , صدّقوني

ما أتْعمَّد أخْسِر شخص لو هو تعمَّد
وكثير من حولي خطوا وخسروني !

لو جا رمضان الجاي من غير " أحمد "
أقل شي .. بـ ( الخير ) بس إذكروني