سحاب وصلك لا كسى القلب يحييه

سحاب وصلك لا كسى القلب يحييه
تخضر معاليقه وتروى عروقه

غيرك ليا من مرني ما التفت فيه
لو ترعد رعوده وتبرق بروقه

وصفك فريد وجل ربٍ مسويه
فيك الحلايا النادرات مخلوقه

غلاك فيني بيناتٍ مواريه
ليت الذي ذقته بعشقك تذوقه

لا غبت اسامر كل نجمٍ واراعيه
واصبر ونفسي للمواصل شفوقه

اللي يودك مخلصٍ لا تخليه
اتعب على وصله وكمل حقوقه

لا صرت مثله يوم يغليك تغليه
راع الغلا ما فيه شيٍ يعوقه

دربٍ يودي صوب صاحبه يمشيه
على اتجاه الحب يدفعه شوقه

لو كان خله بالغرابيل مشقيه
ما فيه غيره بالخلايق يشوقه

انشهد ان العشق بلوى لراعيه
يونس عذابه لا مشى مع طروقه

قلبه على غير اختياره يوديه
ورجله على مشهاة قلبه تسوقه

يصبح مثل طيرٍ تتله مشاحيه
يبي يطير وقاضباته سبوقه
,
,
الشاعر خليل بن هدلان


اطيب تحياتي لكم