ديوان الشاعر ناصر القحطاني - شاعر الاندلس

قصيده طعم المسا - ناصر القحطاني

معك طعم المسا غير .. و معك حتى السوالف غير
معك يا حلو تقليب المواجع بين كفينك

تبختر بين دقات الخفوق و نشوة التفكير
ترى كل الحياه اصغر من اللي بيني و بينك

احس انك تجي و العشب ينبت و الطيور تطير
و احس ان السحاب يلوح براقه علي يدينك

احس بروعة الدنيا و احس ان الزمان بخير
و احسك للحياة اعذب نداء ما انت بمثل عينك

اشوف الصبح لا شال الشفق هز الظلام عصير
و اشوف الورد يضحك ما بقى الا ينشدك وينك ؟

و اشوف الريح تقبل مستخفه دمها و تغير
تنثر لك شعرك و تنتثر سلة رياحينك

ورا ما ترقص القمرا بقلب خانه التعبير
مثل ما ترقص الالوان في مسرح فساتينك

دخيل انشودة العشق و ذنوب ترفض التكفير
دخيل اخر ربيع مرني في حضن عشرينك

انا اللي نزلك من برجك العاجي و جاك يسير
يمد لك اليمين ولا درى عن لهفة يمينك

و اثرك تشوفني في حلمك اللي في رجا التفسير
على ذاك الحصان الابيض اللي في ميادينك

شعرت بطعم سكينك من اول ما بدا التقدير
تمثنيت العروق و قبل اكبر جرح سكينك

لقيتك قبل ما ابحث عنك في الابراج و التبصير
قريتك قبل اموت بلذة قراءة فناجينك

ابي للناس اسولف بك و اقول اللي يصير يصير
و احسك سالفه لو سولفوها شوهوا زينك

حشا لو تطري الفرقا ما اعدك راعي التقصير
عزاي اني ملكت بوقتها عرش اجمل سنينك

يقولون الزمان اغبر و انا اقول الزمان بخير
ما دام اللي سكن في ناظرك ما طاح من عينك

قصيدة الذاهبة - ناصر القحطاني



الله اللي راد والعقده قضاها اللي عقدها
لا على الدنيا سلام ولا لباقي العمر زينه
الفضا ما كنه الا خيمة طاحت عمدها
والفرح ما كنه الا شيخ انقصت يدينه
والعمر قطعة زجاج انكسرت ولا طال امدها
والعرب في العيد بدموع اليتامى مستهينه
والشوارع لفها ثوب الظلام اللي هجدها
والبيوت اطلال من عقب المحبه والسكينه
والشتا والليل والبرد وسما يصرخ رعدها
والعيون اللي ورى الشباك مذعوره حزينه
طولوا بالكهف الاصحاب وبقت روحي وحدها
كنها في كوكب ثاني خلا من ساكنينه
الوداع اللي بعلم العين يعبر من رمدها
والوداع اللي بلا علم لقفص صدري غبينه
والوداع اللي بلا رجعه علي أمر وادهى
والله انه غرغرة سم وسكاكين سنينه
والعنود اللي جفيت الناس والدنيا بعدها
مدت الفرقى لغاليها وهي تعطي الثمينه
وينها كيف اتركتني ليه ما جت في وعدها
والقمر لاطل خابرها تجي بيني وبينه
رحت انادي واتلمس في مهب الريح يدها
كني احصان بلا صاحب طوى البيدا حنينه
رحت اصيح الصبح وينه والعرب مارد احدها
ما سمعت الا صدى صوتي يقول الصبح وينه
كنهم من يوم ذيك الشمس غابت من بلدها
طلعوني في النفود وصكوا ابواب المدينه
كنهم من يوم ذيك الذاهبه محدن وجدها
كل رجال من الشرهه قلع في الدرب عينه
أثرها ماتت وماتت كل فرحه في مهدها
والربيع اقفت به اللي كانت التاج لجبينه
جاورت عقب الحدايق حفرة ماقسى لحدها
حفرة ماني مصدق كيف ضمت ياسمينه
للحزن فيني مثل ما للطهاره في جسدها
ويش اسوي لا فتشت اللي لها وسط الخزينه
زخرفت حلم وبنت له مسكن وسمت ولدها
اه لو غرد ولدها في خميلة والدينه
عاهدتني واظفرت بيمين اقوى من عهدها
والصبي لا خير فيه ان كان ما نفذ يمينه
ما تتقى في رثاها عرق اكتظ بشهدها
ولا تبقى خلف قضبان الجفن عذرى سجينه
كيف عند العالم ايام العزى محصي عددها
والا انا طالت شهوره والله اعلم كم سنينه
لا الثرى فيها نبات ولا المشي خط بنكدها
ولا السما فيها طيور ولا البحر يمه سفينه
لا القمر هذا مساه ولا العصي هذا رغدها
لا الزهر هذا شذاه ولا الذهب هذا رنينه
قالوا الشيخ الفلاني مرجع القوم وسندها
قال يبشر بالعوض والعلم جينا ناقلينه
ساقلك بدر البدور اللي نشدها من نشدها
جادل هزت عروش وخيبت روس ذهينه
قسمها في رسمها في جسمها الا في رشدها
واسمها ان جال الغضب قومه على الألسن رطينه
اترك الناي وعطية شيخنا غن لسعدها
وانبسط يا عم وانسى اللي ورى التربه دفينه
قلت ولصدري تناهيت تروع من شهدها
اه واويلاه من يجلب على قلبي ظنينه
خلوا اغلى ذاهبه ترعى ربيع اللي فقدها
والعطى راعيه محد صوبه الله لا يهينه
لو ضمنت الجنه وتفاحه القلب وشهدها
قلت من بكره عسى مجنونها تاقف سنينه
الله اللي راد والعقده قضاها اللي عقدها
لا على الدنيا سلام ولا لباقي العمر زينه

قصيدة سوار الذهب - ناصر القحطاني

يالفارس اللي ترجلت و حضنك الهدب
يا ليتك أبطيت و الدنيا عليها السلام

يوم اعتنق معصم الأمه سوار الذهب
طاب التلاقي و لا أحلى منه غير الخصام

ثرت و بدل ما يسيل الدم لين الركب
اوميت بالغصن حتى جاك سرب الحمام

همنا بموالك اللي مثل صوت القصب
يا عاجل البر و الخيره و مسك الختام

الله على فعلك أثره مثل حد الحدب
و الله على الكرسي أثره مثل بنت الحرام

أحد على أخوه و أحد ضد أبوه انقلب
ترسم و تحسم خرايط تحت جنح الظلام

و أحد رهين اتجاه الريح مع من غلب
و أحد على طول خلف خلاف .. ليته عدام

ما يعجبه لا العجب و لا الصيام برجب
كان أسفل السافلين و فجأه أعلى السنام

و اللي انولد وسط فمه ملعقة من ذهب
الرب ساتر عيوبه من سنين الفطام

بس انت غير و فعولك غير .. ياللعجب
من يأسنا في الحلال نظن فعلك حرام

خطابة العرش مروا في زحام و صخب
يا أشد أهمية من أهل الصخب و الزحام

يا أكبر فخامة و أقو عزوم و أعلى رتب
و أطلق زعامة و أعز جنودوأطهر نظام

لا فاخروا بالدراهم و الحسب و النسب
فاخر بشي عجز عنه الملوك العظام

معاويه و انت عيدين بحياة العرب
و احنا جسد و انتم الاثنين تاج و وسام

قالوا زمام أمة محمد عساه انقضب
قلت الله يخلي خشوم النسا للزمام

في شرقنا تنقص الثورة و حجم الغضب
و يزيد رقم النصايب جنب رقم الخيام

فخامة الريس أعيانا الرجا و التعب
حتى أصغر أحلامنا ماهي على ما يرام

فخامة الريس اخر شي عندي طلب
تسمع من اللي فتح لك قلبه اخر كلام

لو فيه عشرين حاكم من سوار الذهب
ما كان قلنا عروبتنا عليها السلام