الجـــــــــــــــــــــــــــــــــــــــزء الثــــــــــــــــــــــــــــــامن عشــــــــــــــــــــر
وصلوا للاوتيل...عبدالعزيز وعبدالله بغرفه ووفيصل ونايف بغرفه وخالد ومحمد وابراهيم بغرفه
اول ماوصلوا كلموا اهلهم وقعدوا بعدها
راح محمد لغرفة عبدالله وعبدالعزيز ونايف وفيصل ودق عليهم...طبعا الثلاث غرف كلها جنب بعض..
محمد: بتنامون الحين..؟
فيصل بطنازه: والله نبي ناخذ رايك يا اخ محمد..
نايف: هههههههههه وش تبي اجل..؟
عبدالعزيز: صدق انك ماعندك سالفه..
محمد: طيب خلاص اسمعوا ناموا الحين وبالليل وقت العشا ننزل مطعهم تحت...مطعم لبناني وكل شغله بالليل..
نايف: اهاا عشان كذا..
محمد: هيه هيه وشو اللي عشان كذا موقصدي شي ..
نايف وهو يغمز له: يعني؟ ههههههه
محمد: مو وقت خفة دمك..
فيصل: محمد روح الحين خلنا نرتاح وننام ولما نقوم ننزل ونسوي اللي تبي
عبدالعزيز: قسم بالله انك غثه انا كاره السفره بدون شي الحين كارهه اكثر معك
محمد: يووه اجل الله يعينك هههههههه
رجعوا ناموا وقاموا بالليل ونزلوا للمطعم اللبناني ومحمد كان حاجز قبلها طاوله لهم
.................................................. ......
في بيت بوفيصل
عهود: احم
لينه: اهلين تعاالي
عهود وهي داخله: شخبارك..؟
لينه: بخييير
عهود: مممم تصدقين ام الوناسه والفله هالاسبوع
لينه بضحكه: عارفه..
عهود: احلى مافيك انك تفهمينها بسرعه..بس في اشياء استغرب منها..فيصل بسهوله يقص عليك..
لينه: ههههههههههه (لينه في نفسها: لانك ماتدرين ياعهود وش شفت..)..الا وين عنود..
عهود: تحت وشرايك ننزل لهم بدال هالقعده..؟
لينه: يلا..
نزلوا تحت ولقوا ابو فيصل وام فيصل وام ناصر وعنود
لينه وعهود: السلام عليكم
الكل: عليكم السلام
وسلموا عهود ولينه عليهم وقعدوا
ابو فيصل: حيا الله لينه شخبارك يابنتي..؟
لينه وهي تسلم على عمها: بخير الله يسلمك..بشرني عنك..
ابو فيصل: يسرك الحال..
لينه: الحمدلله..
ام ناصر: فهد الحين ليش مسفرين كل عيالكم...؟
ابو فيصل: شغل والله..
ام ناصر: وش هالشغل بعد..؟..انتو تبون تسفرون وبس..اي عشان يخربون ويقلبون على حريمهم..
ابو فيصل: لا مو كذا..
ام ناصر وهي تقاطعه: بلا كذا بلا غيره كلمهم يرجعون
ابو فيصل: مايصلح يا اختي..
ام ناصر: وش اللي مايصلح اجل يصلح يروحون ويسافرون ويقعدون براحتهم..
الكل كان ماسك نفسه من الضحك على شكل ابو فيصل وام ناصر تتحلطم عليه
ابو فصيل: ولايهمك اوعدك اخر هالاسبوع هم عندك..
ام ناصر: اقولك يرجعون الحين تقول اخر الاسبوع
ابو فيصل: في عقد مانقدر نخالفه...
ام ناصر: ان شاء الله عقد زواج..؟
الكل: ههههههههههههه
ابو فيصل: لا يابنت الحلال عقد شغل..
ام ناصر: ايه اقعد خلهم يجونك اخر الاسبوع وينقفون عليك..
ابو فيصل: لا اله الا الله..
ام ناصر: وشفيك بعد لايكون مو عاجبك الكلام..؟
ابو فيصل: اذكري الله يابنت الحلال
لينه وهي تبي تغير الموضوع: الا خالتي شلونك الحين احسن ركبك ماتوجعك..؟
ام ناصر: لا الحمدلله بس ضغطي مرتفع..
لينه: هههههههه سلامتك ليش..؟
ام ناصر: والله من كل شي..
لينه: افاا ضغطك يرتفع وانا موجوده..
ام ناصر: الله يخليك بس..الا شخبار حملك..؟
لينه: الحمدلله بخير..
ام ناصر: عاد لاتقعدين تتنطنين وتصيرين مطفوقه (وهي تأشر بعصاتها على عهود) مثل ذي
عهود: اناااااااا مطفووووقه؟؟؟
ام ناصر وهي تهش بعصاتها: اي مطفوقه ونص عندك مانع..؟
عهود وهي خايفه من العصا: اااي لالا خلاص مطفوقه مطفوقه
لينه وهي تستفزها: هههههههه ان شاء الله بتعقل..
عهود طالعت لينه خلت لينه تضحك عليها
ام ناصر: اسمع يافهد بنتك ذي مايعقلها الا الزواج..
عهود: لييش..؟
ابوفيصل: توه بدري عليها
ام ناصر: لالا لابدري ولاشي شوف لها احد يضفها ولاتاخذ ولدي ناصر
ام فيصل: بس ناصر متزوج وعنده عيال
ام ناصر: موب مشكله الشرع محلل اربع..
عهود: بس انا ما اابي اخذ واحد متزوج..
ام ناصر: مو بكيفك يابعدي..
ابوفيصل: هههههههه حرام عليك يا اختي زوجة ولدك مريحته وما في احسن منها اخرتها تحطين لها ضره..
ام ناصر: اي موب مشكله..
عنود: اجل ليش مارضيتي فيصل ياخذ وحده ثانيه غير لينه..
ام ناصر: لالالالالا لينه غير شيخة الحريم..
لينه: تسلمين ياخالتي بس بعد زوجة ناصر ماشاء الله وش زينها وناصر يحبها حرام..
عهود: هييييييه وشو اصلا انا مااااا ابي ناصر مو بكيفكم
ام ناصر: اجل خلاص ندور لك واحد غيره..
لينه: وشرايك بخالد ولد عمي..؟
ام ناصر: ماشاء الله وش زينه بعدين لاهو متزوج ولا شي..
عهود سكتت
ابوفيصل: بتزوجون الولد وهو مانطق
ام ناصر: ماعليك لينه تقنعه
عنود: روحي كلميه يالينه ههههههه
لينه: يووه بدون ما اكلمه يحمد ربه ياخذ عهود..بس المهم عهود ترضى وشرايك ياعهود..؟
عهود: لما يجي يخطبني يصير خير..
لينه: يعني لو جا خطبك بترضين..؟
عهود انحرجت من كلامهم: ترى احرجتوني
الكل: هههههههههههه
لينه: انا بقوم اشوف العشا..
عهود وهي ماصدقت على الله : ايه وانا بجي معك..
................................................
في الطبخ
عهود: اوف اشوى لقيت شي اقدر احطه حجه اقوم منهم..
لينه: مو انتي اللي قلتي(وهي تقلدها) تعالي ننزل احسن من هالقعده..؟
عهود: خلاص حرمت..
لينه بخبث: طيب عهود بسألك سؤال وابي جواب صريح
عهود وهي معقده حواجبها: اسألي
لينه: وشرايك بخالد..؟
عهود بارتباك: شلون يعني..؟
لينه: ممم يعني لو جا خطبك بتوافقين..؟
عهود:.............
لينه: ها وين الجواب..؟
عهود وجهها احمر:............
لينه: ترى السكوت علامة الرضا..
عهود:.............
لينه: بنت انا اكملك
عهود: اسمع
لينه: قولي يا اي يا لا
عهود: ماصار شي عشان اوافق ولا ارفض
لينه: داريه بس ابي اعرف
عهود: ممممم ما ادري
لينه: معناااته موااافقه
عهود: تراك احرجتيني سكري الموضوع
لينه بفرح: طيب
................................................
فيصل: ياخي ازعاج هالمطعم..
محمد: بالعكس فرفشه...
عبدالعزيز: فرفشه بعينك..
محمد: هههههههههههه تراكم مسافرين موداخلين حرب وش هالنكد اللي انتوا فيه من يوم ماوصلنا
عبدالله: الله يعدي هالاسبوع على خير
نايف: ههههههههههه نتمنى ان مايكون فيه اصاباات
ابراهيم: مو ناوين تطلبون شي..
عبدالعزيز: انا مو مشتهي..
ابراهيم: اقول عاد بتاكل رضيت ولا ارضيت..
عبدالله: انا اي شي اللي تجيبون باكله..
محمد: مو تخلصه عاد هههههههههه
دق تلفون خالد في هاللحظه
خالد: عن اذنكم شوي..
الكل: تفضل
في جهه ثانيه
خالد: هلا والله..
لينه: هلا فيك
خالد: اخباركم..؟
لينه: بخير..وش هالاصوات..؟
خالد: اخوك محمد بعد
لينه: خيانه...ومن قاعدين معه؟؟
خالد: والله مافيه احد تطمني..
لينه: ايييه الله يستر..المهم كيفكم
خالد: بخير..انتو شخباركم..؟
لينه: الحمدلله عندي لك بشاره..
خالد: الله يسمعنا الاخبار الطيبه..
لينه: مبروك فاتحت عهود وشكلها ماعندها مانع..
خالد بفرح: جد..؟
لينه: اي والله
خالد: يعني افاتح امي لما ارجع تراها غثتني وانا كنت مستني ردك..
لينه: فاتحه وبثقه بعد...
خالد: تسلميييين يالينه مشكووره يا اختي
لينه: العفو خلود الف مبروك مقدما والله يوفقك..يارب..
خالد: تسلمين والله ما ادري وش اقولك..
لينه: ولو تدري انك مثل محمد وعبدالله وفي غلاهم
خالد: داري والله..الله لايحرمنا منك...
لينه: طيب لاتقول لاحد اني كلمتك
خالد: وش قالوا لك لينه و مزون اذاعة رويتور ههههههههه
لينه: هههههههه يجي منك اكثر..يلا بتركك
خالد: الله معك..
.................................................. ...............
شغل الشباب تقريبا خلص ومابقى عليهم غير كم يوم ويرجعون
الساعه 12 الليل كانوا نازلين تحت باللوبي في الاوتيل يشربون كافي
محمد: والله ثقلت عقب هالاكله
فيصل: ما احد قالك تاكل اي اكل من الشارع
محمد: يوه تكفى عاد
ابراهيم: اطلع ارتاح طيب..
محمد: لا ياخوي مابقى غير كم يوم ونمشي
نايف: اجل استحمل
عبدالعزيز: واخيرااااا ياربي بنرجع
فيصل بضحك: مبروك
عبدالعزيز: يباااااااااارك فيك يا ابن الحلال بتطلع روحي
فيصل: سلامة روحك هههههههه
نايف: هيييييييه حمود وين رحت..؟
محمد: هلا...اقول شباب شوفوا هالبنات
خالد: وين..؟
محمد: هذوليك شوفهم وحده فيهم لابسه فوشي ووحده اسود
خالد: اي اي شفتهم..
محمد: ليت من يقعد معهم
خالد: والله موب شينات..
فيصل: هيه خير ان شاء الله وش جاكم..لاتقعدون تطالعون في بنات الناس كذا
محمد: يووه وش سوينا..
نايف: ترى عيب لاتقعدون تطالعون فيهم..
عبدالعزيز: انتوا لاتسون لنا مشاكل
عبدالله: ياليتنا مو جايبينكم
محمد : اقعدوا بس انا بروح لهم
ابراهيم: اووه محمد شوف البنت تبتسم لك..
محمد: اي وش حسبالك عن اذنكم
فيصل: حمود انثبر
محمد: ما ابي بروح..
عبدالله: صدق انك ماتستحي اقعد
محمد: فيصل تجي معي..؟
فيصل: لا والله انا ما اشوف وحده في هالدنيا مثل زوجتي..روح انت لهاللي تبتسم لك وتبتسم لخمسين واحد غيرك..
نايف: بصراحه وقاحه..
عبدالعزيز: ياقلبي على ساره بس
خالد: هههههههههههه من بقى
ابراهيم: انا وعبدالله ههههههههههه
.................................................. ......................
الساعه 2 بالليل
كانت مزون سهرانه مع ريم وراحت تدق لمحمد
مزون: مارد
ريم: دقي مره ثانيه..
مزون: اخاف نايم..
ريم: ما اضن..جربي
مزون: طيب....الو
....: الو
مزون سمعت صوت وحده وشافت للشاشه يمكن تكون غلطانه بالرقم بس لقت رقم محمد
مزون:.......
المره: الووو
مزون: محمد..؟
المره: من انتي..؟
مزون: وين محمد..؟
المره: اووه مش فاضين لك..
وقفلت الخط
ريم: كلمتي..؟
مزون........
ريم: مزون..وشفيك..؟
مزون: ردت علي وحده..
ريم: وشو..؟!!..من ذي..؟
مزون وهي معصبه: ما ادري
ريم: لايكون غلطتي بالرقم..
مزون: لا ما غلطت متأكده منه
ريم: دقي مره ثانيه
دقت مزون وبعدها رمت التلفون
مزون وهب معصبه: قفله الخايس
ريم: وشفيك اهدي..
مزون: وش اهدى اخرتها يذلفون يسافرون ويقعدون لي مع حريم
ريم: استني بكلم عبدالله
كلمت ريم عبدالله ونفس الشي مقفل
ريم: حتى عبدالله تلفونه مقفل
مزون: طبعاا الشباب سهرانين مايبون احد يأذيهم يبون يقعدون على راحتهم..انا اوريك يامحمد اخرتها تعرف علي وحده والله مااقعد لك دقيقه
ريم: وش بتسوين..؟
مزون: وش بسوي الحين تشوفين
قامت مزون وراحت غرفتها ولحقتها ريم وقعدت تشيل اغراضها
ريم: خبله انتي وش بتسوين..؟
مزون: بروح بيت اهلي...خله يعرف من انا اخرتها مره يامحمد هذا وانت رايح لشغل
ريم: استهدي بالله
مزون وهي ترتب اغراضها: والله ما اقعد له دام هاذي سواياه ولا بعد حتى اخواني الحبيبن معه وماقالوا زوج اختنا مالت عليهم كلهم رجال زي بعض
ريم: يوووه وشفيك يابنت الحلال
مزون: تكفين تسكتين انا ماراح اقعد معه اول مايجي اخليه يطلقني
ريم: انهبلتي انتي واللي ببطنك..؟
مزون: انزله ما ابيه ولا ابي ولده
ريم: وش تنزلينه عشان تروحين وطي..؟
مزون: في داهيه لو مانزل ياخذه ويروح
ريم: مزون انتي الحين معصبه اهدي وبعدين سوي اللي تبينه
مزون: ماراح اهدى
ريم: اسمعيني انتي تحبين محمد وهو يحبك بعد لو كان يعرف وحده ممكن تكون نزوه المفروض انك تتمسكين فيه الحين وتخلينه ينسى اي وحده غيرك
مزون: مالت عليه من باعنا برخيص بعناه بتراب
ريم: وحبك لمحمد..؟
مزون: كرامتي فوق قلبي واذا قلبي بخليني ادوس على كرامتي..اطعنه بيدي..
ريم: والله انك خبله...
..................................................
راحت مزون ثاني يوم بيت ابوها وعلمت لينه وغاده وريم علمت ساره حتى عهود وعنود اعرفوا بالسالفه بس ماعلموا اهلهم واستنوا رجعة الشباب
في بيت بو عبدالعزيز
ساره: معناته كلهم ذاك اليوم كانوا مع بعض
مزون وهي منقهره: الضاهر كذا ...لان دقينا على عبدالله مسكر وانا عقبها دقيت على خالد ومحمد وريم كلمت نايف وكلمنا عزيز وفيصل وابراهيم بعد كلهم جوالاتهم مقفله
عهود: كلهم..!
عنود: طيب تأكدتوا يمكن مايكون صدق..
مزون: اقولكم انا مكلمه المره والاخت اقولها وين محمد تقوول يوووه مش فاضين...
لينه: طول عمرهم الرجال كذا
مزون: اي والله بس يصير خير يامحمد
عنود: نشووف وش بيصير لما يرجعون..
عهود: ما ادري بس فيصل استبعد عنه هالشي..
لينه: ليش عشانه اخوك..؟
عهود: لالا مو عشان كذا لو عشان قلبي كنت بقولك ابراهيم بس فيصل اعرفه مو راعي خرابيط..
عنود: اي صح
مزون: وابراهيم..؟
عهود: حتى ابراهيم بس فيصل اكثر
لينه: عموما يوصلون ويصير خير
عنود: والله واضح بتصير مشكله كبير بالعايله كلها
..................................................
جا يوم رجعة الشباب وهم مو داريين وش ينتظرهم...
رجعوا محمد وعبدالله لبيتهم
محمد وعبدالله: السلام عليكم
الكل: عليكم السلام
سلموا على اهلهم وقعدوا
محمد: وين مزون..؟
ريم: في بيت عمي بو عبدالعزيز
محمد: ماتدري اني بجي..؟
ريم: الا بس هي صار لها كم يوم في بيت اهلها ومو راضيه ترجع..
محمد: مو راضيه ترجع..!ليش ..؟
ريم:..........
عبدالله: ريم ليش سكتي..؟
ريم: الليله بتعرفون..عن اذنكم
راحت ريم وتركت عبدالله ومحمد وهم مستغربين ومو فاهمين شي وحاول عبدالله يسحب منها الكلام بس مافي فايده
بنفس الليله جات مزون وخالد وعبدالعزيز
محمد كان جالس ودخلت عليه مزون
محمد بأبتسامه: هلا والله (وهو يبي يسلم عليها)
مزون وهي تأشر بيدها: ماله داعي اقعد
محمد: مزون وشفيك..؟!!!
مزون: اقعد وتعرف
عبدالله: وشفيكم وش صاير اليوم..؟
عبدالعزيز: حصل شي بغيابنا..؟
مزون: اسمعوا عاد...انا ابي اتطلق..
محمد بصدمه: نعم؟؟؟ وش قلتي..؟؟
مزون بإصرار: اللي سمعته..
عبدالعزيز: وش هالكلام..؟
خالد: ليش بعد..؟
مزون: اسمعوا انتوا الاثنين مالكم شغل فيني ولاتدخلون في حياتي
عبدالعزيز: حنا اخوانك واكبر منك
مزون: امحق اخوان رايحين مع زوجي وقاعدين انتو وياه وسهرانين مع حريم..
خالد: وشو..؟؟!
مزون: اللي سمعته
خالد: طيب خذينا على قد عقلنا وفهمينا وش حصل..؟
مزون: انا ملكمه جوال محمد وراده علي وحده واقولها وين محمد تقول مو فاضين
ريم: وبعدها دقينا على جوالاتكم كلكم ومقفلينها..
ساره: ليش سويتوا فينا كذا..؟...هذا واحنا مهتمين فيكم...الحين لو تكلمونا ويرد عليكم واحد وش تسون؟
عبدالعزيز من سمع كلام ساره عصب ووقف وحس نار شابه بداخله لان كلامها فيه جرح لهم
عبدالعزيز بصوت عالي: وش تقولين انتي..؟؟؟
ساره: شفتوا شلون عصبتوا بس لما قلناها بالكلام..؟
خالد بعصبيه: ومن قايل لكم ان احنا قاعدين مع حريم...؟
مزون: ماسعت وش قلت لك..؟
عبدالله: هالكلام متى صار..؟
مزون: يوم الثلاثاء
الشباب تذكروا ذاك اليوم وسهرتهم باللوبي
محمد: بس هالكلام ماصار..
مزون: لا ياشيخ..؟..اجل من اللي ردت علي..؟
محمد: اسمعوا انا بقولكم السالفه من اولها واوعدكم اني ماراح اكذب بحرف
الكل:............
محمد: يومها احنا طلعنا ورحنا نتمشى المهم رحت ولقيت مطعم بالشارع وانا الوحيد اللي اكلت منه
ليلتها قعدنا باللوبي واحنا قاعدين شفنا بنات وقعدت انا وخالد نقول شوفوا ياشباب وما ادري وشو والصراحه كلهم كانوا يقولون لي عيب وماا دري ايش وانا وخالد
كان كلامنا مزح والله كنا بس بنشوف ردة فعل الشباب يعني كانت لعبه بس اما البنات اول ماشافونا قاموا يبتسمون ويعطون من هالنظرات والدلع بعدها بشوي جاني الم قوي وماقدرت استحمل
وعلى طول جات سيارة الاوتيل ودتني المستشفى لاني كنت بموت واصرخ من الالم واحنا كلنا بلا استثناء نسينا جوالتنا وانسرقت....وماندري عاد اللي خذاها اولاد ولا بنات ولا غيره..
بس هذي المسأله ومافيها وبدال ماتقولون لي الحمدلله ع السلامه عقب التسمم تقولون خاينين وتبون الطلاق وما ادري وشو
مزون: وش يضمن لنا ان كلامك صحيح..؟؟
طلع محمد ورقه من جيبه وعطاه اياها
محمد: هذي ورقة دخولي للمستشفى..والسبب اللي خلاني ادخل لها..كل شي موجود بالورقه واقريه..
قرت مزون الورقه وعرفت ان كلام محمد صحيح...قعدوا البناات يلقطووووون وجيهــم من الفشلــــه ولا وحده فيهم نطقت..
خالد: هههههههههههههههههه
عبدالله: وشفيكم ساكتين؟
عبدالعزيز: ها مزون..؟
مزون:........
محمد وهو شكله تعبان: خلاص لاتكلمونهم..عن أذنكم
وطلع محمد وطلعته ذبحت مزون لانها ظلمته وهو كان بالمستشفى وهي ماتدري عنه
عبدالعزيز: ماودكم تقولون شي..؟
ساره: الغلط مو غلطنا..غلطكم انتوا المفروض اول مادخلتوا محمد المستشفى تكلمونا وتقولون جوالاتكم انسرقت
عبدالعزيز: الحين صرنا احنا الغلطانين؟؟؟
خالد: لا غلطانين ولا شي ...الا انتوا مخابرات في نفس الليله اللي دخل محمد المستشفى وانسرقت الجوالات كلمتوا...
عبدالله: وعلى طول حطيتوا ببالكم ان احنا قاعدين مع حريم؟؟
عبدالعزيز: صدق ناقصات عقل ودين..
ريم: مو ملاحظين انكم زودتوها لوا حنا كان قلبتوا الدنيا..
قامت ساره وريم ومزون واطلعوا وخلوهم.....كلمت ريم لينه وقالت لها السالفه
لينه: هههههههههههههه ياحلااااوه صرنا مصخره
ريم: ههههههههه احمدي ريك منتي معنا قعدنا نلقط وجيهنا
لينه: هههههههههههههه اتخيل اشكالكم
ريم: بس شكل محمد زعللل مزون كاسره خاطري والله
لينه: ماعليك محمد مايقدر يزعل من مزون...
ريم: ان شاء الله ...
لينه: اجل اقولك بروح لفيصل الحين العب في حسبته شوي مثل مايسوي فيني دايما
ريم: ههههههههههههه طيب
لينه: يلا مع السلامه..
ريم: يااهلاا
سكرت لينه من ريم وراحت لفيصل
لينه: فيصل..
فيصل: عيونه
لينه وهي تقعد جنبه: تصدق..
فيصل: ايوه..
لينه: حلمت فيك..
فيصل:..جد؟؟
لينه: اي تبي اقولك ..؟
فيصل: غردي ياقلبي..
لينه: حلمت انك انت كنت قاعد مع وحده يوم سافرت..
فيصل في نفسه: وشفيها؟
لينه: وكان معك محمد وخالد وكلكم
فيصل: طيب
لينه: في الاخير قررت انك تتزوجها عاد وجيتوا انتوا من السفر معاكم حريمكم وطلقتونا..
فيصل: ههههههههههههههههههههه
لينه: عجبك الحلم.؟
فيصل: ماعليه والله ههههههههههه
لينه: لا والله؟...طيب قولي ماحصل هالشي فعلا..؟
فيصل: وشو هو..؟!!
لينه: الحلم اللي قلت عليه..
فيصل: ههههههههههه لا
لينه: يعني ماقابلتوا حريم ولا شي..
فيصل: ممم لا
لينه: ايييه طيب
فيصل: ههههههههه انا فااهم وش تقصدين..(وهو يخلي وجهه بوجهها) تحسبون اننا قعدنا مع حريم يوم الثلاثاء وقاعده تقصين علي لا حلمتي ولاشي هههههه صح ولالا؟
لينه: هههههههههه من قالك..؟
فيصل: دقوا علي ههههههههه
لينه: ايه قول كذا من اول..
فيصل: خلك الحين من ذا شخبارك..ماصدقت على الله اني ارجع
لينه: تمام
فيصل: مااشتقت لي؟؟
لينه: الا..
فيصل: الا بس؟
لينه: اشتقت لك موووووت
فيصل وهو يبوسها: وانا اكثررر ياحبي لك
.................................................. ..........
مزون: محمد زعلت..؟
محمد: لا
مزون: شكلك زعلان..
محمد:.....
مزون: محمد اسفه..صدق ان طلعت مثل البزر بس هذا لاني احبك..
محمد: تحبيني وتشكين فيني..؟
مزون: حط نفسك مكاني..
محمد:........
مزون وهي تحط يدها على ظهره: خلااص عاد حمودي تزعل من مزون يعني..؟؟
محمد بأبتسامه: لا بزعل ماقلتي الحمدلله على السلامه..
مزون: ههههههه يابعد قلبي انت سلامتك ياليته فيني ولا فيك
محمد وهو يحضنها على جنب: لا ان شاء الله لاتقولين كذا..
مزون: هذا اخرت الاكل من اي مكان..
محمد: خلاص عااد بتتشمتين ماراح اعيدها..اهم شي اني رجعت لك
.................................................. ..........
ساره كانت بالحديقه ماشيه وحست حد يمسك يدها
عبدالعزيز: تعالي هنا ههههههه
ساره: اهلين
عبدالعزيز: ان شاء الله لقطتوا وجهكم زين؟؟ هههههههههه
ساره: ولايهمك..اقول امش ندخل لعبدالله وريم
عبدالعزيز: يلا
.................................................. ..................
بعد مــــــرور ســـت سنــــــــوات
دخلت تتسحب للغرفه عشان ما احد يحس فيها وكانت تزعجها خصل شعرها اللي على عيونها
دخلت بجسمها الصغير وسكرت البااب بهدوء ومشت لين السرير وطلعت وتغطت بالبطانيه
محمد بصوت كله نوم: اوووووف
محمد: كالعاده يعني..؟
محمد: احسن مافي روحه اليوم..
لمى وهي تضحك: لالا بااااباا
محمد وهو يشيلها من الفراش ويجلسها على بطنه
محمد: وش مقومك من الصبح..؟
لمى كانت حاطه ايديها الثنتين على فمها وهي تضحك
لمى: ولا شي
محمد: ولا شي ها؟..وبعدين معك خليني اناام
لمى بدلع: باااباا قووم ودناا كودو
محمد: لا والله مافي
لمى وكأنها زعلانه: احسن انا ماراح اكلمك زعلت..
محمد: طالعه على امك حنه
لمى:........
محمد: يووه خلاص بوديكم انتي وسعود ونايف
لمى بفرح: هييييه بس نبي احمد ورواء يروحون معنا
محمد: طييييييييب هم تحت؟؟
لمى: ايي
محمد: خلااص يلا كلكم روحوا اجهزوا
نطت لمى وراحت تركض وشكلها كان يجنن لانها طفله وجسمها مليان وحلووو وهي تركض او تتحرك بس لمى وقفت وكانها تبي شي
لمى: باابا
محمد وهو ينزل ع الارض عشان يصير بمستواها: نعم
لمى: معليش أمل تروح معنا..؟
محمد: أمل ماتروح مكان الا مع امها
لمى وهي حاطه اصبعها في فمها: ممممم طيب بروح البس
محمد: يلا بسرعه وقولي لهم يلبسوون
........................................
في الصاله
لمى وهي فرحانه: يلااا بنروح المطعم
ام عبدالله: من بوديكم..؟
لمى: بااباا يقول يلا بسرعه روحوا لبسوا
احمد: ابي اروح
لمى: اي كلنا بنروح
مها: لمى بابا قالك بيودي احمد معكم..؟
لمى: اي احمد ورواء بس اللي ماراح يلبس بسرعه بابا بيروح ويخليه
احمد: مااما قومي لبسيني ابي اروح
مها: هذا انت لابس
احمد: لا ابي اروح
مها: هههههههههههه وشفيك هذا انت لابس هو يتكلم عن سعود ونايف ولمى لانهم لابسين بجاماتهم
رواء: وانا بروح..؟
مها: اي بس لاتفشلوني وتطفشون عمي محمد..
احمد ورواء: طيب
ريم: اجل بقوم البسهم ما ادري وين مزون
........................................
لينه بصدمه:وشو من صدقك انتي؟؟
مزون: اي والله
لينه:.............
مزون: الو لينه..
لينه: هلا
مزون: وينك لايكون...؟
لينه: لالا وش تقولين انتي.. مستحيل...بس تدرين متضايقه ليش هالشي يعني..
مزون: ماعليك المهم انك خلاص..
لينه بأبتسامه: اكيد ولايهمك..الحمدلله
مزون: يلا حبيبتي انا بروح الحين اسمع صوت لمى هالمزعجه اكيد قومت محمد
لينه: ههههههههههه اوكي انا بعد اسمع صوت فيصل والعيال
مزون: ههههههه سلمي على غاده
لينه: من عيوني يلا سلام
مزون: يا هلا
.................................................. ......................
|