الحلقه الثانيه والعشرون ..
تخرعت هذا شو يايبنه ,, رديت بسرعه .. ( أنا هب في البيت حاليا .. وباجر مشغوله ,, ياريت لو تأجل
ييتك للجمعه اليايه ,,لأني يوميا أروح الكوليج )
مدري كيف طلع مني هالأسلوب الوقح والبارد ,,, وهذا يوسف ليش ياي بعد وقته الحين ,, خل الطبخه تسخن شوي وأخليها تستوي على نار هاديه ,,
أدري كلنا بنروح ضحايا في هاللعبه بس لازم أسويها عسب أخذ حقي ,,, وأعرف الكل قدري ,,
ترييت يوسف يرد عليه بس يوسف ما رد عليه الظاهر رضا بالكلام اللي قلته وصدقه ,, بس أنا لازم هالأسبوع أسوي أي شي أي شي المهم اللي ببالي يصير ,,
وصلنا المول ,,
سلطان : يلا نواري وصلنا ,,
استانست ,, سلطان يدلعني منو قدي ,,, وأخيرا بدت اللعبه يا يوسف ,,,
نزلت وقلت : هب لازم تنزل ,,
سلطان : لا ما يصير دام يبناج لازم ننزل ,,
نزل سلطان ومشا يمبي بس ما مسك ايدي ,, شي طبيعي ,, مهما انعدم الحيا يتم ع الأقل فييه شوي منه ,, ولو القليل ,,
دخلت كذا محل ,,,, آخر شي يوم وصلنا جريب كلّه ملابس رجاليه ,,
مسكت ايد سلطان غصب وقلت وأنا أبتسم : سلطاااان هذاا وااااايد حلو لايق عليك ,,
سلطان طالع ايدي ورد يطالعني : دام نواري اختارته عاد أوكي ,,
ابتسمت له ,, عقب أوني عاد شفت ايدي بايده وسحبته وسويت روحي أستحي ,,, حسيت روحي منافقه وحرام اللي قاعده أسويه ,, ألعب ع الحبلين ,, بس لازم غصبا عني ,,
يكفيني ما ذقت من الحياه شو أذوق بعد ,,, الناس كلها مصالح .. لازم نحن بعد نعيش جذا وشراتهم ,,
سلطان طالعني وابتسم لأني أوني استحيت ,,
قال : فديت اللي يستحون ,,
بدينا ,, هذينا بدينا ,, ومدري متى بننتهي وعند أي نقطة ومنو بيدفع ثمن كل اللي قاعد يصير ,,
رحنا صوب المحل وقلت لسلطان : هذا سلطون حلو السماوي ,,
قال بهمس : فديت منطوقج ,,, هالسماوي قصدج ,, وأشر ع القميص ..
قلت له : هي ,, والبرموده لايقه عليه ,, بتتطلع طررر ,,
سلطان ابتسم وعلى طول راح عند الريال عسب ياخذ البدله ,, ختى بدون ما يقايس ,,
قلت له : قايس يمكن ما طلعت قياسك ,,
سلطان : لأأأأ المقاس عليها شرات مقاسي ’’
طالعته وقلت : برايك ,,
خلصنا وردينا ركبنا السياره ,,
سلطان قال : نوره تتعشين برا ,,
قلت له : لأأأأأ شكرا ,,
سلطان : عشان خاطري ,,
ابتسمت له و قلت له : أوكي ,,
تحرك بالسياره وحركها الين وقفنا عند مطعم قصر الهند ,,
طالعته ولا اراديا قلت : سلطان هالمطعم لأأأ ,,
سلطان : ليييش نوره ..؟؟
قلت له : مابا أتذكر أبوي ,,
سلطان حرك راسه : هيييه فهمت ,, انزين خلاااص حياتي لا تصيحين ,,
ياب ايده صوب ويهي عشان يمسح دموعي بعدت ايده عن ويهي ومسحت دموعي ,,
كثر ما أصير وقحه بس مو لهالدرجه انه يلمسني ,,
رحنا صوب مطعم ثاني ,, وقف السياره سلطان وبركنها ونزلنا المطعم ,, دشينا كبينه من الكباين ,,
قعدنا وسلطان شاف المنيو واخترنا كل اللي نباه ,,
سلطان طالعني وقال : ها مستانسه ,,؟؟
قلت له وأنا أبتسم : هي وااااايد ,,
سلطان : شي طيب ,, انزين نواري انتي في خلاااف بينج وبين يوسف ,,
طالعته مستغربه ,,, سلطان قال : لو ما تبين ترمسين برايج ,, بس والله اني براويه ,,
طالعته مستغربه هذا من وين ييدري ومنو خبّره عن السالفه ليكووون يوسف ,, لأأأأ مستحيل وكيف ,, يوسف أهون عليه ويطلع مشاكلنا لأحد ثاني ,,
سلطان طالعني : لا تخافين بوقف وياج ,, ولو مستغربه من يوسف عادي ترا الناس كلهم ألحين مصالح ,,
طالعته وقلت في خاطري ,, يمكن يوسف شرات خوالي ,, بس سلطاااان غير غير وايد ,, مبين عليه طيب وأيد ما يوقف بصف خوالي عشان الفلوس ,,
حسيت بحب أو بالأحرى باعجاب صوبه ,, لو اني كنت زوجة سلطان جان كيف حياتي ,,
ياربيييييييييييه شو هالأفكار الغبيه ,,, لازم أشيلها من بالي ,,
سلطان طالعني وقال : نوره .. لو يوسف طلقج تتزوجيني ,,
داااااااااااارت بي الدنيا ,, هالخبر اللي ما كنت أبى أسمعه طلاقي من يوسف ,, لأأأأأأ ما أتخيل روحي عايشه بدونه وع ذمة واحد غيره ,,
وسلطان ما صار لي الا أسبوع عايشه معااااه ,, أما يوسف عشرة عمر بينا ,, وأحبه من أنا صغيره ,,
بس دامي ابتديت هالدرب لازم أكمله لازم ,, طالعت سلطان استغربت ,,
كيف ما صار له الا أسبوع وااااحد يعرفني وعايش معاي ويقول هالكلام وشو المغزى من كلامه ,,
بس الظاهر يعرف بكل اللي بيني وبين يوسف ,, ويمكن الولد يبا يدافع عني مب شرات يوسف ,,
طالعته ونزلت راسي ,,
قال : أنا آسف اذا جرحتج ,, وسؤالي الظاهر مب بوقته ,,
طالعته وقلت : لا شو دراك كل شي جايز بـ هالدنيا ,,
سلطان ابتسم ابتسامة فرح ,, الظاهر اني بالفعل دخلت قلبه وحبي تربع في وسط قلبه ,,
تعشينا عقب العشا ,, رجعنا البيت دخلت الحجره ,,,
مستانسه ومب مستانسه ,,
مدري حياتي الحين كيف بتصير ,, وهل سلطان صادق ويايه ,, بس سلطان مبين عليه وايد طيب حرااام أظلمه بـ مخططاتي هذي ..
بس لأأأ لازم الكل يستحمل نتيجة أفعالي ,, المهم أخذ حقي ,,
رحت تسبحت وغيرت ,, وقعدت ع السرير ياترى يوسف شو يبا مني متصل اليوم ,,, والله حيرتني معاك يا يوسف ,,
أكيد متصل ,, عشان اييي ويبرر موقفه ,, شكله شاف له مبررات وفكر وقرر عقب ياااه ,,
بس أنا براويك يا يوسف .. وبنشوف عقب شو بتسوي ,, الله يعين سلطان لأنه بيتحمل نتيجه أفعالي معاي ,,
رقدت وانا مثل كل يوم أفكر وأخطط مستويه مافيا أوشي جذا ههههه .. مدري بس الحياه هي اللي جبرتني على هالشي ,,
...............
قمت اليوم الثاني شفت الشمس داشه بين الستاير ,, تجدمت عن الستاير ,, فتحت الستاره يوم شفت ضوء الشمس حسيت بدوخه ,,,
رجعت قعدت ,, مسكت راسي ,,, راح عني العوار .....
خذيت ملابسي ورحت أتسبح وأتلبس ,,,طلعت من الحمام مصحصحه ,,
رحت جدام المستواليت عسب أنشف شعري ,, وأمشطه ,,
طالعت شكلي في المرايه تخرعت ,, تجدمت ,, شفت ويهي شاحب وتحت عيني أسود ,,
اكيييد من التفكير ,, والهموم والصياح ,, كل شي بــ هالدنيا من صوب ,,
مسحت ايدي على ويهي .. وعقب حطيت بودر عشان أخفي الهالات اللي تحت عيني ,,,
نزلت ما شفت أحد ,, رحت صوب المطبخ ,,
شليت لي سندويشه وعصير ’’’ وطلعت رحت فوق الحجره .. مالي خلق لا ساره ولا أمها ,, ربي يكفيني شرهم هالعقارب ,,
رحت الحجره قعدت أول ما حطيت اللقمه في حلجي ,,
حسيت جبدي لايعه وقلبي تحرك من مكانه ,,, من كثر اللوعه ,,
كليت غصب ,, ما قدرت ,, أتريا ورحت ركض الحمام بديت أرجع ,, وأرجع ,,
لدرجه حسيت أمعائي بتطلع من مكانها ما قدرت أوقف ع ريولي قعدت ع البلاط وأنا ماسكه بطني والعوار يايني وشاد مكان واحد ,,
قمت رحت البانيو فتحت الماي الساخن وترسته ماي ,, قعدت في الماي ,, حسيت لدرجه نفسي بغا ينقطع ,, ياربييييه مابي أموت ,, كلّي ذنوب ,,,
عقب ما خلصت رحت حطيت راسي ع السرير وغمضت عيوني حسيت بلوعه ودوخه ,,, مدري حسيت روحي بموووت من العوار اللي زاخني في ظهري وبطني بعد ,,
حاولت أرقد ,, رقدت وما حسيت بروحي الا وأنا أنش على أذان العصر ,,
قمت بسرعه تيددت وصليت العصر ,, ونزلت عسب أتغدا ,, قلت للخدامه تييب غداي الحجره عشان محد يعرف اني تعبانه ,,
كليت غداي بشهيه لأني يوعانه واااايد وما تلوعت ,, خلصت ويوم رحت أقعد أحضر للكليه ,, حسيت بلوعه ودوخه في نفس الوقت ,,
بس يودت روحي غصب عشان ما اطلع اللي كليته ولا بتعب واااايد وبيرد لي فقر الدم ..
ونسيت روحي التعب بالتحضير .. الين حسيت العشا خلاااص قرب ’’ نزلت وشليت عشاي معاي الحجره ,,
الظاهر بهالبيت محد حاس فيني محد ,, أموت أحيا أكل أشرب محد بيدري عني ,,
تعشيت غصب وكليت شوي عشان ما أتلوع ,,
عقب رحت غيرت عسب أرقد ,,
تجدمت عن السرير ,, وشفت روحي قبل في المرايه ,, الظاهر تعب وبيروح انشالله ,,
خذيت لي حبة بندول ,, ورقدت ,,
قمت اليوم الثاني حزة أذان الظهر ,,
رحت تسبحت ولبست ,, وكشخت عشان اذا بشوف سلطان ,, ولبست أوقايتي ,, عقب نزلت ,,
طالعت محد في الصاله دشيت المطبخ ,,
شفت الخدامه قلت لها طلعي لي غدا ,,
طلعتي لي قعدت أكل قلت لها : ميري وين ساره وأمها ,,
ميري : راحت بيت أختها ,,
قلت : أهااا ,,
أنا أقول مالي أي معنى في هالبيت .. بس أحسن أهون عن الصدعه والسوالف ,,
عقب الغدا وقفت .. تجدمت من المغسله حسيت بدوووخه مسكت الطاوله ,, سنترت بمكاني ما رمت أتحرك ,, العوار رد لي والدوخه واللوعه بعد ,,
الخدامه : مدام نوره شو فيج ,,
طالعتها وقلت : ماشي ,, بس مب راقده عدل ,,
الخدامه : تشربين عصير ليمون ,,
قلت لها : هي ياريت لو تسويين لي ,,
طلعت من المطبخ عشان أروح الحجره وأتجهز للكليه ,, وأترتب ,,
وصلت فوق ,, شفت سمعت صوت ,,
..........: صح النوم يالكسوله ,,
لفيت ابتسمت : صح بدنك يالنشيط ههههه
سلطان : تبيني أوصلج الكليه اليوم ,,
طالعته وقلت : اممم برايك ,, هههه عسب أراوي البنات ولد خالي اش حلاته ,,
حسيت الحيا انعدم فيني لمصالح الحياه ,, لهالدرجه الحياه مشتني على كيفها وهواها ,,
سلطان : بس ولد خالج ,,
نزلت راسي استحيت قال : ما تغارين يوم البنات بيقولون هذا حلو ..
قلت : امبلى هههه
ودخلت حجرتيه بسرعه ,, حسيت روحي سخيييييييييفه وهذا سلطان خلال أسبوع فضح حبه جذا .. عاد لو سنه كل العالم بيدرون
تجهزت وسلطان وصلني الجامعه تم يسولف وياي حسيته خذ عليه واااايد وحسيت كل كلمه يقولها يقول كثرها أحبج أحبج ,,
نزلت الجامعه شفت البنات وابتسمت لهن ,,
جواهر يت صوبي : هلاأأأ والله هلأأأ
قلت : هلا وغلا ,,
جواهر : ها شو الأخبار ,,؟؟
قلت : تمام .. ومن صوبج ؟؟
جواهر : تمام ,, هاااا منو الحبيب اللي موصلنج ,,
قلت : أغااار تراني هههه
جواهر : الله يهنيج ههههه
حسيت روحي سخيفه وتافهه ومخرفه ,, أطلع كلام من جيبي وسلطان ما يعني ولا شي ,,
وايد تعبت في الكلاس ,, استأذنت وظهرت رديت البيت كنت مدوخه وااااايد الألم زاخني عدل ,,
رقدت بدون ما اتعشى ,,
قمت اليوم الثاني هلكانه تسبحت ولبست ,,, الخدامه يابت لي ريوق تريقت لأني ميته يووووع ما تعشيت أمس ,, حسيت بدوخه لما أوقف ,,
بعد ما خلصت قعدت ع السرير أحضر للكليه عشان الظهر أرتاح ,,
رقجت على ظهري ورفعت الكتاب تميت اقرا ,, طاح الكتاب من ايدي على بطني ,,
قعدت متخرعه ,,, فزعت راااااااح فكري بعييييد بعيد وايد ,,,
طالعت روحي في المرايه وطالعت بطني ,, حطيت ايدي على بطني ,,
وطالعته .. ليكووووون ليكون أنا حامل ,, لأأأأ مب وقته الحين ,, مابا أحمل أنا الحين مب وقته ,, هالشي بيخرب عليه ,,
تميت أفكر وأفكر ,, قلت لازم أفحص بس كيف ,, لازم أدور لي على حل ,,
فكرت وفكرت الين ما تجهزت للكليه ولبست ورحت الكليه يوم وصلنا قلت للدريول يوديني للعياده اللي جريبه ,, واذا فتح فمه وقال كلمه يت ويله مني ,,
دخلت العياده وسجّلت اسمي ,, ترييت في الانتظار ,, الين ما زقرو اسمي ,,
دخلت عند الدكتور ,, سوّت لي الفحص وقالت لي أتريا عقب دقايق بتطلع النتيجه ,,
طلعت ترييت في الانتظار وأنا أدعي يا رب ما يصير مب وقته ,, مابا عيال أنا لأأأأ لو فيني بطيحه هي بطيحه ,, حتى ولو كان ضناي وولد يوسف ,,
دقايق الا وزقروني دخلت عند الدكتوره طالعتني وقاااااالت : مبرووووووك يختي مبروك ..
طالعته بحسره وانكسار : أنا حامل ,,
طالعتني : آآآه يا حببتي انتي حامل ,,
طالعته قعدت ع الكرسي بدت دموعي تهل ,, أنا حامل أنا حااااااااااامل شسوي ياربيه ,,
الدكتوره مستغربه : فيكي ايه يا بنتي ,,
طالعتها وقلت : تقدرون تطيحونه ,,
الدكتوره طالعتني مستغربه : داااه حرااام وفيها تحمل مسؤؤليه ومحاكم ما يصيرش ,,
طلعت من عندها وأنا أرككككككض ,, نزلت ركبت السياره وانا أصيح ,,
قلت للدريول : تحرك يلاااا ,,
الدريول : وين مدام ,,
عصب عليه : أي مكان أي مكان البحررررررررر ,,
الدريول تخرع وحرّك السياره بسرعه ,,
آآآآآآآآآآه آه ه ه ه شكلي بتعب وايد الين ما باخذ حقي ,, بتعب واااايد .. وقته الحين أحمل شو هذا ,,
وصلنا صوب البحر نزلت من السياره بسرعه ,, بديت أتمشى ع السيف وأنا معصبه وطالعه من طوري ,,
طالعت بطني ورفسته رفسه بيدي وقلت : وقتك الحين انت الثاني ,,
بديت أصيح ,, بعد ما يوسف خانني صار شي يجمع بينا مابي شي يجمع بيني وبينك يا يوسف مابي ,,
رفست بطني بايدي ,, حسيت بألم فضيع وقفت عن الرفس ,,
حراااام أنا شو قاعده أسوي هذا ربي كاتبه لي لازم ما أعارض ,,
حطيت ايدي على بطني ,, دامه ولدي أنا اللي بتحمل مسؤوليته أنا ,,, ولازم محد يدري عنه خاصتا يوسف ,, ولا سلطان أخاااف يكرهني وأنا اللي بديت أميل له ,,
رديت السياره وتحرك الدريول رجعني البيت دخلت ما شفت أحد الحمدلله ,, أحسن ,,
رحت الحجره بسرعه ,, تسبحت وغيرت ,, حطيت راسي ع السرير وأنا تعبانه وهلكانه ,,
أفكر شو هالمصيبه اللي ظهرت بحياتي من يديد شو هاالمصيبه اللي بتذبحني ,, وتقرب أجلي ,, بس لأأأأ أنا لازم أجازف عشانك يا سلطان ,, مستحيل أخسره ,,
سمعت صوت الباب ينددق تجدمت عنه وقلت : منووو ..؟؟
............: سلطان ,,
قلت : ترييا سلطان ,,
رحت لبست عباتي لأني لابسه بجامه ولبست الشيله فتحت الباب .. سلطان كان متساند ع اليدار ,,
ابتسم لي وقال : ما بتتعشين ,,
قلت له : مالي خاطر ,,
سلطان : عشان خاطري ,,
قلت له وأنا أبتسم : أوكي ,,
سلطان ركز بويهي : بلاااج تعبانه ,,؟؟
قلت له وأنا مرتبكه ليكون يدري : ها لا بس قلة رقااااد ,,
سلطان : انزين يلا تعالي بسرعه ,,
طالعته وقلت : ثواني وبيي
رحت غيرت ونزلت شفت خالي وساره ومرته وسلطان ,, سلمت وقعدت وياهم تميت أكل شوي شوي عن جبدي تلوع ويشكون ,, خاصتا سلطان ماباه يعرف عنيه شي ,,
غير انه بدا يميل لي وااااااااايد هذا الظاهر ,, حتى أنا حسيت روحي أميل له نوعا ما مدري ليش ,,
عقب العشا رحت حجرتيه ,, شفت التلفون ,, مسج من بلسم جروحي ,,
( أنا ياي يوم الجمعه أكييييييد ليكون تطلعين ,, )
ردت لي جروحي ,,, يوسف خاصتا لازم ما يدري عن هالحمل ولا بروح في ستين داهيه وداهيه ,,
حطيت راسي وأنا اصيح .. كلما أتخلص من هم يرد لي هم ثاني وأكبر عن اللي قبله وأضعافه مئات المرات ,, ياربييييه متى بعيش مرتاحه وبتخلص من هالهموم اللي ملاحقتني في كل مكان وزمان ,,
...........................
قمت اليوم الثاني وأنا تعبانه ومرهقه ,, بقدر المستطاع أحاول أخفي الألم والتعب اللي ظاهر بعيوني وويهي ,, محد لازم يدري ,,
مرت الأيام وأنا أخفي هالشي على كل االلي في هالبيت ..
صح انهم ملاحظين اني تعبانه .. بس أتحجج بالكليه وقلة النوم وما شابه
ياه يوم اليمعه ,, قمت من النوم وأنا هلكانه ,, دخلت تسبحت وغيرت كشخت ع الخفيف بس عسب أخفي ملامح التعب اللي ع ويهي ,,
وقفت يدام المرايه تميت أطالع شكلي كيف غدااا ,,
صرت ضعيفه وااااااايد خلال هالكم من يوم ,, وهذا بعدي يمكن ما كملت شهر كامل ,,
عاد الله يعين الأيام اللي يايه ,,
اليوم يوسف بيي وبيشوفني شو بيقول عني .. أكيد مهملينها اهني وفهالبيت ,,,
أصلا أنا مدري كيف راضيه أقابله .. بعد اللي سواه له ويه يقابلني ,, المفروض أعارضه ما أشوفه ,, بس خلاااص أكيد هو ظهر وياي بوظبي ,,
تميت قاعده الين أذن الظهرابتدت صلاة اليمعه صليت ,, ونزلت ,,
شفت مرت خالي مجابله الخدم ,,
طالعتني وقالت : ريلج ياي ع الغدا ,,
قلت لها : أدري ,,
ورحت صوب الثلاجه شربت ماي عسب أبلل ريجي واشفي غليلي ,, مدري كيف بقابلك يا يوسف ,,
طلعت من المطبخ رحت الصاله ,, أفكر شو بسوي يوم بقابل يوسف .. وشو بيقول لي .. وشو بقول له ,, يارب ما أضعف يدامه ,, أنا ابتديت من اهني ولازم أنهي السالفه من اهني نهائيا ..
,,,,,,,,,,,,,,,
يو الرياييل من المسيد وراحو الميلس ,, تأكدت هاللحظه انه يوسف ياه ,,
قلبي عورني ,, كيف قاعده أخونه ,, بس سلطان أحسن عنه وأطيب عنه نوعا ماااا ,,
يوسف لو درا عني شو بيسوي فيني .. أشك انه بيذبحني وبيذبح سلطان ويايه .. أكيد هالشي ..
و كيف بقابل يوسف اليوم ,,, يارببببيييييه مدري والله بعامله أوكي بسلم عليه ولا العكس ,, بس يوسف ما يستاهل حبي له ,, لأنه خاين ,,
وبين شكوكي وتفكيري بيوسف وسلطان .. محتاره أختار قلبي ولا عقلي ,,, زقرتني مرت خالي عسب نتغدا ..
تغدينا أنا وساره ومرت خالي
عقب الغدا ياه خالي صوبنا ,, حسيت قلبي بيوقف ,, أكييييد خالي ياي يزقرني ,,
قال : نوره يوسف في الميلس ,,
طالعته وقلت : هي الحين يايه خالي ,,
رحت الحجره والقيت نظره أخيره على روحي وتعطرت ,, وعدلت القلوز ونزلت ,, رحت صوب الميلس ,,
ترددت في البدايه من اني أدخل .. خفت وايد ... بس لازم أكون قويه وأواجه مشاكلي روحي ,,
دقيت الباب ودخلت ,, يوسف يوم شافني وقف ومد ايده ,, مديت ايدي له وسحبتها بسرعه ,,
قعدت في صوب ,,
خالي قال : عاد أنا بستأذن ,,
طالعت خالي لما طلع ,,, رديت طالعت صوب الطاوله ,,
يوسف : اش حالج نوره ..؟؟
رديت عليه ببرود : بخيييير ونعمه ,,
يوسف : مب مبين ,,
قلت له : جيه يعني تشك اني مب بخير ,, دامك تعرف جيه تسأل ..
يوسف : ضعفانه وايد ..
قلت له : يوسف لو سمحت ابدا بالموضوع جيه يااااي .؟؟؟
يوسف طالعني سكت ونزل راسه ,,, رد بعد ثواني طالعني حطيت عيني بعينه ,, بس نزلتها بسرعه أخاف أضعف وأنا قاعده أطالع عيونه ..
قال : نوره ردي ويايه دبي ,,
وقفت وقلت له : اذا ياي عسب أرد ,, أخبرك تراني مب راده ,,,
وبغيت أمشي ,, وقفني يوم قال : واذا ياي أقول لج ياي أبرر موقفي ..
كلامه أثر فيني نوعا ما لفيت طالعته وقلت : اذا السالفه جذا شي ثاني ,,
ابتسم يوسف وقال : انزين تعالي اقعدي ,,
رديت قعدت يدامه ,, قلت : قول بسمعك ,,
يوسف : كنت أظن انج ما بتسمعيني ,,
قلت له : أنا مب من النوع اللي ما يعطي فرصه لليدامه يبرر موقفه ,, كل شي بالتفاهم ,,
قال : شو قصدج ..؟؟
قلت له : ارمس بسمعك ما علينا من هالسالفه الحين ,,
يوسف : أنا ما بجذب .. صدق كنت أرّمس وحده ذاك اليوم ,,,
قلت له : لا لا ,, وبعد قوي عين ,,
يوسف : نوره رجاءً اسمعي وانتي ساكته ,,
طالعته وقلت : انزيييين كمّل ..
يوسف : هي وحده تبا تنتقم ,, مدري هي ولا أحد مطرشنها ,, وافهميها عاد ,,
طالعته بسخريه : لا لا تنتقم ,, أحس روحي بمسلسل ,, ولا روايه .. للأسف ما فهمتها ياليت تفهمني ,,
يوسف تضايج من رمستيه مبين عليه .. لأنه أبد محد علّه صوته عليه ,, حسيته للحظة بيي صوبي ويكفخني بس يوّد روحه ,,
قال : والله بتفهمينها روحج ,, وبعدين انتي مستانسه بروحج ,, ماماتي ترا أنا لا حاط عيني على بيزاتج ولا شي ..
طالعته وقلت : ما تهمني البيزات .. انت تباها ولا غيرك المهم أنا عايشه حياتي ,,
يوسف : شو انتي غبيه ما تفهمين ,,
قلت له بنفس اسلوبه : لو سمحت ثمن كلامك ,,
يوسف : لو أنا أبا بيزاتج ,, كنت باخذها بدون لف ودوران وبدون ما أتزوجج بعد ,,
لفيت ويهي ,,, يوسف ياب ايده ومسك ويهي من حنجي وخلاني أطالعه ..
قال بجديه : أنا الوكيل الشرعي لبيزات أبوج ,, وبيزات أمج باسمي هب باسم وحده ,, يعني لو بغيت ألعب فيهم جان لعبت من زمان ولا تزوجتج بعد ,,
طالعته وقلت : جـــــــذاب ,,
يوسف : والله العظيم ,,, لو مب مصدقه برايج ,, شو عبالج أنا لهالدرجه مافيني دم العب ببنت عمي ,,
طالعته تجدمت عنه حطيت عيني بعينه عيوني امتلت دموع بغيت أرمي روحي في حضنه .. بس في شي منعني ,,
قلت له : والدليل ,,
يوسف : تعالي معاي السياره ,,
طلع ولحقته ,, سيارته كانت في الحوي ,,
ركبت يمبه ,, قال لي : افتحي الطبلون ,,
فتحته وقال : طلعي الفايل الأبيض ,,
طلعته وعطيته ,, طلع منه أوراق وبدا ينبش ,, لما حصل ورقتين وعطاني اياهم ,,
قريت الورقه الأولى بالفعل كل شي باسم أمي ,, متحول باسمه ,, شفت الورقه الثانيه ,, هو الوكيل الشرعي لبيزات أبوي ,,
يعني يوسف ما كان يلعب فيني ,, يوسف صدق تزوجني لأنه يحبني ,, يوسف ما خانني بس شو سالفة هالبنت اللي يكلمها ,,
طالعته ابتسمت له رد لي الابتسامه وقال : بتردين دبي ,,
فجأه قلت : لأأأ ..
نزلت من السياره ,, قال : ممكن أعرف شو السبب ,,
طالعت صوب سلطان وهو داخل الفله ,, عشان أفهمه بالنظرات ,,
قلت له : يوسف انت ييت واااااااااايد متأخر وااااااايد ,, خلني أفكر وبشوف ,,
يوسف : نوره حطي عقلج راسج ..
طالعته وقلت : يصير خير خلني أفكر ...
بغيت أتحرك .. رفع التلفون وقال : طالعي ,,
طالعت التلفون قال : هذا رقم اللي كانت تكلمني ,,
استغربت منّه ,, وقال : مردج بتعرفين يا نوره وبتيين تترجيني أردّج ,,
طالعته ابتسمت ابتسامه غامضه وقلت : أدري يا يوسف بس مو الحين ,,
مشيت ,, وصلت لباب الفله ,, طالعت وراي .. شفت يوسف يطالعني محتار ,, ليش ما رديت وياه شو السبب ,, وحسيته يقول في خاطره كيف تدرين ان مالج مكان بهالبيت وبتردين لي ,,
ابتسمت له ودخلت ,,, حسيت روحي تركت وراي بركان يغلي من الحراره وثواني بينفجر ,,