؟؟؟!!!؟؟؟!!!؟؟؟!!!؟؟؟!!!؟؟
متجهــــه لغــــرفته ..
// بنــــــــــــــــدر //
شوف الصدف يا بندر .. ! حتى جنان رفضت ولد خالتهاا ! بس ليش قاعده البنت ترفض كل من جاهاا .. ؟ شنو الســــر ؟ و انا بكل تأكيد لو أرد و أخطبهاا مره ثانيه بترفض .. بس ليش ؟ هذا الي ذابحني .. و نوف بعد شنو أسباب رفضهااا ؟ يا الله ناس جذي ترفض منيــــ و الطريج !! بدون أسباب !!
بعد ما بدل و لبس بجامه النوم .. كان بيطفي الليت و لا صوت أبوه عند الباب ..
بو بندر _ بندر ..
بندر بخطوات سريعه فتح الباب _ هلا يبا ..
بو بندر دش و هو يبتسم لولده .
بندر بادله الأبتسامه و قال و هو يأشر على الكرسي _ حياك يابو بندر .
مشى بو بندر متجهه للكرسي
و قعد عليه .. قال _ تعال أقعد لا تم واقف ..
جا بندر و قعد على سريره .. قال بندر _ هلا يبا تامرني بشي..
بو بندر _ انا جاي و أقول اني صح يمكن غلطت بربطك ببت عمك .. و اني والله يا بندر هذا من حرصي عليك و اني أبيلك الخير و الفلاح .. بس مثل ما يقول المثل تأتي الرياح بلا ما تشتهيه السفن .. و هذا الشي جا فوق طاقتنا .. و انا استمسحك ياوليدي .. إذا إنك زعلان علي .. و أبش
بندر حب يد ابوه و قاطعه _ لاني زعلان و لاشي كلها عشان مره .. و هذا رزق يهبه الله ما يشاء من عبيده ..
بو بندر يطالعه _ يعني الي صار بالديوانيه .. ننساه بتاتا ولا يتكرر ..
بندر _ أنساه يا بو بندر و هاذي بوسه عالراس ..
بو بندر بإستفسار _ زين ليش ما جيت لعشا بو خالد ؟ والله انه زعل و قعد يتشره علي قدام الرياجيل في الديوانيه ..
بندر كشر وجهه _ أستغفر الله الرجال هذا شيبي مني ..؟
بو بندر يفرك يديه _ والله اني مادري ..بس ياوليدي حق الجار واجب علينا ..
ولا تنسى الشاعر الي يقول :
والله أني ماتولم للمهونه ..
إن شكرني صاحبي و لا نكر بي
والصديق ألي ضحكلي في سنونه ..
يحسبنه في ثرا نفسه مكر بي . أعرف الرجال من نظرة عيونه .
لظلمت عينه إلى لدن نظر بي ..يومهم ما حصلوا ما يطلبونه
العزيزه بالمجالس تفتخر بي
والدي كل الجماعه يعرفونه
شايب بالمرجله و الطيب يربي
يالدارك يا محمد لا تخونه
أحفظه باسم الموله حرب حربي
يالجارك كرم الي يكرمونه
واستره لا شفت شي ما شعر بي
بندر يبتسم _ صح لسانك و لسان الشاعر يا بو بندر ..
بو بندر و هو قايم بيطلع _ المهم جارك أكرمه ..
بندر _ أبشر يا الغالي ..
بو بندر _ مع السلامه
بندر يسكر الباب _ مع السلامه
و بعدها حذف عمره عالسرير بينام .. اليوم راسه بينفجر من كثر الأحداث .. الي صادفته ..
ثواني و بندر في سبات عميق .
عبير بروب سكري و شعرها المربوط مثل ذيل الحصان تقرأ الكتاب بصوت عالي
يقول الشاعر :
قد كنت في جِنِّ النَّشَاط والأشرْ *
كأنَّني خرجتُ عَن طورِ البَشَر
وكنت نَجْدِىَّ الهوى من الصغرْ *
أهيمُ في بَدْر الدُّجى إذا سَفَرْ
وقائدي في الدين آيٌ وأَثَر *
صَحَّ بَرَا وٍ ما وَنَى وَلا عَثَر
وَمَذهبي حُبُّ عَلِيٍّ وَعُمَر *
والخلفاءِ الصَّالحين في الزُّمرْ
هذا وَلا أحْصُرُهُمْ في اثني عَشَر *
لا ولا أَرْفَعُهمْ فوق البّشر
قطع عليهاا نغمتهااا حذفت الكتاب على السرير .. و راحت للطاوله تاخذ موبايلهاا ..
عبير _ هلا بو حور ..
جاسم بلجهه أمر _ تعالي بسرعه لديوانية انا هناك و جيبي معاج عصير برتقال ..
عبير بغبا _ شلون أروح للدوانيه . ؟ أخاف فيها أحد ..
جاسم بصبر _ ألحين انا اقولج انا هناك .. يعني تعالي لا تخافين .. و لا تنسين العصير نفسي فيه ..
عبير _ هواااا و عبور قدام يديك يا خوي كلش ولا نفسك ..
ضحك جاسم و قال _ يلى بسرعه ..
نزلت عبير من الدرج و هي تقصد بإلقاء بارد ..
حب على الجدران ما قد كتبنا
و ارفع حبنا ولاكنا ألتقينا .
حنا تمنينا بهوانا ما تعذبنا .
و لا الظروف كانت صعبه علينا ..
ما شافت أحد بالصاله .. قالت بنفسها _ الله يهديك يا بوحور أحد فهالعصاري يرسل أحد ..
دشت المطبخ و الخدامه مو موجوده أكيد نايمه حرام بعد هاذي لا زم تاخذ بريك بعد هالكرف .. يااا الله صج يعينهم صراحه انا هالعصير و يالله أقوم وأحطه بقلاص شلوون بهالأدمية إلا من صباح الله لي 11 بالليل .. ريوق و غدا و عشا . الحمدلله على النعمه .. و الله انا بخير و عافيه .. و لا فوق جذي نخلي هالخدامه تجيب قلاص ماي و انا قادره أجيب لنفسي و ربي منعمني بالحواس .. استغفر الله يا رب انك تتوب علينا .. أوف نسيت .. طقيت جبهتي صبيت العصير بالقلاص و نسيت لا أخذه معاي للديوانيه . يااا الله أحس كأن الكلمه مشبوهة بالنسبه لي ديوانية ديوانية خخ قعدت أحاول أتأقلم معاها الله يهداك بس يا جسووم ..
عبير رفست الباب برجلها اليمين عشان تفتح لها الباب .. و تدش .. قالت تقلد بندر بصوته و خشونته _ يا ولــــــــــــد ..
جاسم عرفها قال _ دشي يا عبير ..
عبير لفت على يمينهااا و تلاشت الإبتسامه و وجهها أنصفق من الي تشوفه .. جاسم و رجال قاعد معاه .. عبير ما تدري الصينية وينهاا .. ؟ عيونها على الآخر مبطله .. فجأه حست على نفسهاا و أنحاشت بسرعه .. و العصير منكت و الصينيه منقطه على الأرض ..
قال الرجال بعيون ضاحكه لجاسم _ على بركة الله .. باجر العصر عندكم ..
.
.
الجـــ__13__ــــزء
الـــثـالــــــ عشـــــرـــــــــث
دخلت غرفتها بوجه مصفوق . تحس الدم عندها نشف .. و الوجه قاعد يشحب .. بحلم انا يا ناس و لا بعلم ؟! لا لا أكيد حلم .. طقيت راسي مرتين عشان أصحى .. بس الموقف قدام عيوني أشوفه .. جاسم شفيه اليوم ؟ صاحي و لا أنهبل و لا شسالفته ؟ شهالرجال الي قاعد عنده و يخزني خز .. و هو ولا عليه .. بس يوزع أبتسامات !!
لحظه لحظه خل أتذكر شكل الرجال .. ياربي أول مره أشوفه .. لا هو من أهلنا و لا من الجيران .. أجل من يطلع ؟!! بس جاسم شلون يخليه رجال يطالعني ؟ و هو بالأساس ليش ناداني لــ لديوانية؟! ياااا الله شسالفه ؟!
قعدت أطالع باب داري .. أطلع و أشوف هالجاسم و شسالفته ؟
( ابتسمت بخجل ) لكن وجه الرجال شبابي .. و راعي سبورت من هالفرنسيه الي حاطهاا .. و لا ماكو شوارب شهالرجال .. ( عقدت حواجبها )صج شباب آخر زمن .. بس عليه رزه و هو قاعد ..
ياااا ربي الي قاهرني جاسم شلون يدششني عنده .. يا ربي ساعدني إلا أعرف هالرجال الي يخز و يتبسم لـــــــــي ..!!
سمعت طق على بابهاا بسرعه أفتحت عبير الباب و عيونهاا فاتحتها ع الآخر .. لكن الحواجب تعقدت من شافت جاسم .. قالت بغضب _ نعم .. ؟
جاسم يبتسم ويدخل ثم وخر يدها عن قبضه الباب و سكر الباب.. مسكها من يدها و قعدوا على كراسي المكتبه .... قالت بدون صبر _ جاسم شهالحركات هاذي .. أدخلني على رجال مو محرم لي .. من صجك أنت .. ؟
جاسم رفع حواجبه ثم قال بهدوء _ عبير الله عز وجل شرع للمسلمين النظره الشرعيه .. قبل الزواج .. يشوفها إذا أعجبته خير و بركه .. و إذا ما عجبته هم بعد خير و بركه .. و حتى لو الرجال شاف البنت و هي ما تدري ما هو بحرام .. لأن هالأمور حدثت للصحابه في زمن الرسول صلى الله عليه و سلم ..
قاطعته عبير بغبا _ زين شكو الرجال بالزواج ..
جاسم يحاول يتصبر قال و هو شبه مبتسم و مسكر على اسنانه _ يعني شنو شكو ؟ بالله يعني مدخلج على رجال جذي مني والطريج .. ! واحد من ربعي يبي القرب منا .. و قال قبلها لازم أشوفها .. و انا كنت رافض تماما هالشوفه .. بس الله يجزاه خير جابلي الأحاديث الشريفه عن هالشي و وافقت ..
عبير بإستهزا _ يعني هالفرنسية و آخرتها جايبلي حديث شريف شجاب لـــ جاب ؟
جاسم _ لا لا لا يا عبير .. لا أطاعين الناس بهالنظره .. و أحنا مو معصومين من الخطأ .. مو عشان أحنا مو مطلقي اللحى و مو مقصرين الدشاديش .. تنظر لنا نظره بأن الذنوب من راسنا لأخمص أقدامنا و لا الخير و الصلاح و الفلاح ماطبنا .. ! صح أهيا ذنوب .. و الله توعد للمسبل .. لكن الله عز وجل يغفر الذنوب جميعهاا إلا الشـــــــــرك .. و هذا مو يعني اني اسوي المحرمات لا .. الله يغفر إذا شاء .. و لا ننسى بأنه شديد العقاب ..
عبير انحرجت و مارفعت راسها .ودها تقول و أبوي و بندر هل عندهم خبر و لا لأ ؟ ! يا الله أحس وجهي حار إلا مو حار إلا فحمه شابه .. رجال غريب .. صراحه شعور مخيف يشوفج رجال غير أهلج .. يااااي ..
جاسم جنه حاس بأخته قال _ هم باجر بيجون يتقدمون رسمي .. و ابوي و بندر ما يدرون عن هالشوفه .. و انتي ها شرايج ما قلتيلي شي .. غير بس الاستهزا بشكله ..
عبير لسانها أنربط .. شتقول شتخلي عندها أسئله بس مستحية من أخوها .. قال جاسم بمرح _ عاد أهو مدرس تاريخ .. يعني مثقف و مطلع على الحضارات الآخرى .. والعصور .. شعليج يا عبور .. و ماشاء الله عليه رجال بمعنى الكلمه .. و سمعته ذهب .. بس عيبه الوحيد انه جدي بشكل مو طبيعي .. مو عصبي لا بس إذا تكلم تكلم .. نادرا ما تشوفينه يقط نكته او يتغشمر .. بس روحه حلوه .. ( ابتسم ) جني قمت أخورهاا صح ..
عبير و أخوها يوصف هالخطيب بآخر الكلام .. تخيلت هتلر .. ولا موسوليني .. أعظم دكتاتوري العالم .. عيونها بغت تطلع من محاجرها .. سوت بيدها علامه لا .. قالت بخوف _ شنو هذا لا لا لا .. لا يبا لا هتلر و لا بطيخ .. شكله صام النازية و شاربها لا تكفى جاسم أحب يدك .. لا ما بيه .. قول له ما عندنا بنات للزواج ..
جاسم من شاف شكلها و خرابيطها الي قاعده تقطها قعد يضحك من قلب ليــ أخذ يكح .. و هي اطالعه بخوف قالت _ جاسم فيك شي ؟
جاسم و عيونه حمرا من الكح قال بصوت رايح _ أنتي الي شفيج .. شكو هتلر ؟! أصلا شجاب هتلر بالموضوع .. ؟ ( قال بجدية و يأشر على السجاده ) و ليش رافضه تو الناس قومي صلي ركعتين وادعي دعاء الاستخاره ثم تعالي قولي موافقه أو مو موافقه .. صج بنات ماينعطن وجه ؟! ثم قام بيطلع ..
عبير تخصرت _ و دراستي ؟
جاسم عقد حواجبه _ شفيها دراستج ؟
عبير _ يعني تشترط عليه اني أكملهااا .. إلا دراستي يا جاسم مستقبلي ما راح أفرط فيه ..
جاسم بفطنه _ توج تقولين ما بيه .!! و ألحين تحطين شروط .. يلى مبروك مقدما بس أستخيري يا عبيــــر و اناخوج ..
عبير بحرج دنقت و أبتسمت بحيا ..
طلع جاسم من الغرفه .. أما عبير راحت بخطوات سريعه للمنظره تشوف شكلها .. مسكت وجهها بيديهاا الثنتيــــن . و أبتسمـــــــــت .. قالت بدلع _ و الله و كبرتي يا عبيـــــــــر ..
/////////////////////////
جنان و هي طالعه لــ مركز السلطان ... مع أمها .. دقت عليها
عذاري و هم بالطريق ..
جنان _ هلا عذاري ..
ألتفتت ام محمد لجنان .. قالت عذاري _ هلابج جنان .. شخبارج و شخبار امي وابوي و الأهل ؟
جنان _ الحمدلله الكل بخير .. أنتي شخبارج ؟ و شخبار الحلوين ؟ مشتاقين لهم حيل ..
عذاري _ تمام .. و تشتاقلج العافيه .. جني اسمع صوت سياره .. أنتي برى البيت مو ؟
جنان _ ايه طالعين للسلطان بنجهز ماجلة البيت ..
عذاري _ أها زين أمي معاج ؟
جنان اطالع بأمها الي مركزه معاها _ إيه .. ( ابتسمت ) و مندمجه معانا ..
عذاري بدفاشه _ آآهو عطيني أياها ..
جنان _ آفااا ألحين ما تبيني !!
عذاري _ بل عليج من بنت ما تستحين أمي عندج و انا قاعده اسولف معاج .. و لا بعد تشرهين يلى يلى يلى مناك .. عطينيها بسرعه ..
جنان تضحك و تمد الجهاز لــ أمها _ يمه هاج الجهاز .. عذاري تبيج ..
أخذت ام محمد الجهاز _ السلام عليج يا ام طلال ..
عذاري بصوت مرحب _ يا هلا يا هلا بهالصوت و الله .. ينه لج وحشه يا الغاليه .. شخبارج ؟
ام محمد تضحك بخفه _ و يا مرحبا فيج .. والله انا بخير و ابوج بخير .. ناقصنا شوفتج و شوفة الحلوين ..
عذاري بهم _ أستغفر الله يا ربي .. الله يصلحه يمه .. مادري شفيه ؟ متحسس منكم ؟! من أجيب طاري بيتناا و اني مشتاقه لكم .. قال ( تضخم صوتها ) روحه ما فيه .. يكفي تلفونات و بس .. اما طقه طريج ماكو .. صراحه انا زهقت من هالموال .. و هو والله مو مقصر معانا بس أنا لي حق اني أزوركم و أقعد عندكم ..
قاطعتها ام محمد بحزن _ الله يهديه يابنيتي .. و ادعي له .. شكله من الرياجيل الي يقعد مع الي متمشكلين مع اهل حريمهم .. و صابته حساسيه مناا .. البلا كله من هالديوانيات الي تقعد بس واطلع مشاكلهم و الباقي ما يقصرون يطبقونهاا على أهلهم ..
عذاري زفرت بضيق _ آوف منهم يا يمه .. أستغفر الله إيه تذكرت .. ليش تلفون البيت مشغول من ساعتين ؟ أدق أدق و كله مشغـــــــــول ..
ام محمد بصوت عالي منقهر _ ســـــــــــــــــــــــارا يا عذاري .. و أنتي خابره غيرها إن مسكت الجهاز أرقدت عليه ..
عذاري ضحكت _ يا حبي لها يمه و الله مشتاقه لهااا ..
أبتسمت ام محمد _ الله يخليكم لبعض .. و يحفظكم يارب ..
عذاري _ و يحفظج لنا يا الغاليه .
ام محمد _ آمـــيــــــن ..
عذاري بشغف _ إيه يمه بقولج شحقه انا داقه .. !
ام محمد _ قولي يمه أعرفج لسانج يحكج إذا عندج سالفه ..
عذاري تضحك بصوت عالي و قالت بزعل _ شدعوووه يمه ..؟ مسبه هاذي و لا شنو ؟
ام محمد _ حقج علي ..
عذاري _ تبيني أقولج السالفه ؟
ام محمد _ قولي وانا امج ..
عذاري تاخذ نفس _ أمس حماتي تسألني عن جنان .. ما تركت شي إلا و سألتني عنها .. لمحت لي انهم بيخطبونها لـ يوسف ..
قاطعتها ام محمد _ يوسف حماج ..؟
عذاري بسرعه _ إيه يمه .. يوسف صيدلي ما شاء الله عليه و أكبر من جنان بـــ 3 سنوات ..
أم محمد _ والله انا مادري .. صراحه هالأمور هاذي صرت أخاف منها ..
عذاري بضيق _ شنو يعني .. ما فهمتج يمه ؟
ام محمد بتنهي الموضوع _ إن صار شي .. خيـــــــــر إن شاء الله ..
عذاري _ يمه ..!! حماي خوش رجال و ما يعيبه شي ..
قاطعتها امها _ قلت إن صار شي .. الله يقدم ألي فيه الخير ..
فــ ليش الأستعجال ..؟ و بعدين أهم قالولج شي بالصريح ..؟
عذاري _ لااا بس نغزات ..
ام محمد بجدية _ عذاري ..
عذاري _ نعـــــــــم ..
ام محمد _ حياهم الله إذا طقوا الباب .. أما نغزات و تلميح مو هذا سلمنا بالزواج .. إلي يبي يجي البيت و يطق الباب ..
و بعدين عاد نشوف إيه و لا لأ ..
عذاري تحاول تهدي أمها _ يمه أهي ما قالت شي .. اهي بس اسألت عن جنان و ليش تطلقت و جم عمرها و جم باقيلها ؟!!
ام محمد بعصبية _ و هي شكو بطلاقهاا ها شكو تسأل ؟!
عذاري _ يمه الله يهداج الناس إذا بتخطب المطلقه من حقها تعرف شسبب طلاقها !
ام محمد _ اعوذ بالله منك يا أبليس .. عذاري شكلج بترفعين الضغط علي ..
عذاري شافت السالفه بتكبر قالت _ خلاص يمه انا آسفه .. و انسي الموضوع .
ام محمد بصوت مقهور _ وان فاتحتج بالموضوع مره ثانيه .. قولي مدري مدري كل سؤال عطيها هالكلمه مدري .. فاهمتني .. ؟
عذاري بصبر _ آبشـــــــــري .. شي فخاطرج ..؟
ام محمد بضيق _سلامتـــج ..
سكرت الخط ثم عطته جنان الي قاعده تشبك الكلمات و تحاول تشكل جمله مفيده .. قالت جنان بحذر _ شفيها عذاري يمه ؟
أم محمد _ أستخفت و أقعدت ..
سكتت جنان تنطر أمها تكمل و تقولها شسالفه .. بس أمها و لا لقت لها بال .. تأكدت انها لها دخل فهالسالفه .. حماج يوسف ثم طلاق و حموله .. أكيد يوسف حمى عذاري متقدم لي .. أكيد .. أكيد .. ما يبيلها شك .. ؟! بس أمي ليش معصبه .. ؟ و هاوشت عذاري ؟
حاولت أقول لأمي تقولي كل شي بس .. شكل أمي ما يطمن حدها معصبه على عذاري .. الله يهداج يا عذاري لعبتي بالنفسيه .. !!! طالعت بأمي شفتها تستغفر الله ...
فقعدت أستغفر الله بأصابعي .. و أحترمت نفسي حتى ما أخذ تهزيئه محترمه ..
#################
سارا ماده رجولها على الطاوله
و تكلم رفيجتها _ إيه شفتها شفتها تلوع الجبد .. عووع عووع
مادري شلون ملجت ..؟ صج الدنيا حظوظ .. ولا الجمال و الحلا للحين ما تزوجن ( تلعب بشعرها )
إيه .. متى هذا ؟ من صجج ( عدلت قعدتها ) لاه لاه مـــــــا أصدق! انا ودي و الله بس بحاول بأبوي و محمد .. متى ؟ الأسبوع الجاي .. !! أوكي .. بس مو أكيد قلتلج مو أكيد .. ( ردت تمد رجولها على الطاوله ) خخخ ما تضحك .. قدييييمه ..
لا الصيف هذا ماكو سفره .. جنو ما خذه صيفي .. أحلفي قولي والله .. ليش قطيعه تقطعه .. أصلا لو فيها خير جان ساعدتت رفيجتها مو تنجلها .. و الله شوفة عيني .. يوم انجلتها ..خنت حيلي لطيفه قعدت تبجي بجي قطعت قلبي .. شنو شنو ليش انا مو آدميه لي مشاعر و أحاسيس .. ( دخل محمد عليهاا و بيده وجبه شرمبي و يطالع بقعده سارا بإستنكار و قعد ) لحظه روان لحظه .. أكلمج بعد ربع ساعه .. لا تروحين بعيد عن التلفون أخبرج ما تقعدين خمس دقايق بمكان واحد .. خليج زارعه عند التلفون عندي لج خبر بمليون يلى تشــــاو .
قامت و قعدت عند أخوهااا .. قالت _ شرمبي من وراي .. الله يا دنيا .. !
محمد ياكل الشبس _ حياج .. أصلا عزمتي عمرج بالغصب ..
سارا و توقف _ لحظه خل أجيب قلاص عشان تصب لي بيبسي .
و ركضت للمطبخ .. ثواني و لا هي قاعدة تاكل مع أخوها ..
محمد رفع راسه و قال _ منو هاذي ألي كنتي تكلمينها ؟
سارا _ رفيجتي روان ..
محمد _ آهااا .. زين وين الأهل ما شوف أحد بالبيت ..؟
سارا تحط الشبس بحلجها _أمم امي و جنو طالعين للسلطان .. و مرتك مادري .. يمكن فوق ما شفتها اليوم ..
سكتوا بعدها ثم قالت سارا و هي توزع أبتسامات .. _ بو عمر ..
محمد يرفع نظره لها _ هلا ..
سارا _ أممم .. بقولك شي بس وافق ..
محمد يشرب البيبسي _ أول قولي بعدين أشوف ..
سارا حواجبها صاروا أكس _ تكفى محمد نفسي فيهااا ..
محمد يمد لها شبس ._ زين قولي بالأول ..
سارا تاخذ الشبس _ رفيجاتي كلهم بيجتمعون ببيت وحده فيهم و انا مدعوه للحضور ..
محمد بإستنكار هز راسه على طول _ لا لا ..
سارا بتوسل _ محمد تكفى أرجوك أرجوك ..
محمد _ لا سارا .. ما أرضى خواتي يروحن لبيت فيه شباب ..و بنات بعدجن مو متزوجات ..
سارا بترجي _ الله يوفقك يا محمد تكفى و الله ما أطول ..
محمد يطالعها بإستغراب _ شفيج انتي أقولج لا .. تقولين ما اطول .. لا يعني لا .. شيليها من راسج ..
سارا بزعل _ و شمعنى البنات كلهم أهاليهم وافقوا إلا انا .. ؟ يعني أهم ما يخافون عليهم .. و انتوا بس الي تخافون علينا ..!
محمد يتأفف _ اللهم طولك يا روح .. لااااا يا سارا ..
سارا و دمعتها عالباب _ ولي يعافيك .. نفسي فيها .. كل رفيجاتي بيحضرن إلا انا ليش شناقصني ؟ ..
محمد سكت ثواني و اخذ نفس ثم قال بجدية _ بشرط ..
سارا بسرعه قالت _ موافقه .. موافقه .. بس خل أروح ..
محمد _ انا أنطرج عند الباب و عشر دقايق تقعدين بس ..
سارا حست عشر دقايق ما تكفي بس العوض ولا القطيعه .. قالت _ أبشر .. عشر دقايق و أكون عندك ..
محمد _ زين متى هالدعوه هاذي ؟ خوش بزنز ويمان مو بنات ..؟
سارا بفرح _ الأسبوع الجاي .. بس حاول بأبوي .. تكفى حمودي ..
محمد يمثل العصبية _ حمودي بعينج .. اوكي أكلمه .. ( يطالع شعرها ) إلا أقول سويره ..!!
سارا من قال سويره لوت حلجها لصوب الثاني قالت _ نعم
محمد _ شعرج هذا تعبان .. ؟
سارا بصدمه _ هــــــــــــــــاه
محمد _ لــــــــــــــــــواه ..!
سارا وتحك شعرها قالت بزعل _ شنو قاعد تقول ؟ شنو شعري تعبان .. ؟
محمد _ أقصد ما يطول هو ..؟
سارا اطق كتفه بخفه _ قول جذي من الأول .. خو خرعتني !
أمبلا يطول بس ليش تسأل ؟
محمد يطالع شعرها مره ثانية _ لا تقصين شعرج جذي مرة ثانيه ..
سارا مستغربه _ ليش ..؟ جذي أحسن .. و أريح ..
محمد بجديه _ ساراا ما تدرين شنو الحكم الشرعي بهالقصه ؟
سارا بزعل _ لااا مادري ..
محمد بهدوء _ أول حرام لأنه تشبهه بالرجال .. قصي شعرج بس تحت شحمه الأذن ..
و معروف هالحين ان البويات الي نشوفهم مشبوهات و مسترجلات و مشهورات بهالقصه .. فـ بحقج مو حلوه الناس تنظر لج هالنظره .. سارا انا أخوج و ابيلج الخير .. القصه هاذي اتركيها .. شالفرق بينج و بيني ..؟ من هالفروق الي بين الرجل و المرأة.. الشعر .. الولد لي شفناه بشعر طويل استنكرنا هالشي .. فكيف ببنت ما عندها شعر .. و لا بعد تحط جل بعد !
( يطق راسها )
سارا مدت بوزها _ بس انا خلاص تعودت عالبوي ..
محمد يبتسم _ لا خلاص إن شاء الله بتتركينه .. و بتتعودين عالشعر الطويل او الوسط او القصير بس مو البوي يا سارا ..
سارا رفعت حواجبها و قالت _ شكلك محتررررر ..
محمد يقلدها _ شكلك محترررر
على شنو أحتر .. الحمدلله الله منعم علي بشعر شزينه
سارا _ لا بس مو مثل نعومة شعري .. ( تهز راسها بيمين و يسار )
محمد يقوم _ تسوين دعايه سانصيلك أخت سارا ..
سارا تلتفت له و هو رايح للدرج _ إيه أنحاش يا ولد أمك أنحاش ..
محمد حب يخرعها من قالت يا ولد أمك .. ماتوب البنت من طولة لسانها .. هاللسان متبري منها .. ركض لهااا بحركه سريعه .سارا من شافته يركض و هو متجهه لها .. قامت بسرعه و هي خايفه من قلب .. صرخت بأعلى صوت و ركضت بتطلع من دور الصالات كلها و بتنحاش للمطبخ .. ساعدهاا جسمها الرياضي .. من سرعتها .. أما محمد قعد يركض وراها و هو يقول _ تعــــــــــــالي ..
سارا قلبها بيطلع من مكانه ما توقعت حركه أخوها .. و زاد خوفها قربه منها .. فقعدت تضغط على نفسها بالركض و هي تصارخ _ يمـــــــــاه .. دشت المطبخ و بسرعه قفلت الباب عليها .. أنفاسهاا تصعد و تنزل ..و وجهها كان حار من الركض .. لاحظت أرتجاف يدها و رجولها .. صرخت _ لاااااااا ..
محمد كاتم ضحكته و هو يركض لي وصل عند المطبخ .. قعد عند عتبه الباب و أخذ شهيق و زفير .. قال بتعب و جهد _ سارا أفتحي الباب..
سارا بخوف من سمعت صوته _ لاااا ..
محمد يمثل الغضب _ انا ياولد أمك !!
سارا ببراءه و من الخوف قالت _ أأأجل ولد منننو ؟ ولد بو عوض جارنا الي على اليمين !!
محمد ضحك ما تحمل انه يصبر _ لا يا سويره هالكلمه ما تنقال..! أبو عيال و تقولينها لي
سارا بسرعه _ خلاص و الله ما اقولها بس رووح ..
قعد يقهقه _ خلاص افتحي الباب أضحك معاج ..
سارا من سمعت ضحكته أرتاحت .. أول ما أفتحت الباب و على طول طاحت تحبب على راسه و كتفه ..
محمد يضحك و يبعدها عنه _ خلاص يبا .صكيتي على هذاك . الله يرحمه ..
سارا أطق صدره و بزعل _ أول مره أحد يخرعني .. قسمن بالله لو ما ضحكت جان شاب راسي من الخرعه .. شكلك يخرع وانت تلحقني محمد ..
محمد كسرت خاطره أخته حط يده على رقبتها و حب راسها .. _ يا ويلي على أوخيتي ! بس هذا جزى الي يقطون كلام ما يثمنونه ..
سارا _ آبشر ما قولها مره ثانيه .. بس لا تلحقني جذي ..
محمد يجر خشمها _ أبعدي والله بنت علي ..
سارا جرت يده و قعدت تحك خشمها من جره له ..
'''''''''''''''''''''''''''''''''''''''''''''''''' '
نزل بندر و هو يصكر أزارير دشداشته .. شاف أمه قاعده مع حور تلاعبها .. قال و هو يفتح ذراعيه لها _ منو الحلوه ؟
رفعوا راسهم له .. و ركضت حور لعمهااا .. شالها بندر بسرعه و صار يدور فيها و هي تضحك بصوت عالي .. قالت ام بندر يوم شافت ضحكها زاد _ بسك بسك لا تعورها ..
بندر يوقف .. وهو شايلها و جاي لأمه بيقعد عندها _ هي تحبني إذا لعبتها هاللعبه صح حور ؟ ( يطالعها ) قالت حور و تهز راسها بقوة _ ســــح ..
بندر يطالع بأمه _ شفتي يمه من شدة حبها لهالحركه تقول سح مو صح .. ( يرد يسألها ) صح يا حور ؟
حور تهز راسها _ ســــح ..
ضحك بندر و امه عليها .. قالت امه _ الله يخليها لنا يا رب .. و أشوف عيالك يا بندر .. قل آمين.
بندر طالع بأمه ثواني ثم قال _ آمين ..
أم بندر بادلته بنفس النظره ثم ضحكت ضحكه خفيفه .. و سكتت بعدها .. قال بندر بإبتسامه _ ليش تضحكـيـــن ؟!
ام بندر _ تخيلت عذبي بحضنك ..
بندر أبتسم بحنان _ لاحقين على عذبي .. ( شاف ملامح امه تغيرت ) يمه ولي يعافيج مو وقته ألحين ... انا بنفسي بقولج يلى ألبسي عباتج و أخطبي لي ..
ام بندر بحسره _ يا حسرتي بس متى ؟ يا خوفي بعد 5 سنين و قول ضبيه ما قالت ؟!
بندر يبتسم _ لا أبشري عن قريب عن قريب إن شاء الله ..
أم بندر _ آمين يا وليدي ..
ترك بندر حور .. و هي متمسكه فيه ما تبي تتركه .. حاول فيها لكن الراس يابس فشالها على كتفه و هي تضحك بصوت عالي .. قالت امه _ على وين أقعد يا بندر أقعد معي .. ؟
بندر ألتفت لأمه و قال _ جاي جاي بس بودي ملابس للمصبغه حاطهم من الصبح في السياره و لا وديتهم ..
أرتاحت ام بندر ثم قالت _ الله معـك يا وليدي ..
فاطمه شافت خالتها بروحها ..قالت _ السلام عليكم
ام بندر تعدل قعدتها _ وعليج السلام .. حياج ..
فاطمه أدور بنتها _ خاله ما شفتي حور ؟
ام بندر تأشر على القهوه _ تعالي .. حور راحت مع عمها و بتجي ألحين .. بس تعالي تقهوي ..
جت و قعدت عند خالتها تتقهوى
بعد صمت مدته دقيقتين و نص رفعت ام بندر راسها لـ فاطمه و قالت _ فاطمه يمي ..
فاطمه رفعت نظرها لخالتها قالت _ هلا خالتي .. آمري ..
ام بندر كأنها تتذكر شي _ تذكرين عيد الأضحيه الي طاف ؟
فاطمه _ أيه خاله أذكر ..
ام بندر فرحت _ زين ام بدله تركوازيه هاجر إيه اسمها هاجر ذكرتيهاا ؟! قريبتج صح ؟!
فاطمه تذكرت بنت عم بنت خالتها أبتسمت و قالت _ يووه يا خاله .. هاذي هاجر بنت عم أهل ام جابر .. خالتي .. إيه تذكرتها ..
ام بندر ابتسمت _ إيه ما شاء الله عليها . الله واهبها عقل و جمال ..
فاطمه _ إيه بالله انج صاجه يا خاله . هاجر عقل و دين و جمال ..
ام بندر _ وراها ما تعينت للحين ؟
فاطمه _ شخباري خاله . البنت تعينت من شهرين .. جابتلها واسطه قويه و الحمدلله وظفوها ..
ام بندر _ إيه الحمد لله .. بس ذكريني هي جم عمرها ؟
فاطمه تبتسم _ عمرها 24 ..
ام بندر تتذكر شكل هاجر _ يا ما شاء الله عليها لون التركواز و الشعر الطويل الأسود .. معطيها الزين سبحانه ..
فاطمه _ حتى الأخلاق يا خاله ما شاء الله عليها .. ( بفضول )
بس ليش يا خاله تنشدين عنها أحد سألج عنها .؟
ام بندر _ لا و الله يا بنيتي .. محدن نشدني عنها .. مغير انا الي ابيها لـــ بندر ..
فاطمه بلا شعور أبتسمت ابتسامه صفرا ووجها حست كأنه أختفى .. بقلبها _ لهدرجه انا غبيه مره و عندها ولد للحين مو متزوج و قاعده تنشد عن بنت . اجي و اقولها ليش تسألين ؟ لازم أحط نفسي بمواقف بايخه .. و بعدين ليش أرتبكت و حسيت كأني طايحه بحفره . أختج هي الي رفضته مو هو عشان تنحرجين و ترتبكين .. و هاجر تستاهل بنت اخلاق و دين و جمال . يالله يرزقج يا جنان بزوج مايدري وين يوديج .
آي آح الله ياخذ عدوج يا عبير ..
صرخت عليها _ عورتي جبهتي ..!
عبير الي ماسكه كوره المضرب قالت _ شمسرحج ؟ اخبر أحلام اليقظه ولت و تلاشت ..
فاطمه بخبث _ لا حبيبتي هالأحلام لج و لا أحنا جربناها و شبعنا منها ..
عبير بقهر _ يعني شتقصدين ؟ خو بنت عمج مو فهيمه ؟ نوريـــنا ..
فاطمه تحك جبهتها من الألم _
بتفهمين بعدين .. لا تخافين لاحقه لاحقه ..
عبير قعدت تخز فاطمه و عقلها يقول _ لا يكون جاسم قايلها !!
شكلها عندها خبر .. وعت على طقت امها لكتفها و ام بندر تقول _ أكليها بعد ..
فاطمه بتقهرها _ ودها يا خاله اليوم قبل باجر ..
( يا ولــــــــــــــــــد )
سمعوا صوته و تغطت فاطمه ..قالت عبير _ حياك يابو عذبي ..
دش بندر و حور الي بيدها كيس متروس حلاو و عصير و بطاط .. شافت حور امها فركضت سيده لها .. و توريها الأكل .. عبير شافت فرحة حور بالأكل .. فأنتهزت هالفرصه حتى تقهر فاطمه قالت بصوت تسمع بندر .. _ حسبي الله عليج من مره .. مجوعه البنت دهر .. حتى آيه الله ما تبي اطبقها فبنتهاا ( فأما بنعمة ربك فحدث )
بندر بسرعه ألتفت لـــ عبير و عطاها نظره خلتها تختم القرآن بمكانها .
بندر بقلبه _ ياخي هالبنت مادري متى تكبر ؟ متى تعقل ؟ لسانها طويل و متبري منها !
فاطمه أنحرجت من بندر .. و لا على عبير عادي متعودات يتناجرن مع بعض .. دخل بندر يده بمخباته و طلع مفتاح قال _ عبير هاج .. أول ماتبطلين الكبت على يمينج تشوفين جنطه دبلوماسيه جيبيها
عبير بكل أحترام و طاعه هزت راسها و صعدت فوق تجيب لأخوها أغراضه ..
ألتفت بندر لـــ فاطمه و قال _ العذر و السموحه يا أم حور .. بنتنا لسانها متبري منها شوي ..
فاطمه بحرج .. قالت _ لا شدعوه يابو عذبي .. عبير أختي و أعرفها عدل ما تقصد شي ..
ام بندر ماحبت السالفه اطول قالت لبندر _ أنت بتروح لمكان ؟ بندر _ إيه توه الوالد داق يقول في شركه يابانية جاية الكويت . قال نشوفها و نشوف صناعتها شلون صايره ..
أم بندر _ الله يوفقكم ..
وقف بندر قدام الدرج بعد ما شاف عبير تأخرت .. قال _ يمه صراحه بنتج فيها فقر دم ؟
ام بندر تذكر _ إيه فيهااا .
بندر يطالع فوق ثم يطالع بأمه _ عشان جذي أستيعابها بطئ .. ابصعدلها فوق .. و قولي اني ماقالت إذا للحين قاعده ادور على الجنطه ..
صعد بندر الدرج بخطوات سريعه .. حتى يلحق على ابوه و الأخت العزيزه .. قاعده ادور على الجنطه ..
دخل بندر الغرفه .. شافها ادور الجنطه بالشيفو نيره .. قال بحسره _ عبيـــــــــــــــر ..
أخترعت عبير و ألتفتت بسرعه قالت _ خرعتنــــــي ..
جا عندها و قال _ شكو أهنيه ادورين ؟
عبير _ ادور عالجنطه ..
بندر انقهر مو لهالدرجه الغباء يوصل عندها لهالحد .. _ تعالي .
مسك يدها و فتح كبته و أشر على جهة اليمين قال _ هذا شنو ؟
عبير أبتسمت بحرج _ آوه نسيت .
بندر بقهر _ آوه نسيت .. أكلي أكلي الكبد .. يمدحونه لأصحاب فقر الدم ..
عبير _ يا ربي لك الحمد .. كلش و لا الكبد ..!
بندر _ قولي الحمدلله
عبير قالت_ الحمدلله .
فتح بندر الجنطه بعد ما جيك عليها ثم قفلها .. و قبل لا تطلع عبير ناداها بندر .. قالت _ نعم ..
بندر يأشر بيده يعني تعالي .. عبير تمشي شوي شوي .. قال و هو يبتسم _ تعالي ماني بكالج
بس تعالي ..
وصلت قباله و قالت _ نعم ..
حط يده على راسها و قال _عبور الي قلتيه لبنت عمج .. صح و لا خطأ ؟
عبير نزلت راسها و قالت _ السالفه كلها غشمره ..
بندر ينزل راسه لـ وجها _ بعض الكلام ما ينقال ..! و لو بينكم ما عليه بس قدام امي و قدامي .. مو حلو .. و لا هو زين .. الغشمره تكون خفيفه بس غشمرتج أسمحيلي وانا أخوج ثقيله .. ها كلامي صح ؟!
عبير بفشيله _ آسفه ..
بندر _ لا التعذر مو لي .. التعذر لبنت عمج .. و مو عيب أو أنتقاص للشخص .. أنه يعتذر لمن أخطأ في حق الغير ..
عبير _ أبشــــــر يا بو عذبي ..
بندر يمسك الجنطه _ عفيه ع البنت الشاطره ..
و طلعوا من الغرفه .. متجهين للدور الأرضي .. بندر سيده طلع برى البيت .. أما عبير فقعدت عند أمها و فاطمه ..
: ) : ) : ) : ) : ) : ) : ) : ) : ) : ) : ) : ) : ) : ) : ) : ) : ) : ) : ) : ) : ) : )
مشت بخطوات ثقيله .. و نفس كئيبه .. لحمامها " أعزكم الله " خلاص الدنيا ضاقت عليها .. و الآلام زادت عليها .. سواء آلام جسديه أو آلام نفسيه .. الحركه عندها بعد جهد جهيد و الكدمات هي هي ما ختفت و لا راحت و رجولها يا الله تثنيها .. الي يشوفها يقول كأنها بنت 50 سنة .. أكثر ما هاجسها و منغص عليها نومها .. مستقبلها المجهول مجهول بأحداث سلبيه و سيئه على أهلها !!!
و كوابيس عزوز و أهلها دايما محاصرينها .. ما تدري متى نهاية هالكوابيس ؟! هي أخذت عقابها و حتى لو كان بشكل صغير مع رأفتهم لها بس هم أكيد بيجي اليوم ألي بتتكلم فيه الناس .. و تصير علج بحلوجهم . أتكأت على الحنفيه و جاست بنظرها على طاوله المنظفات الصحيه . مسكت علبه الكو نفورت و صبت جزء منه في غطاه .. و بتهور طائش شربته بجرعه وحده ..
|