..........( آخـر مـــدآي ).........
جهمت من العيون ولا ضواك الليل غير هناك ..
ورا هدف الضلوع تسامر القمرا بخفاقي
تريض لاتعبت من أول الطرقة إلى ملفاك ..
متى صبح العيون اللي هدبها يطرف أعماقي
هلا ولا هلا قد قلتها قبلك لـ ذاك و ذاك ..
أبـ أدور كلام ما سمعته وأنثر أشواقي
وأبشعلها قصيد من أول الدنيا إلى دنيآك ..
تهب مع الهبوب إلى ندهتك جذوة أوراقي
وأبنظمها قلايد لين تقدح بالسما طرياك ..
مادامي شاعرك ليه الظلام يرف بـ أحداقي
دريت إنك حبيبي قبل أموتك وأعشقك وأحياك ..
وصرت أول طريقي وآخر أحبابي وعشاقي
سمعت أحلى (" أحبــك ") في حياتي كلها بشفاك ..
أثر بعض الشفايف همسها غيمة وبراقي
تسولف ,, لا تغني ,, لا خيال ما لحقت أقصاك ..
بغيت أستوعبك شح الخيال وضاقت آفاقي
" سهى قلبي معاك وفاحت الدلة ولا قهواك ..
على صالي حشاي أركي لك الدله ولا فاقي "
سرقته بـ الحنان وهرجك الخاثر وشفته جاك ..
فزعت أرد قلبي وأثرني حبيت سراقي
وصلت آخر مداي وقلت لك خلك على مركاك ..
لو أن الموت كاسك بـ أشربه يا حضرة الساقي
توسدت الجراح وكل جرح ما يطيب فداك ..
تنهدت الغياب و نبت بين إيديك مشراقي
تعذر لليالي لي غدا ورد الطريق أشواك ..
ترى كل الدروب اللي مشينا ما ثنت ساقي
لو إنه ما بقى عندي بـ هالدنيا يا كود أهواك..
لا أقول إني خذيت اللي خذيت ولا بقى باقي
...........( حـب جـديــد )..........
حب جديد وقصيدة عشق مجنونه
الله يحييك يا حب لفا توه
حب لكله وحب بس لعيونه
حبين بأقصى خفوقي بس له هوه
إيه إنصتي يا شجون الروح ممنونه
جاني رقيق المشاعر ناوي الخوه
جاني حبيبي وعمري فرحة غصونه
ربيعها يوم سال السيل من نوه
يوم أنهمر لي حنانه بأعذب لحونه
قلت الله الله صفا جوي على جوه
والله لا أحبه ولو حظي وقف دونه
مافيه قوة تصد الحب بالقوه
بس أنتظر يا زمن لين أعلن المونه
ومن بعدها اللي تسوي يا زمن سوه
...........( فـرحـة لقــآك )...........
بين فرحة لقاك وهم فرقاك
لا تذكرت جرح ولا نسيتك
حي هالشوف ما تنمل دنياك
شف سواة العيون اليا لقيتك
عين تشربك شوف وعين تظماك
لا ذبحني ظماك ولا رويتك
قمت أخيلك هنا وهناك وهناك
وين ترحل بي النظرة نصيتك
إن تبسمت قلت الموعد شفاك
وإن تمنعت بأنفاسي دعيتك
وإن طلبت الغلا قلت الغلا جاك
وإن سكنت الخفوق البيت بيتك
وإن نثرت القصيد بدرب لاماك
ذاع صيت القصيد وذاع صيتك
يا رجا العمر لو حفتك الأشواك
ليتك أول طريق القلب ليتك
ودع البرد كف ضم يمناك
صافح الود قلبي يوم جيتك
" حـي هـ الشـوف رغـم همـوم فرقـاك
لـو تناسيـت جرحـي مـا نسيتـك "
..........( الطـريـق المظلــم )...........
تخوفني مشاوير الطريق المظلم المهجور
وأنا لامن ذكرتك قلت طولي يا مشاويري ...
عزاي إنك رجاي العذب لو كل الدروب عثور
وصلت أو ماوصلت أعرفك ما انته منتظر غيري ...
حبيبي وكل الله لاتحسبني بليد شعور
لو أنت المستحيل الصعب ما أبدي لك معاذيري ...
أحبك لو يموت الحب وتصير القلوب قبور
أشوف الجرح يكبر وإنت تكبر وسط تفكيري...
أحبك من هنا حتى طلوع الفجر حتى النور
صحيح إنك قدر محتوم بس أجمل مقاديري ...
أحد ربي يحطك له حبيب ومايجيه غرور
أنا ليه التفت للناس وعيونك جماهيري ...
هلا بك من قدمك لغرتك لي شعرك المنثور
هلا في كل شي فيك وأنت أغلى مساييري ...
ترى صدق الغلا يجبر حطام الخاطر المكسور
وأنا مهما منحتك من غلاي أشعر بتقصيري ...
ولو طالت مشاوير الطريق المظلم المهجور
أنا لامن ذكرتك قلت طولي يا مشاويري ...
............( تعبــــت )...........
تعبت من القصيد ,, من الجروح ,, من إنتظار طال ..
تعبت أستقبل طعون الزمن وأربت على كتفه
تعبت من الكلام ,, من السكوت ,, اللي يهد الحال ..
تعبت أكثر من الحزن الذي ماينتهي عزفه
" تعبت من الوعود ,, من الصديق ,, الطيب المحتال ..
تعبت أعرف كل اللي تعرف الناس بالصدفه "
تعبت من العدو اللي عجز يدخل معي بـ قتال ..
تعبت من الظلام اللي قتلت ولا لقى حتفه
تعبت أسأل من المخطي ,, تعبت أردد الموال ..
مادامك ماسقيت الزرع مالك حق في قطفه
تعبت ألقى الجواب المقنع اللي ماعليه جدال ..
تعبت ألقى طريق ما يكون بآخره شتفه
تعبت أضفي على الصوت (" الحبيبه ") وردتين وشال ..
تعبت أسمع ( صدى ) شامت يردد طاحت الغدفه
تعبت أغازل البسمة على ثغر البكا تختال ..
تعبت أشوف (" شوفي ") ينهزم رغم على أنفه
تعبت أجامل أيامي ولو ورتني الأهوال ..
تعبت أقول عن حمل ثقيل أتفه من الأتفه
تعبت أهز راسي غيظ وألقى في يدي غلال ..
تعبت أسير خلف الوهم لو غيري ركض خلفه
تعبت أشد وأنزل ماظهر لي طيب المنزال ..
تعبت من الدروب اللي مشيت وكلها صلفه
تعبت أرسم حروفي شمس وألمح بالوجيه ظلال ..
بعض ناس تعرف النور بس تقول ما تعرفه
تعبت وقلت كل اللي أظنه يا (فهــد) ينقال ..
تعبت أبغى ألقط أنفاسي إذآ لابد من وقفه
............( سيـد سهـرهــا )............
العنود اللي مسا البارح وأنا سيد سهرها
أقبلت مثل البياض وودعت مثل برديه ...
المسا ضج بسوالف عطرها وأشعل سفرها
والعروق اللي روت مسيارها خضر ونديه ...
مانشدت اخت المهاة ليا متى حزة خدرها
حد علمي يوم أمد لجيدها شرهة يديه ...
عقدها المغرور تاه بعطرها ولا نحرها
ساعة أشره عليه وساعة يشره عليه ...
كل مالدت على البال والعقد يخزرها
قلت أنا ماني خوي عادته ينسى خويه ...
ليتها تدري وعقد الماس لو يدري عذرها
أشهد إن الجمرة اللي في الحشا مني وفيه ...
من سرت يمي وأنا مالي خيار إلا قدرها
كنها كل السنين المقبلة والأوليه ...
من غدت همي وأنا مالي ديار إلا ديرها
جالها بين الضلوع الظامية روحه وجيه ...
جادل كل الدروب المعشبة تنبت بأثرها
جت تبي جرح وقصيد وخلت الثنتين ليه ...
من يحدثني حديث الثلج للجمر بثغرها
والله إني كنت ناوي لي بهاك الجمر نيه ...
من نشد هاك الوساع الخرس عن دنيا حورها
وش جمع سحر الغموض بسودها والنرجسيه ...
الوكاد إني بشط الكحل غنيت لبحرها
ماحلا هوسة هدبها والمسا والسامريه ...
من يعلم مستريح الريح عن فوضى شعرها
الحرير اللي كسا هاك المتون العسجديه ...
علموه إن مازح الغرة ونشد عن قمرها
لايخاف إن شاف له ظلما وشاف الشمس حيه ...
............( يـا أبـــوي )............
يا أبوي لا يلحقك شك و لا ريب
أنفض هجوسك و إرفع الراس عالي ..
" أنا شبابك لا غزا راسك الشيب
وأنا عضيدك لو تجور الليالي .. "
إي والله أبشر يا راعي الطيب بالطيب
والله لا أسدك لو يضيق المجالي ..
آمر و تحت أمرك تهون المطاليب
أنخى و تلقاني قريب(ن) موالي ..
أجيك كلي ما خشيت المصاعيب
لي طبت تكفى يا يبه طاب فالي ..
إن عاش راسي يا عزيز المجاذيب
لا أشيل حملك لو يفوق إحتمالي ..
و أطفي ظماك إن حثربن المشاريب
و أسقيك من زندي قراح(ن) زلالي ..
ولا يهمك يا كريم المواجيب
يفداك حالي يا يبه والحلالي ..
أبشر و ذيبك يا رفيع الشرف ذيب
يا أبوي دام تشوفني لا تبالي ..
|