(((((( الفصل 17 )))))) { و الأخير ]
عــــزاي انه أخذ قلبي في وسط عيونه يشيله .. وأنا أصبحت فــي بعده وحيـد و أكسر الخاطر
****
منصور\ الوووه .. هاا حمدانوه بشر..
حمدان\ هلا منصور..وينك انت .. والله ما رايمين عليه..
منصور\ جريب .. تحملوه .. بالكثير خمس دقايق واكون عندكم ..
ووصل منصور عندهم .. وكان سعيد واصل حده من الخبال و العصبية .. و ساعد حمدان و باجي الشباب و ودوه المستشفى ..
ثم رجع منصور البيت .. ويلاقي أمه فالصالة..
منصور\ السلام عليكم
أم منصور\ وعليكم السلام و الرحمة .. حسبي الله عليك!!! بلاااه ويهك مترضض و كندورتك متشققه .. ليكون متضارب ويا حد
منصور\ لا امايه .. ها ولد عم حمدانو الخبل يته الحالة .. وتدرين لين ما وديناه المستشفى .. كسّرنا ..
أم منصور \ليش .. شو سويتوبه ..؟؟ عسب اتيه الحالة ..
منصور\ والله يا امايه .. مادري .. انا ما كنت وياهم..دقولي و سرت لهم ..
أم منصور\ هيه .. ربي يعافيه ..
ودخل منصور غرفته و سبح و غير ملابسه .. و طلع اييلس ويا امه شوي ..
كان منصور يحس بتعب ,, ما قادر يتنفس ,, صدره يعوره .. مختنق .. عسب هو ما يقدر يتحمل لانه عنده القلب .. واعصابه كانت متوتره ..
وعاشة كانت فالغرفة اللي عدالهم .. ويالسة تسمع شو يقولون .. تبا اتعرف شو السالفه .. لانها توه مكلمة سارة .. و تبا اتعرف شو اتسوى عسب اتخبر ساره.
أم منصور \ وين كنت يوم دقولك ؟
منصور متوتر \ هـــاه ؟! ... اتحوط
أم منصور\ منصووووروه ... ! لا تجذب
منصور\ وليش أجذب .. كنت اتحوط فالموتر و دقلي حمدان جان اوصلها البيت واسير لهم ..
أم منصور\ وصلت أمنوه !!!! .. كنت أدري انك ما كنت بروحك
منصور\ هاه؟؟!! ) مستغرب كيف طلعت منه هاي الرمسه (
أم منصور معصبه\ انته ما بتيوز عن هاي سارة مالتك ؟؟!!
منصور\ امايه .. انتي ليش هوب متقبلتنها ؟! هي شو سوت لج .. حرام عليج
أم منصور\ حرمت عليك عيشتك !! منصوروه انا قتلك .. لا تتعلق في بنت الناس .. لاني لا يمكن اسمحلك انك تاخذ وحدة برع العايله,,
منصور\ انتي ما همج غير البيزات و بس .. شي ثاني ما تفكرين فيه .. المهم عندج البيزات ما تطلع برع العايله .. شو هالتفكير يا امايه ؟! عيب والله عيب عليج وانتي حرمة فاهمة ومتعلمة ماشلله عليج .. واتوقع اتعرفين انه كل واحد له الحق انه يختار شريك حياته .. وانا اختار سارة وما باخذ غير سارة .. بس انا مستغرب من شي واحد بس .. دام انتي خايفة عالبيزات اتضيع .. ســارة بيزاتهم أضعاف البيزات اللي عند ابويه فالبنك...
أم منصور\ منصوروه !! لا تنسا انك قاعد اتكلم امك .. بالله عليك وين يبت الجرأة اتقول كلام شرات ها..
منصور\ أمييه .. كلام الحق ينقال ..
أم منصور\ ســــارة لا ,,,,
سار منصور و حب أمه فوق راسها
منصور\ لج مني كل حترام .. وانتي امايه .. وربي شاهد شكثر غلاتج في قلبي .. لكن لو تميتي رافضه سارة .. انا بآخذها لو ما كنتي راضيه .. فدخيلج ) رد حبها فوق راسها مرة ثانيه ( دخيلج .. لا تخليني أضطر احط نفسي في هالموقف ..
أم منصور\ انا ما بقولك شي .. بس لا تنسى .. بر الوالدين عبادة .. واذا واحد منهم هوب راضي عنك .. الرب ما يرضى عنك .. وان سرت وخذت سارة بدون ارضايه فانا هوب راضيه عنك ليوم الدين ..
وسارت الغرفة ..
اهنيه منصور بدا يفكر .. وذبحه التفكير ...
بدا يتعب أكثر .. دقااات قلبه قاامت تتسارع .. صار صعب عليه يتنفس ...
حطا ايده على طرف الكنبه .. يحاول يثبت عمره بوقفته .. جسمه بدا يضعف ...
يحاول ينادي حد .. بس ما قادر .. صوته كان وايد ضعييف ..
****