يالله ياللـي عليـه النـاس معتاشـه
يالواحد اللي جميع النـاس عايشهـا
انك تفـرج لمنهـو ملتهـب جاشـه
من واهجٍ بالضلوع العـوج ناهشهـا
مكنـي الامريـضٍ طـاح بفراشـه
وان جاء يبي حاجةٍ حولـه تكتشهـا
والهم بالقلب شـاب العيـن طناشـه
طلع بقلبي جـروحٍ كيـف اطنشهـا
على الذي في خيال العين له شاشـه
له صورةٍ بالخيال الصـدق حايشهـا
خلا دموعي على الخديـن رشاشـه
لاقلـت هـدت هواجيسـي يشيشهـا
والحب مثل السحر عزي لمن ناشـه
مثل السحر لادخل بالحـال يرعشهـا
وان كان حالي من اجله طّول ارعاشه
فدوه لمـن دونـه العـذال كارشهـا
الصاحب اللي سموم القيظ ماحاشـه
مودتـه داخـل الشريـان ناقشـهـا
لونه طبيعي ماحـط الـوان غشاشـه
وان سار دون العباه النـاس يدهشهـا
من عقب شوفه غدت الافكار منداشه
ماعاد اميـز بهـا الافكـار دايشهـا
وان جيت صوبه زياره جيت بخشاشه
خايف على اسرارنا الاعـدا تفتشهـا
والعد محمي ضمانه بـات باعطاشـه
وان ذاق منه القليـل الكبـد عطشهـا
رشفت رشفة نهالٍ سمـع قرحاشـه
قرحاش من بالعصـا عليـه نفشهـا
واقفى يعرش الجنوب وزاد بعراشـه
ضرب العصا في جنوبه قام يعرشهـا
وان سمع صوت المعوبل ينده ادباشه
هايم علـى شربـةٍ ماهـوب نايشهـا
وحالي سواته غدى عظامٍ بدشداشـه
وراعى الهوى علته دايـم يخششهـا
واستغفر اللي خلق الاعمار طراشـه
وامن البسيطه يجـي يـومٍ يطرشهـا
|