اســـتأذنك



استأذنك .. بسافـر ايـام .. وآجيـك
وان طالت ايّـام السفـر .. لاتحاتـي

حتى ولو طوّلـت .. مانـي بناسيـك
ياللي بدونك .. ويش تسـوا حياتـي؟

تامر على حاجه؟؟ .. بودّعك واليـك
عسى عوّض الايام .. في المقبلاتـي

حتى يدي .. ماودّهـا تفـارق يديـك
ساكت .. وانا اشوف البلا في سكاتي

ماشفتني لارحت منك .. التفت فيـك
بـلاي والله (( روحتـي والتفاتـي))

لكن قبل مـاروح .. ودي اوصيـك
وانت الوحيد اللـي يقـدّر وصاتـي

لاحدٍ سالك .. وقالك ((وين مغليك؟؟)
قلـه: "لـوازم لاقضاهـا بيـاتـي"

وان طروا النسيان .. مانـي بناسيـك
ياراس مالي في الحيـاه .. وغناتـي

وان طروا السلوان .. مانـي بساليـك
طيفك معي حتى وانا فـي صلاتـي

قلبي .. وهو قلبـي اذا مـرّ طاريـك
لولا ضلوعي .. كان عـزوا مماتـي

لو جض صدري .. كان يمديه ياتيك
ويبات عنـدك .. ويهنـى بالمباتـي

انا .. وقلبي .. والغلا .. ساكنٍ فيـك
وانته .. وقلبك .. والغلا .. وسط ذاتي

غلاك .. مثل الحكم عنـد المماليـك
اكبر طموحي .. لا .. كـل امنياتـي

شف في غيابـي ايّ حاجـه تسليك
لأني بعدك .. اسلى مع (( ذكرياتي))

احاول اذكـر .. اي شـيٍ يطريـك
"واقول هو سوا .. وانا ذي سواتـي "

كني مـوادع .. كـل شـيٍ حواليـك
وكني حسبت حساب ((حزة وفاتـي))

احب .. لاني مقدر انساك .. وآبيـك
ولا اقـدر اخليـك .. ياللـي تحاتـي

معنى احب .. وماقدر انسى واخليـك
((يعني بدونك ويش تسـوا حياتـي؟