على قد الغدر اعذريني 💔
البارت الثالث والثلاثون
:
-
:
دارٍ ماتحوفك ولا ترحبّ بك لا تطبّها
:
-
في الدار وتحديداً في منزل بو روضه تمت ملجة عمر وروضه من دون حفله ولا شوفه كان يباها عقد قران والسلام وعقبها طلع وهو متضايق حيييل من هالخطوه اللي بداها من دون احساس خذته ريوله لبيت عمه نزل وطلب شوفتها ونزلت له رغم انها عارفه بملجته الليله ما استغرب من شوفتها بأبهى حُلى وطله ومتكشخه ومتعدله واهتمامها بأدق التفاصيل في وجوده في بيتهم قام وباس راسها وانتبه لأحمرار عيونها توقع انها كانت تبكي بسبب ملجته على روضه ورجفة شفتها أكدت له الغصه اللي واقفه بوسط يوفها وهي تنطقها بغصب عنها ومن ورى قلبها : م..مب..رروك ما…ما.دب..رت.
حس بطعنة بأيسر قلبه من صوتها اللي تغلّف بالعبرة سحبها لقربه وحضنها ونطق بضيق: ماعرف شو اقول لج الله يبارك فيج ولا اقولج الله يسامحني على هالخطوه اللي بديتها وبليت عمري فيها .
طالعته تتريا منه الجواب والتكمله ونطق بضيقة مزروعه بين صدره: انا غلطان هي نعم غلطان يوم اني خطبت روضه واملجت وانا عارف قلبي وعصيانه وتمرده ما تعلّم يفز الا لج اربعين سنه وهو بحبج مغرّم ومتيّم كيف بوفي بينكم ولا كيف بعدل بينكم وانا قلبي ما يميل الا لج شو هالجرم وشو الخطا اللي سويته عشان اجازي نفسي بهالطريقة.
ابعدت عنه وهي تسحب نفس عميق ومن ثم تزفره رجع حضنها مره ثانيه وهو يكمل كلامه لين الحين تحت تأثير نبرتها اللي هزة اوسط اعماق قلبه واحتلته مايبا يكون رهين نظرتها اللي فيها الم وحزن ولا يبا يتأثر بنظرتها اللي اخترقت وسط جوفه واحتلته مستحيل ينسى نظرتها ونبرتها مستحيل لو يمر عليه الدهر كله اكمل كلامه بأسترسال احبج واموت فيج وهالقلب سيّد عيونج الفاتنات المغريات لكن والله يا عمري وسنيني كلها مادري ليه اندفعت هالدفعة ودي اعرف وش هو اعظم ذنب ارتبكته لأجل ربي يعاقبني ويجازيني بأني اخذها وانا اللي رافضها سنين وسنين انها ماتحل لي امرأه غيرج.
نطقت بين دموعها اللي تنساب بصمت على خدها: لانك ظلمتني يا عمر مانصفتني بالحق ولا سمعت اسبابي ظلمتني بهتاناً واثماً مبيناً واصبح الحب عندك بلا قيمه ولا اعتبار له.
ابعدها من حضنه ولأول مره يشهد دموعها وصدق مانطقت به مسح دموعها بطرف ابهامه ونطق: عساني وماكمل دعوته الا بسبابتها تنّحط على شفاته تمنعه ينطق شي يكدّر مسامعها عنه ونطقت هي بهدوء: قدر الله وما شاء فعل، لله حكمته في هذا شيء وبتعرفه على مرّ الايام يا ولد العم لاتتضايق ولا تزعل اللي مكتوب لنا كلنا ترانا بنحصله وبنشوفه شوف العين للشمس في جبين السماء لذلك لاتتضايق ولا تزعل من اللي سويته بس طلبتك يا عمر قلبي ماهو للعب ساعه ترفعه بالحب وساعه تنزله سابع ارض وتهبد به تراني مب في طور حمل كافي ولا فيني سعة صدر احط المخزون بين ضلوع صدري وأخبيه ترا كل مافيني الم وفاض عن حدّه ومابقى للأمل درب ولاضيّء يا ولد العم.
انتابه شعور يسكنه بظلم الانسانه اللي بين ايديه هدوء كلامها تناغم احرفها اللي تتفوّه به اشعره بأنه احقر خلق الله على وجه الارض اللي سواه فيها مايسويه ريال في عرضه وحلّه وماله وين وهي املكته كله بشعوره وبنفوذه وبقواه ماخلت للعقل فكر ولا للقلب اختيار نطق بهدوء وهو يبعد غترته وعقاله عنه وينسدح على ريولها لأول مره: تكفين خليني اغفى لو يوم واحد مستريح البال بلا فكر وبلا هموم لان قربج يعني لي الامان والراحه.
|