منتديات قصايد ليل - عرض مشاركة واحدة - رواية أبوي أبوي لو صد عني ماترجيته..مميزه روعه جنان حقيقيه

09-03-2010

طاح الموبايل من ايدي و انا اسمع صوت احميد يقول الو الو .. قعدت ع الارض ..يأسه اخر شي كنت اتوقع اسمعه ..فارس طلقني ..يعني خلاص ما صرت ع ذمته.
.متى طلقني ..؟؟ تزوج علياا ..؟؟
تنهدت حاولت اغصب اعيوني تذرف عبراتهااا بس ما طاوعتني عيت انها تبجي ع ها الخبر ..بس كاافي هالشيء كان متوقع و من زمااان ..ليش اطلب من اعيوني و اترجاهاا
ا تسيل دموعها ع ناس ما تستاهل خلاص اليوم انا و فارس تساوينها ..كلن خذ حقه .
." إنتهى الحب إنتهى..إلتهى القلب إلتهى..وهذا القرار الأخير..روحي بطريق وأنا بطريق..خلني على جرحي العتيق...خلاص عافك الخاطر"
رجعت و انسدحت ع الشبريه...حاولت ارقد بس البروده الي كنت احس بها منعتني ..نشيت ادور ع زلاغ البسه ...لقيت لي واحد يديد لبسته ..و رجعت احاول ارقد..
.الحمدلله ..فقدت الاحساس بكل شي قدرت اغلب همومي و ارقد ...نشيت عقب ساعتين..و انا ميته من الضيجه ..
مدري شو صابني يلست اصيح منهاره ...حسيت ان حيلي انهد قمت و صليت ركعتين علشان احس بالراحه .. رجعت ع شبريتي و انا في بالي شي واحد بس
" تعبت من الشعور اللي تجاهلني .. وعذبني وخلا حالتي حاله..وقررت اتركه وانساه .. مدام اني صعب القاه...واظن احسن لي واحسن له .. نكون بعاد.
.ونتفارق بلا ميعاد .. ونترك بعضنا ارحم بكره تتذكر وتعرف قيمة احساسي ...وتبكي دم ما ينلم .. من كثره."

بعد هذيج الليله قطعت العالم كله.. الا اتصال عمور و خوله.. و ابد ما قلته ان فارس طلقني ..ما اباها يعصب و يسوي شي طايش و يقطع رزقه و يرد البلاد يسويها عمور'/
بس بغيته ايعرف حقيقة اربيعه الي مستانس منه وايد..خليه ابروحه يسال و يدور عليه و يخبره كل شي ...
مرت الاسابيع الين ما نشيت في يوم و كانت حزة الظهر و انا ميته من التعب حسيت ان روحي بتطلع يلست اتسحب ..اتصل باي حد الظاهر اني بولد ...
كنت امشي خطوه و ارجع اوقف فتره..كنت اصارخ محد يسمعني كنت اظن الولاده امرهاا سهل من احس بالويع بروح المستشفى و بفاجأ قوم خالاتي بس ما توقعتها جي عذاب ..
طحت ع الارض و يلست احبي شرات الياهل لي ما وصلت عند موبايلي ...كنت احس باصابعي ترتجف ...مب رايمه اضغط ع الدجم خذت نفس طويل ..
ضبطت اعصابي و يلست اركز و انا تصل بـ خلود ...
استانست رغم العذاب الي احسه به يوم سمعت
حس خلود من الطرف الثاني : الوو
رديت ابسرعه: خلود خلود ..
خلود متروعه: شوه نوره شو بلاج ..
كنت ارمس بالغصب: تعبانه بطني ظهري كل شي فيني يعورني خلود..
خلود صرخت: شكلج بتولدين
صرخت عليه متفيجه اتحط احتمالات: خلـــــــــود اقولج تعبانه ..."ويلست اصيح مدري من الويع ولا من الخوف"
خلود: لبسي عبايتج دقايق و بييج و انا و امحمد
حاوت البس عبايتي بس ما قدرت اكيد بموت ..عيل ليش احس جي بالتعب ؟ يالله انك اتساعدني ربي فديتك ساعدني ..ربي مالي بالدنيا غيرك ..ربي ساعدني ..
.انسدحت ع الشبريه و انا اتجلب من الويع..عقب عشر دقايق من التعب سمعت جرس الباب يندق يالله عاد تبوني اوصل لي الباب مستحيل ما اروم..تم الجرس يندق .
.حشى بحرقون الجرس ...جفت موبايلي يرن و انا احاول اوصل لـ باب الشقه بس لمحت المتصل كانت خلود..بين لحظه و لحظه قدرت افتح باب الشقه جني رايحه مليون
كيلو كنت انافخ ..
انصدمت يوم طلت علي خالوه مريم اتشاهق : نوره نوره..
حضنتها و انا اصيح .مدري ليش غمضتني خالوه مريم ..ولا هذا الشوق يلعب دوره ...و يحرك ها الاحاسيس كلها ..
خالوه مريم: خلود ابسرعه ييبي عبايتها
ركضت خلود داخل حجرتي و انا تميت حاضنه خالوه مريم سمعتها اتصيح يوم قلتها: انا اموت خالوه اموت ..
خالوه مريم: اذكري الله يمه ها الالام كلنا انحس فيها شي طبيعي ما عليج الا تذكرين ربج يسهل عليج..
صرخت: تعباااااااااااااااانه بموووووت ما اتحسون فيني ..
خالوه مريم: خلود يالله شو اتسوين ..
للحظه و من كثر التعب طحت ع ركبي بس زختني خالوه مريم و ساعدتني خلود اني البس عبايتي و بمساعدتهم قدرت اركب السياره ..كنت احس اني اموت بس متلومه اصارخ
جدام محمد ريل خلود فشييييييله ..بس كل شويه اقول :ابسرعه ابسرعه ...
كانت خالوه مريم زاختني من ظهري ..اتهمز عليه كانت اتحسسني لمساتها بالراحه ..و الله و من كل خاطري تمنيت يكون فارس جريب مني كرهت هالشعور بس كان غصبن
عني قعدت اصيح ولدي بظهر ع الدنيا من غير ما يجوف ابوه مثلي انا ما جفت ابويي ..
قعدت اصيح بصوت واطي و اشاهق ..حضنتي خالوه مريم..ما كانت تدري ان عذابي و همي ..اكبر بكثير من تعب جسمي ..ساعات من العذاب و الويع..
و مع الصبر و طولت البال ...عقب التعب و الصراخ..عقب كل كلمه سب طلعت من حلجي حق الممرضات او الدكتوره او خالوه مريم من غير قصد ...
عقب كلهااا بلحظه اختفى كل شي و غاب و كاني كنت بكابوس و صحيت منه و انا احضن بنتي بين ذراعي سمعت صياحها فيلست اصيح معاها و كأنها تدري انها طلعت لدنـيا شقيه
شرات امها من غير اب ...وين فارس ليتك تجوف بنتك ..ليتك تشيلها و تحضنها ...
الممرضه: ايه نوره بتعيضي ليه ....هاتي البيبي انحطها بالحضانه
لويت عليها اكثر و انا اقول بصوت ميهود: لا خلي بنتي معاي ...
الممرضه: : حجوفيها بعد ما ترتاحي ..البنت محتاجه انظفها و انحطها بالحضانه بليز..
دشت خالوه مريم علي باستني ع راسي و باركت لي زخيت ايدها بعد ما شالو عني بنتي
قالتها: سامحيني خالوه غلطت عليج اسفه..
خالوه مريم كانت مستانسه: يالله خلود سبتني سب قبلج ..معذورين ..ها جربتي الولاده ..
هزيت راسي بمعنى هي و قلتها: هذي اول مره و اخر مره..
خالوه مريم: هههههههه كلنا قلنا هالرمسه..
نوره: عاد انتي الله يعينج اول مره و توم..
خالوه مريم: هههههه الحمدلله ...
عقب ساعه طلعوني من قسم الولاده و خذوني القسم ..كنت متلهفه اجوف بنتي بس الظاهر عطوني ابره مهدئه لاني ما حسيت بالي يدور حولي كنت اسمع خلود اتبارك لي
و محمد و ارد عليهم بس كنت احس بعمري بعالم و هم بعالم غير ..فجيت اعيوني باليوم الثاني ..
.معقوله رقدت وايد..جفت خالوه مريم راقده الصوب الثاني فديتج خالوه ...ضغطت ع الزر اطلب الممرضه ..
انفتح باب الغرفه: الحمدلله ع السلامه يا نوره ..
ابتسمت: الله يسلمج...وين بنتي ...
المرضه : دي بنتك شقيه اوي كل الاطفال بالحضانه نايمين الا هي بتبصبص حوليها...
ضحكت: ههههه فديتهااا ابااهااا ابا بنتي ...
الممرضه :تؤمري بس لما تتغسلي و تفطري ..
نشت خالوه مريم ابتسمت لها: صبااح الخير خالوه ..
خالوه مريم: صباح النور ..يالله احس بصداع ..
نوره: ليش تعبتي روحج و رقدتي هني ..ما يحتاي..
خالوه مريم: كيف ما يحتاي انتي بروحج تحتاجين المساعده..
نوره: ما بقصرن الممرضات ..
خالوه مريم: لالا شو ممرضات و انا موجوده حالج حال خلود ..الا خوله يحليلهااا
نوره: ان شاء الله المره اليايه بتكون هني معاج...
خالوه مريم: الله يسمع منج..يالله تعالي بساعدج بتروحين الحماام..
الحمدلله حسيت اني رجعت بين اهلي و ناسي بعد ما صرت وحيده و حمدت ربي الف مره لان خالوه ما تشرهت علي ولا شياته ولا سالتني عن فارس ...
طلعنا من الحمام عقب ربع ساعه ...عقب ما تريقنا ..يابولي بنتي حضنتها بستها تاملتها ..تشبه ابوهااا ..انا الي كنت بروح فيها و انا التعبانه و هي تشبه ابوهاا ..
نوره: خالوه تشبه ابوهااا ....؟؟
خالوه مريم شلتها عني : سبحان الله مره ابوهااا شو بتسمونها عيل ..
نوره: اممممممم مدري ...مدري..بجوف ابوها شو بسميها عقب ما يرد من السفر "كنت مضطره اجذب عليها"
خالوه مريم: و جي ما اتريا لي ما تولدين عقب يسافر ..
اكمل جذبتي: مدري كان مضطر اشغال ..
خالوه مريم: هيييييي هااااا ترا هاي الدنيا و اشغالها اتفرق بين الاهل
ما عرفت شو ارد عليها حسبتها اتنغزني بالرمسه بس طنشت..بها اليوم زارتنا خالوه عايشه و نهله و سيف و خالي احمد الي تشره علي و طاااح فيني طيحه و طلعت الف حجه و حجه ليش قطعتهم ..بس اكيد حتى مليون حجه ما بتعذرني طبعا مستحيل اقولهم فارس كان مانعني ..
.حميد ما ياني مع اني كنت متوقعه انه يزورني بس اتصل بي و بارك لي .. و ريحني يوم قال ان ما خبر حد ان فارس طلقني خلاص .. زين مب وقته يعرفون السالفه خليه ابروح يرجع و يخبر اهله ..
.في اليوم الثاني كانت خالوه مريم تقنعني اني اروح بيتهم و اني ما اتم بالشقه ابروحي بس انا رفضت و اصيرت اني اروح شقتي ما ابا اروح مكان يذكرني اـ فارس ..ما ابا ...
خالوه مريم: يا يمه طيعيني وودري عنج العناد ...؟؟
نوره: خالوه انا بكون مرتاحه اكثر في شقتي ...
خالوه مريم: و بيتنا جي مب مريح ترا خليفه محد في العمره ..تمي ع الاقل لي ما ايي خليفه او كملي اسبوع عقب روحي الشقه ..
نوره: اممممممم خلاص بتم اسبوع عندكم ...الا خليفه متى بيرجع..من السعوديه..؟؟
خالوه مريم : عقب اسبوعين...
نوره: امطولين ..
خالوه مريم: هيييييييييي.. ما اجوف فارس اتصل بج و او اتصلتي به اتخبرينه انج ربيتي ...
اتعلثمت ما عرفت شو اقول فجذبت: امبلى اتصل انتي كنتي في الحمام..
طالعتني بنظرات انها مب مصدقتني: جان قلتي كنت برمسه ..
ما عرفت شو اردج عليهااا ...صارت حياتي كلها جذب بجذب ...طلعنا من المستشفى حزة العصر ياه خالي احمد ووصلني بيتهم..
حطوني في حجرة فارس ما يدرون انهم حطوني ابقبر راحت خلود مع محمد و يابوا اغراض بنتي كلهااا ..دشت علي خالوه مريم و انا قاعده البسها سلسلة ذهب و فيها خاتم الي هداني اياه فارس بيوم مستحيل انساه في حياتي .....
خالوه مريم: رقدت ...بنيتج..؟؟
نوره: لا قاعده البسها هاه
خالوه مريم: حرام عليج نوره تو الناس ع ها السوالف شو املبستنها خاتم عود خافي ربج..
نوره: هههههههه ها الخاتم هداني ياه فارس خل تلبسه فيه ريحة ابوهااا ..
دش علينا خالي احمد : يا سبحان الله ها البيت العود كلهم طلعوا منه ما تم فيه غير نوره و بنتها الله يا الدنيا عطوني اشيل بنتي ..
خالوه مريم: بنتك منو يروم لها عندها خطيبين ذياب و عبود..
نوره: هههههههه
خالي احمد و هو يلاعبهااا: شو بتسمينها ...؟؟
نوره : اممممم مدري اتريا فارس ايي يسمها ..
جنون الي افكر فيه ..اتريا وهم فارس مستحيل ايينـي او يسال عني بس اكيد بخبرونه انه صارت عنده بنت .
خالي احمد: عجيب هالدنيا ..كل الناس تزوج بس ما يسون جي انتي اختفيتي و الحينه فارس قطع لا حس ولا خبر ..شو السالفه..
ساعدتني خالوه مريم يوم ردت: فارس امسافر عنها عنده شغل ..
خالي احمد: خلاص عيل انا بسميها هاجر ع اسمه امه لي ما ايرد بالسلامه ...عااد كيفه يسمي الي يسميه ..
مراااات ايام عوضتني عن ايام التعب و العذاب الي عشتها ابروحي كنت احس صج اني مدلله انا و بنتي خالي احمد ما قصر معانا حتى خالوه مريم و خالوه عايشه الي كل يوم اتزورني .
و نهله و خلود..صج صج حسيت بالاستقرار لاول مره..ما يهمني فارس دام هاجر عايشه بوسط اهلي ...بس تمنيت من كل خاطري اني حظها ما يطلع شرات حظي سمعت دقه ع الباب
نوره: تعالي خالوه ..
دشت خلود و جنها خاشه شي وراها : انا خلود مب خالتج امممممممم قولي شو عندي ...
نوره: امممممممم بعد هديه مب كافي العقد الي يبتيه لـ هاجر ...
خلود: هههههههه هذي مفاجاه مش هديه ...شو تتوقعين
هزيت جتفي: مدري ..
خلود: غمضي اعيونج ..
ضحكت و غمضت اعيوني ..شويه و قالت فتحيها ..غصبن عني و طاحت اعيوني ع صورة فارس
" فتح لي دفتر الذكرى مع الاحزان بعثرني..وتركني اتصفح اوراقه وبين حروفه سهرني..وقف دمعتي بعينه وحيرها وحيرني..
وشدني حيل للماضي وخلا الشوق يجبرني..ساعات الشوق يترجا ساعات الشوق يامرني"
خلود: يوم سرت اييب اغراضج و اغراض هجور جفت هالجيس ..قلت اكملها لج خذيتها الخياط و سواها وساده
طالعتها تتأملها انتي سويتها روعه كيف سويتها ..
ابتسمت و مديت ايدي بغيت احضن المخده بس حطيتها داخل شاطوحة هاجر علشان اتجوف ابوها و تتعرف عليه ...قلتها:
هذي زينب عطتتها لي هديه و علمتني كيف اسوي الصوف ..
خلود: رهيبه ...
قلتها و انا اطالع الصوره: مشكوره خلود...
ما تدرين انج فتحي الجرح فتحتي لي ذكريات اتعذبني ...آآآآآآآآآآه اشتقت لاهل فارس اشتقت لـ زينب و فيصل و كلهم الا مهااا ..
اكيد مستانسه و طايره من الوناسه يوم فارس تزوج عليااا ..يتني الصيحه حسيت خلود تتامليني فيودت عمري طالعتها و ابتسمت..
خلود: نوره شو فيج انتي موليه تغيرتي صايره وايد تسرحين و كله مهمومه شو بلاج كل ها عشان فارس محد ..
اااااه يا خلود ليتج اتعرفين فارس شو سوا فيني ...بس زين دخلت علينا خالوه مريم: روحي ولدج يصيح اتصلت خالتج محتشره ..
خلود: اوووووووووووف لوع بجبدي ها تراا
خالوه مريم: محد قالج اتيبين عيال يالله روحي لعيالج..
خلود: زيييييييييييين ...
عقب ما طلعت خلود سالتني خالوه مريم: اييب لج العشىى هني ولا بتعشين في الصاله ...
نوره: لا لا بتعشى في الصاله انا الحينه ابخير ..
خالوه مريم: زين يالله تعالي العشى زاهب محد داخل حتى خالج احمد بتعشى برع البيت ...
تعشينا انا و خالوه مريم ...عقب العشى يت نهله و معاها حميد ..و هذي اول مره اجوف فيهاا عقب عقب ما اتصل فيني يبشرني بخبر طلاقي
نهله: وينها هجوره ..
نوره: راقده
نهله: فديتهااااااااا
حميد: تشبهج !!
نوره: لا تشبه ابوهااا اراويها لك...
حميد: خليها ما يحتاي دام راقده الايام اليايه

مدري ليش حميد دوم يطري كلمة الايام يايه وايد مدري شو يقصد فيها رفعت راسي اطالعه ابتسم لي ..
نهله: زين بعد ما قلت انها تشبهك يا ويهي الطفولي
حميد+نوره= هههههههههه
خالوه مريم: نهله حميد احط لكم عشى ..
نهله: ما يحتاي تعشينا و الحمدلله
كنت متفجه مع خالوه اتم اسبوع في بيتهم بس الحينه مر اسبوع و كذا يوم عقبها قررت اني اروح الشقه ..عرض علي حميد مساعدته ..شليت اغراااضي كلها.
.حسيت ان خالوه مريم كانت شويه و بتصيح لانها تعودت ع وجودي ووجود بنتي ..
خالوه مريم: يمه لا تقطعين تعالي زورينا ..لا تحرمينا من هاجر..
بستها ع راسها : اكيد ..باجر بييكم افا عليج نسيتي عندي سياره ..
خالوه : تحملي في الصغيرونه ..
نوره: ان شاء الله ..
كنت متلومه لاني برجع الشقه مع حميد ابروحي ...
نوره: حميد بمر بيتكم بسلم ع خالوه عايشه ...
حميد: زين روحي لي ما ارتب الاغراض في السياره ...
رحت بيت خالوه عايشه كانت خالوه عايشه ابروحها قاعده في الصاله اطالع التلفزيون حسيتبها مستانسه و طارت من الفرحه يوم جافت بنتي ...سلمت عليها و طلبت مني اتحمل في بنتي ..عقب ركبت سياره حميد..
حميد: نوره بنتج حلوه شراتج..
بلعت ريجي: لا حميد هذي طلعت تشبه ابوهااا ..انا مب جي شكل ويهي ..
حميد: بس فارس مب غاوي !!
من عينك الا غيران منه بس ع شوه بغار منه ..سكت ما علقت
حميد: رمستي عمور متى بيي ...؟؟
نوره: هي اتصل و بارك لي هو و خوله و يمكن عقب اسبوع .يوصلون البلاد .
حميد: يوصلون بالسلامه
اخيرا وصلت شقتي قبل ما يسالني حميد مليون سؤال ..شكرته من كل قلبي لانه ساعدني و خذ اغراضي و اغراض بنتي الشقه...شكرته..
حميد: نوره جان تبين حايه اتصل بي لا تستحين ...؟؟
نوره: ما اتقصير حميد
حميد: مب شرات هذاك اليوم اتصلتي بمحمد و خلود..يوم ربيتي ...اتصلي بي انا ما عندي شغله ..
انحرجت من رمسته ابتسمت له و همست: ان شاء الله ..
حميد: يالله انا بروح تبين حايه اماره ..؟؟
نوره: سلامتك ...
رجعت الشقه بس هالمره مب ابروحي معاي بنت فارس ...رتبت اغراضي و اغراض هاجر شرات ما سماها خالي احمد ..طاحت بيدي وساده الي فيها صوره فارس .
.حطيتها ابمكانها دااخل شاطوحة هاجر خليها تتأمل ابوها يمكن اتجوفه بيووم .. و يطلع حظها احسن عن حظي ..بالبدايه كنت الاقي صعوبه اني اتكيف بها الوضع و معاي
طفله ..و ساكنه ابروحي حتى فكرت اني ارجع بيت خالتي مريم...بس الحمدلله خالوه مريم و خلود ما قصرن كانن كل يوم يزوروني و يقعدون معاي فتره ..
كل ها علشان هجور ..لو كنت ابروحي محد بنشد عني ...بالايام الاخيره خالوه مريم كانت طايره من الوناسه لان ايام بوصل عمور و خوله ..
و بالمره خليفه و حرمته يمكن نفس اليوم ...
عاد هذيج الساعه بضطر اروح ارد حجرة فارس في بيت خالوه مريم دام عمور بسكن خوله في الشقه..اتنهدت ..يالله هناك اريح لي ..
حميد ما قصر معاي كان كل يوم يتصل يسالني اذا كنت ابا شي ...و كنت كل يوم ارده و اشكره ...بهذاك اليوم افتقدت خالوه مريم و خلود ما يوو يزوروني ...
فكرت اتصل بهم ...نوره: هلا خلود وينكم ما ييتي لا انتي ولا خالوه ...؟؟
خلود: ترا خليفه بيي اليوم ...و بنستقبلهم المفروض انتي اتيين ..تعالي ...؟؟
نوره: امممممممم ما عندي حد اييبني ..و انا ما اروم اسوق و فوقي هاجر ..
خلود: بجوف محمد اوكى .. زهبي روحج ..
ياني ع الخط حميد اكيد يبا يسالني اذا كنت ابا شي ..فقلت لخلود: ابرايه محمد خليه
خلود: ما بتيييييين ..؟؟ شوووه .؟؟
نوره: حميد معاي ع الخط بجوفه جان بييبني ...؟؟
خلود: خلاص عيل وفرتي علينا..
نوره: ههههههه مع السلامه ..
خلود : في امان الله ..
رديت ع الخط نوره: الو ..
حميد: هلا ام هاجر اعلومج..
نوره: طيبه ؟.اخبارك..
حميد: بخير دام اني اسمع هالحس كل يوم..
سكت ماشي رد ................
حميد: نوره زعلتي ..
نوره: و ليش ازعل ..اممممممممم
حميد: شووه
نوره: ما سالتني اذا تبين حايه ...
حميد: هههههههه امري تدللي شو بغيتي ..
نوره: اباك اتوصلني بيت خالوه مريم لو سمحت بس اتيب معاك نهله لو سمحت ..
حميد: حق شو نهله اتخافين مني ترا عندج هاجر...
نوره: هههههههه لا نهله احسن ضخمه ..
حميد: هههههههه من اعيوني ..تزهبي بمر عليج لاني جريب ..
نوره: و نهله !!
حميد: شو اباها نهله مع ريلهاا ..اقولج انا جريب وايد اتزهبي بس انتي ..
نوره: خلاص عيل ما عليه هالمره بس ..
حميد: ههههههههه
نوره: ادري ادري بقلبك اتقول طرار و يتشرط..
حميد: و راسج الغالي ما قلت ..
نوره: ههههههه بس زين صدقت ..يالله بروح ازهب هاجر خلها تستقبل عمها ..
حميد: يا ويل حالي ..
نوره: حميد صكرررررررررررر
حميد: هههههههه مع السلامه ..
نوره : في امان الله ...

دشيت حجرتي و انا احس بالراحه لو خطبني حميد !! اوافق ..؟؟ معقوله بفكر يخطبني ..؟؟ ليش لاء ..لبست عبايتي و شيلتي .. و زهبت اغراض هاجر..
وايقت عليها كانت راقده ..بستها من بعيد..رن جرس الشقه
ابتسمت ل هاجر الي نقزت من سمعت الصوت بطلت اعيونها و ردت غمضتها قلتها ارمسها: يا ويل حالي فديتج شو حلوه ..اتريي ببطل الباب حق عمج حميد و عقب بيي
اشيلج زين ..بستها و ركضت صوب الباب سمعت الجرس مره ثانيه يندق اكيد هاجر بتنش الحينه من حشره ها الجرس ..
نوره: زيييييييييين لحظه ..
فجيت الباب و انا ابتسمت: تراك ازعجت..........
"..فجأه اختفى كل الكلام
وتاهت حروفي في الظلام
اللي سكن في عينها
كل الاماني وقتها
ردت لقلبي اشتقتها
ومدري المحبه ضيعتني والا انا ضيعتها
لو سنين عمري تضيع..والزهور تنسى الربيع
ماانساه ابد
لو يصير الشوق دمي
او سواد الليل همي
ماادور احد
ويش ادور بعدها
لونساني وعدها
مدري المحبه ضيعتني
والا انا ضيعتها""
حاولت انطق اسمه بس ما قدرت حسبت اني في حلم ..كنت بقول فارس بس شي كان يكتم ع صدري و يمنعني من الكلام ابسرعه زخيت مقبض الباب علشان اصكر الباب ابويهه
بس هو دز الباب و طرت انا داخل الصاله دش و صكر الباب ...غمضت عيني للحظه فارس فارس هني
".قريب انت وبعيد وفي بالي الوحيد
وحبك دنيتي وآخر مداي
نعم نعم مشتاقلك وقلبي يبيك
ومحتاجلك..كثر ما غبت انا مشتاق
حبيبي الفرقا ماتنطاق
بسولف لك تعال عن اشواقي
تعال قريب انت وبعيد
وفي بالي الوحيد
وحبك دنيتي وآخر مداي
..وينك ياغربه ايامي وسنيني .
.وينك بعدك سكن كل الحزن روحي"