منتديات قصايد ليل - عرض مشاركة واحدة - دمـــــــــــــــــــــوع عذراء رومانسية جريئة

04-15-2017

الجزء 46،،

مر اسبوع على سفر بدر وانا محروقه من داخل صحت صياح بحضن فيصل لاني راح افقده .. تذكرت كلامه لي وهو يودعني ويقول: هالله هالله بنفسج وبـالبيبي سلطان .. وانا ترى قريب مو بعيد كيوتل " شركه اتصالات بدوله قطر " ما قصرت اتصلي فيني وكلميني 24 ساعه اذا تبين .. طيب .. غمضت عيوني وانا مازلت على قعدتي من طلع فيصل للدوام الساعه 5 ونص الفجر ولين الحين وانا على السرير عيزانه اقوم طالعت جوالي اشوف الساعه كم ونصدمت انها 9 ونص الصبح قمت من السرير ودخلت الحمام " عزكم الله " اخذ شور يهديني .. وعقبها طلعت ولبست لابسي وانا اشوف بطني اللي يجنن واحس بالبيبي يضرب داخل .. ابتسمت وانا اقول: والله راح تصيرين ام يا اسووم .. وبنفس الوقت رن جوالي بنغمه حبيبه قلبي وعمري ندى .. هلا والله حي الله هالصوت ..
ندى : أي جذبي علي .. وينج عني لازم انا اللي اتصل لج والا انتي ما تدرين انا وين .. خلاص انا زعلانه ..؟
رديت عليها وانا ابتسم : حبيبتي ندوش والله سوري تعرفين وضعي شلون ؟؟
ردت ندى وهو عتبانه علي وتقول : عيل انا ايش اقول .. اللي من محمد لين ابراهيم وجلسه العلاج وغيره .. بس ايش نقول غير الله كريم ..
مادري ليش حسيت بحزن عليها وقلت وصوتي اختنق : ندى اسفه .. ادري اني مقصرة بحقج ..
صوت ضحكت ندى خلتني اضحك وهي تقول : حياااااااااااااااااااتي اسوم .. والله انج عجيبه لا تصحين علينا ..
مادري ليش هالبنت تشوف الوضع عادي قلت وانا اخذ هواء علشان ما اصيح : ندى انتي ليش جذي انتي تدرين ان الكل يتعذبون علشانج .. بسالج انتي تحسين فينا .. وشلون نفكر نعيش بعدج ..؟
صوت الهدوء على الخط الثاني خلاني اندم على الكلام اللي قلته بس صوت ندى الهادي خلني احزن اكثر من قبل وهي تقول: اسوم هالدنيا حياه وممات .. والكل رايح يموت .. ليش تفكرون جذي هذا بلاء من ربي وانا راضيه وصابره ومستحمله .. بدء صوتها يميل للصياح وهي تقول : اللي افكر فيه محمد شلون راح يتاقلم على الوضع .. وابراهيم اللي راح يسال عني اذا كبر .. هذا اللي معور قلبي .. سكتت ندى وسكت معاها .. كلنا يبكي على ليلاه ..

نور انتي مقتنعه باللي تسوينه ..؟ او انج تبين تعذبين الولد وخلاص ..؟ رفعت راسي اشوف الجازي اللي تبي تفهم ليش انا مصممه على رفض عبدالعزيز للمرة المليون .. وقلت : الجازي هالدنيا علمتني حبي من تبين بس لا تخسرينه .. انا افضل احب عزيز من بعيد بدون ما اخسره فهمتي .. شفت ان الكلام اللي قلته ما عجب الجازي اللي قعدت جنبي على الكنب واحنا قاعدين بالصاله وخالتي ام عبدالله تشوف التلفزيون .. انتي غبيه تعورين قلبج وقلبه على الفاضي .. ليش تعيشين بالعذاب وكل شي بين يدج ابي افهم .. كنت اسمع الجازي وهي تتكلم بس مو قادره استحمل .. ابي موقف من عزيز ياكد حبه لي موقف قوي يخليني ما افكر اني الفرصه الثانيه له .. كنت اسمع الجازي ايش تقول بدون ما ارد عليها .. رن جوالي ورفعته وانا اشوف اسم ندى على الشاشه .. هلا والله بست الحبايب ..
ردت ندى وهي تضحك : ههههههههههههههههههه هلا والله بالعروس اللي معروة قلبي ولد خالتي ..
ما اعرف ليش احترق وجهي من الاحراج اانا اعرف ان ندى اكتشتفت انها ما تحب عزيز مثل ما كنا نتوقع بس بعد مهما كان اللي عاشته حب حتى لو كان خيال رديت وانا جدا متفشله : ليش من قالج ..؟
ردت ندى وهي ما زالت تضحك: ههههههههههههههههههه العصفورة اللي خبرتني .. يا بنت اتقى الله فيه وافقي الولد جن جنونه ..!
رديت بسرعه وانا وجهي صبغ احمر : لا تنسين انه جن جنونه معاج قبل ..
صوت ندى وهي تضحك خلاني اتمنى الارض تنشق وتبلعني وهي تقول : يا بنت انتي تدرين اني اموت بـ محمد وتعرفين ايش قلت لعزيز بالمستشفى .. يعني المفروض تكونين عارفه مكانته عندي .. واللي اعرفه وفهمته من العنود ان الولد يموت الف مرة بالثانيه اشقفي عليه ..
سكتت ندى وانا منحرجه يعني العنود درت وخبرت ندى الله يستر لا يكون الفريج والدوله والعالم العربي والغربي عرف بالموضوع .. اخذت نفس وقلت : خليني اعاقبه شوي ابي منه موقف يبين حبه لي ..
الهدوء اللي على الخط الثاني خوفني بعد ثانيه سمعت ندى تضحك وتقول : انا عندي لج حل يخليج تتاكدين طيب ..؟
تكلمت بسرعه وانا مبسوطه على تخطيطات ندى وقلت: شنو حلج يا ابو الحلول ..
ردت علي وهي تقول :الساعه 6 ونص المغرب راح تعرفين انتي شنو عند عزيز وقولي ندى قالت .. والحين مع السلامه ..
صكرت الخط قبل لا اتكلم ولفيت راسي اشوف الجازي اللي كانت تنطر مني اقول شي ..

كنت ارتب المطبخ وما خليت والا شي داخل الدروج الا طلعته اليوم يوم النظافه العاليمه عندي .. ابستمت لنفسي وتذكرت سعد لما كان يضحك علي اذا قررت اليوم يكون يوم التنظيف وبس رفعت عيوني اشوف الجوال اللي يرن من الصبح على راسي ابتسمت وانا اشوف رقم ندى .. هلا وغلا ..
هههههههههههههههههههه ضحكت ندى وهي تقول : شسالفه الكل يقول هلا وغلا .. ما في غير هالكلمه ..
ضحكت وانا اطالع الساعه واقول: شعندج متصله علي .. لا تقولين وحشتج ..؟
ردت وهي تحلف بالله : فطوووم والله اني مشتاقه لج .. متى راح تنزلين قطر .. والا عجبج جو الكويت ..؟
رديت وانا ابتسم لرد ندى السريع واقول : حياتي والله .. انا مشتاقه لكم موت وبطريقه غير طبيعيه .. بس ايش اسوي الله كريم ..
سكت بالثانيه اللي تكلمت ندى فيها وهي تقول : فطوم ما حملتي .. يالله عاد نبي نشوف ياهل غير سالم ونور وابراهيم وموزة ..
هههههههههههههههههه ضحكت من قلبي وانا اقول : متى ما ربي رد راح يجي لا تستعجلين .. المهم انتوا اخباركم امي شلونها وعبادي والجازي والعنـ ..
قطعت كلامي وهي تضحك وتقول : يا بنت تعالي قطر وراح تعرفيني اما الحين بصكر منج طيب ..
ابستمت وانا ارد عليها : طيب ندوش لا تنسين تسلمين على الاهل .. صكرت من عندها وانا احس براحه من صوت ندى المرح ..

صكرت التلفون من فطوم وانا مبسوطه اليوم كلمت اعز ثلاث اشخاص على قلبي نور وفطوم واسوم .. الله يرحمج يا منيرة اشتقت لج .. ابتسمت وانا اسمع صوت محمد وهو يغني ويلبس لبسه العسكري عنده دوام عصر يعني يطلع من 12 الظهر لين 9 بالليل .. وقفت على رجلي وانا اشوفه واقف قدامي واسمعه يغني وبصوت حزين خلاني اصيح بدون صوت بس دموع تعبر عن اللي احسه وهو يحسه معاي بنفس الوقت :

محتاجك..محتاجك ..محتاج اشوف عيونك
محتاجك..محتاج اشم هدومك..
محتاج اشوفك يا ضوة عيوني..
قلبي و روحي عنك يسألوني..
مثلي تبجي لو نسيت..مثلي تسهر لو غفيت
وشلون انام الليل من دونك..
وشلون اغفه وانا من دونك..
محتاج حبك يجي يدفيني وارتاح..
ادفع حياتي ثمن بس يرجع الراح..!!!
مثلي تبجي لو نسيت مثلي تسهر لو غفيت
وشلون انام الليل من دونك..
وشلون اغفة وانا من دونك..
محتاجك..محتاج اشوف عيونك

اختنقت وراسي بدء يعورني هذا شعوره من دوني .. عيل شلون شعوري من دونه لو تعرف يا محمد اني اموت بالثانيه مليون مرة وانا اعرف اني ما راح اكون معاك .. ركضت لحضنه وانا اعبر عن اللي بخاطري صحت امس واليوم وبكرة .. صحت بعدي عن اغلى ناسي انا اصيح ومحمد يمسح على راسي وهو يقول كلماته اللي دوم تحسسني بامان : حياتي اذكري الله .. انتي ما زلتي معاي والحمدالله على النعمه اللي احنا فيها .. ندى حبيبتي الله يخليج خلاص وقفي هالدموع اللي محطوطه في مخباج " الجيب " ههههههههههه ضحكت على كلامه وانا احضنه اكثر لي .. تنهد وهو يحضني بالمقابل ويقول: تدرين بما ان عندي ساعه لين اروح الدوام خليني اقولج ايش بسوي اذا ... ؟؟ سكت محمد وفهمت ايش يقصد اذا مت .. هذي الجمله اللي وقف عندها .. رفعت راسي له وقلت : ايش راح تسوي ..؟ ابتسم وانا اشوف عيونه مليانه دموع وقال : راح اسولف على راس ابراهيم شلون عرفتج بالصدفه وشلون حبيت صورة لمده 10 سنين .. وشلون شفتج اول مرة وانتي طالعه من بيتنا .. وراح اقوله شلون هاوشتج يوم وفاه المرحومه منيرة .. حضني لصدره وهو يكمل : وبقوله شلون خطبتج من اخوج عبدالله وشلون عرسنا كان .. ما راح اخلي شي عندي .. راح اقوله كل شي كل شي .. سكت وسكت محمد معاي وكل واحد فيني يحاول يحضن الثاني ويحسسه بشعوره ..

على الساعه 6 ونص المغرب صوت عزيز العالي خوفني وانا احاول اهديه وهو معصب .. يعني شنو خطبها وهي مواقفه .. طيب انا ليش ما تبيني انا احبها ليش ما تفهم .. تكلم عزيز وكسر خاطري وانا امسك يده واقول : عزوز اذكر الله الزواج قسمه ونصيب البنت ما قالت شي كل اللي قالته راح تفكر .. كلمته وانا احاول اقعده بس عزيز رفض وقف من على الكنب وقال : عطيني رقمها خليني اكلمها ..؟ ايش انت مجنون تبي عبدالله يكسر راسك ..؟ تكلمت بسرعه قبل لا يجن اكثر بس عزيز ما سمع كلامي سحب جوالي وطلع رقم نور واتصل من جواله وطلع من عندي .. ركضت وراه بس للاسف سبقني وطلع من البيت .. اخذت جوالي واتصلت على ندى بعد الرنه الاولى سمعتها وهي تضحك .. تكلمت وانا منقهرة : استانستي الحين الرجل صار مجنون واخذ رقم نور من جوالي غصب وطلع يكلمها ..
تكلمت ندى بعد ما سكتتني وقالت : هذا اللي ابيه .. ابي نور تشوف اهتمام عزيز فيها وشلون يحبها ويعشقها .. فهمتي ليش قلتي لج قولي له ان الدكتور جاسم خطبها ..
سكت وانا مصدومه من تخطيطات ندى عجيبه هالبنت والله شي .. تكلمت وانا ابتسم : حلو حلو والله انج شي خلاص صكري خليني اشوف اليهال وارد عليج بالتطورات ..
صكرت من ندى ورحت اشوف سالم ونور ايش يسون .. وهم قاعدين على الارض ويلعبون بالدفاتر والالوان وقفت وانا اطالعهم وانا اقول بقلبي يارب احفظهم لي قعدت عندهم وقلت لنور : حبيبتي لو بابا جاب ماما جديده راح تحبينها .. شفتها اطالعني كان الوضع غريب تكلم سالم على طول وقال : مثلج ماما اانود .. ابتسمت لسالم وانا انطر جواب نور اللي قالت : ابي الي ندى .. انصدمت هذي شتقول الله يهداك يا عزيز علقت البنت في ندى واخرتها نور هي اللي تبيها ..

شفت نور وهي تنقز من مكانها بعد ما ردت على التلفون وركضت غرفتها .. ما اعرف شبلاها بس شكيت في الموضوع علشان جذي قعدت عند خالتي وانا اقولها : يمه ليش ما نروح الكورنيش اليوم اذا جاء عبدالله .. طلعتني خالتي وهي تقول : كان زين والله من زمان ما رحت له من يوم كانت ندى عندي .. كسرت خاطري وانا اقول : خلاص راح اتصل له الحين وبروح اسوي الشاي والقهوة واجهز الكيك والتمر .. وقفت وانا ابي نور تطلع بس للاسف ما شفت شكلها .. طلعت برع وانا رايحه صوب المطبخ وافكر باللي راح يصير لنور .. واذا راحت مع من اقعد .. طلعت جوالي من جيبي واتصلت بـ عبدالله علشان اقوله عن الطلعه بس ما رد .. طرشت له رساله " حبيبي اليوم بنطلع مع خالتي الكورنيش اذا انت مشغول قول علشان نروح مع نور " حطيت الجوال على طاوله المطبخ وبديت شغلي وانا ادندن والحن كنت مبسوطه ما اعرف ليش .. تكهرب جسمي وحسيت براحه كبيرة من حضن حبيبي قلبي .. لفيت اطلعه وانا ابتسم وقلت : هلا والله متى جيت ..؟ ابتسم عبدالله لي وهو يقول : صار لي 10 دقايق وانا اطالعج .. وكمل وهو يحضني من جديد : شفتج وانتي طالعه من الصاله ورن جوالي برقمج بس كنت حاطه على الهزاز وانا اصلا واقف وراج وقريت الرساله وانتي مو معاي مع الاغراض اللي بيدج .. ههههههههههههههه ضحكت لاني مو متخيله انه كان يراقبني وقلت له : طيب ايش رايك نروح .. خالتي ملانه من البيت وتبي تغير جو .. تكلم وهو يحضني ويقول: بس بشرط بوسيني وانا اوديكم ..؟ هههههههههههههههههه ضحكت مرة ثانيه وانا ابعده عني واقول: عبادي استح احنا بالمطبخ ..

جمعتنا كانت حلوة وخصوصا سوالفنا عن البيبي اللي جاي بالطريق موضي منحرجه من كلام ندى وامي وانا وصافيه نضحك من قلبنا عليها .. اوووه خلاص عاد ترى اهون واخلي البيبي داخل بطني .. تكلمت موضي وهي تمسك بطنها اللي واضح بشكل حلو وهي بالشهر الرابع .. ههههههههههههههههههه ضحكت ندى وهي تقول : شدعوه ديناصور ..؟ هههههههههههههههههههههههه ضحكنا كلنا عليها بالوقت اللي تكلمت امي وقالت : لا تخافين يوم الولاده الكل معاج من صغير لين كبير .. أي صح كلام امي لا تخافين بس انتي شدي حيلج واهتمي بصحتج .. تكلمت وانا امد يدي بالكوب لندى علشان تصب لي حليب كرك .. تكلمت ندى وهي تضحك : لا لا ما يصير انا ابي اشوف الديناصور اللي بيكون في بطن موضي .. ههههههههههههههههههههههههه رجعنا نضحك وموضي حطت نفسها زعلانه على ندى اللي كانت منفجرة من الضحك .. قعدنا نضحك فترة طويله لين سمعنا صوت راشد وهو يقول : ياولد .. تغطت ندى ولبست الشيله ولفتها عدل وعقبها دخل راشد وشكله تعبان من الدوام .. سلام علينا وقعد وهو يقول : ضحكوني معاكم ابي اضحك .. ابي شي جديد .. ضحكت امي وقالت : موضي تقول ما تبي الياهل يطلع من بطنها .. وندى تقول لها خلاص خلينا نشوف الديناصور اللي راح تجبينه .. هههههههههههههههه ضحك راشد وهو يطالع ندى ويقول : الله يا ام ابراهيم الحين صار ولدي او بنتي ديناصور .. ردت عليه ندى وهي تعطي راشد فنجال القهوه : ليش تسالني يا اخوي .. حرمتك ما تبينه نشوفه واحنا نبي وجه جديد بالعايله .. هههههههههههههههههه ضحكنا وتكلمت وانا اقول : وانتي الصاجه وجه جديد يمكن يعطي البيت حركه .. ضحكنا وسوالفنا واحنا جدا مبسوطين .. ربي يديم لنا السعاده ..

دخلنا الغرفه بعد الجو الحلو اللي عشناه مع اهلي وخصوصا ندى .. دخلت الغرفه وانا اضحك واذكر راشد بكلام ندى وهو يضحك مره ويبتسم مره وانا اعلق ومشتطه بالسوالف وعقبها سكت وانا اشوف راشد اللي وقف يطالعني ونظراته حزن .. قربت منه وانا امسك يده واقول : عسى ما شر شفيك .. رد علي وهو ينتهد ويقول : ندى اليوم عندنا والكل مبسوط بس بعدين يا موضي وين راح تكون .. صدقيني انا احب ندى كاخت لي .. شلون اعيش بدونها او نعيش بدونها .. سكت راشد واختنقت انا من الدموع ما اقدر اسكت عن اللي بقلبي وقلت : تصدق يا راشد ندى غيرت فيني اشياء كثيرة ما كنت متخيله اني راح اكون موضي ثانيه .. نفس الحين الكل يحبني ويقعد وياي عكس قبل يوم الكل يبعد عني والا يبي يكون عندي او معاي بس الحين .. سكت وانا احط راسي على كتف راشد وقلت : انا احبهم كلهم واولهم ندى .. احب اكون معاهم لان ما عندي الا هم وبس .. حضني راشد وهو يهديني لاني بديت اصيح وقال : موضي اذكري الله البنت مازلت عندنا .. والحمدالله على كل حال واذا جاء ذاك اليوم راح تعرف شكثر احنا نحبها .. سكت وانا اسمع راشد ايش يقول وشلون يحاول يفهمني سنه الحياه وقدرها على البشر ..

كنت منسدح على السرير واتذكر الموقف اللي صار اليوم .. 6 ونص المغرب اول ما خبرتني العنود بالسالفه غمضت عيوني وتذكرت وانا منقهر: شلون توافقين على الدكتور جاسم يعني انتي ما تبيني .. هي ساكته وانا منحرق من داخل احس راسي بدء يدخن ويطلع دخان كثيف .. والحين يا نور انتي موافقه عليه ليش انا مو فاهم .. ما همج اللي قلته او تحسبين اني العب عليج .. انا كبير وعمري 32 سنه مالي بـ سوالف الغزل وغيرها .. ارحميني الله يخليج لا تزديني .. كلمتها وانا انطر رد منها بس الهدوء اللي على الخط الثاني خلاني اشك باني اكلم احد .. نور تسمعيني والا صكرتي الجوال بوجهي .. كلمتها مرة ثانيه بس هالمره سمعت صوت انفاسها وهي تتنهد غمضت عيوني وانا اسمعها تقول : عبدالعزيز اذا كنت تحبني هالكثر ليش تقوله الحين ..؟ سكت مو علشان افكر بسؤالها لا ..!! قلت بعد ما ارتحت انها ردت علي : لاني عشت حياه غريبه واعتقد تعرفين ايش هي ..؟ أي اعرف شلون كانت حياتك بس انت اللي حطيت نفسك فيها.. لما حسيت بحبك لي من البدايه ليش دفنته .. طيب كنت تحب ندى سؤال ما كنت تشك بحبك لها والا كان الوضع مساله عناد وانانيه ..؟ تكلمت نور واحسها ضربتني على وتر قوي جدا بقلبي تكلمت وانا ارجع بجسمي على السيارة واقول : أي كنت اناني .. كنت اشوف ندى ملك خاص فيني مثل ما كنت اعتقد ان لينا الله يرحمها ملكي .. كنت اناني ومتملك بشكل انا خفت منه .. تنهدت وكملت كلامي وقلت : لا تظنين اني سعيد بهالشي لا والله اني غلطان وندمان مليون مرة لاني ما قدرت اسعد والا وحده فيهم .. نور الله يخليج لا تعذبني .. امانتج بالله تخلينا نفتح صفحه جديده ما فيها الا نور وعزيز .. سكتنا شوي الكل منا يسمع انفاس الثاني وعقبها قالت : ونور الصغيره .. استغربت من اللي قلته ودريت: عفوا اشفيها نور الصغيرة .. ههههههههههههه ضحكت وقالت : عزيز شبلاك .. انت تقول صفحه جديده وذكرت عزيز ونور وانا اذكرك بـ نور الصغيره يعني صفحه تجمعنا احنا الـ 3 ..

كنت اطلع الساعه وانا مش متخيل اني باسبانيا الفرق بينا 4 ساعات يعني الوقت الحين 5 العصر عندنا بس بالدوحه 9 بالليل .. اااااااااااه يا قطر وحشتيني فديت ترابج .. غمضت عيوني والهواء البارد يضرب وجهي بنعومه لفت انتباهي مجموعه بنات لابسين قمصان طويله لين الركبه وبنطلين جينز ومتحجبات تقريبا عددهم 5 بنات ومن بينهم ولد صغير اعطيه 10 سنين وكانوا يضحكون .. ابتسمت من داخلي وانا اسمع كلامهم كان بحريني يعني هم من البحرين .. حي الله اهل البحرين لفيت صوبهم مرة ثانيه وانا اضحك على تعليقات البنات على بنات اسبانيا .. هههههههههههههههه ضحكت مع ضحك البنات يوم سمعت بنت منهم تقول : اعوذ بالله شبلاهم تقولون عواده كل واحد تقول اقطعني .. لفوا جهتي وانصدموا اني عربي وقالت الصغيره منهم : اخوي انت من البحرين .. نزلت راسي تحت وانا ارد عليها : لا من قطر .. تكلمت وحده وهي فرحانه وتقول : فديت قطر واهلها .. انت جاي مع الاهل وينهم ما شوفهم .. هههههههه ضحكت وانا ارد عليهم : تفداج العافيه .. لا والله جاي بروحي علشان الشغل .. جاني الولد الصغير وبيده كوب فيه شاي احمر وريحه النعناع طالعه ودخلت براسي .. الله على هالريحه قال وهو يمد يده : انا سيلمان والاسم الكريم .. رديت وانا امد يدي : بدر بن علي .. قعدت اسولف مع سيلمان واحيانا مع البنات بس ما رفعت راسي لاني حسيت بحراج من اني اشوف اللي قاعدين معاي ..

الله يخليك الله يخليك لا تصير عنيد اخذ اليهال وطلعهم وخلني مع موزة .. كلمتني وهي تحن على راسي الا نطلع غصب .. لا يعني لا العنود ما تفهمين عربي شبلاج الله يهداج تعبان والله .. كلمتها وانا انسدح على السرير احس ان ظهري منكسر .. يعقوب انت اصلا ما تحس فيني حرام عليك 3 يصيحون وياكلون ويعلبون ويضحكون بنفس الوقت وانت تجي من الدوام وتنام وتقوم المغرب وتطلع وما ترد الا الحين وتقول تعبان .. لا ما يصير .. تكلمت العنود وكسرت خاطري بس والله تعبان والله ما اكذب عليها .. سحبت الملحف وغطيت وجهي .. ما سمعت صوتها لانها طلعت وصكرت الباب بقوة انسدحت تقريبا لمده 15 دقيقه وعقبها ما استحملت قمت من السرير وطلعت لها الصاله بس ما في احد رحت غرفه سالم بعد ما في احد استغربت اكثر .. طلعت الحوش لقيتهم هناك ابتسمت على المنظر اللي قدامي .. العنود حاطه سجاده وعليها سله فواكه وسله ثانيه كافي " شوكلات " وجميع انواع العصير بسله ثلاثه .. قعدت على الدرج وانا اشوف اليهال نور وسالم يركضون ويعلبون وهي تضحك وحاطه موزة على رجلها .. حبيتها ما زعلت بالعكس اخترعت شي جديد يغير من جو اليهال وجوها .. احبج يالعنود احبج ..

صوت ضحكنا كان مغطي على صوت السياير اللي بشارع .. الكورنيش جوه عجيب والهواء بحري والعالم رايحه وجايه .. اللي يعلب رياضه واللي قاعدين حالهم من حالنا .. واللي واقفين بسيايرهم والا يبون ينزلون ..كانوا امي والجازي ونور مسوين لنا جو حلو ومع السوالف خلاص انتهيت .. كنت اضحك من قلبي عليهم مرة يسولفون ومرة يتهاوشون انا اضحك واتفرج عليهم وبس .. صوت امي وهي تهدي الوضع : خلاص يا بنات كلكم غالين علي خلاص .. تكلمت وانا امسك يد الجازي : والله امي صاجه كلكم غالين .. نور اختي والجازي زوجتي بعد شتبون .. هههههههههههه ضحكت الجازي ونور مدت بوزها " شفايفها " وقالت : عبدالله الحين انا اعرفك والمرضاعه بيدي .. والا جوجو غطت علينا .. هههههههههههههههههههه ضحكت لان امي ضربت نور بالعصا وهي تقول : عيب يا قليله الحياء .. انفجرنا مرة ثانيه يوم شفنا نور تقوم من مكانه وتبوس راس امي وهي تقول : خالتي اسفه حقج علي وهذي بوسه على النافوخ " راسها " جونا حلو واللي معطي جونا الحلا وجودنا كـ اسرة وحده ..

كنت ارتب الثياب مع اسوم اللي كانت تشتكي من الوحده وانها ملانه بروحه بعد ما ترجع من الدوام .. وان مكان بدر واضح وانها اشتاقت له من الحين .. كنت اسمع واعطيها الملابس اللي خبرتني ارتبهم الابيض مع الابيض والملون مع الملون وهكذا .. فيصل فيصل .. هااااااااااااااااااااااااااالو وين سرحت .. رفعت راسي وانا افرك اذني بعد ما صرخت اسوم وقلت : يعني وين بروح هذاني جنبج .. حطت يدها على خصرها وهي تقول : أي صح بس بالجسد اما روحك كانت بالهواء .. ههههههههههههههههههههه ضحكت وانا اعطيها الملابس البيضه واقول : ايش تبين اسوي تبين اتصل في بدر واخليج تكلمينه .. نقزت من عند الكبت لين عند الكنب وهي تقول : اوووكي يالله .. ابتسمت على خبالها وطلعت جوالي من جيب الثوب واتصلت على الخط القطري .. عند الرنه الرابعه رد علي بدر وهو يضحك ويقول : مسرع ما اشتقت لي يالنسيب .. هههههههههههههههههههه ضحكت عليه وقلت : مو انا اختك .. سحبت اسووووم الجوال من يدي وراحت تسوالف وياه بعيد عني وانا ابتسم عليها ومرة لها .. رحت عند الكبت ورتبت الثياب وانا اسمع صوتها وهي تصيح وتضحك وتعاتب وتشتاق .. غريبه هالبنت بس حبيبه على القلب ..

كانت موضي نايمه على صدري وانا منسدح على السرير .. غمضت عيوني وانا اشوف موضي الحين وموضي قبل .. اقسم بالله كنت اكرهها كره العمى والا عمري فكرت اتزوجها بس علشان انقذ محمد اسوي المستحيل .. بس سبحان الله هذي الدنيا هي زوجتي وام عيالي وغير هذا هي بنت عمي .. فتحت عيوني وانا اشوفها وهي تتحرك وترجع على نفس المكان بحضني وهي تحط يدها على خصري .. غمضت عيوني وانا اتذكر الماضي .. تذكرت حبيبه قلبي مها اللي كانت راح تكون زوجه لي بس الزمن والقسمه والنصيب كان ضدنا .. ما زالت احبها بس موضي الحين زوجه لي ولازم احترامها مثل ما هي محترمتني .. لازم اعاملها احسن معامله طردت الافكار السوده من راسي علشان اقدر اركز على بكرة والمستقبل اللي راح يجمعنا مع عيالنا ان شاء الله .. ابتسمت وانا اتذكر موضي بالمجلس بعد اول يوم ملكه يوم طحت بالغلط مع انها زوجتي .. وتذكرت اول ما تزوجنا وضحكت بس كتمت ضحكتي علشان ما تقوم .. لاني تذكرت شلون كنت عنتر وانا اصلا من جمالها كنت خروف العيد قبل الذباح .. هههههههههههههههههههه فلتت مني ضحكه قويه ما قدرت امنعها فتحت موضي عينها بس انا على طول قلت لها : نامي يا قلبي نامي .. ابتسمت لي وهي تحط راسها على صدري من جديد وانا اتذكر اللي صار معاها واتخيل اللي راح يصير..

كنت قريب منهم وانا اسمع سوالفها وضحكها على ولد او بنت موضي اللي على قولت ندى الديناصور .. كنت اضحك والا اقدر امسك نفسي وندى تسولف بـ حريه وما خلت شي ما قلته او سوته .. وقفت وراها وهي تحط الجلابيه على الكنب لانها لابسه بيجامه حرير ورديه ناعمه .. وحضنتها وانا اقول : حياتي خلاص راح تقومين ابراهيم من الضحك .. وقبل لا اقول اللي عندي انكمش جسمها دليل على اللالم .. بس هالمرة غير بدت ترجع كل اللي في بطنها خفت وانا الفها جهتي واصرخ عليها : ندى شفيج ايش صار .. كانت اطالعني بعيون وداع بس ما قدرت ترد رجعت مره ثانيه ترجع بس هالمرة اقوى من الاولى خلاص صبري نفذ سدحتها على الارض وركضت جهه غرفه امي وانا اصارخ .. اشك اذا احد فهم ايش انا قلت .. طلع راشد و وضحى وصافيه حتى امي وابوي .. تكلمت وكلامي مو مفهوم : ندى ندى .. هذا اللي قدرت اقوله .. رحت امي تركض هي وضحى وحتى موضي .. وابوي مسكني يهديني اما راشد راح يجيب السيارة علشان نوديها المستشفى .. وصافيه كانت تصيح من قلبها على شكلي .. سمعت صوت امي تنادي علي ركضت من جديد الغرفه وانا اشوفهم يلبسونها عبايتها وامي تقول : جيب بطاقتها الصحيه وبنخلي ابراهيم عند موضي و وضحى وصافيه .. وانت البس ثوبك يالله .. طلعنا وانا اشيل ندى اللي اعرف انها عايشه من تنفسها اللي مو منتظم .. ركبنا السيارة ابوي قدام مع راشد وانا وامي وندى وراء وندى بحضني ضميتها لصدري باقوى ما عندي وانا اقول : ندى لا تروحين الله يخليج .. كانت تبتسم لي بس انا متاكد انها تودعني وتوصيني على ابراهيم ..

مالي خاطر ارد البيت بس ايش اسوي احس بضيقه وما ابي اقابل فطوم وانا وجهي معفوس .. بس لازم ارد الساعه الحين وحده ونص بالليل واكيد البنت خايفه او تحاتيني .. فتحت باب الشقه واول ما صكرت الباب الا فطوم بحضني وهي تعتبني وتقول: وينك فيه ليش جوالك مصكر خلتني اخاف عليك ... حرام عليك راع وضعي اني بروحي هني .. كانت تمسكني بقوة وانا مو طايق نفسي صج حضنها ريحني شوي بس بعد الصفقه اللي خسرناها كانت قويه والمبلغ كان كبير .. بعدتها عني وانا اقول : فطوم الله يخليج ابي انام طيب .. لاحظت ان وجهها تغير وهي تبعد عني بدون ما تعلق قلت بخاطري احسن ما قعدت تحن على راسي دخلت الغرفه وانا متملل من قلب وانسدحت حتى بدون ما ابدل .. حسيت بحركه عند رجلي فتحت عيوني وانا اشوف فطوم تفصخني الجوتي " عزكم الله " سحبت رجلي وانا اقعد وفيني قهر وقلت : قلت ابي انام وما ابي ازعاج والا انا اتكلم بالهندي .. اووووف الواحد ما يرتاح يعني .. شهقت فطوم وهي تبعد على وراء من الصدمه الغير متوقعه وقالت بصوت واطي : سعد شبلاك ..؟ انا ايش سويت ..! يا بنت ناس طلبت اكون بروحي سؤالي صعب والا ما تقدرين تفهمينه .. تكلمت وهي رايحه صوب باب الغرفه وصوتها يبين انها راح تصيح وتقول : اذا كنت معصب على احد برع البيت او متضابق من شغلك رجاءا خل مشاكل برع البيت .. طلعت وهي تصكر الباب بقوة من قهرها .. صج اني غبي شلون اكلمها الحين هي ايش ذنبها .. طلعت على طول وراءها ما لقيتها لا بالصالون والا بالمطبخ والا بـ غرفه الطعام وين راحت .. رحت غرفه الضيوف وقبل لا امسك الباب سمعتها تصيح كسرت خاطري بس ما قدرت اكلمها .. خلها باجر اكون هديت وهي هدت ..