أنا الصديق اللي ليا طحت شالك
لا ضامتك دنياك والوقت بك مال
أنا يمينك شدني في شمالك
يمنى بلا يسرى ترى حالها حال
أنا عزاك وعزوتك لا جرى لك
من تاعس الدنيا هواجيس واهوال
ماني من اللي لا أغتنى ما وفا لك
لو لك عليه من الجمايل والأفضال
وماني خويك كان وقتك صفا لك
أنا خويك لا ادبرت فيك الأحوال
خذني عصى موسى إذا كنت هالك
أمسح لك بحور القهر(قول وأفعال)
فالك ..عسى الله يسعد اليوم فالك
فالك عقب صوم الدهر عيد شوال
بالك يجي في خاطرك يوم بالك
أنك تغيب ولا تجي لي على بال
لا لا تفكر أنت في مثل ذلك
إن أتخلى عنك لو الزمن طال
ما أقول أنا يا خوي مالي ومالك
ما ترخص العشره ولا تغني أموال
اسمع جوابي قبل ما أسمع جوابك
خارج حدود التغطيه وأرسل ارسال
على محيط السالفه حط بالك
اجيك رجلي كان ماجيت خيال
أنا ليا شح الزمن في وصالك
تمدني النخوه على وصلك حبال
أنا عمى عين العدو لا نوى لك
أنول روحه قبل ما روحك تنال
بينك وبين الشمس شجرة ضلالك
ما للشجر قيمه إذا ماله ظلال
والليل لو الليل مظلم وحالك
ترسمني الظلما على صدره هلال
/
/
راقت لي