مرام : يامنى تسحر تجنن ياويلييييييي شوفي كيف تطالعك مفتحة عيونها الحمااااارة
منى : ههههههههههههههه ايه تقول يالهوووووي طلعت ذي أمي !!
مرام : ههههههههههههههههه تهبل ياناااااس .. هاتيها هاتيها ..
ناولتها منى البيبي ومرام شوي وتنخبل عليها .. ضمتها مرام بخفة وباستها واتأججت خواطر الحنين فيها ..

دق الباب ولفت منى طرحتها .. و وقفت أم فيصل واهي تقول : اتفضل ..
دخل أنس ومعاه خالد .. وبارك خالد للجميع ومرام وقفت شايلة البنوته وتحس انها ماتبي تبعدها عنها أبد .. وورتها خالد الي ماسحره شي كثر ماسحره شكل مرام المنخبل على البيبي وهمس لها : شدي حيلك وجيبلي أحلى منها ..
مرام بنفس الهمس : أبي أولد الحيييييين ..
ضحك خالد عليها وقعد على الكرسي أهو ومرام يطالعون البيبي ..

أنس : شوي شوي على بنتي ترا مالها كم ساعه طالعة على هالدنيا لاتصدمونها ..
خالد : والله شكلها ملقوفة فاتحه عيونها تطالع فينا .. شوف ولد صالح مسكر عيونه ولاهو داري عن الدنيا ..
أم فيصل : ههههههه يقول لاحقين على الدنيا خلني الحين انام أحسن لي
مرام : يافدييييييييتهم يهبلووووون ..

وكأي روتين معتاد ..
ظلت منى وحنان يومين بالمستشفى زاروهم كل الحبايب متنقلين بين الغرفتين !
وبعدها طلعوا لبيت أم فيصل ..
كانت من أجمل المواقف ولادة الاثنين بنفس الوقت .. ونفاسهم وتعبهم بنفس الايّام .. بشكل خلى مرام تبات عندهم وتعاون أمها عليهم ..
وعلى أجمل ملاكين بهالدنيا :

سيف ولد حنان .. و سديم بنت منى

* _ ^


*******

في صالة أبو سعود

ضحكت أم سعود واهي تمشي بالصالة وتطالع فتون وعهود واهم يتفرجون على ألبوم صور زواج فتون وفيصل ..
حست بكبر فرحة بنتها برجعة صديقتها بعد طول الفراق .. وان دل على شي يدل معدنها الوفي الي ندر بهالزمن !
عهود : والله يافتون كنتي حلوووووووووة !
فتون : وجع شقصدك وانا وشو الحين ؟؟؟
عهود : ههههههههههههههه تهبلين بس بالزواج اكيد غير .. وياحلوك كل صورك تضحكين ..
فتون : مستخفة هههههههههههههه !
عهود بمكر : معقولة لهالدرجة كنتي مبسوطة ؟؟
فتون : لا شفتي الصدمة الي توصل لدرجة الضحك والاستهبال !! كذا كان حالي ..
عهود : ههههههههههههههه ياحلوك .. بس الحمدلله ربي وفقك وسخره لك ..
فتون : الحمدلله .. عهود باسألك أخوك اتزوج ؟؟
عهود بابتسامة : ايه وعنده ولد الحين ..
فتون : هههههههههههههههههههههههههههههه هههه مراح اتزوج بعدك يافتون هههههههههههههههههههههههههههههه هههههههه صدق الرجال بياعين حكي ههههههههههههههههههههههههههههه ..
عهود : ههههههههههههههههههههههههههه وانتي لايكون صدقتي عاد !
فتون : طبعا لاء .. بس والله فرحتيني وكيفها زوجته ان شاء الله حبوبة ؟؟
عهود : عسل والله ..
فتون بفرح : زيييييين الحمدلله ..

نزلت عبير وقعدت معاهم واسترجعوا ذكرياتهم الحلوة .. بعدها ودعتهم عهود وراحت ..

وأهم بدلوا ملابسهم وطلعوا يزورون منى وحنان ..

وأثناء ماهم بالطريق

أم سعود : عبير حبيبتي انتي تشوفين الي تسوينه صح ؟؟؟
عبير : ايه يمه .. انا ماعادني أتحمل العيشة بذاك البيت لو وش يصير !
أم سعود : بس كل شي يجي بالتفاهم .. مايصير ياقلبي تتركين زوجك وبيتك ..

فتون : شالي مايصير يمه واهم منكدين عليها كل يوم هواش ويدخلونها هي وتركي بمشاكلهم لا والله ماترجع ..

ام سعود : انتي لا تتدخلين اختك عاقلة وتعرف تتصرف ..
عبير ابتسمت وقالت بهدوء : اذا تشوفيني يمه كذا فلا تغلطيني الله يخليك ..
أم سعود : والله ياقلبي انا ابي راحتك وسعادتك ..
عبير : راحتي وسعادتي بالي أسويه الحين ..

فتون : من جد .. لازم تحط حد .. الطيبة ماعاد تنفع بهالزمن وبالذات مع سعالوة مثل ذاك البيت اعوذ بالله .. شذنبها هي كافة عافة يلحقونها بمشاكلهم والله ماصارت ..

عبير : هههههههه أحسك يا فتون مقهوة أكثر مني ..
فتون : بموووووووووت من القهر ! من البداية وانا ماكنت أبيك تسكنين عندهم وتاخذيلك بيت بروحك بس محد طاع شوري ..
أم سعود : الله واكبر يالشور الي نازل من السما .. اختك من قبل لاتتزوج عارفة هالشي ..
فتون : أجل كان ماتزوجتيه !!
وسعت عبير عيونها بصدمة وقالت : ماكنك زودتيها شوي ؟؟
فتون : يوووووووه جينا صوب الحبيب الحييييييييين ..
عبير : ايه حدك عاد !
فتون : من زينه .. فيصل على غفلة ..
أم سعود : ههههههههههههههههههه وينك يافيصل تسمع
فتون : بعد عمررررري اشتقتله كم يوم واهو لحاله خلاص بارجع معاه اليوم ..
عبير : ههههههههههههه هذي كل لحظة لها قرار ..
فتون : خلاص هذا آخر قرار ..

وصلوا لبيت أبو فيصل ونزلوا .. ودقوا الجرس وفتحولهم ودخلوا ..

كان صالح مع حنان بغرفتها الي جهزوها لها بالدور السفلي ..
كان قاعد جمبها على السرير وشايل الولد ويسولف عليه : شرايك فينا سيوف ؟؟؟ هذا انا ابوك وهذي أمك مين أحلى بالله عليك ؟
حنان : ههههههههههههه لا تحرجه قدامي اذا صرتوا لحالكم خله يقولك ..
صالح : وماتشوفين كيف كل ماصرت لحالي معاه يبكي .. ! لايكون قايلتله شي عني انتي ؟؟
حنان : اييييييه قايلة له انك تعض ومعلمته يبكي معاك !
صالح : إكبر إكبر سيوووف .. وانا أوريك ..
حنان : هههههههه اقول هات ولدي اسم الله عليه ..
ضحك صالح وعطاها الولد ويوم لامس ايديها حسها باردة .. وقال : ايدينك باردة حنان ..
حنان : اي والله أحس أطرافي باردة ..
انحنى صالح وحس رجولها لقاها مره باردة وقال : يووه ترا بيدخلك برد حنان .. (( وقف وقال : وين شرابك .. ؟
حنان : هنا بالدرج الي باليمين ..
مشى صالح للدرج وفتحه وأخذ شراب لها .. ورجع وقعد على الأرض نصف قعدة ومسك رجلها بنعومة ولبسها شرابها .. ورفع راسه واهو يمسح على رجولها بخفة ..
ابتسمت حنان بحنية وقالت : يعطيك العافية ياقلبي ..
صالح : الله يعافيك .. ماسويت شي ..
اندق الباب ووقف صالح وقبل مايمشي يفتحه انفتح ودخلت فتون ومن وراها عبير ..
فتون بمرح : عمي ابو سيف هنا هلا والله ..
صالح : هلا فيكم ومرحبا ..
سلموا عليهم وعبير شالت البيبي من حنان واهي منسحرة منه ..
عبير : الله يحمييييييييه ملامحه ناعمه تجنن .. يشبهلك حنان ..
صالح : احم احم ..
عبير : خير عموووو ؟ والله ماخذ الزين من خالتي نفس نعومة الملامح
صالح : دقة الملامح علي انا ماتشوفين شلون ملامحي دقيقة !
فتون : كثر منها ههههههههههههههههههههههههههه ..

باسته عبير بحنيــة ولا قدرت تقاومها شوقها والحنين للبيبي ..
جت فتون ووقعدت جمبها تطالعه وقالت : لا عجبني خلاااص باتوحّم عليه ..
حنان : حتى لو اتوحمتي عليه .. ماراح تجبين مثله لو تطيرين ..
صالح : خليها تجيب بيصير الي عندها نسخة مقلدة وعندنا الأصلي ..
فتون : مساكيييييييين انتوا كلها شهووور تمر بسرعه وتشوفون ان شاء الله الملاك الي بجيبه ..
ابتسمت عبير وعطت فتون الولد وطلعت تشوف منى ..
وشوي ولحقتها فتون ..

بالغرفة المجاورة كان سرير منى وعندها ساره ومشعل الي ماصدّقوا أنس طلع عشان يدخلون ..
كانت ساره متربعة على السرير والبنوتة على رجولها وأم فيصل مادة ذراعينها حولها بحرص ..
سلموا عليها واتهاوشت عبير وفتون على البنوتة مين تشيلها قبل ..
عبير : فتون ابعدي عاد أنا أكبر منك وبشيلها أوّل ..
فتون : يااااااااااااي شوفي تطاااااالعني تبيني وخري لا أمووووووووت ..

منى : ههههههههههههه اقول اتركوا بنتي لاتخرعونها بخناقكم ..

ساره : اصلا سديم تبيني .. كل ماحد شالها صاحت واذا شلتها تسكت ..

ضحكوا عليها .. وبالآخر انتصرت فتون وشالتها واهي منهوسة عليها ..

بس فجأة ناولت فتون البنوتة لعبير ونطت من مكانها ركض على برا !!!

عبير : بسم الله شفيها ؟؟؟
أم سعود : سمعت صوت فيصل ههههههههههههههههههههه
عبير : ههههههههههههه ياحلوها ..

طلعت فتون من الغرفة وكانت الصالة فاضية مافيها أحد وفيصـل نازل من الدرج وماكان يدري بحضور أحد ..
فتون بمرح : سبرااااااااااايز ..
شق فيصل الضحكة واهو ينزل ويقول بفرح : حبيبتي هنا وانا مادري ؟؟؟؟
ميلت فتون راسها بدلع وقالت : بغيت أفاجئك حبيبي ..
نزلوفيصل وأول ماوصلها نطت فتون عليه واهو ضحك وضمها وقال : وحشتييييييييني ..
فتون : وانت أكثر يافيصل طلعت غااااالي !
فيصل : لاااااه ماصدق !
فتون وإهي تبعد عنه : ههههههه والله حبيبي ماقدر على فراقك أكثر خلاص بارجع معاك ..
فيصل : توك تحسين .. انا من ذيك الليلة الي تركتك ماقويت وبعدها جيت انام عند أهلي لا أهلوس ..
فتون : ياعمري لهالدرجة تحبني ؟؟
فيصل : لا أحب الي ببطنك ..
فتون : ههههههههههههههههههه فديته وفديت ابوه ..

باسها فيصل ومسك ايدها وقال : شفتي بيتنا صار حضانة ؟؟
فتون واهي تمشي معاه : هههههه ايه وناسة بس ماشاء الله كل واحد أحلى من الثاني ..
فيصل : والي بيجينا أحلى منهم كلهـم ..
فتون : واثق ؟
فيصل : أكيد .. مو فتون أمه !

ضحكت فتون ودخلوا للغرفة وين ماكل العيلة متجمعة ..
********

بعد اسبوع ….....
في ذاك القصر الكبيــر !

سكرت مشاعل باب غرفتها وقفلته بالمفتاح .. ومشت للاب توبها وقعدت وفتحت المحادثات الي وقفتها يوم نادتها أمها ..

طالعت بالمحادثات الخمس المفتوحة وجت تبي تنادي أولها ..

يووه وش اسمه هذا !! أحمد ولا مشاري ؟؟ لالا الثاني مشاري ..
لااااااااا الثاني سامر !! اجل مين مشاري ؟؟
يووه يامشاعل انتي بعد خمس مره وحده !! الناس يلعبون على حبلين وانا على خمس حبال ههههههههههههههههههههههه ..

قرت المحادثات عشان تسترجع الحكي والأسامي ورجعت تكتب وشوي واتذكرت اسم كل واحد وانغمست بالسوالف والضحك والاستهبال !

وماكانت تدري ان كل هالضحك بيطلع .. من عيونها .. بيوم .. من الايام !!

استهبال ! متعة ! مرح ! فرح !
والنتيجة ايش يامشاعل ؟؟؟؟ ويا ألف وحده من أمثال مشاعل .. !

دق جوالها ومسكته وردت واهي تضحك : ههههـلااااا ..
ملاك : شعندك تضحكين ؟؟؟؟
مشاعل : مع هالمخبّل بالمسنجر ..
ملاك : يوووووووه انتي متى تبطلين ؟؟؟؟
مشاعل : وليه أبطّل ؟؟ أعطيني سبب واحد يخليني أبطّل !
ملاك : مافي ولا سبب بالله ؟؟
مشاعل : ايه مافيه .. زهق بالبيت ولا عندي من يونسني اخواني كله برا وامي مشغولة وانتي بعد مشغولة وانا مستاااااااااااانسة مع هالمهابيل .. والله ياملاك يفطسون من الضحك يحكون مقالبهم وانا وتهاني ميتين من الضحك عليهم ..
ملاك : مو البلى بهالتهاني الله يفكنا منها
مشاعل : ملاكوووووووه شتبين انتي الحين ..؟؟
ملاك : بقولك قومي اتلحلي بمر عليك بعد شوي نروح نزور سامية ..
مشاعل : مو الحييييييين ملاك تكفين خليها بكرا !
ملاك : الحين انتي مجننتني بزورها بزورها ويوم قلتلك يالله تقولين مو الحين ؟؟؟
مشاعل : اي بزورها وابيك تجين معاي بس الحين مشغولة !
ملاك : بايش بالله ! مع القرود الي معاك !
مشاعل : ههههههههههههههههههههههههههه ايه شحلوهم قرودي ..
ملاك : مشاعل ثلث ساعه وانا عندك باي !

سكرت مشاعل واهي تتأفف وكملت سوالف وضحك ولا حست بالوقت لين دق جوالها فجأة وردت الا ملاك تقول : انا عند الباب !
مشاعل : مسرررررررررررررع بسم الله !
ملاك : لك نص ساعه من تركتك لاتقولين ماجهزتي !!
مشاعل : ملااااااااك حبيبتي تعالي ادخلي بيتنا انتظريني وبسرعه باجهز ..
ملاك : شكلك ماتحركتي من النت ياحماااااااااارة يامشاعل !! خمس دقايق لو مانزلتي والله لاروحلها لحالي بااااااااااااااي

وسكرت منها ومشاعل سكرت لابتوبها بالي فيه ونطت من مكانها بسرعه وماتدري وش تبدّي وتسوي ! فتحت دولابها بسرعه وطلعت لها بنطلون بيج وبلوزة ذهبي مخصرة .. ولبستهم بسرعه .. ورفعت شعرها الكيرلي ونزلت خصل بطبيعته ..
لبست صندلها وسحبت عبايتها وفتحت الباب وطلعت مسرعة .. مشت بالصالة بسرعه ولقت أمها وأبوها قاعدين أشرت بإيدها واهي تمشي : السلام عليكم ومع السلامة !
أم وليد : على وين ان شاء الله !
مشاعل : ملاك جتني فجأة تقولي انزلي بنزور سامية ورجتني الله يهديها وبروح لاتروح وتخليني ..
أم وليد : الله يرجكم بنات !
مشاعل وهي تنطنط بالدرج : يسلموووووو ماما ..

أبو وليد : انتي تدرين وين بنتك تروح ومع مين ؟؟؟
ام وليد : ماسمعتها تقول ملاك بنت اخوك !
ابو وليد : ايه بس منهي الي بيزورنها ووين يطلعون ووين يروحون .. انتبهي لبنتك تراها مصرقعة وينخاف عليها ..
ام وليد بثقة : لا تخاف ياراشد بنتي وعرفت أربيها وواثقة فيها

()
أصـ ع ـب احـ س ــاس بهالزمان ..
يخونكـ من عطيتهـ الأمان !
أهديته الثـ ق ــة .. أهداكـ النكران ..
أهديتهـ الفرح .. أهداكـ الأحزان !
()

اتنهّد أبو وليد واهو يطالع الساعه وقال : زميلنا سعود بيجيني بعد شوي .. قوليلهم يحضرون القهوة ..
أم وليد : يالله الحين بانزل واقولهم ..

وقف ابو وليد ومشى لغرفته بدّل ملابسه وأهو يفكر بسعود ولقاؤه .. من رجع سعود من السفر وأهو موتره هاللقاء .. خاطره يشوفه وبنفس الوقت شايل همه ! شايل هم الحكي الي بيسمعه عن بنته .. شايل هم دوامة الحيرة والألم الي بيوقع فيها !
بس هذي بنتي !! لف الزمن ودار وأظهرها بحياتي من جديد ! هذي قطعة من لحمي ودمي ! دارت الأيام لتجي لحظة اعترافي فيها ! بس وش بعد الاعتراف ياراشد ؟؟ بتظل على موقفك المتخاذل ؟؟؟
رامي بنتك .. ومخفي الحقيقة حتى عن أقرب الناس لك ! !

نغزه قلبه عند هالطاري .. وهز راسه وطلع !
ومامداه ينزل الا دق سعود على جواله وقاله انه وصل ..

فتح ابو وليد الباب واستقبله بمجلس الضيوف .. وبعد ماضيفه ودارت بينهم السوالف الرسمية .. سأل أبو وليد : أخبارها ياسعود .. ؟
سعود : والله ماتسر !
كشر أبو وليد واتنهد بضيق .. وسعود راقب ملامحه واهو يقول : أمها توفـّت !
شخص بصر أبو وليد وعيونه تسمرت بالفراغ !!
وسعود كمل بمرارة : اهي تعبانة من زمان .. وزاد تعبها السنوات الأخيرة .. وزاد حملها وهمها بعد ما تركت بنتها وماتت تاركة وعد بهالدنيا لحالها .. تعرف وش معنى لحالها ؟؟ حتى معارفها الي كانوا معهم من صغرهم انتقلوا مصر وصارت بوحده مايعلم فيها الا ربي !

أبو وليد كانت عيونه مسمرة بالأرض .. وكل الكلام الي يطلع من سعود يتحول لسهام تصيب قلبه وروحه ! وقال بخنقة : شسويت معها ؟؟ تركتها وجيت !

سعود : لا مو لهالدرجة ! وديتها مصر .. عند معارفها الي صاروا أوفى مني انا زوجها .. وأوفى منك انت أبوها !

هز ابو وليد راسه والعذاب يصرخ بعيونه وقال : انا مادري شسوي ياسعود .. وعد جت بأسوأ ظروف واجهتها بحياتي .. أنا خذيت ام وليد وجابتلي وليد وطلقتها بسبب مشاكل الله لايعيدها .. وبعدها سافرت ابريطانيا وكنت بحالة دمار .. احتوتني ام وعد الله .. الله يرحمها ويغفر لها ! وماقدرت اصبر بدون ماتزوجها .. وتزوجتها وقعدت معها كم سنة مازرت السعودية فيها ولا مره لين خلصت من شغلي ودراسي وألاهي حامل ! كان الموضوع صدمة بالنسبة لي .. ! كنت مستبعد انها تحمل وان يربطني فيها أطفال ! تركتها ورجعت على أمل أرجعلها .. لكني رجعت زوجتي الي كانت تنتظرني وكلها أمل أرجعها .. رجعت أم ولدي .. و .. أرسلت لأم وعد ورقة طلاقها ! وعليها من ذاك الوقت قطعت أي تواصل بيني وبينها .. حاولت .. تراسلني هي .. وتقولي عن بنتها .. كنت دايم أردد اسم وعد .. الاسم هذا يعنيلي شي كبير .. وسمتها وعد الاسم الي أحبه .. وارسلتلي صورها .. ويوم مالقت مني اي تجاوب قطعت عني أخبارها وأخبار بنتـ ـي !