ومن روائع الأمير محمد الأحمد السديري
مسندها على الشيخ ( بندر بن عبدالمحسن الجبرين - رحمه الله - )
ان جا ينادمني وضيعٍ من النـاس=صديت عنه وقلت منـت بنديمـي
ما هوب كبر وكل ناسٍ لها اجناس=وعندي عزيز النفس دايم حشيمي
للكبر والله مـا توشحـت بلبـاس=بكتب التواضـع ناجـحٍ بتعليمـي
انادم اللي رفقتـه ترفـع الـراس=وياقف معي دايم بوجه الخصيمـي
ان كبرت القاله والاريـاق يبـاس=يظيـم عدوانـه ولا يستظيـمـي
وعندي اذا شفت المناعير جـلاس=انـا لهـم بايـات فكـري كليمـي
ولا اقارب الخايب ولا كـل بـلاس=اللي علـى نقـل النمايـم فهيمـي
نشدتني وتقول بالقلـب هوجـاس=قلت أي نعم مافيـه حـيٍ سليمـي
يا بومحمد كن ماعنـدي اونـاس=اليا خفق فكـري بشـيٍ عظيمـي
أغيب كني وسط ظلمات الآدمـاس=واناجي الـرب العظيـم الكريمـي
اناجي الخـلاّق قطـاف الأنفـاس=الواحد اللي فوق عرشـه مقيمـي
عزالله اني بالهواجيـس غطـاس=وعزّي لمن هو في بحرهن يهيمي
يابندر الجبرين يامعـرّب السـاس=اخلصت لك حيثـك نديـمٍ حليمـي
العالـم الله ماهرجنـا بـالأدنـاس=والله بمـا يخفـي فهيـمٍ حكيمـي
ولادنّ في جلساتنا حافـة الكـاس=ولا نخوض بكـل هـرجٍ ذميمـي
واللي نوده قطّعت عنـه الارمـاس=ذكراه مثـل احـلام ليـلٍ بهيمـي
وقت النضا قفّـا وقفـن الافـراس=وحتى زهور الورد صارت هشيمي
والنمر مخلد عقب ما هوب فـرّاس=والبوم عقب الذل أصبّـح عديمـي
وديك الدجاج معلقٍ فيه الاجـراس=والصقر في صكات وقته سقيمـي
وابو حقب حصّل بالايـام نومـاس=الحر غاب وصار عقبـه زعيمـي
وين الرجال مروّيـة كـل عبـاس=اهل المهار اللـي تعـط الرهيمـي
اقفوا كمـا غيـمٍ تقفّـاه نسنـاس=ولاحدن بها الدنيـا مقيـمٍ مديمـي
كم واحدٍ في لجة العيـب غطـاس=يفوت عمره في ضلالـه بهيمـي
من الذهب لوهو خزن طرم الاكياس=جن من كريم وحرم منها اليتيمـي
|