((الفصل الثاني))
أحمد ف الشركه يالس يفكر
أحمد : أنا لازم ألقا لي حل في مشكلة الإدمان هذي مقدر أعيش طول عمري مدمن أنا لازم اتعالج
وقرر إنه يتعالج من دون محد يعرف عن ادمانه
ــــــــــــــــــــــــــــــــ
نوره وصلت للبيت ودخلت على دارها شوي تتفاجأ إلا ّ وأمها يالسه على سريرها وامبيّن عليها الزعل
نوره باستغراب وخوف من إنها عرفت عن حملها : يمّه ؟؟ اش فيج ؟
الأم : نوره بنيّتي أنا تعبت من كثر ما أفكّر بحالج ودّي آتطمّن عليك وانتي مب راضيه لايكون فيج مرض خطير وانتي ساكته
نوره : لا يمّه بسم الله علي مافيني شي كاني قدّامج
الأم : بس صار لج جم يوم وانتي ماتشتهين شي وتبين تنامين وويهج صاير لونه أصفر قومي يمّه أودّيج المستشفى وماراح تعصيني اليوم
نوره : لا يمّه لا الله يخلّيك مابي أروح المستشفى الله يخليك
الأم بتعجّب ! : وليش يمّه المستشفى بيذبحونك ؟؟
نوره : لأ إنتم راح تذبحوني
وقامت نوره تبجي
الأم : صارحيني يمّه وش صار لج ؟؟ طمنيني على حالج ؟؟
أخو نوره فيصل وهو مار على الغرفه سمع نوره وهي تقول انتم بتذبحوني وقعد يبي يسمع السالفه
إلا نوره تقول : يمّه تذكرين رفيجتي أمل ؟
الأم : إيه يمّه وش فيها وش دخلها ف حالتج ؟
نوره : تذكرين الحفله اللي رحتها ؟
الأم : ايه يمّه تحجّي بسرعه لا تخرعيني ..!
نوره : أنا كذبت عليج يايمّه صحيح انا رحت الحفله بس ماكانت ف بيت أمل !
الأم : عيل وين ؟
نوره : أمل ودّتني لمخيّم وكان مليان بنات وشباب ورقص واللي انتي تعرفينه وأنا على نيّاتي يالسه أطالعهم من بعيد إلا وأمل تيي وتييب واحد ويّاها إسمه خالد وقالت خلّيه رفيقج اليوم بدل ماتقعدين لحالج جذي , أنا خفت منه بس هي طمّنتني إنه ماراح يسوّي شي ويلس يسألني عن حياتي ودراستي وجذي ثمّن قال تعالي نركب السياره وأودّيج مكان تتسلّين فيه بدال هالخربطه أنا ترددت بس من كلامه حسّيت إنّه أمين وماراح يسوّي فيني شي ورحت وركبت وياه السياره ومشينا وثمّن وقّفنا عند عماره بس ما أذكر وين موجوده وقالي انزلي قلت لأ قال انزلي لا تخافين ونزلت وطلعنا لشقه وااااااااااااااااايد حلوه ثمّن راح وياب لنا شي نشربه ثمّن ماحسّيت بحالي ونمت ويوم إنّي صحيت لقيت نفسي على السرير وخفت إنه سوّالي شي وقمت ورحت أدوّرله لقيته نايم قوّمته وقلتله ترى وايد تأخرنا وسألته إذا كان سوّالي شي قال لا ماسوّينا شي بس انتي تعبتي ونمتي ورجعت للمخيّم ثاني وأنا مدري وش السالفه وقلت لأمل تردّني للبيت
الأم : انزين يمّه دامه ماسوّالج شي وش فيج صايره تعبانه جذي
نوره وهي تبجي : خلّيني أكمّل لج يمّه
الأم : انزين ؟؟
نوره : وبعد جم من يوم تسألني أمل وش رايج بالحفله ؟ وقلتلها : حلوه , قالت : ان شاء الله استانستي ويّا خالد ؟ وقلتلها : إيه عادي رحنا للشقه وبصراحه أعيبتني وثمّن شربت عصير وبعدها نمت قالت : يعني ماتحسّين بتعب بشي هاليومين ؟ قلت : لأ ليش تسألين ؟ قالت : لا بس سؤال وثمّن سكّرنا ع الموضوع وبعدها بجم يوم دخت وماقدرت آتحرك إلا و أمل تاخذني للمستشفى وسوّيت تحاليل وقال لي الدكتور حامل !!
الأم : حااامل !! انتي الحين حامل ؟؟ اشلون حامل وهو ماسوّا فيج شي
فيصل واقف وهو متماسك يبي يسمع نهاية القصه وف نفس الوقت مافيه صبر بس يبي يشوف النهايه
نوره : إيه وهذا شي استغربت منّه وطلعت من المستشفى وقعدت أصيح وامل تقلي سكتي راح أفهّمك السالفه قلتلها من يوم شفتج ماشفت الخير وقلت لها اشلون حملت مو تقولين خالد ماسوّى فيني شي !! ومتى هو قرب منّي ؟؟ وقامت أمل تقولي : يوم إنج شربتي العصير ونمتي هو كان حاط مخدّر لج وانتي مادريتي وشربتيه على نيّاتج وصار اللي صار وانتي ماتدرين ونمتي ويوم انج صحيتي لقيتي نفسك ع السرير وعلى بالج ماصار شي بس هو أخذ اللي يبي
الأم وهي تصيح : وليش يايمّه سمعتي كلامه ليش ؟ الناس ماراح تفهم جذي وماراح تصدّقج الناس همّها بالظاهر وما همّها بالباطن
نوره : وأنا اش ذنبي يا يمّه ماكنت عارفه شي حتى إن أمل كلّمته وقال مالي شغل فيها شفتي اشلون يمّه أخذ اللي يبي وكان ناوي يكمّل لعبته بس يوم درى إني حامل ماصار يرد عليه ولا يبي حتى يسمع سيرتي
دخل فيصل وهو معصّب وثاير وقال : حامل ها ؟؟ ياللي ماتستحين على ويهج هذه نهاية الدلع يايمّه كاهي هي قدّامج ويايبتلنا مصيبه
وقعد فيصل يضرب نوره ويضربها ويضربها ثمّن قال لأمه خلّيها مكانها اتعذّب الحين مالنا ويه نقابل الناس لازم ننقل ولا عاد أشوفج تخلّيها تطلع من البيت حتى الغرفه ماتطلع منّه أخذ أمه وخّلى نوره بحالتها تعب من الحمل وويه مفقّع وبدمها على الأرض وطلع وقفّل على نوره الباب بالمفتاح وأمه تناظر بنتها وتدري بحالتها ودّها بس ولدها معيي إنها تسوّيلها شي ..
طلع فيصل من البيت وهو معصّب وثوبه دمّان وراح ويهّز أوراق نقله لدوله ثانيه عشان يداري فضيحة أخته نوره وسافر واشترى لهم بيت ورجع وكانت نوره طول هالفتره تضمّد جراحها بغرفتها ورفيجاتها مايدرون عن أخبارها شي وكل ما يو يسألون عنها ف بيتها يقولون لها مب موجوده وبعد مرور شهرين انقلوا أهل نوره من الكويت ومحد يدري عنهم بعدها
ود تدري بحالة نوره وماتبي تفضحها وقالت الله يكون بعونها وإن شاء الله محمد يقدر يساعدها
ـــــــــــــــــــــــــــــــــــــــــــــ
زادت العلاقه بين مروه وود ويوم من الأيام أم ود تقول : ود يمّه تعالي أبيج ف موضوع
ود : هلا يمّه آمري ..
الأم : مايامر عليج عدو حبّيت آخد رايج ف مروه ؟؟
ود : مروه ؟ وش فيها ؟ من أي ناحيه يمّه ؟
الأم : يعني تصلح تكون زوجه لأخوج وائل ؟؟
ود : والله ماادري عادي هي طيبه وأخلاق ومايعيبها شي وما أعتقد وائل بيرفضها
الأم : ايه صح وائل وين يلقى وحده مثل مروه خلاص يمّه ماراح ناخذ رأي وائل راح نخطب له هي ونقوله سوّينالك مفاجأه
ود : حلو يمّه انزين ومتى راح اتكلّمين أم مروه ؟؟
الأم : ألحين ..
الأم تتصّل على أم مروه ///
الأم : ألو .. السلام عليكم
أبو مروه : هلا .. وعليكم السلامه والرحمه
الأم : ممكن أم مروه ؟
أبو مروه : ايه دقيقه ..
أم مروه : ألو ياهلا ياهلا
أم ود : السلام عليكم أم مروه
أم مروه : وعليكم السلام أهلين شخبارج ؟
أم ود : بخير الله يسلّمج .. انتي كيفج ؟
أم مروه : والله بخير الحمد لله
أم ود : ودّي إني أييكم اليوم أبيج ف موضوع مهم
أم مروه : حيّاج بأي وقت
أم ود : الله يحييج خلاص اليوم ؟
أم مروه : ايه الله يسلّمج
أم ود : انزين أخلّيج الحين .. توصّين شي أيبه معي ؟
أم مروه : سلامتج مانبي غير شوفك ..
أم ود : الله يسلّمج .. فمان الله
أم مروه : الله معج ..
تقفل أم مروه السماعه وف نفسها : غريبه وش الموضوع المهم اللي تبيني فيه ؟؟ نشوف لا يات
ــــــــــــــــــــــــــــــــــــــــ
|