لو للسنيـن وغربـة الوقـت ميعـاد


ما اخترت غربة وقتي اللي كسانـي




ولو للوجيه وضحكة النـاب ميـلاد


فرشـت لطعـون الوجيـه الأمانـي




لكن سر البيـت فصـدور الأسيـاد


ومـوت النخيـل معلـقٍ بالسوانـي




واللي ضحك لي بالرخا وأشعل الضاد


وش كان دوره يـوم وقتـي حدانـي




غير انه أسهب في جحـوده ولا زاد


من وضعي إلا ضيقةٍ فـي المحانـي




شح العتاد وقلـب الأحـزان معتـاد


تحصد عطا نبضه كفـوف الأنانـي




يا ما بذرت الطيب وارهيت الامـداد


في جرهـدي البيـد والعمـر فانـي




أقبلت من عزمـي للأحـلام منقـاد


اشيل حمـل جـدودي اللـي ثنانـي




من هيبتي ما كنت أشوف السما مـاد


متوشـحٍ مـن مجدهـم مـا كفانـي




أخذت منهم كيـف الأمجـاد تـزداد


ونسيت لا اخذ حسيتي مـن زمانـي




ودام الحمية ذنـب والوضـع جـلاد


وش عذر قوسي من تمـرد سنانـي




ووش عذر قتل الحلم بعيون الأحفـاد


لا صار حاضر حلمهـم مـا بنانـي




أنا حصدت اكبر خطا بس وش عـاد


لا صارت اكبر عثرتي من حصاني




عطيت مـن دمـي لدمـي ولا فـاد


في ساعةٍ فيهـا خسرنـي رهانـي




سنين وأنـا أقـدم الطيـب وارتـاد


غر النجـوم ويحتفـل بـي مكانـي




وأقول سيفي لا قسا الوقت بي حـاد


اضـرب بحـده كـل هـمٍّ نوانـي




وفي حاجته سنيت حـده وكـم جـاد


حتى لو انه فـي ضلوعـي كوانـي




وصدّرت ضامـي والرياجيـل وراد


يا حيف وأنا اللـي وسيـعٍ بطانـي




ولو للسنين وغربـة الوقـت ميعـاد


ما اخترت غربة وقتي اللي كسانـي





الشاعر نايف المطيري..