 |
منتديات قصايد ليل
(http://www.gsaidlil.com/vb/index.php)
- …»●[دواويــن الشعــراء والشاعرات المقرؤهـ المسموعهــ]●«…
(http://www.gsaidlil.com/vb/forumdisplay.php?f=37)
- - ديوان صاحب السمو الملكي الامير خالد الفيصل حفظه الله
(http://www.gsaidlil.com/vb/showthread.php?t=1895)
( ســــــــــافر)
سافر عسى ربي يحرسك وياقـاك هذا البخت عزّاه وش فـي يدينـي يا شين باكـر يـا حبيبـي بليّـاك لا جاء وعدك اللي بوقتـه تجينـي لي قمت أدوج في مداهيل ما طاك يا ما جرى بشهـار بينـك وبينـي هذا وهو تـوّك تطـري بممشـاك وشلون لي قفيت يـا نـور عينـي يا شيب عينك يا هوى البال واشقاك كانك مثل ما أبيك يااسمـر تبينـي |
(بنـــت الكـــحيله)
بنت الكحيلـه مهرتـي وخيالتي من كل اصيـل ألقـى عليهـا طربتـي بين المعنـق والشليـل صدر وقطـاة فلوتـي العنق والساق الطويـل وقع الحوافـر نغمتـي وحداتنا رجع الصهيـل أبوي وجـدي قدوتـي لو ما لهم عندي مثيـل بالدين تفخـر عزوتـي والرمح والسيف الصقيل ماكـر حـرار ديرتـي ما في هل العوجا ذليل |
(نجمة حياتي )
ميّلـت نجمـة حياتـي للمغيـب ودّعتني راعهـا فجـر المشيـب ليلة(ن) في برد في صحراء زمان عشتها في غربـة الدنيـا غريـب عشتها جاهـل وعاشتنـي حكيـم الخطا واجـد و مـرات تصيـب بينـت فينـي تجاريـب الحـيـاه كل سيل حط فـي دربـه شعيـب الصخـر تشقـه سيـوف الدهـر كيف تسلم خفقة القلـب العطيـب و الريـاح تشيـل كثبـان الرمـل كيف زهر العشب يبقى ما يغيـب أجمع حروفي وأشكـل صورتـي و الغريب اجمع شتاتـه بالعجيـب مـرة ترقـص حـروفـي للهوى ومرة اسمع مـن حرفـي نحيـب هاضني صوت الضمير الى اشتكى اختنق مالـه سميـع ولا مجيـب وهاضني شكوى القلوب من العقل ضامها كنه علـى الدنيـا رقيـب كلما صاح الضميـر و ون قلـب سالت حروفي على دمعة حبيـب |
(وداع يانــــفس)
وداع يـا نفـس قدرهـا دعـاهـا تنازعت والموت ما عنـه مـردود تشبّثت بحبال زخـرف(ن) حياهـا تبى نهار(ن) زود واليـوم موعـود تسلّلت مثـل الهـوا مـن خفاهـا عجزَت تقضّب في ذرى يابس العود تبخّرت روحي من حيـاض ماهـا يتلّهـا نــزّاع الأرواح بـركـود بالهون يـا نـزّاع روحـي تراهـا باقي عذاب أيام بيض(ن) على سود |
(غـــربة الــــروح)
قامت تعاظم غربة الروح يـا سعـود يالله دخيلـك و استـجـدّت جـدايـد تغرّبت وسط الجسـد روح مجحـود في دارهـا وشلـون راحـت بدايـد والشوف ذاب و خالطت بيضها سـود و الزّود نقص وناقـص العلـم زايـد من اول(ن) و الطيب للناس مقصـود و اليـوم صـارت طيّباتـه شـرايـد للوقـت تالـي مثـل باديـه مشهـود فيه الجهل عوّد علـى النـاس سايـد يا عازف(ن) عمري على نغمة العـود هـذي حياتـي غنهـا لـي قصـايـد مر(ن) على الهيّن و مر(ن) على الكود وعمر الفتى لحظـات هيّـن و كايـد واسمع من الخفّاق رجـع و مـردود قلب(ن) مع الونـات قـد لـه عوايـد |
(لـــونـــسيت)
لو نسيت العمر ما انسى دمعتـك صرخة(ن) ذابت من عيونك دموع ترتعش مرتاعة(ن) فـي وجنتـك وانتفض قلبي لها بيـن الضلـوع أزعَجت صمت الليالـي عبرتـك بالخفا ثوره وبالظاهـر خشـوع تسكب الدمعه وتظمـى نظرتـك مشهد النظرة وهي تظمى يـروع يا ضياع العمر ضيعـة بسمتـك ضاع معها خافق(ن) مثلك جزوع ليت من يمتص جـارح لحظتـك والفرح يشعل دياجيـرك شمـوع |
(ســـاعات الـــعصر)
ليت عقل العود في سن الشبـاب وحكمة الستيـن فـي عشرينهـا كان ما جرَ القـدم درب العـذاب وانتهزت ظروفهـا فـي حينهـا وكان ما ضاعت دقايقهـا هبـاب وكـل لحظـه أستغـل سنينـهـا كم تركت من الفرص واقفلت باب بعتها واهـل الفـرص شارينهـا وان نصحني ناصح أحسب حساب قلـت يمـدي .. توَنـا بادينـهـا العمر بـاوَل زمامـه لا تهـاب والَليـلْ طـوال يـا سارينـهـا ما هقيت إن الزمن مثل السـراب والَليـالـي خيَـبـت راجينـهـا أثر ساعات العمر مثل السحـاب بالظـلام تمـر مـا نـدري بهـا ويل من همَاته صعود الهضـاب ترجـمـه ريحانـهـا بايدينـهـا وحظ من همَاته يحـوش التـراب يبشر بكثر الذهـب فـي طينهـا وكل قصر له أساس وسقف وباب يحكـمـون اركانـهـا بانينـهـا والصيانة للقصـر وإلا الخـراب أفطنـوا للـدار يــا حامينـهـا |
(أحـــب الليـــل)
أحب الليل و نجـوم الليالـي حبيباتـي أساهرهـن لحالـي لقيت بصحبة النجمات سلوى عقب ما فارق الخفّاق غالـي ألا يا ساريات الليـل سيـري على واديه مع مسرى خيالي تجلّي في سما خـلّ المـودّه و قولي للحبيب وش جرالـي هنيـك يـا نجـوم تناظرينـه و انا مالي على النظره مجال ِ و لكني ولو شابـت عيونـي أحب الليل و نجـوم الليالـي صبرت و كل حي لو تصبّـر إلى مالت ليالي العمـر مـالِ |
(عــــــــابــــــــر الخـــــــــاطـــــــــر)
ياعابر الخاطـر تصـوّرت معنـاك لا شـك ماكـل الخواطـر تـقـالِ خذ صورتك لَى جيت ساري بمسراك مالك بها مصلـوح تبقـى ولا لـي تلقى من الشعّـار الاقصيـن ذولاك من ياخذ المعنـى علـى كـل حـال وأنـا اتخيّـر مـن معقّـل مطايـاك مركوبـة الفكـره وافـكّ العـقـال إمّا سريت الليل مع نجـم الافـلاك والاّ مـع شمسـي تبعنـي ظلالـي أوزن كلامي قبـل يكتـب بالابـواك واقلّب المعنى علـى ماطـرى لـي الورد طيبي واتسـوّك مـن الـرّاك والثوب ضافي والقصر راس عالـي |
(صاحـــب الـــحاجه)
صاحب الحاجه ولو طالت لحوح وصاحب الحلم القديـم يغازلـه واعذاب القلب من كثر الجروح كـم سيـف بالعـذاب ينـازلـه أخفي الطّعنات وعيونـي تبـوح كـن الاوجـاع بهدبهـا نازلـه غايتي بليـل ظلامـه مايـروح بينـي الايّـام وبينـه عـازلـه كل ما مشيت له عنّـي يـروح وعيّت الخطـوه تجـي منازلـه والهوى بالقلب وهّـاج يضـوح لـو يسوقـه للمنايـا جـازلـه كل ياس يطرده فينـي طمـوح وكـل عـزمٍ خافقـي ينحازلـه |
| الساعة الآن 11:24 AM |
Powered by vBulletin® Copyright ©2000 - 2024, Jelsoft Enterprises Ltd. TranZ By
Almuhajir
HêĽм √ 3.1 BY: ! ωαнαм ! © 2010
new notificatio by 9adq_ala7sas
جميع حقوق النشر لشعارنا و كتابنا ومسميات الموقع خاصة و محفوظة لدى منتديات قصايد ليل الأدبية