 |
منتديات قصايد ليل
(http://www.gsaidlil.com/vb/index.php)
- …»●[دواويــن الشعــراء والشاعرات المقرؤهـ المسموعهــ]●«…
(http://www.gsaidlil.com/vb/forumdisplay.php?f=37)
- - ديوان بدر بن عبدالمحسن
(http://www.gsaidlil.com/vb/showthread.php?t=40600)
(سيدي قم )
سيدي قم... ما خبرت اللي يحب يشتهي النوم سيدي قم... لاتنام وفي السماء باقي نجوم يا جريح البارحه كيف طبت اليوم سيدي .. يا سيدي قم سيدي ...الليل للعاشق نهار قم معي ... نجمع نجوم الظلام سيدي ... لو عرفت الانتظار ما غفا لك جفن .. .يا عذب الكلام اه لو تدري الهوى والسهر مقسوم يا جريح البارحه كيف طبت اليوم سيدي .. يا سيدي قم سيدي ... لا تناظرني بغضب ودي تحس مثلي بالغرام سيدي ... ما وراك الاالتعب ليت عيني مثل عينك تنام اه لو تدري الهوى والسهر مقسوم ويا جريح البارحة كيف طبت اليوم سيدي .... يا سيدي قم |
(شمس الجمال )
هيه يا غصن تمايل بالدلال ما تخاف الكسر لا هب الهبوب وما تخاف الله وتسعى بالعدال انصف من لحاظ عينيك القلوب لا متى ذبح العرب عندك حلال تابت العالم متى عينك تتوب مير قلبي يا لغضي بيعه محال ما أقدر أعطي لو تبي مني ذنوب أشهد إنك بالحلى فقت الخيال وعيب حسنك كان في حسنك عيوب شارقة في طلعتك شمس الجمال وجامع في ضحكتك كل محبوب الخمل فيني انا ما بك خمال مشملٍ نوّك .. وانا نوّي جنوب |
(ديمه )
قلت المـطر . . قالـت من اليـــوم ديمــــه ما به رعـد . . لا بـرق . . ما غـير هـتان عشـقٍ جـمع ما بيـن قاعٍ وغـيمه فـيض على صدر الثـرى دمع الأمزان هــمس النديم .. الــلي يعـاتب نـد يــمه صـوت المطـر .. كـنه تعاتـيـب خلان وتبــسـمــت لا جل الــلــيالي الـقــد يـمـه وقالـت تــذ كر قـلـت يابـنت نسيان نـقـض الجـروح الـلي تـشافـت ظـليمــه ما عاد به وصـلٍ ولا عاد هـجران ومـا لـلرجا فـي بعض الأحـوال قــيــمه ومال العـمى صبـحٍ ولو بات سهـران لــو لــلزمن .. عن نية الغـد ر شـيـمـه مـا فـــرق أحـبابٍ ولا بعــد أوطان كلٍ خـصـيم .. وذاق لـوعـة خــصـيـمـه والـلي خـصـيم الوقـت يا بنـت خـسران |
(الرماد )
الشمس طاحت .. وبردت.. ورمد الشفق .. في حجر الارض من يشتهي يدوس باقدامه على هالرماد كله .. يا عابرٍ .. على المدى .. من السراب .. الى الندى .. قلبي سقط فوق التراب شله.. او لا تدوس القلب خله .. كل يوم له شمس وانا مالي سوى قلبي انا .. من بكى لين الثرى بله بالدمع .. ويوم اكتفى .. صد وعصر ظله .. ومسح بردنه .. وجنته .. ثم ابتسم لين حسدوه الناس يازارعٍ شوك الهراس .. فوق الرمل كله .. لاقدام من يكره الشوك ياحظ من ياطى بقدم .. انا مالي سوى قلبي الشمس طاحت ونثر الظلام ظله .. على الجروح .. ياكاتم الزين الفضوح عن عيني لا تظهر انيابك .. وتقطع احبابك شمات انا من عطى ضي الشموس خله .. لين حسدوه الناس ولا تنتظر غير السموس .. لله .. انا مالي سوى قلبي .. |
(زل الطرب )
تلعب وانا .. ما عاد لي بالطرب شف لعبك بروحي بدل الفرح بجراح زل الطرب يا موجع الطار بالكف شابت قوافي الليل .. نور الضحى لاح كانك تدق القلب .. دقك على الدف عسى الضلوع توقي القلب لا طاح شفتك .. ولا ادري من قضب بعدك الصف ناس ٍ كثير .. وكنهم عندي أشباح نورك دعاني عندك الشوف وقف كنه فنارٍٍٍ لاح في عين ملاح من له ثمان اسنين من راح منكف خلّى السفين وعارض الموج سباح من فرحته ما حسب االحيل يتلف غلب عليه الموج والقاع منزاح |
(عيونك )
شعرك كساه النور ما باج ظلماه وخدّك غشاه الليل ما غاب نوره فــ .. عيونك جنود .. وبواريد ورماه غزو .. ورمشك صار مقدم سبوره صبّح به اللي داله القلب بحماه قبل النذير .. وقبل يملك شعوره أنا الصويب اللي غشت صدره دماه شلفا عيونك هشمت مش زوره يامن يبي ذبحي .. وأبي منع لاماه روحٍ شكت ظلمك تراها معذوره |
(الليالي الوضح ) في الليالي الوضح .. والعتيم الصبح .. لاح لي وجه الرياض .. في مرايا السحب .. كفّها فلة جديله من حروف .. وقصة الحنا طويلة .. فـ الكفوف من نده عطر الرفوف .. لين صحاه .. في ثيابك يا الف ليله.. وفي الهبوب .. انثنينا يا هبوب النعاس .. والحلم .. ألف غصن من اليباس .. فز لاجلك .. وانثنى .. اكسري الاوهام كاس ..والمواجع فم وان عشقتيني انا .. ما ابي من الناس .. ناس .. ما علينا .. لو طربنا وانتشينا آه .. ما ارق ( الرياض ) تالي الليل .. انا لو ابي .. خذتها بيده ..ا ومشينا .. *** يا نصيبي من الصور .. والرسايال ومن كل شمس قايمه .. ومن كل ظلٍ مايل .. يا مكاني من البيوت .. ومن الصحاري اللي .. فرقت فكري قبايل .. وين احب الليله .. وين اهيم .. اقبلي مثل ديم .. أو غصون النار تنبت فـ الغضى .. وبين ما خلى من النخيل الفضا .. وما نسى الغيم .. أقبلي .. يا بختري عيوني من الربيع .. وطل وجهي من الشتا .. ومثل صوتي من الهبوب .. اقبلي مثل الرياض .. من تعاريج الدروب .. في ضلوع الوادي .. وين حبيتك قمر .. فوق طين أجدادي .. *** وين احب الليله .. وين أهيم .. ارفعي طرقة الشيله .. عن سديم .. وكوبٍ وهاج .. اقطعيني بنصل طرفٍ سادرٍ وحجاج .. شقيقيني يالهبوب العارضية .. واهدمني سياج .. لين أغني الهوى ما هو خطيه.. يالعفاف اللي تسربل بالبياض .. كل ما قربت يدينا .. ناض طير.. وجض ريم .. ما علينا .. آه .. ما ارق الرياض تالي الليل .. انا لو ابي .. خذتها بيدها .. ومشينا |
(لا تقول ) لا تقول ودعتني داري بالحيل مالي عليك عتاب مريت في موعدك ساري وقفت لين النجم ماغاب الليل تحت الشجر عاري والفجر غطي السما بثياب والريح في كفوفها الذاري تدفن ارسوم الوعد بتراب مريت ماللوله طاري ووقفت ماللندم اسباب مدري تعودت مشواري أو خان بي قلبي الكذاب |
(اللوعة ) ياللي نسيت الزمن وقلوبنا تعده كم ليلةٍ غبت والهاجوس يلعب بي لا انت مع القلب يالغالي ولا ضده كله سوى راحتي والا تعب قلبي يسيل قلبي على الخدين .. وارده خبرت قلبٍ من اللوعات ينحبي وان قلت لا بد يبرد زادت الشده شقيت انا منك والشكوى على ربي يا من يغيب القمر لا من ظهر خده الزين زينك وانا كثر الوله ذنبي من عانق السيف لازم يجرحه خده ومن يعشق الجمر فيه النار تشتبي |
(قمر قلبي ) من رماد المصابيح .. اللي انطفت في الريح جيتك أنا وقلبي .. ومن سهاد المواويل .. وباقي قصيد الليل جيتك قمر دربي .. فيني تعب .. لا والله أكثر حالي صعب .. لا والله أكثر وكنتي الحبيبة والصديق .. واللي خذتني من الطريق وسكنتني أهدابها .. في قلبي شوك .. وفي عيوني شوك شوفي أصابعك انزفت .. من كثر ما لمست جروحي وجففت .. دمعي الحزين .. في صوتي ليل .. وفــ صمتي ليل .. وانتي الليالي اللي حلفت .. تشعل نجومي بالظلام اللي انطفت .. من هالسنين فيني تعب .. لا والله أكثر حالي صعب .. لا والله أكثر وانتي الحبيبة والصديق .. واللي خذتني من الطريق وسكنتني أهدابها .. ياللي أغلى من سنيني .. ناظريني لين تحسدني العيون .. وان حكوا حسادي فيني .. وقالوا انك تعشقيني .. آه يا محلا السوالف والظنون .. ليتهم ما يسكتون .. ولما تسقيني الغرام .. اسري بالنور والظلام .. واتركي كل الكلام .. انتي الحبيبة والصديق .. واللي خذتني من الطريق .. وسكنتني أهدابها .. |
(مالهم صوت) مالهم صوت .. غربوا والزمان سكوت .. ليتهم ماقربوا وهقوني بالوصل .. علقوني بالأمل هذا شيء لايحتمل .. التجافي موت .. الهوى تيه.. غرني ضعت في واديه .. وانت طيفك مرني مرني ليل وفجر .. مرني باحلى العمر آه من يقوى الصبر .. التجافي موت .. طول صدود .. صاحبك يالعيون السود .. ماسمع من صاح بك صاح من هم وغضب .. ها الجفا ماله سبب .. وانت من خان وكذب .. ليه احبك موت .. |
(من زعلك) من زعلك في عيونك السود نظره لا شفتها حسيت بالحزن والياس من زعلك طاحت من الليل قمره خلت طريقي من المواعيد والناس لو هو انا .. بالله شوفيني مره وأنا أعتذر للتبر .. للدرللماس أبعتذر لنجومها في المجره وللما القراح اللي شربته من الكاس حبيبتي أرجوك في القلب حسره كافي زعل اشغلتي الفكر هوجاس والله لو تدرين ها الحب جمرة بين الضلوع تشب من حر الأنفاس غديت طفلٍ ضايع فيه عبره محدٍ سأل وشفيه ماقال لا باس وهذا الغرام الله يكفيني شره بعيش أحساسه وباموت أحساس |
(نبض الحب ) كل حبٍ .. تغير وانمحى مـن حـنـايـاك يالـقــلـب الـقــديـم كود نبض على وضحى صحى أول العمر يوم اني فطيم لامني الشيب .. وابعدني السحى لا ارتمى فوق هالصدر الرحيم أعشق الوضح لاجلك والضحى وضوح برق الوسامى في العتيم اقبل الصبح والليل انتحى ابشري بالفرج والله كريم |
(ما ابيه ) عذبيه.. إسعديه.. داوي قلبي واجرحيه .. واللي ما مثله ابد .. مثلي ما حبك احد ولو رضي قلبي بغيرك.. ما أبيه .. ما أبيه تملكيني لوبـ غيتي .. تملكيني لو رفضتي تسحريني لو حكيتي .. تسحريني لو سكتي أنا نجمه في مدار ك .. ضي عيني من نهارك .. وانتي قلبي واللي فيه لو رضي قلبي بغيرك ما أبيه.. انتي اغلى من هجرني .. وانتي اجمل من يغيب .. والله لو بعدك قهرني .. ما أبي غيرك حبيب .. سافري والقلب دارك .. راضي بـ ثلجك ونارك .. حبي قلبي واكرهيه .. لو رضي قلبي بغيرك.. ما أبيه أنا أحبك لا تخافي .. الا قلبك لو هواني .. هذا ضعفي واعترافي .. بس ما ارضى هواني .. ابعدي هذا قرارك ... ماني سجنك أو حصارك ... روحي سوِّى اللي تبيه ... لو رضي قلبي بغيرك .. ما أبيه واللي ما مثله أبد .. مثلي ماحبك احد |
(ما انكر العطر) ماانكر العطر .. وحبيبتي ومااجحد النور .. وحبيبتي ومااخفي اشعور إني احب الشمس ولفتاتها إني اعشق الليل ونظراتها ياناس انا معذور في حبيبتي والشمس وماانكر العطر الغت مواعيد النهار .. شمس بدت مثل النهار ريح المطر لون الخضار .. حبيبتي أحلى البياض وأحلى السمار بالحيل مجبور .. ماأخفي شعور إني احب الشمس ولفتاتها إني اعشق الليل ونظراتها ياناس أنا معذور في حبيبتي والشمس وماانكر العطر خليني فـ عيونك هوى .. همس الحنين لا تغمض اعيونك علي .. ولا تكذبين تشرقني الدمعه فـ عيوني تحرقني اللوعه فـ ظنوني ياحبي انا والله ماأخونك وماانكر العطر وحبيبتي |
( الماضي الحاضر ) صوتٍ شبيه الريح .. مشققٍ بأعواد شيح مرتّق بالدم .. معتّق بالهم زافر صوتٍ مثل خضر العروق اللي على ظهر الكفوف المبطيه نافر صوتٍ ذبيح .. يصرخ يصيح .. إبلك خذوه القوم بين الفزع والنوم .. أسرجت مهري ألف .. وسلّيت سيفي ألف .. وظهرت تحت الشلف .. ماكان في الشارع غير الرصيف والفجر .. وبواب جيراني من هالمدى راجع .. يحمل رغيفٍ حار .. زاد لثلاث صغار.. للمدرسه صحيوا ولبسوا مرايلهم .. سنين سنين .. هالصوت الجارح الزاجر.. يصيح بي وينك.. قطفت بساتينك .. وابلك خذته القوم.. خذته القوم هالابل.. أفـّز وفي أنفي ..عـجاجة الغـاره .. وأصحى وفي كفي ساعه ونظاره .. مالي إبل أرجـوك مـالي نخيل .. لانصل ولا حـافر.. تعبت من صوت العروق المبطيه.. ومن صمتي الفاجر.. وأنا أخر الفرّيس ظنك .. أنـا أخـر الفرّيـس .. حسبك ياحادي العيس .. هذا الزمن عاري ..لاردن ولا جوخه .. يصهل مهر راكان .. وينادي ابن مهيد .. يوقف شعر هالبيد .. هذا الزمن أصمخ .. مايسمع شيوخه.. شد الرحال .. سافر .. دوّر ياحادي العيس .. روض وزهر ماديس ولذنوبنا.. لذنوبنا غافر وداع يا خضر العروق اللي على ظهر الكفوف المبطيه يالماضي الحاضر .. |
(وادعيني) وادعيني .. لا تردين الملامة وادعيني .. لاتخافين الندامة وادعيني يا حبيبة .. وسامحيني ياغريبة ان جرحتك في اللي فات .. ذا ترى طبع الحياة يا عسى اللقيا قريبة لا تضنين الوداع .. بيننا هذي الدقيقة من زمان الحب ضاع .. وما درينا بالحقيقة كلنا نطرد سراب.. حظنا منه العذاب .. وادعيني يا حبيبه.. وسامحيني ياغريبة.. لوجرحتك في اللي فات .. ذا ترى طبع الحياة.. يا عسى اللقيا قريبة وادعيني بابتسامه .. نورها ينفي الشجون واتركيني بالسلامة .. .يا عسى دربك حنون واوعديني لو نسيتي .. قصة الماضي اللي راح زي ما تنسي الامانه .. حاولي تنسي الجراح وادعيني يا حبيبة.. وسامحيني ياغريبة.. ان جرحتك في اللي فات.. ذا ترى طبع الحياة يا عسى اللقيا قريبة |
(الموعد الثاني) خذاك .. الموعد الثاني .. نويت ... تغيب .. وتنساني .. مشت بك .. خطوتك لبعاد .. وتركت .. لدمعتي ميعاد .. مثل ذا الوقت تلقاني .. وخذاك ..الموعد الثاني .. أحبك .. كلها كلمه .. ونظرة شوق خداعة .. عطتني ..بالأمل دنيا .. غريبه .. يومها بساعه .. خذتني .. غصب عني لك .. حسبت إني قمر ليلك .. واثر شوفك تعداني .. وخذاك ..الموعد الثاني .. صديق الليل .. لو تندم .. على جرح تركته لي .. لا انسي قلبك المسكين .. حبيب جرحك قبلي .. ولكن سكتك تحتار .. ابد .. بين الندى والنار.. والى منه قضى المشوار.. بدا مشوارك الثاني .. |
(نسيم الليل ) هب النسيم بريح من مفرقه لاح عطر.. وسنى من غزة الليل بادي ما عاتبه موضى جبينه ولا شاح أعطاه خده .. وانتشى بالبرادي لا يا نسيم الليل قلب الخطا باح والعين ملت جفنها من سهادى يا ليتني مثلك خلي ومرتاح ما أحد نشد عن غايتي .. عن مرادي ولا طاب لي غصن من الغى مياح أروي غليل القلب لا صار صادي لا شك أنا بالحب كتبت لي جراح شربي حزين الدمع .. والصبر زادي لا جيت أبا أدله عن زماني الذي راح قالت ليالي الشوق00وين أنت غادي |
(موت وميلاد ) فـ عيني تغيب الشمس .. وتشرق افـ عيني في ناظري للشمس .. موتٍ وميلاد لليل في دمعي سنا .. نجمتين وللصبح في جفني شفق هم وسهاد كن السهر دربٍ عليه ابـ تجين ولا ودي أقطع درب لاماك برقاد ياللي جميع الناس بينك وبيني وكل لحظة أنا نتظر منك ميعاد عذري لياسي منك .. إنك تبيني خنت الرجا.. وان صنت لي عهد ووداد ولمصافحك ربي خلق لي يميني أمدها لك وصل وأمدها بعاد البسمتك ترخص غوالي سنيني جرحي يهون ووجاير الشوق يزداد أنسى عذاب العمر و ما أنسى حنيني تبلى ليالي العمر وجروحك جداد |
(يا سيد الناس) الما ركـد والجريد الغض .. ما هـزّه نسـايمٍٍ والـزمـن لا جـا ولا راحي جمحت يا مهر حظي وأثر بك فـزّه ما طـوّلت كلها غـارة ومشـواحي لو كنت رمحٍ ٍ بكفّي كنت با هـزّه لاشـك من هـو عليه أهوش بسلاحي ولو كنت بيرق عقيدٍ ويـن أبا رزّه وأطـول طويلٍ أشوفه .. هضبة جراحي يا سـيّد الناس .. شمسك مالها حـزه تعبت أمـاري بشمعي وضي مصباحي من مس نورك جبينه يبشـر بعـزّه ومـن مـر غيمك عتيمه بارقـه لاحي يا سـيّد النـاس .. كلٍ لابس ٍ بـزّه صعبٍ نفرّق ما بين الخبل والصاحي كم واحدٍ مـر .. قال عيـوني تخـزّه هو ما درى إني عمى عن قاصر أشباحي أنـا عيـوني تتـل النجم .. وتكـزّه عن حـارك الفلك .. هذي عادة رماحي وما ألوم حظي .. تعب من كثر ما دزّه لو هـو لغيري . .نسـاه الهم .. وإرتاحي |
(يا زمان صدفه ) ولا قلبي يحب الموعد اللي تركته للزمان صدفه ولا عيني تحب الدمعة اللي يمنيها الهوى بعطفه وانا مابي.. حصاد الموسم المرجي ولا أظن الأمل ينجي حطام المركب الغرقان كفايه توعد الولهان فاكر يا زمان يا زمان صدفه حبيبي عمرنا لحظات نعديها ولا ندري ويكفينا الذي قد فات كفاية يا بعد عمري وانا مابي .. حصاد الموسم المرجي ولا أظن الأمل ينجي حطام المركب الغرقان كفايه توعد الولهان فاكر يا زمان يا زمان صدفه |
(مالنا وقت ) (كل شيئ .. دايم في وقته.. ليه؟؟ كل شي .. حنا نحبه .. صعب نستعجل عليه .. طيب .. ليه؟؟ يا ترى انتظار الشيئ .. هو سفرٍ اليه ) احملي اللحظه حجر .. وطوحيها في المدى .. تصبح الساعة .. دقيقه غيري الزمن الحقيقه طلعيني من الصور .. من الخطوط .. الحزينه اطلقيني من الشطوط ومن مجاديف السفينه اجمعي الصوت .. الصدى احملي اللحظة حجر .. وطوحيها في المدى ( كل شي دايم في وقته عجيب .. وكل شي حنا نحبه كثر ما يظهر يغيب يا ترى .. منهو البعيد .. منهو القريب ) ما لنا وقت .. وقتنا دايم يجي الزمان اللي يروح .. وان سألتيني أحبك .. كثر ما تشفى الجروح .. اشطبيني الف ذكرى .. واكتبي .. اللي يتذكر .. غبي واللي ما ينسى غبي ودي اشوفك .. باقي لحظه هذا كل اللي أبي .. |
(الوعد ) يا صـاحبـي طـالـت علـي المسـافـه كل ما نشـدتـك قلـت لـي الـدرب قـدام وعـدك مثـل بـاكـر أحبــه وأخـافـه ولا ينقضـي بـاكـر علـى طـول الأيـام ما اقـول ضـاع العمـر عنـدك حسـافـه انت الـدقـايـق عشتـها وانـت الاعـوام ودي ربـيـع العـمـر يـسبـق جفـافـه يا مسقـي العطشـان من كـاس الأوهـام كـانـك تعـاف الجـرح حنـا نـعـافـه وما سهـرت عيـوني تبـي عينـك تنـام ومـن لا ذكـر منـك جـميـل خـلافـه ما يملكه وعـد تـرى السـعـد قـدام |
(وعدتيني) وعدتيني .. بنجم الضي .. بالقمرا .. تركتيني لجرح الماضي .. للذكرى .. وليتك ما وعدتيني .. رسمتي لي الهوى بسمه .. بتشرق في ظلام الأمس .. وقلتي لي مراكبنا .. بتوصل لو مواني الشمس .. وانا من فرحتي باحلم .. واصدق حلم ايامي .. خذاني الحب ما اعلم .. عن الدرب اللي قدامي .. كفايه .. انك وعدتيني .. وعدتيني حبيبة عمر .. تقاسمني الهنا والجرح .. تركتيني لحيرة عمر .. خذت مني المنى والفرح .. حبيبه ما ابي لأجلي .. ولا حتى قمر ليلك .. فقدت فـ غربتي إسمي .. وقلت أنسى أناديلك .. نسيت إنك نسيتني .. |
(موعد الاحباب) سقى الله موعدك يا زين .. سقى الله موعد الاحباب سحابٍ ماهمى من عين .. ولا جادت به الاحزان سحابٍ ماطرٍ هتان .. سقى الله في العمر ليله .. ظهر في صفوها بدرين .. قمرها .. ووجهك الفتان الا ليت الفجر .. ما بان .. ترى فرقى الأحبه شين سهرنا والهوى واحد .. وصرنا والفراق إثنين حبيبي قلبي اللي كان .. وفينا والزمن خوان صبرنا والسؤال سنين .. سقا الله روض خلاني .. رحلت وما رحلتوا بعين ولا روحٍ .. ولا وجدان .. نسيتوا بداركم إنسان .. نسيتوا وما نساني البين |
(ما انكر العطر) ماانكر العطر .. وحبيبتي ومااجحد النور .. وحبيبتي ومااخفي اشعور إني احب الشمس ولفتاتها إني اعشق الليل ونظراتها ياناس انا معذور في حبيبتي والشمس وماانكر العطر الغت مواعيد النهار .. شمس بدت مثل النهار ريح المطر لون الخضار .. حبيبتي أحلى البياض وأحلى السمار بالحيل مجبور .. ماأخفي شعور إني احب الشمس ولفتاتها إني اعشق الليل ونظراتها ياناس أنا معذور في حبيبتي والشمس وماانكر العطر خليني فـ عيونك هوى .. همس الحنين لا تغمض اعيونك علي .. ولا تكذبين تشرقني الدمعه فـ عيوني تحرقني اللوعه فـ ظنوني ياحبي انا والله ماأخونك وماانكر العطر وحبيبتي |
(ما ابيه ) عذبيه.. إسعديه.. داوي قلبي واجرحيه .. واللي ما مثله ابد .. مثلي ما حبك احد ولو رضي قلبي بغيرك.. ما أبيه .. ما أبيه تملكيني لوبـ غيتي .. تملكيني لو رفضتي تسحريني لو حكيتي .. تسحريني لو سكتي أنا نجمه في مدار ك .. ضي عيني من نهارك .. وانتي قلبي واللي فيه لو رضي قلبي بغيرك ما أبيه.. انتي اغلى من هجرني .. وانتي اجمل من يغيب .. والله لو بعدك قهرني .. ما أبي غيرك حبيب .. سافري والقلب دارك .. راضي بـ ثلجك ونارك .. حبي قلبي واكرهيه .. لو رضي قلبي بغيرك.. ما أبيه أنا أحبك لا تخافي .. الا قلبك لو هواني .. هذا ضعفي واعترافي .. بس ما ارضى هواني .. ابعدي هذا قرارك ... ماني سجنك أو حصارك ... روحي سوِّى اللي تبيه ... لو رضي قلبي بغيرك .. ما أبيه |
(الوعد باكر) الوعد باكر .. و لو تأخرتي ... لا يجي باكر ما أبي باكر بدونك احبسي الفجر فـ عيونك و إن أشغل طيفي ظنونك واعديني بعد باكر ... أنا ظلي تحت شمسك و لو تغــيـــبي ما هو ظلي .. و انتي اسمك في حياتي يهمسه بعضي لكلي .. آه يا ضعفي و غروري اعدلي فيني و جوري و اصدقي .. راعي شعوري و واعديني بعد باكر .. هذا وجهك في عيوني ما رسمته لا وربي .. و اللي يصرخ في ضلوعي هذا صوتك ماهو قلبي .. آه يا شمعة وجودي .. اشعلي نارك في عودي.. اهجري قلبي و عودي و واعديني بعد باكر .. |
(النسيان ) تذكر النسيان ... لاعاد تنساه ياقلب ... وانسي القلب لعل يشفا يدرى الحبيب ... انه حبيبٍ وابجفاه ماهو خراب الكون ... لاقفيت واقفا كان الخطا منى ... فقلبي خطاياه هو علمه ... وشلون ... يهجر ويجفا تعب المسافر ... وابعد الموج مرساه صار المدى له يم ... والشمس مرفا ومل الهوى نوحه ... وبوحه ... ونجواه ماعاد لى صبر على الجراح ... تكفا الى متى ...صدري بيحترق حناياه كنك على صالي ...عظامي بتدفا والى متى ... جفنى بيسقيك من ماه كن الليالي لاصفا الدمع تصفا تذكر النسيان .... ياقلب وانساه وانسي ... الجروح اللي مع الوقت تشفا |
(ناعم يا ندى ) ناعم يا ندى في ليل الربيع يا عمر .. ابتدا وخايف يضيع نعومة كلام بتمحي الألم .. وبسمة سلام تخلي العدم .. جناين محبه .. وخضرة مروج ومركب ومويه .. ونسمه وموج قابلتك في حلم واماني رقيقه وضمك خيالي .. يا وهم الحقيقه خذتنا الليالي .. في رحلة حنين نسينا الليالي وعمر السنين .. وعشنا فـ محبه .. وخضرة مروج ومركب ومويه ونسمه وموج حبيبي .. أببكي أبضحك باذوب وأذوب في حبي جميع القلوب أحبك لآخر مدى في حياتي أحبك في همسي .. وكلامي وسكاتي أحبك محبه .. وخضرة مروج .. ومركب ومويه .. ونسمه وموج .. |
(وش كثر إنتي جميلة) بتعلم حروفك 00 عن الشعر كله 00 وادخل كفوفك 00 عن البرد كله 00 واشهر سيوفك 00 في وجه الوقت كله 00 ( ياالله 00وش كثر انتي جميلة00 وش كثر انا احب00) واسند جروحي00 مثل جذع نخله00على هاالمدى00 واركض في صوتك00 وتحمل هبوبك رمالي00 سرابك00جبالي00 دروبك خيالي00 وتبقى جروحي00 عطش الف نخله00هجرها الندى00 واتمنى مره وانتي معايا00 اناظر ورايا00واناظر بعد00 وغير ابتسامك00ماالمح احد000 على هاالمدى000 |
(يا سواد العين ) ياسواد العين .. فـ عيوني سواد النظر دخان .. وأنفاسي لهب من نثر في مطلع الشمس الرماد ومن جمع في موقد اللوعه حطب كانها الفرقا .. فهي همٍ وكاد مير اظن الياس ياخل السبب ياالبعاد اللي ورى طولك بعاد ماورى الدرب العسير الا الصعب وش بقي لي من الرجا كود العناد وش جنيت من الهوى غير التعب لو يرد العشب لومي للجراد كان لمت السحب في جرد الحدب |
(وسيم الناس) قال مجروح ... جاوبته نعم قال ماشوف بك ... اثار ...دم قلت وان كان في ذاتي النزيف قال ما به نزيف ... من عدم قلت وان خان بي اغلا حبيب قال وهم ... بنيته وانهدم قلت ماعذبك يوم الفراق قال درب وتمشيه القدم قلت ما به سوى جلدك شعور قال غيره فلا احس ... بالم ياوسيم الناس لو قلبك وسيم واكرم الناس في غير الكرم عندك الظلم عدل ٍ في الهوى واعدل العاشقين ... اللي ظلم انت لو كان في حبك حياة كان خلى حياتك له طعم اتعس الخلق من يرجي ... هواك ما اضيع النبض في ... قلب الصنم |
(مجنونها) لعيونها ... بس لعيونها قلبي سراب بدونها .. قلبي سراب ... وعيني سراب ما اقول أعشقها بعقل... مجنونها... البارحة مريت في أحلى الفصول صيف وشتاء.. وناظرتها.. وقلبي يقول هذي العيون إلى متى حبيبتي ياكثرها عيونك على هاالليل وين ما التفت اشوفها .. حبيبتي يازينها عيونك على هاالليل سحرني برق سيوفها.. ما أقول أعشقها بعقل.. مجنونها.. قمري .. يا شمس الذهب سفري وراء عيونك تعب قلبي تعب... وصبري تعب ومن الهدب لين الهدب... بحر ومراكب من لهب أمواج تبحر برضاه .. وأمواج تلعب بي غضب |
(هم) هم .. يافؤادي هم .. بالوتر بالشادي بالزهر ..بالوادي هم.. يامساالحب ..ياالدنيا.. يامسا الحب ليلنا حب.. ياالدنيا .. ليلنا حب لبست الضي الشوارع .. والدروب والمباني .. شامه في خد الغروب والمدنيه..غادةٍ .. حسنا..لعوب هم .. يافؤادي هم اعطني زهره..وانا ابيع الظلام.. واشتري للحرب ... سربٍ من الحمام .. من يعيش فـ حب .. بيموت بسلام.. وهم ..يافؤادي هم |
(مني السلام ) مني السَلام ..وكان لي منك فرقَا جَمرة غضى حبك لجت داخل الجوف عيني عليك من اشهَب الدمع شرقا غيرك فلا حسّيت وغيرك فلا شوف ما انته امحول كيف انا يمك أرقا والحَيّ مثلي بتَالي العمر مكتوف حَبل الصّبر مَشدود والكف عرقا كيف اتقضت لاغدَت قيض وشعوف واصيح لك مَا يسمَع المَوج غرقا واصيح لك مَا يرجّع المَاضي حسوف يومك لنا مَا أخاف بَردٍ وحَرقا بَيت العَزا بعدك يبي جدر وسقوف ويومَك لنَا لون السّمَا منك زَرقا وللعشب نوارٍ وللمَاطر قنوف كلٍ يروح ورحمَة الرّبّ تبقى وكلٍ سِوَاك اليوم يَا شَيخ مخلوف |
(اللي هجرني) مما بروحي لا أزعج الصوت وادعيه غديه يسمع صيحتي من عذابه اللي هجرني ما درى ويش أنا فيه أقفا وقفي ما يرد الإِجابه لولا الحيا .. ثوبي من الغبن لا أفريه وأجدع هدومٍ .. ما وقتني حرابه وأبكي وأبكي من شكى ظلم غاليه واللي فقد شوف الأهل .. والقرابه وأصفق بكفٍ وأتبع الصبر باقيه وأقول تكفى .. وآصله حد بابه وأجعل ظلام الياس نور الرجا فيه وأتبع ولو في القاع مغوي سرابه عل الرجا يلحق على الطول راجيه والا جريح الحب يشفى صوابه |
(وعود وأعذار) عطني فـهواك الصبر لاصرت قاسي تبدي حنان وداخل القلب جبّار لا صار قلبك خالي الحس ناسي وتلعب على المشتاق بوعود واعذار ولا صار فيك من الأمل كثر ياسي وعندك يقين وتارك القلب محتار لا من نسيت اولي نويت التناسي اترك وراك لباكي العين تذكار اشرب معاه الوهم لا جف كاسي و لا ما حصل شوفك أضمك بالأفكار يا حارمٍ عيني لذيذ النعاسي ومعذبٍ روحي بجنّتك والنّار |
(الوله) يطري عليه الوله .. وأطري على باله يامرحبا لاضوى خلي على بابي هجيت حدب الضلوع ونوخ جماله لاجله بكت دمعتي ولأجله ضحك نابي وكل ما ضحك لي لمحت النور في آماله والى تجهم سترت السقم بثيابي وكل ما شكى من عنى همه وغرباله أقول لعل به جرحٍ من أسبابي طال الحكي ما لقيت الوصل بوصاله لاني حبيبه ولا هو أقرب اصحابي ناديت طاري المحبه مالنا وماله بالحيل أنا وانت ربع وكننا أغرابي يا زين كانك حزين .. فحالتي حاله بكفيك همك وأنا بصبر على مابي لو الشجر له نصيب فـ بارد ظلاله ماحرق القيض جفني وأنت فـ أهدابي |
| الساعة الآن 10:14 AM |
Powered by vBulletin® Copyright ©2000 - 2025, Jelsoft Enterprises Ltd. TranZ By
Almuhajir
HêĽм √ 3.1 BY: ! ωαнαм ! © 2010
new notificatio by 9adq_ala7sas
جميع حقوق النشر لشعارنا و كتابنا ومسميات الموقع خاصة و محفوظة لدى منتديات قصايد ليل الأدبية