 |
منتديات قصايد ليل
(http://www.gsaidlil.com/vb/index.php)
- …»●[دواويــن الشعــراء والشاعرات المقرؤهـ المسموعهــ]●«…
(http://www.gsaidlil.com/vb/forumdisplay.php?f=37)
- - ديوان بدر بن عبدالمحسن
(http://www.gsaidlil.com/vb/showthread.php?t=40600)
(حبيبتي يا حلم )
قصت ظفايرها .. ودريت البارحه .. جاني خبر .. أدري لبست خاتم عقيق .. وتقرا لها كتاب .. عتيق .. كتاب .. واظنه شعر .. أحفظ أنا حجار الطريق .. اللي يودي لبيتها .. واعرفها زين .. واعرفها زين ٍ وانا .. لا شفتها ولا جيتها .. قابلتها صدفه .. على شفاه الصحاب .. همسة أمل حسيتها ودمعة عذاب .. وصارت هي الخبر الجديد .. وعلومها همي الوحيد وش عاد .. لو كانت بعيد .. بين الحروف حبيتها .. حبيبتي .. يا حلم .. ياللي أعرفك اسم .. وجهٍ تصوره الحروف .. واتخيله .. نجم ٍ احس انه قريب .. ما اوصله .. انتي اللي اعرفه .. زين .. واللي اجهله انتي .. حبيبتي .. وياليتها .. اعرفها زين وانا .. لا شفتها ولا جيتها .. |
(أوقات)
أوقات ياخذنا الحكي .. وننسى بالحكي أوقات .. واوقات .. يا ليت الكلام سكات .. يجرحنا الحكي .. اسهر .. مع حبيبي .. يا قمر الكلام .. لين يغفى حبيبي .. وجروحي تنام .. ابعد عن حروفي .. وعن المي وخوفي .. وابحر في سفينه .. عن بحر الظلام .. وصلنامدينه .. من عطر وغمام انا وين القى كلام .. ما مر فــ كلام اوقات .. يا ليت الكلام سكات .. يجرحنا الحكي .. بغني لعيونك .. في حزني وفرحي وبكتب عيونك .. قصيده لجرحي واخلي ابتسامك .. دموعك كلامك قمر هالسوالف في ليل السكوت .. ولو الف نجمه في عيني تموت .. في حزني أحبك .. ويأسي أحبك .. أحبك .. مأقول أوقات |
(تعالي)
عتيم الليل ... قمرنا من زمان والله ... فقد نوره ... عتيم الليل ...احس النظره تتكسر ... على سوره .. سهرنا ... في عتيم الليل ... حزين الهمس ... قدرنا ... ننتظر باكر ... شعاع الشمس ... تعالي ... طالت الغيبه ... وانا مشتاق ... انا مشتاق ... انا الاشواق ... انا العشاق ... تعالي من جسور الليل ... تعالي ضي ... تعالي في هجير العمر .. حنان وفي .. وربي ... طالت الغيبه حنون الليل ... وصوتك همسة التحنان .. حنون الليل .. بيروي بالامل عطشان ... حنون الليل .. وانت بتسمعي صمتي ... تحسي بي ... تقاسي فيّ تعذيبي ... تشديني من الامواج ... ترسّيني على مينا ... وصوتك في ليالينا ... أبد ساري ... حنون الليل ... وانت الريح والساري ... تعالي ... طالت الغيبه وربي طالت الغيبه .. |
(جرحي بخير )
ومرت سنه .. على فراقك على صوتك .. واشواقك غريب كيف االزمن يرحل واحلام العمر .. تذبل .. سنه مرت .. وانا أول .. حبيبٍ يوقد الشمعه لجرحه في يوم ميلاده هلا .. بالحب .. واعياده وكل عامٍ .. وجرحي بخير مشيت دروبنا .. خطاوي قلوبنا ومريت الوعد .. وعدنا العام ماكان الوعد .. ولا الأيام .. هي الايام وما ادري ليه هالشارع .. نسوه الناس ومتى هالمقعد الخالي .. يجوه الناس حبيبي .. ليه فـ غيابك .. يغيبوا الناس حبيبي .. ايه والله حبيبي .. ايه والله نساني العمر.. لو انساه نساني الفرح .. لو انساه احبه .. ما ظهر نجم .. ونبت عشب .. وسرى براق أحبه .. لا زمن يشقي جروحي .. لا جفا .. وفراق أنا هذا الهوى كله .. وقلبي آخر العشاق .. |
(أجمل الحزن)
يا اجمل الحزن .. لدموعك سلام من حبيبٍ ... بقى منه الكلام وين انا منك .. غربني الزمان وخانني النور ... وابعدني الظلام لو بعزيك ... سالت دمعتي تدري الدمع في حبك ... حرام لو بواسيك ... مايكفي الهوى ولو أبي ... عذر مايكفي الغرام أعطنى من عذابك يا البعيد صرخةٍ ... تجعل ظلوعي حطام آه ...لو في يدي أبكي معاك قطرةٍ مادرى عنها الغمام ماابخل الوقت ... يحرمني البكا وانت لجلك حرمني الإبتسام يا اطهر الحزن ... لو كان القصيد يكشف الغم عن بدر التمام لكتب الشمس شعرٍ في سناك وامحي إمن السما...عج وكتام ياعسي البدر نوره مايغيب عن حبيبٍ بقي منه الكلام |
(انفاس )
يازين مافي العيون نعاس والقلب مشغول بهمومه اما معي نطرد الهوجاس والا لك النوم وحلومه هذي نجوم السما .. جلاس وعيبٍ على العاشق القومه لاجل الهوى عذبونا الناس ومن بيح السد ما الومه انفاسنا ماغدت انفاس من حرها دوم مكتومه |
(كافي عتاب )
البارحة والقلوب أصحـاب كنت القمر وأنت تمدحني واليوم .. لي مخلبين ونــاب ومشا هد الـدم يفرحني كذاب هذا المـدح كـذاب وكـذّاب ذنمٍ يجـرحني إنسـان..ماني نجم وشـهاب وليتك مـلاكٍ وتصلحـني لي صرت عـاري..علي ثياب بالله وشـلون تفضحـني اخطيت واخطيت كافي عتاب إنطـق بحكمي وريحـني ياصـاحبي ماقطعت أرقـاب عـدلٍ قصـاصي وتذبحني ولاني بعد أجمل الأصـحاب الأجمـل إنـك تسـامحني |
(ترحيبة الحزن والليل )
لما يبعد ... في المساطيف المسافر .. لما يخفيه الضباب .. لما يرحل ... بالأمل وبفرح باكر ... لما ينسا لي عذاب ... هلا ... يا حزن ... هلا بالصاحب الطيب ... ابد ... لو تبعد قريب ... هقيت إنك مع الفرقا ... تبي تنسى حنينك لي ... هقيت انك بعد مليت ... من الماضي عذابك لي ... عسى ما جرحك فرحي ... عسى يا حزن ... أنا لو خنت في جرحي ... وضيعني ... الهنا ليله ... ترى ما في يدي حيله ... هقيت إني لمحت النور ... بيمسح دمعي المبهور .. بمنديله ... سحرني حلو ترتيله ... لما يسري في الفضا .. نجم السهاد ... لما يطفيه السحاب ... لما يملى عمرنا الماضي السواد ... تصبح البسمه ... صواب ... هلا بالليل .. هلا والله .. يا ضاوي لو أضمك لي .. على صدري ... وافني فيك أشواقي .. أماني ...عمري الباقي ... هلا بالليل ... حبيبي كسر الفرحة على صخر الجفا الجاير ... حبيبي حزنه الزاير لياليا ... يحبك ليل ... يقول ازرع ضنى شوق النوى فيا ... وأنا في موعد الشكوى ... أبي شكوى ... أبي دمعة ضنى تسوّى جراح العمر ... هلا بالليل ... يا ضاوي بالحنين المر ... هلا ... والله ... |
(أغنية في العشق والموت)
ضمي مَلامح صورته .. ضميه .. لعله يفيق .. يَشهق .. أو يَردّ النَّفسْ .. ضمّيه لعَله حبس .. صٌوته .. رعشة عرٌوقه .. وخيم حزين الصمت فُوقه .. مات .. مات من قبل ما يكتب له فـ قٌربك حياة .. من لبسه ثوب البياض .. من سبل عيٌونه .. مسح غبرة جبينه .. وش يفيد .. اللي زرع نصلٍ حديد .. في قلبه الطيّب نسى .. قولي عسى .. ما تلمحي .. فـ طرف ثُوبك له دما .. يا خٌوفتي .. اللي سبح في نهرك الجَارف .. غد اموته ظما .. ضمّي ملامح صورته .. ضمّيه لعله يفيق .. يشهق أو يرد النفس .. صوته جرس .. ينحب على بوابة الليل .. يوقظ خدر جرحك .. يتل من عينك احبال الدّمع ضمّيه لعله سمع .. انك تحبينه .. ولا ..قلتي تحبيه .. ولا .. قلتي تحبيه .. |
(الله اقوى)
الله أقوى غدا شوفك سراب كيف أبا أروي حنيني .. بالظما يا ممنى حياتي .. بالسحاب وين غيث المحبه .. ما هما اجدبت بالحشا أرض العذاب واشتكت من تجافيك السما كيف ترضى عليّ .. طول الغياب وانت حبك جرى مجرى الدما يا حبيبي ذوى قلبي وذاب من عذابــه وبيح ما كما وعل عينٍ .. رضت فيك العتاب تشتكي بعد نوره مـ العمَا |
(اقول أحبك )
قالوا حروفي عمي وعيونك بروق مافي قصيدي جنح ليلٍ وبارق قلت الذي له داخل ضلوعي حروق أقرب من اللي في سما الناس شارق غيري يشوفك وأجود الشعر مطروق وأنا أحسـّك وأصدق الحب فارق ياللي عيونك دم وعيونك عروق ولهاث قلبٍ فـي نواعسك غارق أقول أحبك يخرج البحر صندوق تبرالغزاة وكنز سود البيارق وأقول أحبك صدرالايام مشقوق عن وجه غرناطه وعن مهر طارق وأقول أحبك والله إني من الشوق ألقا طيوفك في جميع المفارق كتبت لك قلبٍ من القلب مسروق ولا طاب لي وصفٍ من الوصف سارق |
(الاختيار)
ودي اختار.. الليله درب .. ما تعرفه .. ودي اجلس في مكان .. ما يذكرني بصدفه .. أو وعد .. ودي أحكي يا حبيبي .. مع احد .. غيرك احد .. لجل النهار .. وحريتي .. اعطيني .. لحظة اختيار .. وحدي وغديت أنت الزحام .. وحدي أبد .. وانت الكلام .. نورك وما غيره .. ظلام .. عذب الحروف .. طاغي الطيوف .. أبعد عن عيوني .. بااشوف .. لجل النهار .. وحريتي .. اعطيني .. لحظة اختيار .. ابي درب .. مايوصلني لدارك .. ابي وعد .. ماحتمل فيه انتظارك .. وابي ليل .. مايجي بعده نهارك .. ودي ادري .. هي حياتي .. اختياري .. أو اختيارك .. ودي انسى .. ليله وعدك .. أنسى وعدك .. ماأجيك .. وش يضرك .. لواخونك .. مره واختارك عليك |
( السراب)
قال السراب وقلت ظامي لسرابه قال الهلاك وقلت لعيون الاحباب يا لايمي في حب مترف شبابـه الموت حق ولاتبـرق بالاسبـاب كانه ذبحني صاحبي من عذابـه ماابي لدمي يا هل اللوم طـلاب الجادل اللي فيـه زيـن ومهابـه يفز له قلبٍ .. وتخضع له أرقاب في حجر عينة لي غدير وسحابه وفي وسط قلبي له تناهيت وعتاب إن قلت أحبه يكفي القلـب مابـه وان قلت أنا مابيه ..باصير كذاب |
(اغفر لي الزله )
أبيك في كلمةٍ لو هي خطا تغفـر لي الزله وردتك ظاميٍ وان عز وصـلك بااقطع حبالي أحبك ذا ترى أول كلامي .. وآخره كله ولكن وش يضر اليـوم لو تدري عن احوالي وخذ ما جـاز لك من هالحكـي واللي تبي خلـه انا لا قلت ما في خاطري والله ما بالي ظلال العاشق جروحه ومن ما يتبعه ظله أمانة يا شعاع الشمس لا تغضب من ظلالي وتقـدر تطـوي الدرب البعيد وتقـدر تفـّله ولكن صعب تمنع في الهـوى صبري وترحالي وتقـدر تغمد السيـف الرهيف وتقـدر تسلّه ولكن عـند خلاّق البرية علم الأجالي متى عمرك سمعت بعاشق قد مات من غلّه هذاك الحاسد وراعي الهوى تتلفه الأمالي حبيبي من يعـزك في الهوى ما تقدر تذله ترى قربك يزيدك بالغلا وان عفتني غالي |
(تخيل)
تاقف على اطراف الهدب .. وماشافتك عيني صافحتني ومدري يدك هي لمست ايديني ... سلم .. ابارد السلام .. وهذا ترى كل الكلام .. اللي بقى بينك وبيني ... تخيـّــل ... من وين ... ومنين ومتى ... بالله ذكرني ... بالله ذكرني ... متى جيتك انا فـ ليلة شتا .. تهزني ريح الشمال ... محتاج انا لبسمه وشال ... تركتني لبرد الطريق وانا على بابك .. اتذكر انك قلت لي بالله وش جابك .. ودعتني قبل السلام .. وهذا ترى كل الكلام اللي حصل بينك وبيني ... تخيّــــل ... اليوم لعيوني السما والارض البعيد ... اليوم ولغيرك انا يطري على بالي القصيد ... اشتقت للقلب الخلي .. وش هم .. لو تعتب علىّ .. جيتك انا فـ ليلة ألم .. قلبي على كفي ... همست لي روح ياغريب الشوق مايكفي ... سلم ابارد السلام ... وهذا ترى كل الكلام ... اللي بقى بينك وبيني ... تخيّــــل ... |
(أجمل زمانه)
ما سألته .. إسمه .. عنوانه .. مكانه .. ومرني .. أجمل زمانه .. مر في قلبي وراح .. خطوته مست جراح .. آه .. مديت النظر .. وآه .. جرحني النظر .. وما سألته كيف .. ضيعته خجل .. يا إنت .. خبرني من إنت .. جرحتني وين الدوا .. وين إنت .. انامين انادي .. وليه أنادي .. من أي وادي العطر .. من أي شمس النور .. ولا الشجن من أي شارع .. وما سألته كيف .. ضيعته خجل .. ما سألته ما مداني .. كلها كانت ثواني .. حرف من خوفي قتلته .. وحرف عانقني وعصاني .. بس وقفت فـ مكاني .. آه .. مديت النظر .. وآه .. جرحني النظر .. وما سألته كيف .. ضيعته خجل .. |
(تالي نهار)
تالي نهار وعاتق الشمس مذبوح والوقت لو تدرين للوقت ذباح كن السما صوتً من الذعر مبحوح والليل خيلٍ سود للضي تجتاح وسحايبٍ فوق الشفق كنها قروح على جبينٍ ما شكى كثر ما طاح لاذت عصافير المسا في ذرا الدوح وتنفس سراج الوهن بين الألواح حبيبتي ضاق الفضى وين باروح وان رحت ظلم النفس للنفس ما راح مجروح ماهو هم لو قلت مجروح يالله عسى ما اصير في قلبك جراح تبسمي برقٍ على ثغرك يلوح بشد له مدام في العمر مـرواح غزيت وجه الصبح من غير مصلوح وانكفت دون الشمس هقوات ورماح |
(الخل العنيد)
تل قلبي .. تل طيرٍ على طلعٍ وكيد جود المقرود سبقه وعيا يطلقه يوم فاع اركى جناحه على قاسي الحديد وانكسر ريش النداوي ولا الله وفقه يكفخ القلب المشقي على الخل العنيد ما وفا بالعهد لا شك قلبي صدقه واهني اللي على الحول ينبت له جديد وش سواة اللي جناحين قلبه محرقه يا لطيف الروح وبحق خلاق العبيد اكرم المملوك بالوصل والا فاعتقه |
(سوالف ليل)
سوالف ليل .. بجنب المنقد الغافي .. على حد السهاد .. تحدثنا في تالي ليل .. زرعنا سرنا الخافي .. على شفاه الجمر معنى .. وخفنا الناس تسمعنا .. يا انتي .. لاتوادعنا... في تالي ليل لاتخافي .. بنلقى اللي بقي معنا .. سوالف ليل .. أو حفنة رماد ... |
(الروح الجريحه )
يا عذولي .. وش تفيد به النصيحه لا تعذل القلب .. وجروحه طريّه من يداوي علة الروح الجريحه ومن يسلي دمعة العين الشقيه ان شكيت من الهوى .. قالوا فضيحه وان سكت استنقضوا جرحي عليه وان نويت البعد .. ضاقت بي الفسيحه وان بغيت القرب .. خان القرب فيه من عذلني في الهوى الله يبيحه ومن عذرني .. ما حصل مني خطيه |
(زلة المحبوب)
يا زين .. للعاشقين ذنوب كثير واللي يحب يغفر بالحيل .. طول الزعل عذروب إلى متى الكسر ما يجبر با أخطي .. وأعيد الخطا وأتوب والصاحب .. اللي علي يصبر وإن ما دمح زلتك محبوب ما أظن من يكرهك .. يعذر |
(ربيع الحب )
الله يعين الروح .. كم هي تمنى شوف الحبايب ساعةٍ عقب حرمان والله يجازي اللي بلطفه هدنا وقتٍِ تبدل وأبدل الوصل هجران أقفى ربيع الحب .. وأدهر وطنا وشوك الثرى دسناه في درب الأحزان خاط القدر بسلوك حكمه كفنا وإلى حكم وش ياترى بيد الإنسان حنا ضحايا الياس .. نرجي زمنا ينظر لنا لو يوم لله بإحسان حـــنا ليالــينا بــهـــوانا رمنــا حنا .. جنينا ونرجي الله غفران |
(ذلني الشوق)
ينزع الحر .. للعالي المنيف عادة الحر .. لطام يعاف ذلني الشوق يالقاسي اللطيف ولحظة الوصل .. من صدك تخاف انا قلبي .. جناحٍ له رفيف يتبع الشمس في الريح الصلاف للوعد جيت من لون الخريف وللوعد جيت من طعم الجفاف ومر في ساعتي وقت ونزيف ومر في خاطري حزن وزفاف آه وينك انا مثلك كفيف وليه قمراك تطلع ما تشاف |
(الشفق)
أول اليوم عانقت الشفق وآخر اليوم عانقني شفق وأنا بين التلاقي والفراق أدفن العمر وأحفر لي نفق يا حبيبي وأنا مثلك غريب عن حمى النوم غربني أرق اقطع الليل لديار النهار واغسل الدمع من شط العرق ولا جمعني بك الموعد لمحت ألف نجمٍ توهج .. واحترق أجمل العمر طفلٍ من غلاه قمت أضمه لصدري واختنق وباقي العمر لو عمره يطول ما يجي سطر في ذهن الورق من بقول اللقا غير الوداع بينهم فرق واجد ما صدق أول اليوم عانقت الشفق وآخر اليوم عانقني شفق |
(ذليل الدمع )
أنا لانيب لاشاكي .. ولاعتاب كفاني اشطون هواك اللي نثرته لاتعجب لاأنكسر كاسه ترى ما يذبح العاشق مثل دمعٍ بكته اعيون على موت الأمل واللي يحبه هو سبب ياسه حبيبي ما خبرت الدمع يرقا وجنة المشطون ذليل الدمع .. لابد يتحدر لو رفع راسه بقالي عزتي ياللي على اللي ما سواها تمون وأظنك ما سمعت بعاشقٍ قلبه عصى وداسه أنا الحطاب في قاعٍ جرد ما به شمع وغصون حداه البرد والليل الطويل وشب فاسه |
(ردي علي الصوت )
ردي علي الصوت .. ردي حياتي صمتك على شكوى حنيني .. مذله اما اقطعي حبل الوصل بالنجاتي والا عطيني باقي الود .. كله لا توعديني .. عذب الصبر ذاتي والبعد حالي مع عنا الوجد سله اشكي الجفا لك .. ما شفيتي شكاتي الوعد الأول للقا .. فات حله يرضيك يصبح شملنا للشتاتي يرضيك نرضي كل نفسٍ مغله يرضيك لا فرحوا بهمي عداتي واقفوا يقولون .. الغضي عاف خله ردي علي الصوت .. يكفي السكاتي قولي لغيرك ماهفا القلب للّه |
(ردي سلامي )
حبيبتي... ردي سلامي للهوى .. عذب السلام .. وأغلى الأماني وللأمل .. كلمة ملام .. قولي له إني ما هقيت ... إني الى نحت وشكيت .. ترجع ليالينا سوى شوق وغرام ... سنين .. مرت وما أدري عن الأيام .. يقولوا تفرق الأحباب .. وانا أقول القمر ما غاب .. من أول يوم تواعدنا .. أثاري الوقت يخدعنا .. ويبعد عننا الأحلام .. قولي له إني ما هقيت ... إني الى نحت وشكيت .. ترجع ليالينا سوى شوق وغرام ... حبيبتي يا نظر عيني .. أشوف الليل ما بيني .. وبينك .. وكل الناس .. أحس فـ نظرتك معنى .. ودربٍ كان يجمعنا على الإحساس .. قولي له إني ما هقيت ... إني الى نحت وشكيت .. ترجع ليالينا سوى شوق وغرام ... |
(سوالف رحلتي)
عن حبك رحلت .. ولحبك وصلت .. وهذي سوالف رحلتي .. سافرت .. في كل التراب سافرت .. لديار السحاب وهربت من ليل اللقاء .. وسهر الغياب وأنتي بداية رحلتي وكنتي النهايه .. ودعتك وغصب علي خذتك معايه .. يا طول هالرحله.. لو هي المسافه والزمن يا قصر هالرحله .. سافرت من جرح الشجن يا طولها .. يا قصرها تصوري إني نسيت بس الأكيد إني بكيت لين الدموع تكدست .. أوراق عن حبك رحلت ولحبك وصلت وهذي سوالف رحلتي |
(صوتك يناديني )
تذكٌر .. صوتك يناديني ... تذكر ... تذكر ... تذكر الحلم الصَغير ... وجدار من طين وحصير ... وقمَرا ورا الليل الضرير ... على الغَدير ... لاهَبٌت النسمَة تكسر ... جيتي من النسيان ... ومن كل الزمان ... اللي مَضَى ... واللي تغٌير ... صوتك يناديني تذكٌر ... ناديتي ... خانتني السنين ... اللي مَضت راحت ناديت ... ماكن السنين ... اللي مضت راحت كنا افترقنا البارحة ... البارحة .... صارت عمر ... ليله ... أَبَدْ عيٌت تمرٌ ... ياجمرة الشوق الخَفي ... نسيت أنا وجرحك وفي ... يتذَكر الحلم الصغير ... ريانَة العُود ... نادي ... نادي الليَالي تعُود .. بشوق الهَوى ... بوعُود ... بوجهي اللي ضيعته زَمَان ... في عُيُونك السٌود ... ياالضحكة العَذبة ... عَنك الصٌبر ... كِذبه ... وفيك العُمر موعود ... اشتقت للحلم الصغير ... واشتقت لجدار وحصير ... وقمَرا ورا الليل الضرير ... على الغدير ... ان هبت النسمَة تكسر ... |
(الدواير )
يا رامي المـاء .. بالحـصا.. لأجـل الـدواير.. تكـبر.. لا تـوجـع المـاء .. أكــثر.. هـذي حـدود .. الـمـاء.. يـجـيـبــك الـهــاجــوس .. و يــروح بـك.. يا شــين وش نفع الحكي .. لا روح بـك.. تخـط فالـرمـل البحـر.. وتـرزّ وعـودك .. سـاريه.. وتبـقـى الحـقـيـقــه .. عــاريـه .. ما عـاد في الـسـفـر الا دوايـر .. بيـن الـكـواسـر.. والبـدن .. ماكان لي صـدر.. وما كان لي كـف.. لحـمي تـنتـف .. ناظـر.. عـلى راسـي تحـوم .. عــقـبـان الهـمــوم .. وتـرســم دوايـر .. وقـلّ لـي .. وش اللـي صـايـر.. وكانـك حـبيبـي .. فـسّـر الكـون .. و الا حـبيبـي .. اتـرك الـكـون .. وقـل لي .. من خـذا منـي محـلي .. ليـن ضـاقـت .. فسّـر اشـتاقـت.. تـبينـي .. حـدد اقـدامي .. جـبيني .. و آخـر الجـدب .. العــوايـر .. واتـرك الـمـاء .. لأشـهــب الـمـاء .. و الـدوايــر.. |
(راعي الهوى مسكين )
شعر موج .. وقمر خد .. دفا روح .. وطغى قد .. وراعي الهوى مسكين .. زهى الكحل .. في الحاجر الفتان وسرى الليل .. تو الفجر ما بان وراعي الهوى مسكين كما الشمس .. يجهر سنا نوره ما اقدر أناظر .. والعين مكسوره وراعي الهوى مسكين .. ثغر ورد .. ورده شكت ورده من دونها الشوق .. والرمح والقرده وراعي الهوى مسكين .. |
(سلام )
سلام يا رمشٍ كسى باهي الخد سلام يا ذبح القلوب الخليه انعم من النسمة على خدة الورد وأغلى سلامٍ لو ترده عليه كان الجفا منك حصل لي فلا بد أرضى بعطفك لوه رد التحيه رد السلام ولي تبسم على قد ما توجب ظروف الوفا والحميه وان كان لك قلبٍ غليلٍ على الصد الله حسيبك صد .. أنا اش في يديه والله ما يصبر على خاين الود كود الذي قد خان أمانة خويه |
(السكوت الكلام )
ياحروفنا الملح.. في شفاهنا الحنضل ... كان السكوت أفضل .. ولا الكلام ؟ قلت اللي في قلبي .. وخرج الحكي..من الحكي وما عاد.. اخيامنا طويت ..كافي ندق اوتاد الكلمه .. ماهي انتصار ولا انكسار .. كانت حقيقه .. يوم انقطع حبل الحوار يا حروفنا الحنضل.. في شفاهنا الملح زعلوا حبايبنا..كان السكوت أفضل |
(دمع السحاب)
جهّى مطر دمع السحاب المجاهيم سود العيون اللي انتثر وبلهنه رمح الشمال اللي طعن مهجة الغيم شق السحاب وسالت الشمس منه ساعة غشاني دمعها كنه الديم دب الوجل في المهجة المرجهنه وقمت اتذرى بالصبر والتعازيم بعضي يبوح الخوف وبعضي يكنه ناديتها واللي يغيث المظاليم انك ولا غيرك لقلبي مضنه ان قالوا الحساد داله وانا .. اهيم ما نيب انا ارجي من عدوي محنه قالت تشد .. وقلت بالحيل باقيم ما في الوطن .. وعيون الاحباب منه تبسمت شوقٍ .. بحبٍ .. بتسليم حبيبتي .. والا العدو خاب ظنه |
(دروبي رمل)
في دروبي رمل لامن جيت ساري ينبت الأشواك لامن رحت ساري صاحبي ماجيتك إلا وفي طريقي من ربيع العام نوّار وخباري ولا تواعدنا وبه في الأرض زهره ولا تفارقنا وبه للبرق طاري لا تأخر دام لي في العمر ساعه ولا تقدم لين أشوفك في انتظاري الزمن ورده .. سهرت أحسب ورقها وإن قضا ماجيت في دموعي عـواري حبـّني كثـر اللـذي نلقـى بوعـدنا من ظلال وريح ونجوم وغـداري صاحبي مثل الخجل لو تكتسي بي قبل أصير الشال يذهلني انحساري ياقريب البعد .. للشكوى أسامي الجفـا .. والخوف .. وآخرها حذاري وانت لو خان الزمن بقول وافي لا أنا تركي .. ولا أظنك مشاري |
(سافري )
سافري كان يرضيك السفر جربي لو ورى ليلي صباح بدلي الرمل بأمواج البحر واتبعي الغيم تحملك الرياح سافري لين تبكين المطر واضحكي لين ما يضيق البراح ولا تعبتي وحسيتي بضجر خلي الشوق لديارك جناح أرجعي في ابتساماتك عذر مثل ما الدمع في عيني سماح انتي العين من طول النظر وانتي القلب من كثر الجراح |
(دروب الأرض )
دروب الارض .. توصلنا الاماكن وترجع !! ويكفي هالسفر عذروب بأن الارض ما تقوى الهروب .. دروب وغير الارض وين بتروح تسافر.. كان الصوت يرجع للحناجر .. كان الجرح يرجع للخناجر مثل كل الطيور اللي تهاجر وترجع كل مرة تعب هالبحر لا يجتاز جدران السواحل انا لي سنين راحل حملت الطين كله .. لكل الطين قلي يا انا الى متى وانت على هذا الأنا مصلوب دروب الأرض .. لكن لكن |
(شاعر)
أحبك ..آهـ انا ياليت قلبي .. شعلةٍ من نور كريمٍ مثل شوق النظرة اللي تسكن أهدابك أحبك وش بقى مني حطام العاشق المغرور وما أظن الزمان اللي مضى يرجع من اسبابك ولكن صدقيني الصدق في هذا الزمان شعور يحبك من صدقلك مرةِ ما همه عتابك أمانه لا تصبين العمر في كاسي المكسور يضيع العمر ما يبقى سوى الإبهام وانيابك ابد ما هو قصيده كتبهـا لك شاعرٍ مشهور ٍولا هو وردةٍ يذبل ورقها في داخل كتابك ولا هو بسمةٍ صفرا على شفاة موات بور وملامح صورةٍ تخفينها حتى عن اصحابك الا يا طفلتي ماهو الهوى هالشارع المهجور ولا هو ريحة غبار الوعد في اسفل ثيابك كذب من قال ورد العاطفه ينبت بظل السور وجبان اللي يخاف الناس لو وقف على بابك كتب لك كل مافي الحب من عذب الكلام سطور و لكنه عجز يا طفلتي لا يكتب كتابك |
(السهر والخوف )
نبي .. نطفي قمرنا .. لو يعذبنا السهر .. والخوف .. نبي ننثر قهرنا .. يا حبايبنا .. على مد النظر .. والشوف .. نبي ننزع من أعماق الحشا سكين .. نبي ننزف حنان العاشق المسكين .. ونجرح في سواد العين .. صورنا .. ونبي نطفي قمرنا .. سامحينا يالمحبة .. لو جرحنا وانجرحنا .. س امحينا لو نسينا .. في الهوى ضحكة فرحنا .. وآه يالنصل الحرير .. ياهوى القلب الضرير.. يالجروح اللي مضت .. واللي بتصير .. نبي ننزع من أعماق الحشا سكين .. نبي ننزف حنان العاشق المسكين .. ونجرح في سواد العين .. صورنا .. ونبي نطفي قمرنا .. |
(سيف الغضب )
أفداك أنا كلي .. عودي غصن يابس .. لا تحرقيني اليوم .. حر .. وسموم .. وصيف .. إنتي إجلسي فــ ظلي .. ولا جا الشتاء يمدي لا تجرديني اليوم .. خليني في غمدي .. سيف الغضب ماضي خلي الكلام يموت .. ووقت الغضب ماضي .. لا ترجعيه .. بصوت .. وش كثر أنا راضي حبيبتي عندي .. قولي لي يا بعدي .. يومين ماشفتك .. يومين مالي عيون .. محروقه أجفاني بشموع إحساسي كانت دموعي فوق وجهي وانفاسي .. وظلي على كتفك .. وراسي على زندي .. أفداك أنا والله لاتسمعي رعدي ولا يزعجك برقي .. انا لو شكيت أحلم .. ما به زمن نندم .. ومابه عمر للخوف .. إنتي احفظيني فم .. ولا تحفظيني حروف .. ولو غرقت فــ يم .. لا تعشقي بعدي .. |
| الساعة الآن 03:31 AM |
Powered by vBulletin® Copyright ©2000 - 2025, Jelsoft Enterprises Ltd. TranZ By
Almuhajir
HêĽм √ 3.1 BY: ! ωαнαм ! © 2010
new notificatio by 9adq_ala7sas
جميع حقوق النشر لشعارنا و كتابنا ومسميات الموقع خاصة و محفوظة لدى منتديات قصايد ليل الأدبية